(-2024.05.01 – ගාලු මුවදොර පිටිය-) 1886 වසරේ මැයි මස 01 වන දින ඇමෙරිකාවේ චිකාගෝ නුවර හේමාකට් චතුරශ්‍රයේදී, පැය 08ක සේවා මුරයක් ඉල්ලා විරෝධතාවක නිරත වෙමින් සිටියදී එල්ල වූ මර්දනීය වෙඩි ප්‍රහාරයෙන් රුධිරය වැගිරූ කම්කරුවන් සදාතනිකව සිහි කිරීමට 1889 වසරේ රැස් වූ දෙවන කොමියුනිස්ට් ජාත්‍යන්තරය තීරණය කළ අතර එතැන් පටන් සෑම වසරකම මැයි පළමුවන දා ජාත්‍යන්තර […]
(-2024.05.01 – ගාලු මුවදොර පිටිය-)
1886 වසරේ මැයි මස 01 වන දින ඇමෙරිකාවේ චිකාගෝ නුවර හේමාකට් චතුරශ්‍රයේදී, පැය 08ක සේවා මුරයක් ඉල්ලා විරෝධතාවක නිරත වෙමින් සිටියදී එල්ල වූ මර්දනීය වෙඩි ප්‍රහාරයෙන් රුධිරය වැගිරූ කම්කරුවන් සදාතනිකව සිහි කිරීමට 1889 වසරේ රැස් වූ දෙවන කොමියුනිස්ට් ජාත්‍යන්තරය තීරණය කළ අතර එතැන් පටන් සෑම වසරකම මැයි පළමුවන දා ජාත්‍යන්තර කම්කරු දිනය ලෙස ප්‍රකාශයට පත් කෙරිණි.
ශ්‍රී ලංකාවේ වැඩකරන ජනයා ප්‍රමුඛ පොදු ජනතාව මෙවර ජාත්‍යන්තර කම්කරු දිනය සමරන්නේ මෙරට දූෂිත, ප්‍රභූ දේශපාලනය අවසන් කර ජනතාවාදී පාලනයක් තුළ රටත්, සමාජයත් ගැඹුරු සාධනීය පරිවර්තනයකට ලක් කරමින් තිබෙන අවස්ථාවකය. පවුල් සහ පරම්පරා කිහිපයක් 76 වසරක් පුරා තට්ටු මාරු ක්‍රමයට ගෙන ගිය දූෂිත පාලනය නිමා කර මෙරට දේශපාලනයේ සුවිශේෂී හැරවුමක් සනිටුහන් කිරීමට ඉකුත් ජනාධිපතිවරණයේදී සහ මහමැතිවරණයේදී ජාති, ආගම් භේදයකින් තොරව මෙරට සිව් දෙස ජනතාව විසින් කටයුතු කරනු ලැබිණි. එකී ජනවරමේ අපේක්ෂා සාක්ෂාත් කරමින් මේ වන විට රට ආර්ථික, සාමාජයීය සහ දේශපාලන වශයෙන් පුළුල් පරිවර්තනයකට ලක් කිරීමට ජාතික ජන බලවේගයේ අපි කටයුතු කරමින් සිටින්නෙමු.
දුෂිත, ප්‍රභූ දේශපාලන ක්‍රමය තුළ පතුලටම ඇද දමා තිබූ මෙරට ආර්ථිකය යළි ඉහළට ඔසවමින් ස්ථාවර ආරම්භයක් ලබා ගැනීමට මේ වන විට අපි සමත් වී සිටිමු. එහි පැහැදිලි සංඥාවන් දැනටමත් සියලුදෙනාට පෙනෙන්නට තිබේ. රජයේ පළමු අයවැයේදීම ඉතිහාසයේ කිසි දා නොවූ අයුරින් රාජ්‍ය සේවකයන්ගේ අවම වැටුප සැලකිය යුතු ප්‍රමාණයකින් ඉහළ නැංවීම ඇතුළු ගොවි ජනතාව, ධීවර ජනතාව, තරුණයින්, කාන්තාවන්, සිසුන් පමණක් නොව නිෂ්පාදකයන්, සුළු පරිමාණ ව්‍යාපාරිකයන්, විවිධ වෘත්තීන්හි නිරත වන්නන් ආදී සමාජයේ සියලුදෙනා වෙනුවෙන් ප්‍රතිලාභ ලබා දීමට අපි කටයුතු කර ඇත්තෙමු. එසේම වතුකරයේ කම්කරු ජනතාව මුහුණ දෙන ගැටලු විසඳීමට හා ඔවුන්ගේ පුරවැසි අයිතිවාසිකම් තහවුරු කිරීමටද අපි කටයුතු කරමින් සිටිමු.
දිනෙන් දින අලුත් වන නිෂ්පාදන බලවේගවලට සමගාමීව අප භුක්ති විඳින අයිතිවාසිකම්හි නව පරිච්ඡේදයක අවශ්‍යතාව අපි දකිමු. 1948 මානව හිමිකම් න්‍යාය පත්‍රයේ නොතිබූ, ඩිජිටල් ප්‍රවේශ අයිතිවාසිකම්, පාරිසරික අයිතිවාසිකම් ආදියද ඇතුළත්ව වෙනස් වන දේශපාලන පද්ධතින්හි මතු වීම සහ ලෝක සාමය තහවුරු කරමින්, නව සංවර්ධන අවශ්‍යතා මත පදනම්ව මානව හිමිකම් පිළිබඳ යාවත්කාලීන වූ විශ්ව ප්‍රකාශනයක අවශ්‍යතාව වත්මන් සමාජය ඉල්ලා සිටී. ඒ පිළිබඳව සංවේදී වීම සහ මැදිහත් වීමේ අවශ්‍යතාවද ජාත්‍යන්තර කම්කරු දිනය සමරන මේ අවස්ථාවේ අපි යළි සිහිපත් කරමු.
ජාත්‍යන්තර භූ දේශපාලනික වෙනස්කම් සහ අභියෝග හමුවේ නොසැලෙන ආර්ථිකයක් ගොඩනැංවීම වෙනුවෙන් වෙහෙසෙන මෙරට වැඩකරන ජනතාවගේ අයිතිවාසිකම් තහවුරු කරමින් හා ප්‍රවර්ධනය කරමින් දූෂිත ප්‍රභූ දේශපාලනය බිද හෙළූ මෙරට ආර්ථිකය ප්‍රකෘතිමත් කර “ලස්සන ජීවිතයක් සහ පොහොසත් රටක්” නිර්මාණය කිරීමට සහෝදරත්වයෙන් එක්ව පොර බැඳීමට මෙරට ආදරණීය වැඩකරන ජනතාවට ආරාධනා කරමින්, වැඩ කරන ජනතා අයිතින් සුරක්ෂිත කෙරෙන අර්ථවත් වූ ජාත්‍යන්තර කම්කරු දිනයකට ශුභාශිංසන එක් කරමි.
අනුර කුමාර දිසානායක
ජනාධිපති
ශ්‍රී ලංකා ප්‍රජාතාන්ත්‍රික සමාජවාදී ජනරජය
2025 මැයි 01 වන දින
(-බේරුවල ජන රැලිය 2025.04.27-) ජනාධිපති අනුර කුමාර දිසානායක සහෝදරයා මෙම අදහස් පළ කළේ, බේරුවල ඊයේ (27) පැවති “ජය නියතයි ගම අපටයි” ජයග්‍රාහී ජනතා රැලිය අමතමිනි. එම රැලිය අමතමින් ජනාධිපතිවරයා මෙසේද පැවසීය. පසුගිය වසරේ ශ්‍රී ලංකාවේ දේශපාලනය වෙනස් කිරීමට ජනතාව තීන්දු කළා. එහෙම තීන්දුවක් ගත්තේ ඇයි? ජනතාවගේ අපේක්‍ෂාවන් වුණේ රටේ ආර්ථික තත්ත්වය නගා සිටුවීම, හොරු ඇල්ලීම, […]
(-බේරුවල ජන රැලිය 2025.04.27-)
ජනාධිපති අනුර කුමාර දිසානායක සහෝදරයා මෙම අදහස් පළ කළේ, බේරුවල ඊයේ (27) පැවති “ජය නියතයි ගම අපටයි” ජයග්‍රාහී ජනතා රැලිය අමතමිනි.
එම රැලිය අමතමින් ජනාධිපතිවරයා මෙසේද පැවසීය.
පසුගිය වසරේ ශ්‍රී ලංකාවේ දේශපාලනය වෙනස් කිරීමට ජනතාව තීන්දු කළා. එහෙම තීන්දුවක් ගත්තේ ඇයි? ජනතාවගේ අපේක්‍ෂාවන් වුණේ රටේ ආර්ථික තත්ත්වය නගා සිටුවීම, හොරු ඇල්ලීම, හොරකම දූෂණයෙන් නාස්තියෙන් තොර රාජ්‍ය පාලනයක් ඇති කිරීම වගේ දේවලුයි ආණ්ඩුවට දැන් මාස හයකට ආසන්න කාලයක් ගතවී තිබෙනවා. මේ රටත් මේ රටේ ජනතාවත් තිබුණු තත්ත්වයට වඩා ඉහළ තැනකට ගෙන ඒමට අප ඔබලාට පොරොන්දුවක් ලබා දුන්නා. ජනතාව අපට ඡන්දය ලබා දී බලාපොරොත්තු වන සියලු දේ ඉටු කරමින් තිබෙනවා. නමුත් දැන් අඬන්නෙ කවුද? බලය අහිමි වුණු, මෙවැනි ප්‍රතිඵලයක් බලාපොරොත්තු නොවුණු, බල සිතියම සිහිනයක් බවට පත්වුණු වේදනාවෙන් පෙළෙන කණ්ඩායම් අඬමින් සිටිනවා. ජාතික ජන බලවේගය හා ජනතාව අතර තිබුණු සම්මුතිය අප අපගේ පාලන කාලය තුළ ඉටුකරනවා. ආර්ථික ස්ථාවරභාවය මේ වන විටත් අප කර තිබෙනවා.
ආර්ථික ස්ථාවර භාවය පිළිබඳ මනින සංඥාවන් වන්නේ, ඩොලරයට සාපේක්ෂව රුපියලේ අගය ස්ථාවරභාවයක පවත්වාගෙන යාමයි. මෑත ඉතිහාසයේ අඩුම උද්ධමන අගයක් වාර්තා වී තිබෙන්නේ පහුගිය මාස හයේ කාලය තුළයි. ආර්ථිකය අවස්ථාවරභාවය නිසාම ආයෝජන ව්‍යාපෘති මේ රටින් ඉවත් වුණා. චීන රජය, ජපන් රජය තමන්ගේ ව්‍යාපෘති අතහැර දමා ගියා. නමුත් මේ වනවිට එම රජයන් නැවත එම ආයෝජන ව්‍යාපෘති ආරම්භ කිරීමට කැමැත්ත පළ කර තිබෙනවා.
මේ වසරේදී වාරිමාර්ග ක්ෂේත්‍රය සඳහා පමණක් දස ලක්ෂ 78,000ක් වෙන්කර තිබෙනවා. මේ මුදල වියදම් කිරීමට සැලසුම් හදන්න ඕනේ, ටෙන්ඩර් කැදවන්න ඕනේ, නිවැරදිව සිදුවෙනවාදැයි බලන්න ඕනේ, මේ සියල්ල සිදු කිරීමට ශක්තිමත් රාජ්‍ය සේවයක් අවශ්‍යයි. මේ වනවිට අඩපණ වූ රාජ්‍ය සේවයක් අපට තිබෙන්නේ. ශක්තිමත් රාජ සේවයක් සකස්කස් කිරීමට අලුතින් රාජ්‍ය සේවයට 30,000ක් බඳවා ගැනීමට කටයුතු කරනවා. ඒ සඳහා දේශපාලන අධිකාරිය ලියුම් ගන්න අවශ්‍ය වන්නේ නැහැ. හැකියාව සුදුසුකමට වඩා දේශපාලනය උඩට ඒම රාජ්‍ය සේවයේ පිරිහීමට එක ලක්ෂණයක් වෙනවා. රාජ්‍ය සේවය ආකර්ෂණීය වෘත්තියක් බවට පත් කරනවා. මෑත ඉතිහාසයේ රාජ්‍ය සේවකයාගේ මූලික වැටුප උපරිම ලෙස වැඩි කිරීමට ජාතික ජන බලවේගයේ මාස හයේ ආණ්ඩුව තීන්දු කළා.
