by admin

අප සමඟ එකමුතු වෙන්න

ජාතික ජන බලවේගය

අපගේ මෙහෙවර

අධිරාජ්‍යවාදීන්ගෙන් ලද ඊනියා නිදහසෙන් පසු මේ රට පැවතියාටත් වඩා අගාධයකට, නරාවලකට ඇද දැමූ අසාර්ථක, අසමත්, අවස්ථාවාදී, බඩගෝස්තරවාදී, ශීඝ්‍රයෙන් පාදඩකරණය වූ, මේ රට කාබාසිනියා කරමින් ආණ්ඩු කළ රැවටිලිකාර දේශපාලන කණ්ඩායම්වලින් රට මුදාගෙන, සැබෑ ලෙසින් ජනතාවට වගකියන ජනතා නියෝජිතයින් තනන රට හදන – රට රකින පුළුල්තම ජනතා බලවේගය ගොඩනැගීම.

ජාතික ජන බලවේගය

ජාතික ප්‍රතිපත්තියේ පදනම

අපගේ අනුබද්ධ සංවිධානයක් වන ජාතික විද්වත් සංවිධානය රට පුරා ගොස් විවිධ ජන කොටස් හමු වී කතාබස් කර, ඔවුන්ගේ අවශ්‍යතා හඳුනාගෙන ගොඩනැගූ ජාතික ප්‍රතිපත්ති මාලාව ද පදනම් කර ගනිමින් විවිධ සංවිධාන හා පුද්ගලයන්ගේ වැදගත් යෝජනාද එකතු කර ගනිමින් අපගේ ප්‍රතිපත්ති මාලාව සකස් වී ඇත. එය තවදුරටත් ජනතා අදහස්වලට විවෘතකොට එය සංවර්ධනය කර ඒ තුළින් දිනෙන් දින ඉහළ යන බඩු මිල, දැරිය නොහැකි ණයබර, ආර්ථික හා සමාජයීය පීඩනය, ජාතික අසමගිය යන දුර්විපාකයන්ගෙන් නිදහස්ව අපට අහිමි වෙමින් තිබෙන අපේ බිම, අපේ මුහුද, අපේ වැඩපොළ, අපේ අහස අපට දිනාගෙන සම්පත්වලින් ගහන වූ මේ වාසනාවන්ත රට සැබෑ සෞභාග්‍යය කරා ගෙන යාම අපගේ ප්‍රතිපත්තියේ පදනමයි.

හෙට පිණිස....

වසර හැත්තෑවක අසමත් ආණ්ඩු කිරීම්වලින් හෙම්බත් වී සිටින ශ්‍රී ලාංකික ජනතාව, රැවටිලිකාර දේශපාලක පැළැන්තියෙන් මුදවාගනිමින් ප්‍රගතිශීලී සහ ජනතාවාදී ආණ්ඩුවක් හදන්නට අඩිතාලම දමන අපි….

