Home News Sinhala මාධ්‍ය නිවේදනය – ජන නියමු කලාකරුවෝ

මාධ්‍ය නිවේදනය – ජන නියමු කලාකරුවෝ

by Ravinath Wijesekara

පුරවැසියනි දෙමව්පියනි,

ගුරු-විදුහල්පති අරගලයට උපරිම සහාය දෙන්න

ශ්‍රී ලංකාවේ මේ වන විට ක්‍රියාත්මක වන ගුරු සහ විදුහල්පති අරගලය  ඉතාම තීව්‍ර ස්ථානයකට පත් ව ඇත. 1997 සිට 2021 දක්වා වසර 24ක වැටුප් විෂමතා ඉතිහාසය පදනම් වූ අතිශය සාධාරණ අරගලයක් ලෙස මෙය හැඳින්විය හැකිය. ගුරු භුමිකාවේ හරය  පිලිබඳ ව හෝ එහි වැදගත්කම මෙන් ම සමාජීය වශයෙන් හිමි බලවත් බව ද පිලිබඳ ව අමුතු රචනා ලිවීමට අවශ්‍ය නැත. රටක තෘප්තිමත් ගුරුපරපුරක් සිටීම දරුවන්ගේ අධ්‍යාපනයේ සාර්ථකත්වය තීරණය වන බලවත් සාධකයක. ලොව බොහෝ දියුණු රටවල ගුරු වෘත්තියට හිමි වැටුප් තලය ඇතැම් විට දේශපාලනඥයන්ගේ, විනිසුරන්ගේ  හෝ ඉංජිනේරුවන්ගේ වැටුපට වඩා ඉහලින් තැබූ අවස්ථා ද සිහි කළ හැකිය. ශිෂ්ටාචාරාමය අගයකින් යුතු ගුරුවරයාගේ භූමිකාව වැටුපක ඉලක්කම්වලට ලඝු කළ නොහැකිය. සත්‍යයට අවනත ව කල්පනා කළහොත් ලංකාවේ ගුරු වැටුප පවතින්නේ ඉතා ම දරිද්‍ර තැනකය. එය අවිවාදිත සත්‍යයකි. මෙම අරගලය මගින් ඔවුන් ඉල්ලන්නේ වැඩි වැටුප් නොව රජය මගින්ම පත්කළ උසස් කොමිසමක් මගින් නිර්දේශ කළ හිමි වැටුප ය. නොගෙවා පැහැර හැරි වැටුපය. ශ්‍රී ලංකාවේ දෙමාපියන් හා සියලු පුරවැසියන්ගෙන් අප නිශ්චිත ලෙස ඉල්ලා සිටින්නේ තම දරුවාගේ ආදරණීය ගුරුවරයා හුදෙකලා නොකරන ලෙස ය. මේ වන විට අරගලය නිසා අඩාළ වී ඇති අධ්‍යාපන ගැටලුව විසඳන ලෙස ආණ්ඩුවට බල කරන ලෙසය. ඔබ හා ගුරුවරයා අතර විරසකයක්, අනවබෝධයක් මවා නොමග යැවීමට කරන ජනමාධ්‍ය උපායන්ට මුලා නොවන ලෙසය. සත්‍ය ලෙසම මෙය අප රටේ පුරවැසියාගේ ප්‍රශ්නයකි. ඔබ මේ අරගලය හා එක්ව එය ආරක්ෂා කරමින් ඉතාම ප්‍රබුද්ධ ලෙස කටයුතු කළ යුතු බව අපගේ වැටහීමයි. 

දශක ගණනාවක් මෙරට කර වූ ආණ්ඩු අප රට තීව්‍ර අගාධයකට යොමුකර ඇත. රටේ ඉරණම පවුල් කීපයක් අතට  සහ අසාධාරණ ලෙස හදිසි ධන කුවේරයන් වූ කිහිපදෙනෙක් අතට පවරා ඇත. අතිවිශාල ඇමති මණ්ඩලයක් නිසා ජනිත වූ අතාර්කික වියදම්, බලය හා සුඛය උදෙසා දිනපතා කරන ධන නාශන, ඉතාම සරල ලෙස ද විවෘත ලෙස ද කරන මහා පරිමාන බදු වංචා සහ ගජමිතුරු සත්කාර නිසා අහිමි වන රාජ්‍ය ආදායම වැනි කරුණු කිහිපයක් කළමනාකරණයෙන් පමණක් වුව ද ගුරු ගැටලුව විසඳීමට අවශ්‍ය  ප්‍රතිපාදන සොයාගත හැකිය.

දුෂ්කර ම මොහොතක ඔබේ දරුවාගේ ආදරණීය ගුරුභවතා ඔබේ මැදිහත්වීම ඉල්ලා සිටියි. එය කළ හැක්කේ ඔබේ ජීවිත කොල්ල කා ඇති මේ රෙජීමයට මුලා නොවීමෙනි. ගුරුවරයා තනි නොකිරීමෙනි. ගුරුවරුන්ගේ අරගලයට ඔබේ සහාය ලබාදීමෙනි. ජනනියමු කලාකරුවන් වන අපි එය ඔබෙන් ඉල්ලා සිටිමු. ගුරු අරගලයට ජය පතමු.

ජනනියමු මෙහෙයුම් කමිටුව වෙනුවෙන්

  • සාහිත්‍යවේදී ජයතිලක කම්මැල්ලවීර
  • රංගන ශිල්පී චන්ද්‍රසෝම බිංදුහේවා       
  • සාහිත්‍යවේදී කමල් පෙරේරා
  • රංගන ශිල්පිනී දීපානි සිල්වා
  • සාහිත්‍යවේදී කීර්ති වැලිසරගේ
  • මහාචාර්ය හිනිදුම සුනිල් සෙනෙවි

You may also like

Leave a Comment