Home News Sinhala සරත් වීරසේකර ඇමතිවරයා යුද උන්මාදයෙන් පෙළෙන ප්‍රකාශ ගණනාවක්ම කළා…

සරත් වීරසේකර ඇමතිවරයා යුද උන්මාදයෙන් පෙළෙන ප්‍රකාශ ගණනාවක්ම කළා…

by Ravinath Wijesekara

“රටේ ජනතාව තමන්ගේ ස්වාධීන දේශපාලන අදහස් දැක්වීම් සහ උද්ඝෝෂණය කිරීමේ අයිතිය ගෝඨාභය රාජපක්‍ෂ ජනාධිපතිවරයාගෙන් ගත්ත දෙයක් නෙවෙයි. ව්‍යවස්ථාවෙන් ලබාදී තිබෙන අයිතියක්. මේ අයිතිය ශ්‍රේෂ්ඨාධිකරණයේ නඩු තීන්දු රාශියකින් තහවුරු කර තිබෙනවා. පොහොට්ටුවේ අයත් විපක්‍ෂයේ සිටිය කාලයේ බුක්ති විඳි අයිතියක්. විශේෂයෙන්ම ගුරු සංගම් නායකයින් තලේබාන් නායකයන් වගේ පෙන්වන්න හදනවා. නමුත් පොලිස් ඇමති ක්‍රියා කරන්නේ පොලීසියෙන් වැරැද්දක් කළොත් ඔහු මැදිහත් වී බේරා ගන්න බවයි. කොළඹ වරායේ ජැටිය විකිණීමට විරුද්ධව උද්ඝෝෂණය කරන අය, තෙල් සංස්ථාවේ අයිතිය රැකගන්න උද්ඝෝෂණය කරන අය මාතෘභූමියේ සම්පත් ආරක්‍ෂා කරගන්න ක්‍රියා කරනවා. ඒ අයට විරුද්ධව පොලීසිය යොදවන බව සරත් වීරසේකර ඇමතිවරයා ප්‍රකාශ කරනවා. ආණ්ඩුවේ ප්‍රධානීන් තුවක්කුවෙන් වෙඩි තියන්න කලින් වචනවලින් වෙඩි තියනවා. ඊට පස්සේ තමයි තුවක්කුව ගේන්නේ. මේ වෙනුවෙන් සරත් වීරසේකර ඇමතිවරයා යුද උන්මාදයෙන් පෙළෙන විවිධ ප්‍රකාශ සිදුකරමින් ඉන්නවා.”

