Home News Sinhala සිසු දරුවන් සහ ගුරු අරගලය ගැන සිළුමිණ පුවත්පතින් ප්‍රශ්න 5ක්

සිසු දරුවන් සහ ගුරු අරගලය ගැන සිළුමිණ පුවත්පතින් ප්‍රශ්න 5ක්

by Ravinath Wijesekara

1. ගුරු විදුහල්පති වෘත්තීය අරගලය නිසා මාර්ගගත අධ්‍යාපනය හෝ නොලැබීම හේතුවෙන් දරුවන්ගේ අධ්‍යාපනය පසුබෑමකට ලක් වීම ඔබ දකින්නේ කෙසේද? 

“වසර දෙකක සිට දරුවන්ගේ අධ්‍යාපනය අඩාළ වුණා. කොවිඩ් වයිරසය පැතිරීමත් සමඟ පාසල් වසාදැම්මත් දරුවන්ට උගන්වන්න රජයට කිසිදු සැලසුමක් තිබුණේ නැහැ. මාර්ගගත අධ්‍යාපනයත් ගුරුවරුන් විසින් ආරම්භ කරන ලද්දක් මිසක; රජය පහසුකම් ලබාදී ආරම්භ කරන ලද දෙයක් නොවෙයි. මාර්ගගත අධ්‍යාපන ක්‍රමයට අවශ්‍ය පහසුකම් ගුරුවරුන්ට හෝ දරුවන්ට තිබුණේ නැති නිසා ඒ අධ්‍යාපනය සාර්ථකයි කියලා අපිට හිතන්න බැහැ. අපිට හිතන්න තියන දේ තමයි, දරුවන්ගෙන් අතිබහුතරයකට අධ්‍යාපනය ඇණ හිටියා කියන කරුණ. මේ ඇත්ත භාර අරගෙන තමයි අපිට ඉදිරියට යන්න වෙන්නේ. අධ්‍යාපනය අඩාළ වූ කාලය ගැන ආණ්ඩුව වගකිව යුතුයි. ඒ අතරම විශාල කාලයක් තිස්සේ නොවිසඳුණු ගුරු අරගලය ආවා. ඒ අරගලය ආරම්භ වන අවස්ථාවෙත් පාසල් වසාදමා තිබුණේ. ඒ නිසා ගුරු අරගලය නිසා අධ්‍යාපනයට පාඩුවක් වුණේ නැහැ. වෘත්තිය සමිති නායකත්වය අත්අඩංගුවට ගැනීමත් සමඟයි ස්වේච්ඡාවෙන් ආරම්භ කළ මාර්ගගත අධ්‍යාපන කටයුතුත් නතර කිරීමට ගුරුවරුන් තීරණය කළේ. දරුවන්ට අධ්‍යාපනය ලබාදීමට ක්‍රමවේදයක් සැලසුම් කිරීම අත්‍යවශ්‍යයි. ඒ හැර වෙනත් විකල්ප නැහැ. සාමාන්‍ය පෙළ සහ උසස්පෙළ පන්තිවලට විශේෂ අවධානය යෙදවිය යුතුයි . කොවිඩ් තවම ඉවර වෙලා නැහැ ; ඒ තත්ත්වයත් හිතට අරගෙනයි මේ දේවල් කළ යුතු වන්නේ; සංචාරක ව්‍යාපාරය විවෘත කර තිිබෙන නිසා කොවිඩ් තවම පවතිනවා කියන අදහසින් අධ්‍යාපනය කෙසේ පවත්වාගෙන යා යුතු ද කියා සැලසුම් කළ යුතුයි. ගුරුඅරගලයත් සමඟ ආණ්ඩුව දැනට අරන් තියන ක්‍රියාමාර්ග නම් හරියන්නේ නැහැ.. ගුරු අරගලයට සාකච්ඡා මාර්ගයෙන් හොඳ විසඳුමක් ලබාදීම අත්‍යවශ්‍යයි”

2. ගුරු විදුහල්පතිවරුන් පාසල් නැවත ආරම්භ කිරීමට සහාය ලබා දීම සම්බන්ධයෙන් ඔබේ අදහස? 

“ගුරුවරුන්ට පාසල ආරම්භ කිරීම පිළිබඳව කිසිදු ගැටලුවක් තිබුණේ නැහැ. ඒ අය ඉල්ලන්නේ ඒ අයගේ සාධාරණ ඉල්ලීමයි. වෘත්තිය සමිති තීරණය කර තිබෙනවා, 25 වනවිට රාජකාරියට යන්න. 23, 24 පමණයි; ඒ අය වැඩවර්ජනයක් කරන්නේ. ගුරුවරුන්ගේ ඉල්ලීම් වෙනුවෙන් කටයුතු කරන අතරම දරුවන් වෙනුවෙන් පාසල් ආරම්භ කිරීමට ආණ්ඩුව කටයුතු කළ යුතුයි”

3. රටේ ආර්ථික අර්බුදය සැලකීමට ගෙන ඇතැම් ගුරු විදුහල්පතිවරුන් තම භූමිකාව පිළිබඳව අවබෝධයෙන් දරුවන්ගේ අධ්‍යාපනය නඟා සිටුවීමට කටයුතු කළ බව ඇතැමුන්ගේ අදහසයි. එයට එකඟද? 

