Home News Sinhala “ආර්ථික සාධාරණය සහ යුක්තිය සමග ප්‍රජාතන්ත්‍රවාදයේ හරය නැවත ගෙන ඒමට සූදානම්”

“ආර්ථික සාධාරණය සහ යුක්තිය සමග ප්‍රජාතන්ත්‍රවාදයේ හරය නැවත ගෙන ඒමට සූදානම්”

by Ravinath Wijesekara

පේරාදෙණිය විශ්වවිද්‍යාලයේ සිංහල අධ්‍යයන අංශයේ මහාචාර්ය ලියනගේ අමරකීර්ති


“මේ සහෝදර සහෝදරියන් පිරිස සමඟ මේ වේදිකාවේ සිට අපේ රට ඉදිරියේ වාඩිවී සිටින්නේ ජාතික ජන බලවේගය විදිහට මේ රට සමස්තයක් විදිහට භාරගෙන, රට වැටී තිබෙන අගාධයෙන් ගොඩගන්න සූදානම්, ඒ සඳහා අවශ්‍ය කරන බුද්ධිමය, ඥානමය, සංස්කෘතික සම්පත් අප සතුව තිබෙනවා කියන එක අවධාරණය කරන්න. අපේ මේ පණිවුඩය දෙස සාවධානව බලන්න කියලා ආරාධනා කරනවා. මේ රට පරිවර්තනය කරන්න අවශ්‍ය ජන නැඟිටීම් හැම ක්ෂේත්‍රයකම ඇතිවී තිබෙනවා. එවැනි ස්වාභාවික පරිසරයක් සකස් වෙනකොට ඒ පරිවර්තනයට නායකත්වය දෙන්න අවශ්‍ය සබුද්ධික පිරිසක් අවශ්‍යයි. ඉතිහාසය ගොඩනඟන්න ඒ හැකියාව මේ මොහොතේ තිබෙන්නේ ජාතික ජන බලවේගය තුළ බව අපි නොපැකිළවම කියන්න සූදානම්. 

අපි ගෙවමින් ඉන්නේ වසංගත සමයක්. වසංගතය එන්න කලිනුත් තිබුණු සටන් පාඨයක් යළි යළිත් කියමින් තිබෙනවා. සියලුදෙනා එකතුවීම, ප්‍රජාතන්ත්‍රවාදය පිළිබඳ සටන් පාඨයක්. නිසි කලට මැතිවරණ පැවැත්වීම, සාධාරණ මැතිවරණ පැවැත්වීම, මැතිවරණ ප්‍රචාරණයේදී හැමදෙනාටම සාධාරණ අවස්ථා ලබාදීම ආදී දේවල්. ඒවා වැදගත් තමයි. නමුත් මේ වසංගතය අපට උගන්වා තිබෙන්නේ අපේ රටේ ප්‍රජාතන්ත්‍රවාදය ඊට වඩා ගැඹුරු ලෙස අගාධයට ගොස් තිබෙන බව. මැතිවරණ නිරීක්ෂකයන් යෙදීමෙන් පමණක් ගොඩගත නොහැකි මට්ටමට ප්‍රජාතන්ත්‍රවාදයේ හරය ඛාදනය වෙලා. ප්‍රජාතන්ත්‍රවාදය වැදගත් අතරම ඊට වඩා ආර්ථික ප්‍රජාතන්ත්‍රවාදය වැදගත් බව ජාතික ජන බලවේගයේ අපි අවධාරණය කරනවා. නව ලිබරල් ධනවාදයේ මූලික කාර්යභාරය විදේශීය රටක හෝ ආයතනයකට මූල්‍යමය ආධාර තුළින් පවතින ධනවාදී ක්‍රමය ප්‍රසාරණය කිරීමයි. ඒ ආර්ථික වර්ධනය ඒකපෞද්ගලික දළ ජාතික නිෂ්පාදිතයෙන් මනිනවා. 

මේ වසංගතයෙන් අපට පෙන්වාදී තිබෙන්නේ එයින් නොපෙනෙන හිස්තැන් ගණනාවක්, පරතර ගණනාවක් තිබෙන බවයි. සිග්නල් නැතිව ගස් උඩ නඟින දරුවෝ දකින්න ලැබෙන්නේ ඒ නිසා. පාසල්වල ඉගැන්වීමේ කටයුතුවලට ග්‍රාමීය දරුවන්ගේ සහභාගිත්වය ඉතාම අඩුයි. ඒ තමයි අර පරතරය. යුක්තිය, සාධාරණත්වය නැතිකමේ ප්‍රශ්නය ඒක. ජාතික ජන බලවේගයේ අපි ආර්ථික සාධාරණය සහ යුක්තිය සමඟ ප්‍රජාතන්ත්‍රවාදයේ හරය නැවත ගෙන ඒමට සූදානම්. ඒ සඳහා අවශ්‍ය කරන සම්පත් අපි ළඟ තිබෙනවා. මේ රටේ සමහර දේශපාලන ප්‍රභූ පවුල්වල අයට ජාත්‍යන්තර ගනුදෙනු කරන්න පුළුවන් බවට මතයක් පළකරමින් යනවා. 21 වැනි සියවසේ ජාත්‍යන්තර දේශපාලන හා ආර්ථික ගනුදෙනු සඳහා සහභාගි විය හැකි බුද්ධිමය සම්පත් සියල්ල ජාතික ජන බලවේගය සතුව තිබෙන බව අවධාරණය කරන්න කැමැතියි. තනි පවුලකට හෝ පරම්පරාවකට හෝ අපි ණයගැති වෙන්න අවශ්‍ය නැහැ. දැනුම උගත්කම තිබෙන මානව සම්පතක් අපි සතුව තිබෙනවා.

අපි ආර්ථිකය දිහා බලන්නේ හුදෙක් දත්ත දිහා පමණක් නොවෙයි. අපේ දරුවන් සැප පහසුකම් සහිත ජීවිතයක් ගතකරනවා දකින්න අපි ආසයි. හැබැයි ඒ තුළ එකිනෙකා කෙරෙහි දයාවෙන්, එකිනෙකා කෙරෙහි වගකීමෙන්, ආදරයෙන් උණුසුම් මනුෂ්‍යත්වයෙන් පිරි සම්බන්ධතා සහිත සමාජයක් ගොඩනැඟෙනවා දකින්න අපි ආසයි. එවැනි මනුෂ්‍යයන් ගොඩනැඟීමට අවශ්‍ය සංස්කෘතික සහ කලාත්මක සම්පත්, ඒ සඳහා අවශ්‍ය බුද්ධිමතුන් අපි සතුව සිටිනවා. මේ රටේ ආර්ථිකය ගොඩනැඟීමේ හැකියාව අපට තිබෙනවා විතරක් නොවෙයි, මනුෂ්‍යමය පරිවර්තනය කිරීමේ දීර්ඝකාලීන සම්පත් පවා අප සතුව තිබෙනවා. අපි වගේ විශ්වවිද්‍යාල ආචාර්යවරු, කලාකරුවෝ, ජාතික ජන බලවේගය වටා එකතු වෙලා ඉන්නේ දවසකින් දෙකකින් මේක අත්හැර යන්න නොවෙයි. මේ රට පරිවර්තනයක් වෙනවා දකින්න. ඒ වෙනුවෙන් සංවාදයට අපි ඔබ සියලුදෙනාටම ආරාධනා කරනවා.”

වීඩියෝ https://www.facebook.com/nppsrilanka/posts/925719541341904

You may also like

Leave a Comment