GSP+ සහ හදිසි නීතිය ඉවත් කිරීම

“මේ වනවිට ප්‍රජාතන්ත්‍රවිරෝධී තත්වයක් ආණ්ඩුවෙන් ගොඩනගාගෙන යනවා. ඒ වෙනුවෙන් ප්‍රභාකරන් කෙනෙක් සහරාන් කෙනෙක්, ඕනෑ වෙලා තිබෙනවා. ඊට විරුද්ධව අනෙක් පැත්තෙන් සිරිල් මැතිව් කෙනෙක් ඕනෑ කරලා තියෙනවා. මේ නිසා අපි ආණ්ඩුවට අවධාරණය කරන්නේ සිරිල් මැතිව්ගේ භූමිකාවලින් මේ රට ජයග්‍රහණය කළේ නැති බවයි. ජාතිවාදයටත්, ආගම්වාදයට විරුද්ධව මත දක්වන අයව හංවඩු ගැසීමට මේ අය ක්‍රියා කරමින් ඉන්නවා. ඒ අතරේ හදිසි නීතිය පනවා අත්‍යවශ්‍ය භාණ්ඩ මිල පාලනය කරන බව කීවා. නමුත් හදිසි නීතියෙන් හාල් මිල අඩු කළේ නැහැ. ඔවුන්ගේ අසාර්ථක ක්‍රියාකාරිත්වය පවතින අතර යුරෝපා සංගමයේ ජී.එස්.පී. ප්ලස් සහනය ලබාදීම සම්බන්ධයෙන් විමර්ශනය කරන්න කණ්ඩායමක් ලංකාවට ආවා. ඒ නිසාම හදිසි නීතිය දීර්ඝ කිරීමේ යෝජනාව පාර්ලිමේන්තුවට දැම්මේ නැහැ. ඒ අතර ජී.එල්. පීරිස් ඇමතිවරයා පාර්ලිමේන්තුවේදී ඉංග්‍රීසි භාෂාවෙන් යුරෝපා සංගමයට අවශ්‍ය කරන මත ප්‍රකාශ කරනවා. නමුත් ඒ අතරේ සරත් වීරසේකර ඇමතිවරයා සිංහල භාෂාවෙන් උද්ඝෝෂකයන්ට වෙඩි තියන්න කතා කරනවා. නමුත් ලංකාවේ සියලුම තානාපති කාර්යාලවල සිංහලෙන් සහ දෙමළෙන් වැඩ කරන බව ජී.එල්. පීරිස් ඇමතිවරයා දන්නවා. යුරෝපා සංගමයෙන් ලබාදෙන බදු සහන ලබාගැනීමට ආණ්ඩුව උත්සාහ කළත් ඔවුන්ගේ ඇත්ත වුවමනාව තියෙන්නේ ජාතිවාදය හා ආගම්වාදය ඉදිරියට ගැනීමයි. මේ වනවිට ලංකාවේ සිංහල, දෙමළ, මුස්ලිම් සියලුම ජනතාවට සිදුවී තිබෙන්නේ තමන්ගේ සාධාරණ අයිතිවාසිකම් ලබාගැනීමට ජාත්‍යන්තරයට යන්නයි. මේ නිසා අපේ රටට අත පොවන්න විදේශීය රටවලට ඉබේම පාර කැපෙනවා.”

නිරූපමා රාජපක්‍ෂට විරුද්ධව ජනාධිපතිවරයා ගන්නා ක්‍රියාමාර්ගය මොකක්ද?

