Home News Sinhala ආණ්ඩුවට සෘජු ප්‍රතිපත්තින් නොමැතිකම කොවිඩ් මරණ වැඩිවීමට හේතුවයි..!

ආණ්ඩුවට සෘජු ප්‍රතිපත්තින් නොමැතිකම කොවිඩ් මරණ වැඩිවීමට හේතුවයි..!

by Ravinath Wijesekara

විකල්ප කල්පනා

රටේ ආර්ථිකය පවත්වාගැනීම සහ කොවිඞ් වසංගතය පාලනය කිරීමේ උපාය මාර්ගයක් ලෙස රට අගුලු දැමීම හෙවත් “ලොක්ඩවුන්” කිරීම පිළිබඳ විවාදයක් ඇත. මෙහි දි වසංගත රෝග හා ප්‍රජා සෞඛ්‍ය විශේෂඥයින් මෙන්ම ක්ෂද්‍ර ජීව විද්‍යාඥයින්, 100%ක්ම පාහේ රට අගුලු දැමීමට එකඟ ය. දෑත් සේදීම, දුරස්ථභාවය තබාගැනීම වැනි පුද්ගල සාධක මත පමණක් විශ්වාසය තැබීම තවදුරටත් ප්‍රමාණවත් නැත. මොවුන් සියලුම දෙනා කියන්නේ එකම දෙයකි. පාලනයෙන් ගිලහී ඇති කොරෝනා වසංගතය පාලනයට නතුකර ගැනීම සඳහා පූර්ණ අගුලු දැමීමක් අවශ්‍ය ය. එසේ නොවන්නේ නම් කොරෝනාවලින් මිය යන සංඛ්‍යාවට අමතරව රාජ්‍යයේ ලිහිල් ප්‍රතිපත්තිය නිසා ඒ හා සමාන පිරිසක් මියයෑමට නියමිත ය. එවා සාවද්‍ය මනුෂ්‍ය ඝාතන ලෙස ද සැළකීමට පුළුවන. ලෝකයේ පහෙන් එකක ජනගහනයක් මෙන් ම ඉතාමත් දියුණු සෞඛ්‍ය උපකරණ වලින් සමන්විත එක්සත් ජනපදයට වඩා දියුණු බවින් ඉතා අඩු වියට්නාමය, තායිලන්තය තායිවානය පවා ආරම්භයේදී ම වසංගතය පාලනය කරගැනීමට සමත් විය. ජනාධිපති බයිඩන් යටතේ යම් සාර්ථකත්වයක් පෙන්වා ඇති නමුත් විශේෂයෙන්ම ඩොනල්ඞ් ට්‍රම්ප්ගේ වැරදි ප්‍රතිපත්තිය එක්සත් ජනපදයේ මේ අසමත්කමට තදින් බලපෑවේ ය. කොරෝනා වසංගතයේ ව්‍යාප්තිය හා පාලනය කෙරෙහි ඒ සම්බන්ධ රාජ්‍ය ප්‍රතිපත්තිය සෘජු ලෙස බලපාන බව පෙනේග ඒ අනුව ශ්‍රි ලංකාවේ කොවිඞ් වසංගතයේ ශීඝ්‍ර ව්‍යාප්තිය කෙරෙහි, ඒ සම්බන්ධයෙන් වූ රාජ්‍ය ප්‍රතිපත්තිය සෘජු ලෙස බලපා ඇති බව සක්සුදක් සේ පැහැදිළි ය.

පූර්ණ අගුලු දැමිමක දී පවුල් අතර එක්වීම, භාණ්ඩ ලබාගැනීමට වෙළඳ පොලට එක් රොක්වීම, පන්සල් හා පල්ලි යෑම, ආපන ශාලාවලට ගොස් එකට ආහාර ගැනීම, රැකියා ස්ථාන හා ඇඟලුම් කර්මාන්ත ශාලාවලට සේවකයින් ගාල්කිරීම, සම්භාහන මධ්‍යස්ථාන විවෘතව තැබීම ඇතුලු ජනතාව එකට සම්බන්ධවීම උපරිම මට්ටමෙන් නතර කිරීම අවශ්‍ය කෙරේ. වියදම් සහගත විය හැකි නමුත්, මුහුණදීමට සිදුවි ඇති, ආරක්ෂා සහිත හදිසි තත්වයක් වන මෙහිදී සමාජ දුරස්ථභාවය තබා ගැනීම රෝගය පාලනය කිරීම සඳහා ගත යුතු අත්‍යවශ්‍ය ප්‍රතිපත්තිමය තීරණයකි. කෙසේ නමුත්, මේ අගුලු දැමීම රටේ ආර්ථිකයට අහිතකර ලෙස බලපාන බව අමුතුවෙන් කිවයුතු නොවේ. මූලික වශයෙන් රට අගුලු දැමීම වෙළඳාමට මෙන්ම නිෂ්පාදනයට හානිකර ය. එ මගින් ධනය ඇති නිෂ්පාදකයාගේ හා ව්‍යාපාරිකයාගේ පමණක් නොව සේවකයාගේ ද ආදායම් ඇනහිටීම තර්කානුකූල ය. එය එසේ වූවත් අගුලු දැමීම සෞඛ්‍ය පැත්තෙන් වසංගතය පාලනය කිරීමේ අත්‍යවශ්‍ය අංගයක වී ඇත්නම් එය අත්‍යවශ්‍යයෙන්ම නිවැරදි ලෙස කළ යුතු වේ. නමුත් ආදායම් අහිමිවන්නන්ට මෙහිදි කිසියම් උපකාරයක් කළ යුතු ය. මෙහි දී ජීවත්විම සඳහා ආදායම් අහිමිවන අය රැක බලා ගැනීමට ආදායම් ලබන අයට සිදු වේ. ඊළග ප්‍රශ්නය වන්නේ එය කරන්නේ කෙසේ ද යන්න ය.