සංචාරක ක්ෂේත්‍රය පිළිබඳ වැඩි අවධානයක් අප යොමු කර තිබෙනවා. නව සංචාරක ගමනාන්ත හඳුන්වා දෙමින් සංචාරක කර්මාන්තය නව පරිවර්තනය වෙනසක් සිදු කිරීමට අප සැලසුම් කර තිබෙනවා. අනුරාධපුරය යාපනය වැනි සංචාරක ගමනාන්ත ප්‍රවර්ධනය කිරීමට අප බලාපොරොත්තු වෙනවා. අනුරාධපුරේ පළමුවෙනි රාජධානිය සංචාරක ගමනාන්තයක් ලෙස දියුණු කිරීමට ඉන්දියානු ආධාර ඇතිව කටයුතු කරනවා.
අපනයන ආදායම වැඩි කිරීම සඳහාත් වත්මන් ආණ්ඩුව සැලසුම් කර තිබෙනවා. ලෝකයේ රටක් ආර්ථික තීන්දු ගැනීමේදී අපේ රටේ ආර්ථිකය හාන්සි නොවන තැනකට ශ්‍රී ලංකාව පත් කරනවා.
කිසිදු ජාතිවාදී ආගමික ගැටුමකට යාමට අප ඉඩ තබන්නේ නැහැ. වත්මන් ආණ්ඩුව ගොඩනැගීමේදී සිංහල දෙමළ මුස්ලිම් සියලු ජනතාව එකතු වී කටයුතු කළා. ජාතික සමගිය ඇති කිරීමේ දේශපාලන ව්‍යාපාරය ජාතික ජන බලවේගයයි. මම ඊයේ හිටියේ පුදුකුඩුඉරිප්පු ප්‍රදේශයේයි. මෑත ඉතිහාසයේ විශාල ජනතාවක් පැමිණ කළ එකම රැස්වීම එයයි. සිංහල දෙමළ මුස්ලිම් ජනතාව අප කෙරෙහි බලාපොරොත්තු තබාගෙන තිබෙනවා. අප ජාතිවාදය නැවත හිස එසවීමට ඉඩ තබන්නේ නැහැ.
සාමාන්‍ය ජනතාවගෙන් කෙනෙක් වාහනයක් ලියාපදිංචි නොකර පාරක දාන්නේ නැහැ. නමුත් පහුගිය කාලෙ හිටපු දේශපාලඥයෙක් ලියාපදිංචි නොකර වාහන භාවිතා කර තිබෙනවා. එසේ ලියාපදිංචි නොකර වාහන භාවිතා කළ ඇමතිවරු තුන්දෙනෙකුට ඉදිරියේදී නීතිය ක්‍රියාත්මක කරන්න සිදු වේවි. අද නීතිය කාටත් සමානයි. පොලිස්පති පොලීසියට බයේ හැංඟුණු ප්‍රවෘත්තියක් ජනතාවට බලන්න වුණා. ඒ කියන්නේ නීතිය සැමට සමානයි කියන එකයි. ජනාධිපතිවරයාගේ සිට පහළම දේශපාලනඥයා දක්වා ජනතාවගේ මුදල් සතයක් හොරකම් කරන්නේ නැති ආණ්ඩුවක් ස්ථාපිත කර තිබෙනවා. ජනතාවගේ මුදල් නාස්ති කරන්නේ නැහැ. මේක තමන්ට ලැබෙන්න හිමිකම තිබෙන දේත් අතහරින ආණ්ඩුවක්. මන්ත්‍රීවරුන්ට විශ්‍රාම වැටුප, වාහන බලපත්‍ර නොදෙන ආණ්ඩුවක්. ආණ්ඩුවේ වියදම් කප්පාදු කරමින් රාජ්‍ය සේවකයාගේ වැටුප් වැඩි කිරීමට අප මුදල් එකතු කළා. ඉතුරු කරගන්නා සියලු මුදල් ජනතාවට ලබා දෙන්න අපි සූදානම්. අස්වැසුම ප්‍රතිලාභ වැඩි කළා. තවත් ලක්ෂ හතරක් අස්වැසුමට එකතු කරන්න සැලසුම් කර තිබෙනවා.
භාණ්ඩාගාරය මුදල් එකතු කරලා එම මුදල් නිවැරදි ආකාරයෙන් ජනතාවට බෙදා දෙනවා. මේ වසර භාණ්ඩාගාරයට වැඩිම මුදල් එකතු වන වසර බවට පත් වේවි. පසුගිය මාස තුනම ආදායම් ඉලක්ක පසු කර තිබෙනවා. ඔබ ගෙවන බද්දෙන් රටට නිවැරදි ලෙස සේවයට යොදා ගන්නා බවට අප ජනතාවට සහතිකයක් දෙනවා .
හොරකම් කළ දේශපාලනඥයන් පිළිබඳව විමර්ශනය සිදුකිරීම මේ වනවිටත් සිදු කරමින් තිබෙනවා. නමුත් දඬුවම් දීමට අවශ්‍ය බලය ආණ්ඩුව සතුව නැහැ. එය සියල්ල අධිකරණයට වාර්තා කරමින් තිබෙනවා. දඬුවම් ලබාදීම අධිකරණය විසින් සිදු කරයි. හිටපු ජනාධිපතිවරයාගේ ලොකු පුතාට එක නඩුවයි මද්දුමයට නඩු දෙකයි, ආච්චිට එක නඩුවයි. මේ වන විට මහ ඇමතිවරු දෙදෙනෙක් අත්අඩංගුවේ පසුවෙනවා. එකම මහ ඇමතිවරයෙක් දඬුවමට ලක්වෙලා තිබෙනවා. දූෂණයට එරෙහි ආයතන මේ වන විට ශක්තිමත් වී තිබෙනවා. එම ආයතනවලට දේශපාලනිකව ඇඟිලි ගහන්නේ නැහැ. කාලයේ වැලිතලාවට යට නොවී අපරාධවලට දඬුවම් ලබාදීමට වත්මන් ආණ්ඩුව කටයුතු කරමින් තිබෙනවා.
සෞඛ්‍ය ක්ෂේත්‍රය වෙනුවෙන් නැවත ඖෂධ හිඟයක් ඇති නොවීමට මුදල් වෙන්කර තිබෙනවා. රුපියල් බිලියන 604ක් සෞඛ්‍යයට වෙන් කරතිබෙනවා. ලබන වසරේ අධ්‍යාපන ප්‍රතිසංස්කරණයක් ඇති කිරීමට බලාපොරොත්තු වෙනවා. දෙමාපියන්ට බරක් නොවන දරුවන්ට පීඩාවක් නොවන අධ්‍යාපනයක් ඇති කිරීමට අප කටයුතු කරනවා. ලෝකයේ දියුණුතම ප්‍රවාහන පද්ධතියක් ඇතිකිරීමට අප සැලසුම් කර තිබෙනවා. රට සුබවාදී දිශානතියකට පරිවර්තනය වෙමින් තිබෙනවා.
මධ්‍යම ආණ්ඩුව පළාත් පාලන ආයතන සියලු දෙනා එකතු වී ගමනක් යා යුතුයි. මහ ආණ්ඩුව හොරකම් නොකරන නාස්ති අවම කරන ආණ්ඩුවක් වෙනකොට හොරකම් කරන, නාස්ති කරන පළාත් පාලන ආයතන තිබිල වැඩක් නැහැ. ඒ නිසා මෙවර මැතිවරණයෙන් ජාතික ජන බලවේගයට විශිෂ්ට ජයක් ලබාදීමට කැපවෙන්න.
“ඇරඹී තිබෙන නව දේශපාලන සංස්කෘතියට අභියෝග කරන්න විපක්ෂයේ කිසිවෙකුටත් බැහැ”
-ජනතා විමුක්ති පෙරමුණ ප්‍රධාන ලේකම් ටිල්වින් සිල්වා සහෝදරයා-
ලබන මාසෙ 06වැනිදා අපේ රටට තුන්වැනි ජයග්‍රහණය ගේන දවසයි. පසුගිය ජනාධිපතිවරණයේදී පැරණි, ප්‍රභූ දේශපාලනය පැත්තක තියලා අපේම ජනාධිපති කෙනෙක් පත්කර ගත්තා. මහ මැතිවරණයෙන් ඊටත් වඩා ශක්තියකින් පාර්ලිමේන්තුවට 159ක මන්ත්‍රී සංඛ්‍යාවක් සහිත ආණ්ඩුවක් හැදුවා. ඒ දෙවැනි ජයග්‍රහණයයි. ඉදිරි මැයි 06 වැනිදා රට පුරා තිබෙන පළාත් පාලන ආයතන සියල්ලම මාලිමාව ජයග්‍රහණය කරලා පිට පිට ලබන තුන්වැනි ජයග්‍රහණය වාර්තා කරන්න අපි ලැහැස්තියි. මෙතන රැස්වී සිටින ජනතාවගෙන් පෙන්නුම් කරන්නේ මාලිමාවේ ශක්තිය, ජනතාවගේ විශ්වාසය දිනපතාම වැඩිවෙමින් තිබෙනවා කියන එකයි. විපක්ෂය දැන් බිඳ වැටිලා. පොඩි පොඩි කල්ලි හැදිලා, එක්කෙනෙක් දෙන්නෙක් වොයිස්කට් දෙමින් ඉන්නවා. ඒ ගොල්ලන් වඳවෙමින් යන සත්ව කොට්ඨාසයක් බවට පත්වෙලා. ලබන මැතිවරණයෙන් පසුව එයාලා රතු දත්ත පොතට එකතු වේවි. දේශපාලනය කියන්නේ පරණ ක්‍රමයම බවයි ඒ ගොල්ලන් හිතාගෙන ඉන්නේ. බොරු කියන එක, අවලාද නගන එක, අපහාස කරන එක දේශපාලනය කියලා එයාලා හිතාගෙන ඉන්නවා.
පසුගිය ජනාධිපතිවරණයත් එක්ක රටත් වෙනස් කළා. රටේ ජනතාව වෙනස් වෙලා තිබෙන්නේ. රටේ අලුත් දේශපාලන සංස්කෘතියක් ආරම්භ කර තිබෙනවා. ඒකට අභියෝග කරන්න විපක්ෂයේ කාට හෝ බැහැ. එක වරෙක අනුර සහෝදරයා පාර්ලිමේන්තුවේදි කිවුවා, ඒ ගොල්ලන්ට “අපිව පරද්දන්න ඕනෑ නම්, අපට වඩා ශිෂ්ට සම්පන්න ව්‍යාපාරයක් හදන්න” කියලා. එයාලට ශිෂ්ට වෙන්න බෑ මයි. එයාලා යන්නේම අශිෂ්ටත්වයට, ම්ලේච්ඡත්වයට. කිසිදු දවසක ආණ්ඩුවට ලැබෙන්නෙ නැති නගර සභාවක් බේරුවල නගර සභාව කියන්නේ. ඉතිහාසයේ පළමු වැනි වතාවට, එය දිනන බවට අපේ මුස්ලිම් සහෝදරවරු සහතික වෙලා තිබෙනවා. බේරුවල නගර සභාව ඇතුළු සියලුම සභා මාලිමාව දිනවනවා කියන විශ්වාසය අපට තිබෙනවා. අපි ජනාධිපතිවරණය දිනුවා 50%කින්. මාස දෙකකට පස්සේ මහ මැතිවරණය දිනුවා 60%කට වඩා වැඩි ප්‍රමාණයකින්. පළාත් පාලන මැතිවරණය 70% පැනපු දැවැන්ත ජයග්‍රහණයකින් ඔප්පු කරන්න ඕනෑ රට ඉන්නේ මාලිමාවත් එක්ක කියලා. මීට මාස හයකට ප්‍රථම ප්‍රතික්ෂේප කරපු අයව නැවත ගේන්න ඕනෑ නැහැ. රටෙන් හොරු එළවලා තිබෙන්නේ. ගමෙන් හොරු එලවන්න ඕනෑ. හොරු ටික නැවත වෙස්වලාගෙන, පාට මාරු කරගෙන, පක්ෂ මාරු කරගෙන එනවා. මේ එන්නේ ඉස්සර සභාවෙන් හොරකම් කරපු, කොමිස් ගහපු අයම තමයි.