“මේ වනවිට ආණ්ඩුව ජාතික ජන බලවේගයේ ප්‍රසිද්ධ ක්‍රියාකාරිකයන්ගේ ඥාතීන්ගේ ගෙවල්වලට පවා සී.අයි.ඩී කණ්ඩායම් යවමින් තිබෙනවා. ඒ වගේම අභූත චෝදනා එල්ල කරමින් තිබෙනවා. පෙරටුගාමී සමාජවාදී පක්‍ෂයේ නියෝජිතයන් ගණනාවක් දින 60කට වැඩි කාලයක් සිරකොට තබාගෙන ඉන්නවා. ඔවුන්ට සිරගතව සිටියදී කොවිඩ් පවා වැළඳී තිබෙනවා. පොදු දේපොළ පනත යටතේ ඔවුන් සිරකරගෙන සිටියත් නිරූපමා රාජපක්‍ෂට විරුද්ධව ජනාධිපතිවරයා ගන්නා ක්‍රියාමාර්ගය මොකක්ද කියලා අපි ප්‍රශ්න කරනවා. නිරූපමා රාජපක්‍ෂ පාර්ලිමේන්තු මන්ත්‍රීවරියක් ලෙස වත්කම් බැරකම් ප්‍රකාශයේදී ඇයගේ සමාගම් පිළිබඳව හෙළි කළාද කියලා පැන්ඩෝරා කණ්ඩායම ප්‍රශ්න කරනවා. ඒ වගේම ඇමතිවරියක්ව සිටියදී නිරූපමා රාජපක්‍ෂ අධ්‍යක්‍ෂ ධුරය දැරූ සමාගම්වලින් රජයේ කොන්ත්‍රාත් ලබාගැනීම පිළිබඳව වාර්තා කළාද කියලා ප්‍රශ්න කර තිබෙනවා. ගොඩක් මැති ඇමතිවරු හොරෙන් බිස්නස් කරන බව අපි දන්නවා. රුපියල් කෝටි 3500කට ආසන්න ප්‍රකාශ නොකළ වත්කම් උපයා ගත්තේ කොහෙන්ද කියලා ප්‍රශ්නයක් තිබෙනවා. නමුත් ගෝඨාභය රාජපක්‍ෂ ජනාධිපතිවරයා ඒ සම්බන්ධයෙන් ගෙන තිබෙන ක්‍රියාමාර්ගය අපි ප්‍රශ්න කරනවා. මේ රටේ මහජන ධනය මංකොල්ලකෑම, විනය විරෝධීව ක්‍රියා කිරීම සම්බන්ධයෙන් ආණ්ඩුවේ මැති ඇමතිවරුන්ට විරුද්ධව කිසිදු නීතියක් ක්‍රියාත්මක වෙන්නේ නැහැ.
පසුගිය දිනවල සම්මත කළ කළු සල්ලි සුදු කිරීමේ පනත සම්බන්ධයෙන් අපිට බරපතළ සැකයක් මතුවෙනවා. පැන්ඩෝරා පත්‍රිකා ගැන හෙළිකළේ තුන්වැනිදා වුණාට ඒ සම්බන්ධයෙන් ක්‍රියා කිරීම ලොකු ක්‍රියාදාමයක්. මීට සම්බන්ධ පුද්ගලයින්ගෙන් දැනට මාස දෙක-තුනකට පෙර වංචා-දූෂණ පිළිබඳව ප්‍රශ්න පත්‍රයක් ඉදිරිපත් කර තිබුණා. ඒ නිසා ළඟදීම මේ තොරතුරු හෙළිදරව් කරන බව අදාළ පුද්ගලයින් දැනගෙන හිටියා. ඊට පෙර කළුසල්ලි සුදු කිරීමේ පනත සම්මත කර ගත්තාදැයි සාධාරණ සැකයක් අපිට තිබෙනවා. මේ නිසා අපි ජනතාවගෙන් ඉල්ලා සිටින්නේ ජාතික සම්පත් රැකගන්න කටයුතු කරන පිරිස්, තමන්ගේ වෘත්තීය අයිතිවාසිකම් රැකගන්න අරගලය කරන පිරිස් සම්බන්ධයෙන් ජනතාව වඩාත් අවදියෙන් සිටිය යුතු බවයි. මේ පිරිස් සමග එක්වී ජාතික සම්පත් රැක ගනිමින් මහජන අයිතීන් රැකගන්න එක්වන ලෙස සියලුම දෙනාගෙන් ඉල්ලා සිටිනවා.”