රට වෙනුවෙන් නව ගමනක් යාමට අපි ආරාධනා කරනවා

ජනාධිපතිවරයා මාර්තු 02වැනි දින පාර්මේන්තුව විසුරුවා හැරීමෙන් පසුව මහ මැතිවරණය අප්‍රේල් 25වැනි දින පැවැත්වීමට නියමිතව තිබූ බව ඔබ දන්නවා. නමුත් මැතිවරණ කොමිෂන් සභාව කොවිඞ් 19 වසංගතය නිසා ජනතාවගේ ආරක්ෂාව වෙනුවෙන් මැතිවරණය කල් තැබීමට පියවර ගත්තා. ඒ අනුව මහ මැතිවරණය අගෝස්තු 05වැනිදා පැවැත්වීමට දින නියම වී තිබෙනවා.
මේ වන විට ජනාධිපතිවරයා ප්‍රමුඛ ආණ්ඩුව ඔබේ අපේක්ෂාවන් විශාල ලෙස බිඳ දමා ඇති බව අමුතුවෙන් කිවයුතු නැහැ. ආයතනවල ප්‍රධානීන් ලෙස දූෂිතයන් වෙනුවට විද්වතුන්, ක්ෂේත්‍රයේ අත්දැකීම් ඇති අය පත්කරනු ඇතැයි ඔබ සිතා සිටියා. එහෙත් ඒ සඳහා පත් කරනු ලැබ ඇත්තේ පැරණි චෝදනා ලැබූවන්මයි. එසේම ඔහුගේ මැතිවරණ වේදිකාවලදී විශාල ආර්ථික සහන ලබා දෙන බව ප්‍රකාශ වුණා. නමුත් ඔබට එම සහන නොලැබුණා පමණක් නොව නව බදු පැනවීම් මගින් භාණ්ඩවල මිල විශාල ලෙස ඉහළ ගොස් තිබෙනවා. අද ඇත්තටම කුස්සියේ රාක්කයේ තිබෙන්නේ බඩු නෙමෙයි, බදු. ඇත්තටම මේ ආර්ථික සහන කප්පාදුව ඇරඹුණේ කොවිඞ් 19 වසංගත තත්වය නිසා නෙමෙයි. ඊට පෙරම ජනවාරි මාසයේම ආණ්ඩුව රජයේ සේවකයින්ගේ විශ්‍රාම වැටුප් වැඩිවීම, වැටුප් වැඩිකිරීම හා දීමනා නතර කෙරුවා.
ජනාධිපතිවරයා, මහින්ද රාජපක්ෂ ආණ්ඩුවේ සිටි පැරණි අය වෙනුවට නව පිරිසක් මැතිවරණයට ඉදිරිපත් කරනු ඇතැයි ඇතැමුන් අපේක්ෂා කළා. තමන් පැරදුණේ දූෂිත ඇමතිවරුන් නිසා කියලා මහින්ද රාජපක්ෂ අගමැතිවරයාම වරක් ප්‍රකාශ කර තිබුණා. නමුත් ඒ සියලු දෙනාම මෙවරත් අපේක්ෂකයින් ලෙස ඉදිරිපත් වී සිටිනවා. එසේම සමහරු පරිසරය ගැන සැලකිලිමත් වුණා. ගල්කිස්ස වෙරළ සිදුවීම, විල්පත්තු නව ගැසට්පත් නිකුත් කිරීම, එහි රක්ෂිත ප්‍රදේශවල කෝමාරිකා වැවීමට ඉඩදීම, අලි මංකඩවල් වසා දමමින් අඹ වැවීමට යාම, වැලි හා පස් ජාවාරමට ඉඩදීම ආදී පරිසර විරෝධී ක්‍රියාමාර්ග හේතුවෙන් ඔවුන්ද කලකිරී සිටිනවා.