ඔබ, අපි වංචා, දූෂණ නැති අලුත් දේශපාලන සංස්කෘතියක් හදා තිබෙනවා. මහජන මුදල් නාස්ති කරන්නේ නැති, ජනතාවට ඉහළින් වැජඹෙන්නේ නැති, සරල ලෙස ජීවත් වෙන ආණ්ඩුකරණයක් අපි හදා තිබෙනවා. ජනතාවට සහන දෙන්න පටන්ගෙන තිබෙනවා. හොරකම, පගා ගැහිලි නතර කර තිබෙනවා. හොරු අල්ලන්න පටන්ගෙන තිබෙනවා. රට කිසියම් දිශාවකට ගමන් කරමින් තිබෙනවා. අන්න ඒ පැත්තට අපි ගමත් අරගෙන යන්න ඕනෑ. ඒ වැඩේට අපි එකඟයි කියන සහතිකය දෙන්න ඕනෑ. මේක පුංචි ඡන්දයක් නොවෙයි. පළාත් පාලන ආයතනවල විෂය පථය සීමාවක් තිබෙනවා. ගමේ පාර හදන එක, බෝක්කුව හදන එක, මොන්ටිසෝරි හදාගන්න එක පොඩි පොඩි වැඩ ටිකක් තිබෙනවා. ඒ අතරතුර ඊට වඩා එහාට යන ගමනක් තිබෙනවා. අපි රටෙන් පටන් ගත්ත දේශපාලන සංස්කෘතිය ගම දක්වා ගේන්න ඕනෑ. ගමටත් හදමු වංචා, දූෂණ නැති ගමේ ආණ්ඩුවක්. මහජන මුදල් සාංඝික දේපළ වගේ රකින, නාස්ති කරන්නේ නැති පාලනයක්, ආණ්ඩුවක් ගමටත් හදමු. ගමටත්, නගරෙටත් කොමිස් ගහන්නේ නැති, හොරකම් කරන්නේ නැති, වංචා-දූෂණ නැති පාලනයක් හදමු. අපි රටට හදලා තියෙනවා, වරප්‍රසාද ලබන්නේ නැති, ස්වේච්ඡාවෙන් වැඩකරන දේශපාලන සංස්කෘතියක්. ගමටත් හදන්න ඕනෑ, මහජන මුදල් නාස්ති කරන්නේ නැති, වරප්‍රසාද ගන්නේ නැති පාලනයක්. රටේ ආරම්භ කරපු වෙනස ගමට ගෙනියන්න ඕනෑ. ඒ සඳහා මේ සභා සියල්ල මාලිමාව දිනවන්න ඕනෑ. මේ සභා පවත්වන්නේ යාළුකම්වලට, ගමේකමට, අපේකමට, සල්ලිවලට සලකන්න නොවෙයි. උදව්වක් කළා නම් උදව්වක් කරන්න. අපි මේ රටේ ආරම්භ කළ ගමනක් තිබෙනවා. උඩ සිට පහළට එක පිම්මට ඒ ගමන යන්න ඕනෑ. ඒ නිසයි මේ ඡන්දය අපි දිනන්න ඕනෑ වෙන්නේ. විපක්ෂය හොඳටම කලබල වෙලා ඉන්නේ. ඒගොල්ලන් කියන දේ එයාලම දන්නේ නැහැ. එයාලා මාසෙන් මාසෙට ජනාධිපතිලා පත්කරනවා. තව අවුරුදු පහකට රටේ ජනාධිපති අනුර සහෝදරයා. අවුරුදු පහෙන් පස්සෙත් රටේ නායකයා අනුර සහෝදරයා. මේක කල්පෙකට හොල්ලන්න බැරි ආණ්ඩුවක්.
ඒගොල්ලන් දුකෙන් ඉන්නේ. ඒගොල්ලන්ගේ ස්වර්ගය අහිමි වෙලා. දෙව්ලොවෙන් බිමට වැටිලා. වංචා, දූෂණ නැති ආණ්ඩුවක් අපි හදා තිබෙනවා. වංචාවෙන් දූෂණයෙන් ජීවත් වුණු අයට අපේ ආණ්ඩු හරියන්නේ නැහැ. හොරකම් කරන්නේ නැති, පගා ගහන්නේ නැති, වරප්‍රසාද ගන්නේ නැති, ජනතාව වෙනුවෙන් කැපවී වැඩකරන ආණ්ඩුවක් අපි හදා තිබෙනවා. රාජ්‍ය බලය පාවිච්චි කරපු, වරප්‍රසාද භුක්ති විඳි අයට ඒක නැතුව බැහැ. ඒ නිසා උඩින් ගන්න බැරි බලය බිමින් හරි ගන්න උත්සාහ කරනවා. රනිල් වික්‍රමසිංහ කිවුවා, එයාලා වෙන වෙනම ඡන්දෙ ඉල්ලුවාට ඡන්දෙන් පස්සේ එකතු වෙලා සභා පිහිටු වනවාලු. මාලිමාව පරද්දන්න හදන්නේ ඇයි? අපි මේ රට පාවා දීලා නැහැ. මහජන මුදල් නාස්ති කරලා නැහැ. සම්පත් විකිණීම නවත්වා තිබෙනවා. ජනතාවට එරෙහිව බලය පාවිච්චි කරලා නැහැ. ජාතිවාදය පාවිච්චි කරලා මුස්ලිම් ජනතාවගේ කඩ සාප්පු ගිනි තියලා නැහැ. ඉතිහාසයේ පළමු වතාවට ජාතික සමගිය තිබෙන ආණ්ඩුවක් හදා තිබෙනවා. ඒකාලේ ජාතිවාදය පතුරලා ගැටුම් ඇති කළා. නැවත ජාතිවාදය ඇති නොවෙන සමගියෙන් ජීවත් වෙන්න රටක් හදා තිබෙනවා. මේ සමගියටත් පරාද වුණු අය බයයි. මහනුවර ශ්‍රී දළදා දැක්ම තිබුණා. එතනදි මහනුවර පල්ලි, දේවස්ථාන සියල්ලම දළදා වැඳපුදා ගන්න ආපු ජනතාවට නවතින්න, නිදාගන්න පහසුකම්, කන්න බොන්න දුන්නා. ඒක තමයි ජාතික සමගිය. අපට එහෙම ආණ්ඩුවක් ඕනෑ. එහෙම ආණ්ඩුව රකින බව පෙන්නන දවස තමයි මැයි 06දා. මේ පටන් ගත්ත දේවල් ආපසු හරවන්න දෙන්න එපා.
එයාලට දැක්මක් වැඩපිළිවෙළක් නැහැ. දේශපාලනය දන්නේ නැහැ. අපි දේශපාලන දැනගෙන පිළිවෙළට වැඩ කරගෙන යනවා. එයාලට අපිත් එක්ක හැරෙන්නවත් බැහැ. වෙනස් වෙන්න බැරි නම් රතු දත්ත පොතෙන් තමයි නතර වෙන්නේ. අපි ජනතාවට වුණු පොරොන්දු ඉටුකර තිබෙනවා. ඉටුකරගෙන යමින් තිබෙනවා. අපි මැතිවරණ කාලයේදි ජනතාවට කිවුවා, වංචා – දූෂණ නැති පාලනයක් හදනවා කියලා. අපිට ආඩම්බරයෙන් කියන්න පුළුවන් වංචා දූෂණ නැති ආණ්ඩුවක් අපි හදලා තියෙනවා කියලා. ලෝකේ රටවල් අපිට ගරු කරනවා, වංචා-දූෂණ නැහැ, ඇමතිවරු පගා ඉල්ලන්නේ නැහැ කියලා. ඔබේ ඡන්දෙට වටිනාකමක් තිබෙනවා. වෙනදා ඡන්දෙ දීලා, මන්ත්‍රීවරු, ඇමතිවරු හොරකම් කරන කොට ඡන්දෙ දීපු කෙනාට ලැජ්ජාවක් හිතෙනවා. මාලිමාවට ඡන්දෙ දුන් අයට ආඩම්බරයක් එනවා මන්ත්‍රීවරු, ඇමතිවරු මහජන මුදල්වලට අත තියන අය නොවෙන නිසා. ඔබේ ඡන්දෙට ඇත්ත වටිනාකම ලබාදුන් එකම පක්ෂය තමයි ජාතික ජන බලවේගයේ මාලිමාව. ඒක අපි රකින්න ඕනෑ.
ඔබට අපි පොරොන්දු වුණු අලුත් දේශපාලන සංස්කෘතියක් ගේනවා කියලා. අපි ඒක ඉටුකරමින් යන්නේ. අපිට සරල ජනාධිපතිවරයෙක් ඉන්නවා. ඇමති මණ්ඩලය 25ට අඩුවෙන් හදනවා කිවුවා. අපි හැදුවා අමාත්‍යාංශ 22යි. ඇමතිවරු 21යි. මහින්ද ජනාධිපතිගෙ කාලේ පොල් ඇමති හිටියා. තල් ඇමති හිටියා, කිතුල් ඇමති හිටියා, සීනි ඇමති හිටියා, මැටි ඇමති හිටියා. අපි ඒ විකාර කර නැහැ. අපි කිවුවා මන්ත්‍රීවරුන්ට වාහන පෝර්මිට් නැහැ. කාර් පර්මිට් අහෝසි කරනවා කියලා. ඒක අපි කළා. කිව්ව දේ ඉටු කළ එකම දේශපාලන පක්ෂය ජාතික ජන බලවේගය විතරයි. හොරු ඇල්ලුවාද කියලා ප්‍රශ්නයක් තිබුණා. පොඩි ප්‍රමාදයක් තිබුණා. හේතුව ඒ ආයතන ඒකට සූදානම් වෙන්න ඕනෑ. හොරු අල්ලන්න අපට බැහැ. ඒකට අල්ලස් හා දූෂණ කොමිසම, අපරාධ පරීක්ෂණ දෙපාර්තමේන්තුව, පොලීසිය, නීතිපති දෙපාර්තමේන්තුව ඒ අය තමයි ඒ වැඩේ කරන්නේ. දැන් වැඩේ කෙරෙමින් තිබෙනවා. නාමල් රාජපක්ෂට මහාධිකරණයේ නඩු පවරා තිබෙනවා. යෝෂිත රාජපක්ෂට අධිචෝදනා පත්‍ර බාරදී තිබෙනවා. ඩේසි ආච්චිට නඩු පවරා තිබෙනවා. චාමර සම්පත් ඇතුලෙ ඉන්නවා, ඔහුට විරුද්ධව චෝදනා තුනක් තිබෙනවා. පොදු දේපළ යටතේ මහජන මුදල් හොරකම් කරලා, වංචා කරලා, රිමාන්ඩ් එකේ. මර්වින් සිල්වා මහත්තයාට රජයේ ඉඩම් හොර ඔප්පු හදලා විකුණලා. දැන් රිමාන්ඩ් එකේ. හිටපු ඇමති, ප්‍රසන්න රණවීර දැන් පොලීසියට බයේ හැංගිලා. උතුරු මැද පළාතේ හිටපු මහ ඇමති, මහජන මුදල් වංචා කරලා තීන්දුව දුන්නා වසර 16කට නෑනත් සමග හිරේ. අපි අවධාරණයෙන් කියනවා අපේ රටේ අපරාධ කළ කිසිවෙකුට ගැලවීමක් නැහැ. ඒ හැමෝටම අනිවාර්යයෙන් නීතිය ඉදිරියට එන්න වෙනවා මයි.