මාධ්‍යවේදීන් නැගූ ප්‍රශ්නවලට පිළිතුරු ලබාදෙමින්…

“නිරූපමා රාජපක්‍ෂ මහත්මියගේ සැමියා සම්බන්ධයෙන් ඩොලර් මිලියන 12ක වංචාවක් පිළිබඳව ශ්‍රී ලංකා පොලීසිය සිදු කළ පරීක්‍ෂණවලට මොකද වුණේ කියලා පැන්ඩෝරා විසින් ප්‍රශ්න කර තිබෙනවා. ජනාධිපතිවරයා පත්වීමෙන් පසුව ආණ්ඩුව බලයට පත්වී අවුරුද්දකට මඳක් වැඩි කාලයක් ගතවී තිබෙන්නේ. මෙම කාලය තුළ වංච-දූෂණ චෝදනා එල්ලවී තිබුණු සියලුම දෙනා සම්බන්ධයෙන් විභාග වෙමින් පැවති නඩු ඉල්ලා අස්කර ගත්තා. ඔවුන් අධිකරණයෙන් නිදොස් කොට නිදහස් වුණේ නැහැ. නීතිපතිවරයා මැදිහත්වී ඉල්ලා අස්කර ගැනීම් තිබෙන්නේ. ජනාධිපතිතුමාත් එහෙමයි. රුවන්වැලි සෑය අභියස දිවුරුම් දීමෙන් පසුව එතුමාගේ නීතිඥයා හැටියට ක්‍රිය කළ අලි සබ්රි මැතිතුමා – එතකොට ඔහු පාර්ලිමේන්තුවේ හිටියේ නැහැ.- ගෝඨාභය රාජපක්‍ෂගේ රාජ්‍ය මුදල් අවභාවිතය පිළිබඳ අධිකරණයේ පැවති චෝදනා ඉවත්කර ගත්තා. එහෙම කෙනෙක් පැන්ඩෝරා හෙළිකිරීම් ගැන අල්ලස් කොමිසමේ විමර්ශනවලට යොමු කරයිද? ඒ වගේම අලි පැටවුන්ගේ සිද්ධිය ගත්තත් ඒ බව පැහැදිලි වෙනවා. අලි 14දෙනෙක් නිදහස් කරන අතර එන්.ජී. රාජපක්‍ෂගේ අලියෙකුත් සම්බන්ධ කරගෙන නිදහස් කර තිබෙනවා. මේ අය වංචා-දූෂණ ගැන පරීක්‍ෂණ පවත්වයිද?

ඔන්ලයින් ක්‍රමය කොහොමත් සාර්ථක නැහැ. ඒ නිසා නිසි විධිවිධානවලට යටත්ව පාසැල් ආරම්භ කළ යුතුව තිබෙනවා. වෛද්‍ය විශේෂඥයන්ගේ උපදෙස් අනුව කටයුතු කිරීමයි කළ යුත්තේ. ලංකාවේ කිසිදු ගුරු සංගමයක් වැඩ වර්ජනයක නැහැ. ස්වේච්ඡාවෙන් ඔන්ලයින් උගන්වපු ගුරුවරුන් එයින් ඉවත් වුණා. ඒ වගේම තව පිරිසක් ස්වේච්ඡාවෙන්ම ඉදිරිපත්වී පැවරුම් සකස්කර ඉගැන්වීම් කටයුතු කරගෙන ගියා. ගුරු වෘත්තීයේ අගය දන්නේ නැති ඇමතිවරු අපහාස කරලා ඔන්ලයින් ඉගැන්වීම නැවැත්වුවා. ගුරුවරුන්ගේ ප්‍රශ්නය පක්‍ෂවලට අදාළ දෙයක් නෙවෙයි. සාධාරණ අරගලයක්. අදත් ඔවුන් රට පුරාම කළු කොඩි දාලා විරෝධය පළ කරනවා. පාසැල් ආරම්භ කළත් ඔවුන් ඉගැන්වීම් කරන අතර වෘත්තීය අරගලය කරගෙන යයි කියලා හිතනවා.

එන්ත ලබාගැනීම අපේ අයිතියක්. එය ලබාගන්නා ලෙස අපි හැකි හැම අවස්ථාවලදීම අවධාරණය කර තිබෙනවා. නමුත් සමහර අය එය ලබාගන්න කොහෙත්ම කැමති නැහැ. ආණ්ඩුව සහ මාධ්‍ය ආයතනත් හවුල් වී දියත් කළ මිත්‍යාව වගේම අන්ත දක්‍ෂිණාංශික දේශපාලන අදහස් දරන පිරිසක් දියත්කළ මත නිසා එන්නත් ලබා නොගන්නා පිරිස් ඉන්නවා. ජනතාව විද්‍යාත්මක අධ්‍යාපනයෙන් තොර වීම ගැන අපිට දකින්න ලැබෙන තවත් ප්‍රතිඵලයක් තමයි මේක.”

ජනතා විමුක්ති පෙරමුණේ ජාතික සංවිධායක බිමල් රත්නායක

You may also like

Leave a Comment