එසේම තවත් කණ්ඩායමක් ජනතාවගේ බලාපොරොත්තු කඩ කළා. පසුගිය ජනාධිපතිවරණයෙන් පසුව එක්සත් ජාතික පක්ෂයේ ගම් මට්ටමේ ඇතැමෙකුට රැකියා අහිමි වුණා. තවත් අය විවිධ පීඩාවන්ට ලක්වුණා. නමුත් එජාප නායකත්වය තමන්ගේ පාක්ෂිකයන්ගේ ගැටලුවලට මැදිහත් වුණේ නැහැ. ඔවුන්ට ප්‍රධාන වුණේ නායකත්ව ගැටුමයි. සිරිකොත අල්ලා ගැනීම, වෘත්තීය සමිතියේ බලය අල්ලා ගැනීම ආදිය ඔවුන්ට ප්‍රමුඛ වුණා. අවම වශයෙන් තමන් වෙනුවෙන් වැඩ කිරීම නිසා පීඩාවට පත්වූවන් වෙනුවෙන් මැදිහත් වෙන්න ඔවුන් අසමත් වුණා. දැන් ආණ්ඩුව 2/3 ගැන කථාවක් නැහැ. 2010 දී වත් ආණ්ඩුවට 2/3ක් ගන්න බැරිවුණා. එවර එය ලබා ගත්තේ එජාපයේ 20ක් පමණ වරප්‍රසාද දී ආණ්ඩුවට අරගෙනයි. මෙවරත් ආණ්ඩුව උත්සාහ කරන්නේ එම කණ්ඩායම්වලින් පිරිසක් එකතුකර ගැනීමටයි. ඒ නිසා වරප්‍රසාද වෙනුවෙන්, මුදල් වෙනුවෙන් ප්‍රතිපත්ති මාරු කරන පිරිස් පාර්ලිමේන්තුවට යැවීමෙන් තේරුමක් නැහැ.
ජාතික ජන බලවේගය ඔබේ හඬ පාර්ලිමේන්තුව තුළ සැබෑ ලෙසම නියෝජනය කිරීමට සූදානම්. අපි රට පුරාම ශක්තිමත්, ප්‍රතිපත්තිගරුක කණ්ඩායමක් ඉදිරිපත් කර තිබෙනවා. රට ගොඩනැගීම සඳහා දියුණු ජාතික වැඩපිළිවෙළක් අප සතුයි. දැනට ඔබ අතර ඇත්තේ පවතින පාර්ලිමේන්තුව මිරිස් කුඩු ගහන, වතුර බෝතල් හළන, පිහි රැගෙන එන, අසභ්‍ය වචන කියන අශිෂ්ට තැනක් බවට වන අදහසකුයි. අපි ඒ වෙනුවට පාර්ලිමේන්තුවට ශිෂ්ටත්වය රැගෙන එන කණ්ඩායමක් ඉදිරිපත් කර තිබෙනවා. පසුගිය පාර්ලිමේන්තුවේ ජනතා විමුක්ති පෙරමුණේ අප මන්ත්‍රීවරුන් හයදෙනාගේ හැසිරීම පිළිබඳව කිසිවෙකුටවත් විවේචනයක් නැහැ. එසේම පාර්ලිමේන්තුව අපරාධකරුවන්, මත්පැන් නිෂ්පාදකයින්, ප්‍රධාන සහල් ජාවාරම්කාරයින්, ප්‍රධාන වැලි පස් කපන්නන්, බාර් අයිතිකරුවන්ගෙන් පිරී තිබුණා. එය ශුද්ධ කළ යුතුව තිබෙනවා. අපි ශිෂ්ටසම්පන්න හොඳ මිනිසුන් ජාතික ජන බලවේගය ලෙස මැතිවරණයට ඉදිරිපත් කර තිබෙනවා. පාර්ලිමේන්තුව ඔවුන්ගෙන් පිරවීමට ඔබට අවස්ථාව ලැබී තිබෙනවා.
ගවගාලක් ලෙස ඔබගේ හෙළාදැකීමට ලක්වූ පාර්ලිමේන්තුව ශුද්ධ කළ හැක්කේ ඔබටම පමණයි. ගෝඨාභය ජනාධිපතිවරයා බලයට පත්කිරීමට සහය දී බලාපොරොත්තු බිඳවැටුණු ඔබටත් එජාපයට ඡන්දය දී බලාපොරොත්තු බිඳවැටුණු ඔබටත් තෝරාගැනීමට ඇත්තේ ජාතික ජන බලවේගය පමණයි. රට ගොඩනැගීම සඳහා අවංක වුවමනාවක් ඇති සිංහල, දෙමළ, මුස්ලිම් ඔබ සියලුදෙනාට ජාතික ජන බලවේගය සමග රට වෙනුවෙන් නව ගමනක් යාමට අපි ආරාධනා කරනවා.

හෙට පිණිස

ජාතික ජන බලවේගයේ අපි