අපි ජනතාවට බොරු කියලා නැහැ. කරන්ඩ බැරි කිසිවක් අපි කියන්නේ නැහැ. යමක් පොරොන්දු වුණොත් අපි නොකර ඉන්නෙත් නැහැ. එහෙම පුංචි ආණ්ඩුවත් අපි හදන්න ඕනෑ. මේ ප්‍රාදේශීය සභාවේ හොරු එලවන්න ඕනෑ. කොන්ත්‍රාත්වලින් කොමිස් ගහන එක නතර කරන්න ඕනෑ. මහජන මුදල් ටික රැකලා, මේ බිම්වලට සේවා ලබාදෙන වැඩපිළිවෙළක් හදන්න ඕනෑ. ඒකට බාධා කරන්න ඔය ඇවිත් ඉන්නේ. ඔබට ලොකු කාර්යභාරයක් තිබෙනවා. අපි රටේ ජනාධිපති ලෙස මාලිමාවෙන් අනුර සහෝදරයා පත්කර ගත්තා වගේම, මාලිමාවේ ලොකු ආණ්ඩුවක් හදලා රටට බාර දුන්නා වගේම, ගමේ පුංචි ආණ්ඩු ටිකත් මාලිමාවට බාර දෙන්න ඕනෑ. අපි ජනතාවට විශාල සහන දී තිබෙනවා. ලංකාවේ මෙතෙක් තිබුණු ආණ්ඩුවලින් වැඩිම ජාත්‍යන්තර සහයෝගය තිබෙන්නේ මාලිමාවේ ආණ්ඩුවට. අපි ජනාධිපතිවරණය ජයග්‍රහණය කරලා, මහ මැතිවරණය ජයග්‍රහණය කරලා පටන් ගත්ත දේශපාලන ගමන “පොහොසත් රටක් – ලස්සන ජීවිතයක්” නිර්මාණය කිරීමේ ගමන ඉස්සරහට යා යුතුව තිබෙනවා. ඊළඟ තබන යෝධ පියවර හැටියට මේ ඡන්දයෙන් සියලුම පළාත් පාලන ආයතන මාලිමාව අති විශිෂ්ට ජයග්‍රහණයක් අත්පත් කර ගන්න ඕනෑ. ඒ වෙනුවෙන් මේ සතිය තුළ ගෙවල්වලට යන්න. මාලිමාවට ඡන්දයක් නොදෙන්න තීරණය කළ අයටත් කතා කරන්න. මේක අපේ ආණ්ඩුව, ජනතාවගේ ආණ්ඩුව කිසිම හොරෙකුට වට්ටන්න දෙන්නේ නැහැ. අපේ ආණ්ඩුව අපි දිවි හිමියෙන් රකින්න ලැහැස්තියි. ලබන මාසෙ 06 දා හැමෝම එකතු කරගෙන ඡන්ද පොළට ගිහිල්ලා මාලිමාවට කතිරෙ ගහමු. අපි හැමදෙනාම එකතු වෙලා වැඩ කරමු. ගමත් මාලිමාවට ගනිමු. ජය නියතයි.
“රටේ ආර්ථික වැඩපිළිවෙළ ක්‍රියාත්මක කිරීමේදී,ගමේ ඡන්දය ජයගැනීම ඉතාම වැදගත්”
-ජාතික ජන බලවේගයේ ප්‍රධාන ලේකම් වෛද්‍ය නිහාල් අබේසිංහ සහෝදරයා-
මේ රටේ විධායකයත් ව්‍යවස්ථාදායකයත් අත්පත් කරගෙනයි බේරුවල රැස්වීමට අපි සහභාගී වෙන්නේ. මේ වගේම ඔක්තෝබර් මාසේ 27වැනිදා, මේ ස්ථානයේ මෙවැනිම රැස්වීමක් පැවැත්වුවා. ජනාධිපතිවරණයේදී පනස්අටලක්ෂයකට වැඩි ඡන්ද සංඛ්‍යාවක් ලැබුවා. පාර්ලිමේන්තු මැතිවරණයේදී හැටඅටලක්ෂය ඉක්මවා ඡන්ද ලැබුවා. කළුතර දිස්ත්‍රික්කයෙන් හාරලක්ෂ පනස්දෙදාහකට අධික ඡන්ද සංඛ්‍යාවක් ලැබුවා. ඒක 66%ක්. ප්‍රතිවාදී සමගි ජන බලවේගය ලැබුවේ 18%ක ප්‍රතිශතයක්. අපි මේ පළාත් පාලන 17ම අනිවාර්යයෙන් ජයග්‍රහණය කරනවා. අපි බාරගත්ත බංකොලොත් රට මේ වෙනකොට බංකොලොත්භාවයෙන් මුදාගෙන තිබෙනවා. ඒ වගේම දුක්විඳින ජනතාවගේ මූලික ප්‍රශ්න මේ වෙනකොට විශාල ප්‍රමාණයක් විසඳමින් ඉන්නවා. ගොවි ජනතාවට පොහොර සහනාධාරය, ධීවර ජනතාවට භූමිතෙල් සහනාධාරය, විශ්‍රාමිකයන්ට ඉහළ වැටුප්, රජයේ සේවකයන්ට අවුරුදු ගණනකට පස්සේ වැඩිම මූලික වැටුපක්, 2028 දී රාජ්‍ය සේවකයාගේ අවම මූලික වැටුප රුපියල් හතළිස්දාහට වැඩිවෙනවා. අතිකාල දීමනා ඇතුළු අනෙකුත් දීමනාද වැඩිවෙනවා.
අපට ඊළඟ කාර්යයන්ට එළඹෙන්න තිබෙනවා. අපේ පාර්ලිමේන්තුව නීති සම්පාදනය කරමින්, තීන්දු තීරණ ගනිමින්, මේ රටේ ජනතාව නිවැරදි දිසාවට ගෙන යමින් ඉන්නවා. ඊළඟ පියවර වෙන්නේ ප්‍රාදේශීය සභා, නගර සභා ශක්තිමත් කරන එක. මන්ත්‍රීවරයෙකුට විශාල කාර්ය මණ්ඩලයක් නැහැ. අපට ඉන්නේ ලේකම්වරයෙක්, රියදුරෙක් සහ පුංචි කාර්ය මණ්ඩලයක්. මේ අය වැඩ කරන්නේ ප්‍රාදේශීය සභා, නගර සභාවල සහ ප්‍රාදේශීය ලේකම් කාර්යාලවල සිටින නිලධාරීන් සමග. මේ ආයතනවලින් කෙරෙන කාර්යයන් ජනතා සේවය උදෙසා ක්‍රමවත්ව මෙහෙයවන එක. අපි ප්‍රාදේශීය සංවර්ධන කමිටු කැඳවමින් ප්‍රාදේශීය ලේකම් කාර්යාලවල නිලධාරීන් සමග උරෙනුර ගැටෙමින් ගමේ යටිතල පහසුකම් ටික දියුණු කිරීම, ඔබේ ආර්ථික වැඩපිළිවෙළ දියුණු කිරීම වැනි කටයුතුවල යෙදෙමින් ඉන්නවා. ඒ නිසාම තමයි මේ පළාත් පාලන මැතිවරණය ඉතාම වැදගත් වෙන්නේ. ඔබේ ඡන්දය තීරණාත්මකයි. ඔබේ එදිනෙදා ජීවිතයට සම්බන්ධව පාරවල් පිළිසකර කිරීම, විදුලි පහන් සවිකිරීම, කුණු කසළ ඉවත් කිරීම, පෙර පාසල් ශක්තිමත් කිරීම, දරුවන්ගේ සෞඛ්‍ය කටයුතු දියුණු කිරීම මේ වැනි නොයෙක් ආකාරයේ කටයුතු පළාත් පාලන ආයතනවලින් කෙරෙනවා. පළාත් පාලන ආයතන 17ම ජයග්‍රහණය කරවා දුන්නොත් අපේ මන්ත්‍රීවරුන්ට ගමේ වැඩේ හරියටම කරන්න අපට ලොකු ශක්තියක් වෙනවා. මේ මැතිවරණය ඔබට, අපිට තීරණාත්මකයි. අපගේ ජීවිතවල ඉතා සමීපම කටයුතු කරගන්න වෙන්නේ මේ නියොජිතයන් මගිනුයි. ඒකට නායකත්වය දෙන්න ජාතික ජන බලවේගයේ නියෝජිතයන් සූදානම්ව ඉන්නවා. ඒ නිසා 06 වැනිදා උදෙන්ම ඡන්ද පොළට ගොස් මාලිමාව ඉදිරියෙන් කතිරය ගසමින් ඔබේ යුතුකම ඉටුකරන හැටියට ඉල්ලා සිටිනවා.
“මැයි 6දා සිදුවන්නේ රටේ යෝධ සංවර්ධන යාන්ත්‍රණය සම්පූර්ණ කර ගැනීමක්”
-කළුතර දිස්ත්‍රික් නායක, ආණ්ඩු පක්ෂයේ සංවිධායක, සෞඛ්‍ය හා ජනමාධ්‍ය අමාත්‍ය වෛද්‍ය නලින්ද ජයතිස්ස සහෝදරයා-
අපි ඉන්නේ ඉතාම ජයග්‍රාහී මොහොතකයි. ජනාධිපතිවරණය දිනුවා. මහමැතිවරණය ඊටත් ඉහළින් දිනුවා. පළාත් පාලන ආයතනත් මාලිමාව ඉහළින්ම ජයග්‍රහණය කරනවා; ඒක ඉර හඳ වගේ විශ්වාසයි. තමන්ගේ පරාජය දැකලා විපක්ෂයේ අය දැන් විකාරයෙන් කියවන්න පටන්ගෙන තිබෙනවා. රාජිත කියනවා රනිල් දෙසැම්බර්වල ජනාධිපති පුටුවෙ වාඩිකර වනවාලු, කබීර් කියනවා දෙසැම්බර්වල සජිත් ජනාධිපති පුටුවෙ වාඩිකරවනවාලු. වාඩිකරන්න පුළුවන් මොරටුවෙන් ගත්ත පුටු දෙකක.
මේ රටේ ජනතාව අනුර කුමාර දිසානායක සහෝදරයා ගැනත් මේ ආණ්ඩුව ගැනත් පෙරටත් වඩා දැඩි විශ්වාසයක් තියල තියෙනවා. ජනාධිපතිවරණයේදී සහ මහ මැතිවරණයදී මාලිමාවට ඡන්දය නොදීපු අය අනිවර්යෙන්ම මෙවර මාලිමාවට ඡන්දය දෙනවා. ඇයි පසුගිය මහ මැතිවරණයේදී අපට ඡන්දය නොදීපු මේ ගම්වල අපේ අම්ම තාත්ත, මෙවර ඡන්දය මාලිමාවට දෙනවාමයි. විපක්ෂයේ අය එදා මොනවාද කිවුවේ. දැන් මොකද වෙලා තියෙන්නේ. අපි ආවොත් දානයක් දෙන්න බැහැ. බුද්ධාගම ඉවරයි. පෙරහැරක් කරගන්න බැහැ. කෝ දැන් ඒ අජිත් පෙරේලලා. ටොන් පච කෙළ කෙළා ඔය ගෙදර පොඩි රැස්වීමක් කරගෙන ඉන්නවා. ඒ දේශපාලනය මැයි 06දා අවසන් කරනවා. කථා දෙකක් නැහැ. මේතරම් හොඳ ආණ්ඩුවක්, මේ තරම් ජනතාවට සහන දෙන ආණ්ඩුවක්, ඉතිහාසයේ මහජන ආණ්ඩුවක් කිවුවහම වචනයේ පරිසමාප්ත අර්ථයෙන්ම මහජන ආණ්ඩුවක්. ජනතාවට දෙන්න පුළුවන් හැමදේම දෙන ආණ්ඩුවක්. කළුතර දිස්ත්‍රික්කයේ මේ පළාත් පාලන ආයතන 17 ම අපි දිනනවා.