“ගුරුවරුන්ගේ ප්‍රශ්නය විසඳගන්න රටේ ආර්ථික තත්ත්වය විසඳගන්න කුරු බලා ඉන්න බැහැ. ගුරුවරුන් අවුරුදු 23ක් මේ ප්‍රශ්න සමඟ හිටියා. මෙතැනදී වැදගත් වන්නේ ප්‍රමුඛතාවයි. රටේ අනෙක් දේවල්ද දරුවන්ගේ අධ්‍යාපනය ද ප්‍රමුඛ වන්නේ කියා සලකා බැලිය යුතුයි. දරුවන්ගේ ගුණාත්මක භාවය රඳා පතින්නේ ගුරුවරුන් මතයි. ඔවුන් අධෛර්යමත්ව ඉන්නවා නම් අධ්‍යාපනය සාර්ථක වෙන්නේ කොහොමද? හොඳම කුසලතා සහ සුදුසුකම් තිබෙන අය නැතිනම් අපිට ගුරු වෘත්තියේ ගුණාත්මක භාවය ඉහළ දාන්න බැහැ . පසුගිය 2011- 2012 විශ්වවිද්‍යාල ගුරුඅරගලය පිටුපස තිබුණු ප්‍රධාන කාරණාවක් නම් සුදුසුම පිරිස විශ්වවිද්‍යාල තුළ රඳවාගන්නට අවශ්‍ය නම් ඊට හොඳ වැටුපක් අවශ්‍ය බවයි . ගුරුවරුන්ටත් ඒ අදාළ වෘත්තිමය ඇගැයීම් ලබා දිය යුතුයි. එය වැටුපෙන් පමණක් කරන්න අපහසුයි. සේවය ඇගැයීම වැනි දේවල් කළ යුතුයි. මේ පවතින ආණ්ඩුවේ වාමාශික පක්ෂ කිහිපයක් ඉන්නවා. වෘත්තිය සමිති ක්‍රියාකාරින් රැසක් ඉන්න පක්ෂයක එහෙම දේශපාලන ව්‍යාපාරයක් මේ වගේ ගුරුවෘත්තිය අරගලයකදී හැසිරිම කිසිසේත් අනුමත කරන්න බැහැ. මේ විදිහට වෘත්තිය සමිති සමඟ හැප්පෙන එක සහ මර්දනය කිරීම ඉතාමත් කනගාටුදායකයි.”

4. ගුරු අරගලය අඛණ්ඩව ගෙනයෑමට හේතුව කඩාකප්පල්කාරී පිරිසකගේ මෙහෙයවීමක් බවට මත පළ වෙනවා. ඒ ගැන ඔබේ අදහස? 

“ගුරුවරුන් ස්වේච්ඡාවෙන් කරපු මාර්ගගත අධ්‍යාපනයෙන් ඉවත් වුණා. මාර්ගගත ක්‍රමය ඒ අයට රජය පැවරූ රාජකාරියක් නොවෙයි. වැටුප් අරගලය සම්බන්ධයෙන් ඒ අයගේ ගැටලු සමාජයට ඉදිරිපත් කිරීමට දීර්ඝ කාලයක් කටයුතු කළා. ආණ්ඩුව විවේචනය කරන සියලු දෙනා කඩාකප්පල්කාරීන් කියලයි මේ ආණ්ඩුව කියන්නේ.. මේ ගුරු වර්ජනය ඇතුළෙත් බහුතරයක් ඉන්නේ මේ ආණ්ඩුවට ඡන්දය දුන්න පිරිසක්. මොන පක්ෂයකටවත් බලහත්කාරයෙන් මිනිසුන් අරගලවලට ගේන්න බැහැ. වෘත්තිය හෝ වෙනත් ගැටලු නොතිබුණා නම් ගුරුවරයා අරගල කරන්නේ නැහැ. ඒ අයගේ නොවිසඳුණු ගැටලු තිබෙනවා. ගුරුවරුන් කියන්නේ විපක්ෂවලට හිතුණ ගමන් පාරට බස්සන්න පුළුවන් අය නොවෙයි. ඒ අය පාරට බැස්සේ දේශපාලනයකින් තොරව සාධාරණ ඉල්ලිම් රැසක් දිනා ගන්න. වෘත්තිය සමිති හැටියට සාමජිකයන්ගේ ඉල්ලීම්වලට ඇහුම්කන් නොදී වෘත්තිය සමිති ව්‍යාපාර මෙහෙයවීම වරදක්. ඒ නිසා වෘත්තිය සමිති නායකත්වය මේ වෙනුවෙන් පෙනී සිටිනවා. ප්‍රශ්න නිර්මාණය කරන්න වෘත්තිය සමිති ව්‍යාපාරයකටවත් දේශපාලන පක්ෂයකටවත් බැහැ. ජනතාව එවැනි ක්‍රියාමාර්ගවලට යොමුවෙන්නේ ඒ අයගේ අයිතිවාසිකම් අහිමි වූ විටයි”

5. සියලු වෘත්තිකයන් දේශපාලනික පිල් බෙදීමකින් තොරව යම් කැපකිරීමක් මේ මොහොතේ කළ යුතු යැයි ඔබ සිතනවාද?

“වෘත්තිය සමිති ඉන්නේ ආණ්ඩුව සතුටු කරන්න නොවෙයි. සාමාජිකයන්ගේ සාධාරණ ඉල්ලීම වෙනුවෙන් පෙනී සිටීමයි වෘත්තිය සමිති නායකත්වයේ වගකීම. වෘත්තිය සමිති ව්‍යාපාර කියන්නේ ප්‍රජාත්‍රාන්තික ව්‍යුහයක් තුළ නීතියෙන් පිළිගත් ආරක්ෂා වූ සංවිධානයන්. ඒ අය සමඟ ගනුදෙනු කිරීම ආණ්ඩුවේ වගකීමක්. නිහඬව නොසිට ආණ්ඩු වෘත්තිකයන්ගේ ප්‍රශ්න විසඳිය යුතුයි.”

You may also like

Leave a Comment