පිලිතුර ඉතා සරළ ය. ඒ සඳහා ප්‍රථමයෙන්ම යා යුත්තේ රටේ ධනය සමුච්චනය වන හෙවත් ඒකරාශිවන තැනට ය. මානව ඉතිහාසයේ වසර දහස් ගණනක සිට මෙවන් ව්‍යසනයන්ට මානව වර්ගයා මුහුණ දී තිබේ. වසංගත රෝග වලට අමතරව ඉඩෝරය, ජලගැලීම්, වැනි නොයෙකුත් ස්වාභාවික විපත් ඒ අතර වේ. ඓතිහාසික වශයෙන් පැවති ඒ ඒ සමාජ ක්‍රමය තුළ ආපදාවක දි ප්‍රයෝජනයට ගැනීම සඳහා මානවයා නිෂ්පාදනයෙන් කොටසක් සුරක්ෂිතව තබාගත් බව අපි දනිමු. ඒ අතිරික්ත සමුච්චය පිරිමැස්මෙන් යුතුව ව්‍යසනය අවසන් වන තෙක් බෙදාහදා ගෙන සමාජය විසින්ම සමාජය නඩත්තු කර ගෙන තිබේ. දියුණු යැයි කියන මෙම යුගයේ නිසැක ලෙසම අප ද එම ක්‍රමය අනුගමනය කළ යුතු ය. එක් තැනකට, නැති නම් තැන් කිහිපයකට එක් රැස්වී ඇති එම ධනය, අසරණ වූ අය තෝරා ගෙන බෙදා දී සමාජය ආරක්ෂා කරගත යුතු ය. එවිට රට අගුලු දැමීම ප්‍රශ්නයක් වන්නේ නැත. චීනය, කියුබාව, වියට්නාමය පමණක් නොව නිව්සිලන්තය, දකුණු කොරියාව හා තායිවානය වැනි රටවල පවා පෙර කියන ලද විශේෂඥ උපදෙස් අනුව සැබෑ ලෙස රට අගුලු දමා නැතිබැරි අයට සහන ලබා දී කොරෝනා වසංගතය පාලනයට නතුකර තිබේ.

මෙහි ප්‍රතිවිරුද්ධ පැත්ත කූමක් ද? ප්‍රාග්ධනය සමුච්චනය හෙවත් එක් තැනකට හෝ සීමිත තැන් කිහිපයකට ඒකරාශී වන ධනය සාධාරණව, අවශ්‍යතාවය අනුව නැවත බෙදා හැරෙන්නේ නැත. ඇතැම් විශාල සමාගම්වල, විශාල වශයෙන් ඒකරාශී වු ධනයක් තිබේ, අපේ රට ගතහොත් ඒ ආකාරයට විශාල වශයෙන් ධනය ඒකරාශිවන සමාගම් 30කට වඩා තිබේ. එයට අමතරව යහමින් මුදල ඒකරාශිවන බැංකු පද්ධතියට අමතරව පුද්ගලික ව්‍යාපාර ද ඇත. බොහෝ විට සමාජයේ පහළම ස්ථරයට එවැනි ඉතිරියක් නැති අතර එයින් ඉහළ ස්ථරයේ සිටින අයගේ ගිණුම්වල ද රුපියල් දෙතුන් දහකට වඩා වැඩි මුදලක් නැත. මෙවැනි හදිසි අවස්ථාවක රාජ්‍ය මැදිහත්වී බද්දක් පනවා තිබෙන තැනින් ගෙන නැති බැරි කොටසට සහනයක් සලසා දිය යුතු වේ. එවිට වසංගතය පාලනයට නතු කර ගැනීමට අවශ්‍ය සැබෑ අගුලු දැමීමක් කිසිසේත්ම ප්‍රශ්නයක් විය නොහැකි ය. එසේ නොමැතිව ආර්ථිකය පවත්වා ගැනීමට වැඩකරන ජනතාව සේවා ස්ථානවලට ගාල් කරන්නේ නම් වෛරසය හේතුවෙන් මියැදෙන සංඛ්‍යවට වඩා රජයේ ප්‍රතිපත්තිය නිසා මියැදෙන සංඛ්‍යාව තවත් ඉහළ යනු ඇත.

ජාතික ජන බලවේගය

You may also like

Leave a Comment