ඒ පළාත් පාලන 17 ම සම්බන්ධකර ගෙන ඉදිරි අවුරු 4 දී ලොකු වැඩසටහනක්. දිස්ත්‍රික්කයේ පසුගිය අවුරුදු හැත්තෑ ගණනක් තිස්සේ නොකරපු සංවර්ධනයක් අපිට කරන්න තිබෙනවා. ඔන්න ඉතිහාසයේ පළවෙනි වතාවට කළුතරට එනවා මහ නගර සභාවක්. කළුතරට මහ නගර සභාව ගන්න මූලික වෙච්ච කෙනෙක් තමයි අද කළුතර කණ්ඩායම් නායකයා ලෙස තරග කරන අමාත්‍යාංශ ලේකම් ඒ.පී.ඒ. ගුණසේකර මහත්මයා. මහ නගර සභාවක් ගන්න කටයුතු කරපු අය. මහ නගර සභා එකක් ඇති දිස්ත්‍රික්කයට. අපට තියෙනව බේරුවල, පානදුර, හොරණ නගර සභාව. එක මහ නගර සභාවයි ඉතුරු නගර සභා තුනයි. ආරංචියි බේරුවලත් මහනගර සභාවක් කරනව කියල බය කරන්න එනවා. දැනට අපිට එහෙම අවශ්‍යතාවයක් නැහැ. කළුතර මහ නගර සභාව හැදුවහම ඒ ඇති දිස්ත්‍රිකයටම. ඊළඟට ප්‍රාදේශීය සභා 13 මේවායේ තිබෙන්නේ එක එක සංවර්ධන මට්ටම්. ඒ ටික දියුණු කරන්න අපිට විශාල වගකීමක් තියෙනවා. ඇයි? මේ ඡන්දය පුංචියට ගන්න එපා. අපි ආණ්ඩුවක් හැටියට මේ රට, සැලසුම් සහගතව සංවර්ධනය කරන මහා දැවැන්ත ව්‍යායාමයේ යාන්ත්‍රණය සකස්කර ගන්නා අවස්ථාවක්. මෙච්චර කාලයක් වැඩ කළේ ජනාධිපතිවරයා, කැබිනට් මණ්ඩලය, පාර්ලිමේන්තුව අපේ ආණ්ඩු පක්ෂ කණ්ඩායම. ප්‍රාදේශීය සම්බන්ධිකරණ කමිටු, දිස්ත්‍රික් සම්බන්ධිකරණ කමිටු නායකත්වය දීලා. ඒකෙන් මේ රටේ ජනතාවට සතුටුවෙන්න පුළුවන් දේවල් කළා.
රජයේ සේවකයන්ට මේ අප්‍රේල් මාසෙ දැනෙන මූලික වැටුපක් අතට ලැබුණා. රජයේ සේවකයෝ හිතුවෙත් නැහැ එච්චර ලැබෙයි කියල. නෝනයි මහත්තයයි දෙන්නම රජයේ සේවකයෝ නම් මේ මාසෙ හොඳ ගාණක් හම්බවුණා. ඊට වඩා හොඳ වැටුපක් ලැබෙනව මැයි මාසේ. ගොඩක් අයට ඕ.ටී., නිවාඩු දීමනා, මේ ආදී දීමනා ලැබෙන්නේ මැයි මාසේ. ඒක හැදෙන්නේ 2027 ජනවාරිවල ලැබීමට නියමිත මූලික වැටුපට අදාළව. ඉතිහාසයේ මොන කාලේද මෙහෙම ආණ්ඩු කළේ. රනිල් වික්‍රමසිංහල මූලික වැටුප 2500ක් කරන්න ඒක දීල අවුරුදු 3කට පස්සේ තමයි දීමනා දෙන්න පටන් ගත්තේ. අපි මාස 18කට පස්සේ මූලික වැටුපට දීමනා හදනවා. හොඳ නැද්ද? හොඳයි. ආණ්ඩුව නීතියක් සම්මත කළා, පෞද්ගලික අංශයේ වැඩකරන අයෙක් ඉන්නව නම් අප්‍රේල් මාසයේ සිට, අවම මූලික වැටුප රු.27,000ක් කරන්න. තිබුණේ විසිඑක්දාහ, එය විසිහත් දාහ කරනවා. ජනවාරි වෙන කොට රු.30,000ක් වෙනවා. අතට ලැබෙන මුදල් ප්‍රමාණය වැඩිකර තියෙනවා. ගෙදර දරුවා යන්නේ දරුවෝ 300ට වඩා අඩු පාසලකට නම්, ඒ වගේ දරුවො ලක්ෂ 16කට රු.6000ක් දුන්නා. පොත් පත් පාසල් උපකරණ ගන්න. දෙන්නෙක් හිටියොත් රු.12,000ක් ලැබෙනවා. තුන්දෙනෙක් හිටියොත් රු.18,000ක් ලැබෙනවා. තුන්සියයට වඩා අඩු පාසල් දරුවන් 8,25,000කට පාවහන් ගන්න රු.3000ක් දුන්නා . ශිෂ්‍යත්වය පාස්වුණු දරුවන්ට ලැබුණ රුපියල් 750ක ශිෂ්‍යාධාරය රු.1500 දක්වා දෙගුණ කළා. මහපොළ හිමිකම් කියන විශ්වවිද්‍යාල දරුවන්ට රු. 5000ක දීමනාව රු.7500ක් කළා. මහපොළ නොලැබෙන දරුවන් විශ්වවිද්‍යාලයේ ඉන්නවා නම් ඒ අයටත් ශිෂ්‍යාධාරය දෙනවා. තිබ්බේ 4500යි. ඒක රු.6500ක් දක්වා වැඩිකර තියෙනවා. කාර්මික විද්‍යාලවලට යන දරුවන්ට රු.5000ක දීමනාවක් ලැබෙනවා. මොන්ටිසෝරි යන දරුවන්ට කෑමවලට දීපු දීමනාව රු.60 දීමනාව රුපියල් 100 දක්වා වැඩි කළා. දරුවෝ එක්ලක්ෂ පනස්දාහකට වාසියක් වෙනවා. මොන්ටිසෝරියේ ටීචර්ගේ දීමනාව රු.1000කින් වැඩි කළා. මේ කිවුවේ පොඩ්ඩයි. මේ මාස හතරෙ කරපු දේවල් ටිකක් මේ. මාස 4කට මෙහෙම නම් මාස 60ක් යන කොට මේ රටට කොතරම් දේවල් ලැබෙනවාද කියල ඔබට කල්පනා කරන්න පුළුවනි. ඔබේ ඡන්දයට ඉහළම වටිනාකමක් දී තියෙනවා.
රනිල් ඇතුළු වික්‍රමසිංහ ආණ්ඩුවට ජනතාව වෙනුවෙන් කිසිවක් දෙන්න බැහැ. වැටුප් වැඩිකරන්න බැහැ. ඕ. ටී. වැඩිකරන්න බැහැ. රක්ෂා දෙන්න බැහැ. රනිල්ගේ ආණ්ඩුව කිවුවේ, අයි. එම්. එෆ්. එක නිසා කිසිවක් කරන්න බැහැ කියලා. දැන් ඒ වාරික ගන්න ගමන් ඔබට සහන දී තියෙනවා. ඒ වගේම ආණ්ඩුව 30,000ට රැකියා දෙන්න වැඩ පිළිවෙලක් සැලසුම් කර තිබෙනවා. ඒ යටතේ දැනටමත් උපාධිධාරීන්ට, ඕලෙවෙල් සමත් අයට රැකියා තිබෙනවා. ඒ අතර සෞඛ්‍ය අමාත්‍යාංශයේ ඩෙංගු සහායකයින් ස්ථිර කරන්න වැඩපිළිවෙලක් සැලසුම් කරගෙන යනවා. මේ යටතේ පවුල් සෞඛ්‍ය සේවිකාවන් 900ක් බඳවාගෙන තිබෙනවා. දැන් ඒ අය සේවයට වාර්තා කර සේවය කරමින් ඉන්නවා. මැයි මාසය ඇතුළතදී සෞඛ්‍ය සේවයට හෙද හෙදියන් බඳවා ගන්නවා 3146ක්. ඇටන්ඩන්ලා 1000ක්. රෝහල් කනිෂ්ඨ කාර්ය මණ්ඩලය තව 3000කට ආසන්න සංඛ්‍යාවක් බඳවා ගන්න පුළුවනි. මේ ආදී වශයෙන් පොලිස් නිලධාරීන්, ගුරුවරු විවිධ ක්ෂේත්‍රවල පුරප්පාඩු සොයා බලමින් අත්‍යවශ්‍ය තැන්වලට බඳවා ගැනීම් කරනවා. දෙන්න බැහැ කිවුවට අපි මේ රටේ ජනතාවට ඒ අවස්ථාව ලබා දුන්නා. දැන් සංචාරකයන් ලක්ෂ 30ක් ලංකාවට එන කොට එහි විවිධ රැකියා අවස්ථා ඇතිවෙනවා. අපේ විවිධ ක්ෂේත්‍රවල ආයෝජනය කරන්න බැහැ කියා සිටි ව්‍යාපාරිකයන්, විදේශිකයන් දැන් ලෑස්තියි ආයෝජනය කරන්න. ඒ නිසා පෞද්ගලික අංශයේත් රැකියා අවස්ථා ඇතිවෙනවා. ඒවා ඉතාම සාධාරණව දේශපාලන මැදිහත් වීමෙන් තොරව, දක්ෂතාවයට, හැකියාවට, කුසලතාවයට ලබාදෙන ක්‍රමයක් අනුගමනය කරනවා. අපි හදන නිෂ්පාදන ආර්ථිකයේ ප්‍රතිලාභ පෙරළා ඔබට ලබා දෙනවා.
නාගගොඩ ශික්ෂණ රෝහල ගැසට් කරගන්න පුළුවන් වුණාට ඇත්ත ශික්ෂණ රෝහලක් බවට පත්වුණේ නැහැ. අපි පළමු වැනි මාස කීපය තුළදී ඊට අවශ්‍ය පහසුකම් ටික දුන්නා. මේ ජුනි මාසේ වන විටි මොරටුව විශ්වවිද්‍යාලයේ වෛද්‍ය පීඨයේ පළවෙනි වසර අවසන් ශිෂ්‍ය කණ්ඩායම මහාචාර්ය ඒකකයේ පුහුණුවට එනවා. විශ්වවිද්‍යාල ආචාර්ය මහාචාර්ය විශේෂඥවරු එනවා. එවිට නියම ටීචින් හොස්පිටල් එකක් වෙනවා. එහා පැත්තේ තියෙනවා හොරණ මූලික රෝහල. එය දිස්ත්‍රික් මහ රෝහලක් දක්වා උසස් කර තියෙනවා. අපි බලාපොරොත්තු වෙනවා එය මධ්‍යම ආණ්ඩුවට පවරගෙන තවදුරටත් සංවර්ධනය කරන්න. මේ ආදී වශයෙන් සෞඛ්‍ය සේවාව දියුණු වෙනවා. සෞඛ්‍ය ඔබ ළඟට එනවා. අපේ ප්‍රධාන ඉලක්කයක් තමා ප්‍රාථමික සෞඛ්‍ය සේවය දියුණු කරන එක. වයස් ගත ජනගහනයට, බෝ නොවන රෝග වැඩියෙන් තිබෙන අයට, ඔබට පහසු තැනක කිලෝ මීටර් 3ට අඩු දුරකින් ඔබේ සෞඛ්‍ය රැකබලා ගන්නා මධ්‍යස්ථානයක් පිහිටු වනවා. කළුතර දිස්ත්‍රික්කයේ එවැනි මධ්‍යස්ථාන 172ක් ඉදිකිරීමට ස්ථාන හඳුනාගෙන තියෙනවා. ඉදිරි අවුරුදු 3 ඇතුළතදී ඒ ඉදිකිරීම් කටයුතු කරනවා. ඔබේ ආණ්ඩුව මේවාට මුදල් වෙන්කර තියෙන්නේ. මේ මස 4 වෙනුවෙන් ඔබ වෙනුවෙන් සංවර්ධන කටයුතු සඳහා රුපියල් බිලියන 1400ක්, කෝටි එක්ලක්ෂ හතලිස් දාහක්) වෙන් කර තියෙනවා. සෞඛ්‍යට පමණක් රුපියල් කෝටි නවදාස් දෙසීයක් තියෙනවා. මාර්ග සංවර්ධනයට තියෙනවා කෝටි තිස්පන්දාස් පන්සීයක්. පාලම් හදන්න කෝටි දෙදාස් එකසීය පනහක්. වාරිමාර්ග වෙනුවෙන් කෝටි හත්දාස් අටසීයක් වෙන්කරල තියෙනවා. මේ සියල්ල මහජන යහපතට.
මේ වැඩ කරන කොට ජනාධිපතිගේ සිට පහළට දුවන යාන්ත්‍රණයක් අවශ්‍යයි. ඒ දම්වැලේ පුරුක් එකතු විය යුතුයි. ඔබ මේ මැයි 6 දා ගමට නියෝජිතයෙක් හදාගන්නවා නෙවෙයි අර යෝධ සංවර්ධනයේ යාන්ත්‍රණයේ අපට සම්පූර්ණ කරගන්න බැරිවේච්ච කොටස සම්පූර්ණ කර ගන්න තමයි මේ කටයුතු කරමින් ඉන්නේ. මේ වැදගත් අවස්ථාවක්. වැදගත් ඡන්දයක්. බේරුවල නගර සභාවයි, ප්‍රාදේශීය සභාවයි විතරක් නොවේ මේ ආයතන 17ම ජයග්‍රහණය කරගෙන ඔබේ ජීවිතය ලස්සන කර ගනිමු. පොහොසත් රටක් කර ගනිමු. ඒ වෙනුවෙන් ශක්තිමත්ව සියලු දෙනාම මාලිමාව වටා එක්වෙන්න. සියලුම කොට්ඨාස ජයග්‍රණය කරමු.
(-පොළොන්නරුව ජන රැලිය – 2025.04.20-) පාස්කු ප්‍රහාරය සම්බන්ධ ජනාධිපති කොමිෂන් සභා වාර්තාවේ සියලු ලේඛන විමර්ශනය කිරීම වෙනුවෙන් තමා එය අද අපරාධ පරීක්ෂණ දෙපාර්තමේන්තුව වෙත යොමු කළ බවත්, මෙම ම්ලේච්ඡ ප්‍රහාරයේ සැබෑ වගඋත්තරකරුවන් ජනතාවට හෙළි කිරීමේ වගකීම ඉටු කරන බවත් ජනාධිපති අනුර කුමාර දිසානායක මහතා අවධාරණය කළේය. 2019 අප්‍රේල් සිට 2024 සැප්තැම්බර් දක්වා ගෙවී ගිය වසර […]
(-පොළොන්නරුව ජන රැලිය – 2025.04.20-)
පාස්කු ප්‍රහාරය සම්බන්ධ ජනාධිපති කොමිෂන් සභා වාර්තාවේ සියලු ලේඛන විමර්ශනය කිරීම වෙනුවෙන් තමා එය අද අපරාධ පරීක්ෂණ දෙපාර්තමේන්තුව වෙත යොමු කළ බවත්, මෙම ම්ලේච්ඡ ප්‍රහාරයේ සැබෑ වගඋත්තරකරුවන් ජනතාවට හෙළි කිරීමේ වගකීම ඉටු කරන බවත් ජනාධිපති අනුර කුමාර දිසානායක මහතා අවධාරණය කළේය.
2019 අප්‍රේල් සිට 2024 සැප්තැම්බර් දක්වා ගෙවී ගිය වසර පහමාර තුළ මෙම පරීක්ෂණවල අරමුණ වී තිබුණේ සැබෑ සැලසුම්කරුවා යටපත් කිරීම බව පෙන්වා දුන් ජනාධිපතිවරයා වත්මන් ආණ්ඩුව බලයට පත්ව ගෙවී ගිය මාස 06 තුළ පාස්කු ප්‍රහාරයට වගකිව යුත්තන් නීතිය හමුවට පැමිණ වීම සඳහා ඉතා නිරවුල්ව පියවරෙන් පියවර අවශ්‍ය ක්‍රියාමාර්ග ගෙන තිබෙන අතරම, ඉදිරියටද ගනිමින් සිටින බවද පැවසීය.
පාස්කු ප්‍රහාරය පිළිබඳ ජනාධිපති කොමිෂන් සභා වාර්තාවේ සියලු කොටස් මෙතෙක් සමාජයට හෝ අපරාධ පරීක්ෂණ දෙපාර්තමේන්තුවට ඉදිරිපත් කර නොතිබූ බවත්, වත්මන් රජය බලයට පත් නොවන්නට එම ලේඛන අදටත් සැඟවී තිබෙන බවත් ජනාධිපතිවරයා ප්‍රකාශ කළේය
ජනාධිපති අනුර කුමාර දිසානායක මහතා මේ බව සඳහන් කර සිටියේ “ජය නියතයි ගම අපිටයි” ජන රැලි මාලාවේ තවත් ජන රැලියකට අද (20) පොළොන්නරුවේදී එක් වෙමිනි.
ජන රැලිය ඇමතූ ජනාධිපතිවරයා වැඩිදුරටත් මෙසේද පැවසීය.
පසුගිය සැප්තැම්බර් 21 වන දා අපේ රටේ එතෙක් පැවති දේශපාලන ගමන්මග මුළුමනින්ම වෙනස් කර මේ රටේ ජනතාව විසින් නව දේශපාලන තීන්දුවක් ගනු ලැබුවා. පරම්පරා කිහිපයක් ඉහළ කණ්ඩායමකට හිමි ව තිබූ මේ රටේ දේශපාලන බලය පළමු වතාවට සැප්තැම්බර් 21 වන දා පොදු ජනතාව අතට මාරු වුණා. ඒ වෙනුවෙන් මෙම පොළොන්නරුව දිස්ත්‍රික්කයේ ජනතාව විශාල දායකත්වයක් ලබා දුන්නා. ඉන්පසුව නොවැම්බර් 14 වන දා පාර්ලිමේන්තු මැතිවරණය පැවැත්වුණා. එම මැතිවරණයේදීද මේ රටේ ජනතාව ජාතික ජන බලවේගයට සුවිශේෂී ජයග්‍රහණයක් ලබා දුන්නා.
ඉන් පසුව ආණ්ඩුවේ මාස 06ක පාලනයෙන් පසු මෙම මැයි 06 වන දා පළාත් පාලන මැතිවරණය පැවැත්වෙනවා. ඒ අනුව මෙම පළාත් පාලන මැතිවරණයේදීද ශක්තිමත් ජන වරමක් පිළිබිඹු කිරිමට අපට අවශ්‍යයි. ඉතා පැහැදිලිව මෙම පළාත් පාලන ආයතන සියල්ල ජාතික ජන බලවේගය ජයග්‍රහණය කරනවා.
අද මේ රටට ජාතික ජන බලවේගය කියන දේශපාලන ව්‍යාපාරය තෝරා නොගෙන තෝරා ගත හැකි වෙනත් දේශපාලන ව්‍යාපාරයක් නැහැ. ජාතික ජන බලවේගයේ නායකත්වය නැතිව වෙනත් නායකත්වයක් නැහැ. අද මේ රට ඉදිරියට ගෙන යාමට වගකීම, හැකියාව සහ වුවමනාව තිබෙන එකම දේශපාලන ව්‍යාපාරය ජාතික ජන බලවේගයයි. මේ රටේ ජනතාව දීර්ඝ කාලයක් තිස්සේ විවිධ පක්ෂ සමඟ විවිධ බැඳීම් ඇති කර ගෙන තිබුණා. ජාතික ජන බලවේගය අතට බලය ලබා දුන්නේ එම බැඳීම් සියල්ල ලිහා දමලායි. එදා වගේම අදත් අපි ඔබට සහතික වෙනවා අපට ලබා දුන් බලය අබ මල් රේණුවකින්වත් ජනතාවට අහිතකර ලෙස උපයෝගී කර ගන්නේ නැහැ වගේම සෑමවිටම ජනතා අවශ්‍යතා වෙනුවෙන් මෙම බලය උපයෝගී කර ගන්නවා කියලා.
දීර්ඝ කාලයක් අපේ රට පාලනය කළ පාලකයන් විසින් අපේ රටේ ආර්ථිකය පතුලටම ඇද දමා තිබුණා. මෑත දශකයේ ලෝකයේ එවන් ඉරණමක් අත් ව තිබුණේ රටවල් දෙක, තුනකට පමණයි. මේ ව්‍යසනය හිමි වූ රටවල් දෙක තුන අතර 2022 – 2023 සමයේ ශ්‍රී ලංකාව ඉදිරියෙන්ම සිටියා. වසර 76ක් මේ රටේ පාලක කණ්ඩායම් විසින් හපයක් බවට පත් කර තිබූ ආර්ථිකය සහතික වශයෙන්ම ජාතික ජන බලවේගය විසින් පියවරෙන් පියවර ගොඩනඟනවා. යළි කිසි දිනක අපේ දරු පරම්පරාවට එවැනි ව්‍යසනයකට මුහුණ දීමට අපි ඉඩ දෙන්නේ නැහැ.
අපි කෙතරම් ව්‍යසනවලට මුහුණ දුන්නාද? තිස් අවුරුදු යුද්ධයක් පැවතුණා. ජාතිවාදය නිසා සිංහල, දෙමළ, මුස්ලිම් ජනතාව අතර සැකය සහ අවිශ්වාසය වර්ධනය වුණා. සාමාන්‍යයෙන් මැතිවරණයකදී නැගෙනහිර ජනතාව මුස්ලිම් පක්ෂවල නායකයෝ තෝරනවා. උතුරේ ජනතාව දෙමළ පක්ෂවල නායකයන්වත්, දකුණේ අය සිංහල පක්ෂවල නායකයන්වත් තෝරනවා. ඡන්දවලදී මේ අයුරින් අපි බෙදුණා. ඡන්ද ලබා ගැනීම සඳහා එකිනෙකා අතර ජාතිවාදය වපුරුවා. මෙම බෙදීම නිසා ඉතා කළු සහ දුක් සහිත ඉරණමකට අපේ රට මුහුණ දුන්නා.
එහෙත් පසුගිය පාර්ලිමේන්තු මැතිවරණයේදී උතුරේ, නැගෙනහිර සහ දකුණේ සියලු ජනතාවගේ තේරීම බවට පත් වුණේ ජාතික ජන බලවේගයයි. හැමදාමත් අපේ රට එකට තිබුණ නමුත් ජනතාව විරසක වී සිටියා. දේශපාලන පක්ෂ විසින් ජනතාව විරසක කර තිබුණා. මෙරට පළමු වතාවට ජනතාව එක කුඩයක් යටතට එකතු වී තිබෙනවා. ඒ තමයි ජාතික ජන බලවේගයේ කුඩය. එය අපේ රටේ දේශපාලනයේ සුවිශේෂී හැරවුමක්. අපි දැන් මාස හයකට වැඩි කාලයක් මේ රට පාලනය කරමින් සිටිනවා. කොතැනකවත් යළි ජාතිවාදී ගැටුමක් ඇති වීමට අපි ඉඩ දෙන්නේ නැහැ. ඒ සඳහා තිබෙන නීති ප්‍රමාණවත් නැතිනම් නව නීති සම්පාදනය කර හෝ අපේ රට තුළ ජාතිවාදය තුරන් කර ජාතික සමගිය නිර්මාණය කරනවා.
අද පාස්කු ඉරිදා දිනයයි. 2019 පාස්කු ඉරිදා බලය ලබා ගැනීමේ අරමුණින් විශාල ඛේදවාචකයක් සිදු වුණා. 2019 අප්‍රේල් සිට 2024 සැප්තැම්බර් දක්වා ආසන්න වශයෙන් ගත් විට වසර පහමාරක් මෙම පරීක්ෂණවල අරමුණ වී තිබුණේ සැබෑ සැලසුම්කරුවා යටත්පත් කිරීමයි. 2019 පැවති ආණ්ඩුව හෝ නැවත 2019 නොවැම්බර්වල බලයට පත් වූ ආණ්ඩුවට හෝ සැබෑ වගඋත්තරකරුවන් නීතිය හමුවට ගෙන ඒමට කිසිදු වුවමනාවක් තිබුණේ නැහැ. දැන් පාස්කු ප්‍රහාරයට වසර 06ක් ගත වී තිබෙනවා. අපි බලය අරගෙන මාස 06කට ආසන්න කාලයක් ගත වෙමින් තිබෙනවා. අපි ඉතාමත් නිරවුල්ව පියවරින් පියවර පාස්කු ප්‍රහාරයට වගකිව යුත්තන් නීතිය හමුවට පැමිණ වීම සඳහා අවශ්‍ය ක්‍රියාමාර්ග ගෙන තිබෙන අතර ගනිමින්ද සිටිනවා.
පාස්කු ප්‍රහාරය පිළිබඳ ජනාධිපති කොමිෂන් සභා වාර්තාවක් අද මට ලැබුණා. එම සියලු වාර්තා සමාජයට හෝ අපරාධ පරීක්ෂණ දෙපාර්තමේන්තුවට මෙතෙක් ඉදිරිපත් කර තිබුණේ නැහැ. මෙම වාර්තා එළියට දැමුවේ ඇතැම් ලේඛන කොටස් සඟවලයි. පාස්කු ප්‍රහාරය සම්බන්ධ ජනාධිපති කොමිෂන් සභා වාර්තාවේ සියලු ලේඛන විමර්ශනය කිරීම වෙනුවෙන් අද මම එය අපරාධ පරීක්ෂණ දෙපාර්තමේන්තුව වෙත යොමු කළා. අපි බලයට පත් නොවන්න තවමත් එම ලේඛන සඟවා තිබෙනවා. අපි අද ඒ සියල්ල අපරාධ පරීක්ෂණ දෙපාර්තමේන්තුවට යොමු කළා හොඳට කියවා නිර්දේශ ඉදිරිපත් කිරීමට. එහි නිර්දේශ ගණනාවක් තිබෙනවා. එම නිර්දේශ සියල්ල ක්‍රියාත්මක කළ යුතුයි.
ඒ වගේම මෙම ප්‍රහාරය පිළිබද තැන තැන ආන්දෝලනයට තුඩු දුන් සිදුවීම් තිබෙනවා. පළමු පොලිස් නිලධාරින් දෙදෙනා ඝාතනය කළ ස්ථානයට ජැකට් එකක් ගිහින් දැම්මේ කවුද? එහි සැකයක් තිබෙනවා. සමහර එමි අංක තිබෙන දුරකථන අංක භාවිත කළේ කවුද කියා සැකයක් තිබෙනවා. අපි ඒ සියලු සැකයන් නිරාකරණය කරමින් පරීක්ෂණ හා විමර්ශන ක්‍රියාවලිය ඉදිරියට ගෙන යනවා. මේ රටේ ජනතාවට පාස්කු ප්‍රහාරයේ සැබෑ වගඋත්තරකරුවන් හෙළි කිරිමේ වගකීම අපි ඉටු කරනවා.
ඒ වගේම මේ රටේ බිඳ වැටුණු ආර්ථිකය සැලකිය යුතු මට්ටමේ ස්ථාවරභාවයකට ගෙන ඒමට අද අපි සමත් වී තිබෙනවා. ඒ අනුව අද රට යථා තත්ත්වයට පත් වෙමින් තිබෙනවා. අද වාහන වෙළඳපොළ විවෘත වෙලා තිබෙනවා. රුපියලට සාපේක්ෂව ඩොලරය ස්ථාවර මට්ටමක තිබෙන අතර මෙය රටේ ආර්ථික ස්ථාවරභාවයේ සංඥාවක් වෙනවා. අද තෙල් මිල අඩු වෙලා. ඒ වගේම විදුලි බිල අඩු වෙලා තිබෙනවා. අත්‍යවශ්‍ය ආහාර ද්‍රව්‍යවල මිල අඩු කිරීමට අපි සමත් වී තිබෙනවා.
මෙම පළාත්වල සංවර්ධනය වෙනුවෙන් අවශ්‍ය මුදල් ලබා දීමට අපි සූදානම්. ඒ අනුව මින්නේරිය වැව යටතේ තිබෙන සුළු හා මධ්‍ය පරිමාණ වැව් අමුණු ප්‍රතිසංස්කරණය කිරීමට අපි මිලියන 500ක් වෙන් කළා. තවත් මුදල් ලබා දිය හැකියි. ඒ මුදල් වැය කරමින්, වැඩ කළ හැකි රාජ්‍ය යාන්ත්‍රණයක් අපිට අවශ්‍ය වෙනවා. ඒ සඳහා අවශ්‍ය සැලසුම් අපි සකස් කර තිබෙනවා.
එදා අපේ රටේ නීතියට යටත් නැති සහ බිය නැති කණ්ඩායමක් සිටියා. අපි මේ රටේ සැම පුරවැසියාම නීතියට යටත්වන නීතියට බියක් තිබෙන සමාජයක් ගොඩනඟනවා. අපරාධ පරීක්ෂණ දෙපාර්තමේන්තුව මගින් අද විශාල පරීක්ෂණ ගණනාවක් දියත් කර තිබෙනවා. නීතිපති දෙපාර්තමේන්තුව වැඩ පටන් ගෙන තිබෙනවා. අල්ලස් හෝ දූෂණ විමර්ශන කොමිෂන් සභාව වැඩ පටන් ගෙන තිබෙනවා. නීති ප්‍රමාණවත් නොවූ විට අපි නව නීති සකස් කර සම්මත කර දුන්නා. නීති විරෝධීව උපයාගෙන තිබෙන වත්කම් නැවත පවරා ගැනීම සඳහා අපි පසුගිය අප්‍රේල් 08 වන දා නීතියක් සම්මත කර ගත්තා. මේ අයුරින් අපි නීති ශක්තිමත් කර තිබෙනවා මහජනයාගේ මුදල්වලට අත තිබ්බොත් දඩුවම් ලැබෙනවා කියා බියක් ඇති විය යුතුයි. මේ රටේ ජනතාව අපට බලය ලබා දී අපේක්ෂා කළ දේ අද අපි අද ඉතා හොදින් ඉටු කරමින් සිටිනවා.
අද වැඩියෙන්ම කලබල වී සිටින්නේ වැඩියෙන්ම බිය වූ අයයි. අපිට කිසිවෙකුගෙන් පළිගැනීමට අවශ්‍ය නැහැ. අපට අවශ්‍ය යළි මේ රටේ නීතියේ විධානයේ ආධිපත්‍යය තහවුරු කිරීමටයි. මහජනතාවගේ රුපියලකට අත තබනවා නම් බිය විය යුතු මනෝභාවයක් මේ රටේ ඇති කළ යුතුයි. කුමන අවස්ථාවේ හෝ දඬුවමක් ලැබෙනවා කියා හැඟිමක් ඇති විය යුතුයි. මේ රට ගොඩනැඟිය හැක්කේ එවිටයි.
එදා රාජ්‍ය වත්කම් අතළොස්සක් අතරේ බෙදී ගියා. දැන් භාණ්ඩාගාරයේ ධනය ජනතාව වෙත ගලාගෙන ඒමට පටන් ගෙන තිබෙනවා. ආණ්ඩුවකින් සිදු විය යුත්තේ එයයි. එය වත්මන් ආණ්ඩුව ඉටු කරමින් සිටිනවා. ජාතික තලයෙන් මෙම වැඩකොටස ඉටු කරන විට මෙම වැඩපිළිවෙළ ශක්තිමත් කිරීමට ප්‍රාදේශීය නායකත්වය අවශ්‍ය වෙනවා. ගමේ පාරවල් ටික හදන විට, ගම සංවර්ධනය කරන විට එය ග්‍රාමීය වශයෙන් මෙහෙය වීමට දේශපාලන නායකත්වය අවශ්‍ය වෙනවා. ඒ සඳහා හොරකම් නොකරන අයට මෙම ප්‍රාදේශීය සභාව සහ නගර සභාවට භාර දිය යුතුයි. ජනතාවගේ මුදල් පරිස්සම් කර වියදම් කරන බවට සහතිකයක් දිය හැකි කණ්ඩායමක් අපි මෙවර පළාත් පාලන ආයතන වෙත පත් කර ගනිමු’යි කියා මම ඉල්ලා සිටිනවා.
(-බදුල්ල ජන රැලිය – 2025.04.19-) ජනපති බදුල්ලේදී කියයි මෙම මහපොළවේම ඉපිද, මහපොළව සමඟ පොරබදිමින්, මහපොළෙවේම මියැදුණද වතුකරයේ කම්කරු ජනතාව මෙරට පුරවැසියන් ලෙස නොසැලකීමේ යුගය අවසන් කර ඔවුන්ගේ අයිතින් දිනා දෙන බව ජනාධිපති අනුර කුමාර දිසානායක මහතා පැවසීය. ඉන්දීය රජය යටතේ හිමිව ඇති නිවාස ව්‍යාපෘතිය කඩිනම් කර එම ජනතාවට ලබාදීමට කටයුතු කරන අතරම, වත්තට ගැට ගසා […]
(-බදුල්ල ජන රැලිය – 2025.04.19-)
ජනපති බදුල්ලේදී කියයි
මෙම මහපොළවේම ඉපිද, මහපොළව සමඟ පොරබදිමින්, මහපොළෙවේම මියැදුණද වතුකරයේ කම්කරු ජනතාව මෙරට පුරවැසියන් ලෙස නොසැලකීමේ යුගය අවසන් කර ඔවුන්ගේ අයිතින් දිනා දෙන බව ජනාධිපති අනුර කුමාර දිසානායක මහතා පැවසීය.
ඉන්දීය රජය යටතේ හිමිව ඇති නිවාස ව්‍යාපෘතිය කඩිනම් කර එම ජනතාවට ලබාදීමට කටයුතු කරන අතරම, වත්තට ගැට ගසා තිබෙන වතුකර ජනතාව, වත්තෙන් නිදහස් කර නිදහස් ව්‍යවසායකයෙකු ලෙස ගොඩනැඟීමට ආණ්ඩුව මැදිහත්වන බවද ජනාධිපතිවරයා ප්‍රකාශ කළේය.
එසේම දැනට වතු කම්කරුවන් වෙනුවෙන් ප්‍රකාශයට පත් කර ඇති රුපියල් 1700ක වැටුප ස්ථීර කර ගැනීම සඳහා වතු සමාගම් සමඟ සාකච්ඡා කරමින් රජයක් ලෙස ඒ වෙනුවෙන් ගත හැකි සැම ක්‍රියාමාර්ගයක්ම ගන්නා බවද ජනාධිපතිවරයා පැවසිය.
වසර 76ක් පුරා මාරුවෙන් මාරුවට බලයට පත් වූ පාලකයින් විනාශ කළ රටේ ආර්ථිකය පියවරින් පියවර ගොඩනැගීමේ වැඩපිළිවෙළ මාස 06ක් වැනි කෙටි කාලයක් තුළ වත්මන් රජය ආරම්භ කර තිබෙන බවත් ආණ්ඩුව මාස හයෙන් කඩා වැටෙන තුරු ඇතැමුන් බලා සිටියද අද හතරගාතෙන් වැටී සිටින්නේ ආණ්ඩුව නොව එම අසාර්ථක දේශපාලනඥයන් බවද පැවසිය.
එසේම ජාතික ජන බලවේගය නැවත මේ රටේ ආර්ථිකය ගොඩනඟන්නේ යළි කිසිදු දිනක 2021, 2022 වසරවල ඇති වූ තත්ත්වය රට තුළ නිර්මාණය නොවන ආකාරයෙන් බවද ජනාධිපතිවරයා අවධාරණය කළේය.
ජනාධිපති අනුර කුමාර දිසානායක මහතා මේ බව සඳහන් කර සිටියේ “ජය නියතයි ගම අපිටයි” ජන රැලි මාලාවේ තවත් ජන රැලියකට ඊයේ (19) බදුල්ලේදී එක් වෙමිනි.
ජන රැලිය ඇමතු ජනාධිපති අනුර කුමාර දිසානායක මහතා වැඩිදුරටත් මෙසේද පැවසීය.
පැරණි අසාර්ථක දේශපාලන කඳවුරු පරාජය කර පසුගිය සැප්තැම්බර් 21 වනදා පැවති ජනාධිපතිවරණයෙන් ජාතික ජන බලවේගය ජයග්‍රහණය කළා. පසුව නොවැම්බර් 14 වනදා පැවති මහ මැතිවරණයේදී මේ රටේ ජනතාව එක් වී ජාතික ජනබලවේගයට සුවිශේෂී ජයග්‍රහණයක් ලබා දුන්නා. දැන් මැයි 06වනදා පළාත් පාලන මැතිවරණය පැවැත්වෙනවා. මෙම පළාත් පාලන ආයතන සියල්ලේම ජයග්‍රහණය ජාතික ජන බලවේගය අත්පත් කර ගන්නවා.
අපේ රටේ දේශපාලනයේ ඉතාමත් වැදගත් හැරවුමක් සිදුව තිබෙනවා. පවුල් කිහිපයක් විසින් දිගු කාලයක් පුරා අපේ රට පාලනය කළා. එහි ප්‍රතිඵලය බවට පත් වුණේ මුළුමනින්ම කඩා වැටුණු රටක්. නීතියක්, විනයක් නැති රටක්. හැම පැත්තෙන්ම අසාර්ථක වූ රටක් ඔවුන් නිර්මාණය කළා. ජනතාව දීර්ඝ කාලයක් මාරුවෙන් මාරුවට ඔවුන්ට ඡන්දය දී ඔවුන් දෙස බලා සිටියා. අනතුරුව වසර 76කට පසුව උතුරේ, නැගෙනහිර, දකුණේ සියලු ජනතාව එක් වී ජාතික ජන බලවේගයේ ආණ්ඩුව හැදුවා.
මේ මාස 06 තුළ අපි ක්‍රමානුකූලව පියවරෙන් පියවර මේ රට ගොඩනැඟීම සඳහා අවශ්‍ය වන වැඩපිළිවෙළ සකස් කර ක්‍රියාත්මක කරමින් පවතිනවා. අප සතුව තිබු පළමු අභියෝගය වූයේ රටේ ආර්ථික ස්ථාවරභාවය ඇති කිරීමයි. රටක් ඉදිරියට ගෙන යාමට ආර්ථික ස්ථාවරභාවය අතිශය වැදගත් වෙනවා. මීට වසර දෙක හමාරකට පෙර අපේ රටේ තිබුණේ ඉතා අසාර්ථක, ස්ථීර නොවන නිරන්තරයෙන් කඩා වැටීමට ලක්වන ආර්ථිකයක්. නිදාගන්නා විට ඩොලරයේ අගය එක් අගයක් ගත් අතර නැගිටින විට තව අගයක් වෙලා තිබුණා. මේ අයුරින් අස්ථාවර ආර්ථිකයක් පැවතුණා. බැංකු පොලී අනුපාතය 30% – 35%ට ගියා. උද්ධමනය ඉහළ ගියා. එපමණක් නොවෙයි අපේ රටේ ක්‍රියාත්මක වෙමින් තිබු විදේශ ව්‍යාපෘති සියල්ල දාලා ගියා. ඒ නිසා අනෙක් සියල්ලට පෙර රටේ ආර්ථිකය ස්ථාවර කිරීමේ කාර්යය ඉටු කිරීමට අපිට සිදු වුණා. මේ වන විට සැලකිය යුතු ප්‍රමාණයකින් අපේ රටේ ආර්ථිකය ස්ථාවර මට්ටමට පැමිණ ඇති බව මම සතුටින් ප්‍රකාශ කරනවා.
ඒ වගේම රට තුළ ස්ථාවර වන ආර්ථිකයේ ප්‍රතිලාභ ජනතාවට ලබා දීමට අපි මේ වන විට කටයුතු කරමින් සිටිනවා. අස්වැසුම දිමනාව වැඩි කිරිම සහ අලුතින් පවුල් ලක්ෂ 04කට අස්වැසුම ලබා දීමට අපි කටයුතු කරනවා. අපි ජනතාව බලාගත යුතුයි. පාසල් ළමුන් ලක්ෂ 16කට මෙම ජනවාරි මාසයේ සිට පාසල් පොත් සහ උපකරණ ලබා දීම සඳහා අපි කටයුතු කර තිබෙනවා. සිසුන්ට පාසල් පොත් සහ උපකරණ ලබා ගැනීම සඳහා ආධාර කරන පළමු ආණ්ඩුව මෙයයි.
අපි ග්‍රාමීය දුප්පත්බව තුරන් කළ යුතුයි. දුප්පත් බව සමාජ ඛේදවාචකයක්. ඒ නිසා අපේ පාලන කාලය තුළ ලංකාවේ දුප්පත්බව තුරන් කිරීම සඳහා කටයුතු කරන බව ප්‍රකාශ කළ යුතුයි. අපි ආකාර කිහිපයකින් ඒ සඳහා කටයුතු කරමින් සිටිනවා. දුප්පත්භාවයෙන් ගොඩඒම සඳහා දිගුකාලීන වුවත් ස්ථිර විසදුමක් අධ්‍යාපනය තුළ තිබෙනවා. හොඳට ඉගෙන ගෙන හොඳ රැකියාවක් සොයා ගතහොත් එම පවුලට දුප්පත්භාවයෙන් ගොඩ ඒමට හැකියාව තිබෙනවා. ඊට අවශ්‍ය අධ්‍යාපන ප්‍රතිසංස්කරණ අපි කඩිනමින් ක්‍රියාත්මක කරනවා.
ඒ වගේම කෘෂිකර්මාන්තය නංවාලීම කෙරෙහි අපි විශේෂ අවධානය යොමු කර තිබෙනවා. කෘෂිකර්මාන්තය නව තාක්ෂණය සමග බද්ධ කිරිම පිළිබඳ අපි ඉන්දියාව සහ චීනය සමඟ සහයෝගිතා ගිවිසුම්වලට එළැඹ තිබෙනවා. ඒ වගේම කඩා වැටී තිබෙන බීජ ගොවිපොළ නැවත ප්‍රතිසංස්කරණය කර සාධාරණ මිලකට බීජ ලබා දීමට අපි කටයුතු කරනවා. ඒ වගේම ගොවි ජනතාවට සාධාරණ මිලකට වල්නාශක සහ කෘමිනාශක ලබා දීමට අවශ්‍ය පියවර අපි ගන්නවා. ඒ වගේම එම ගොවි ජනතාවගේ දරුවන් නව ව්‍යවසායකයන් සහ සුළු හා මධ්‍ය පරිමාණ කර්මාන්තකරුවන් බවට පත් කළ යුතුයි. ඒ සඳහා රාජ්‍ය බැංකු මගින් සංවර්ධන ණයක් ලබා දීමට අපි සැලසුම් කර තිබෙනවා. ඒ අනුව රාජ්‍ය බැංකුවල සංවර්ධන ඒකකයක් හදලා අඩු පොලියට ඇපයක් රහිතව ණය මුදලක් ලබා දීමට අපි කටයුතු කරනවා. අපි එකතුවෙලා අලුත් පරම්පරාව වෙනුවෙන් අලුත් ආර්ථික ක්ෂේත්‍ර විවෘත කර දෙනවා. අපි ඒ සඳහා තානාපතිවරුන්ගේ සහාය ඉල්ලා තිබෙනවා. ඔවුන් සිටින රටවල වෙළෙඳපොළ අවස්ථා සොයාබලා මෙම වෙළෙඳ සබඳතා ගොඩනඟා දීමට අපි සූදානම්.
දුප්පත්භාවයේ පතුලේම ගිලී සිටින්නේ අපේ රටේ කඳුකරයේ ජනතාවයි. ඔවුන් විශාල ලෙස සෞඛ්‍ය අනාරක්ෂිතභාවයකින් පෙළෙනවා. අධ්‍යාපනයේ ඉතාමත් පහළ අඩියක පසු වෙනවා. ඔවුන් මේ රටේ පුරවැසියන්.
ඔවුන් මෙරටට පැමිණ දැන් අවුරුදු 200කට වැඩි කාලයක් වෙනවා. මේ මහපොළෙවේ ඉපිද, මහපොළව සමග පොරබැද ජාතික ආර්ථිකයට දායකත්වය ලබා දී මේ මහපොළෙවේ මියැදෙන නමුත් ඔවුන් අපේ රටේ පුරවැසියන් ලෙස සලකන්නේ නැහැ.
ඉන්දියානු රජයේ ණය ආධාර ක්‍රමය යටතේ මොවුන් වෙනුවෙන් නිවාස ව්‍යාපෘතියක් ලැබී තිබෙනවා. එහෙත් තවමත් එහි කටයුතු අවසන් කිරීමට නොහැකි වී තිබෙනවා. අපි ඉතා ඉක්මනින් එම නිවාස ඉදිකිරීම සඳහා සුදුසු ඉඩම් හඳුන්වාදී එම නිවාස ව්‍යාපෘතිය කඩිනමින් අවසන් කර එම ජනතාවට නිවාස ලබා දීමේ වැඩපිළිවෙළ ආරම්භ කරනවා.
ඒ වගේම වතු ජනතාවට සාධාරණ වැටුපක් ලැබිය යුතුයි. වතු සමාගම්වල වත්තෙන් කොටසක් එම වැඩකරන අයට ලබා දීමේ නියමු ව්‍යාපෘතියක් ක්‍රියාත්මක කිරීමට අදත් අපි වතු සමාගම් කිහිපයක් සමග සාකච්ඡා කළා. ඔවුන් එහි වැඩ කර කර්මාන්තශාලාවට තේ දලු ලබාදිය යුතුයි. වත්තට ගැට ගසා තිබෙන පුරවැසියා වත්තෙන් නිදහස් කර ගෙන නිදහස් ව්‍යවසායකයෙකු සහ නිදහස් ගොවියෙකු ලෙස ගොඩනැඟිය යුතුයි. ඒ සදහා නියමු ව්‍යාපෘතියක් අපි ඉතා ඉක්මනින් ආරම්භ කිරීමට කටයුතු කරනවා. එය අත්හදා බලා එය සාර්ථක නම් ඉදිරියටම ක්‍රියාත්මක කරනවා.
ඒ වගේම අපි දන්නවා වතුකරයේ වැටුප සාධාරණ වැටුප් තලයක නැහැ. අපි වතු සමාගම් සමග සාකච්ඡා කර දැනට ප්‍රකාශයට පත් කර ඇති 1700ක වැටුප ඉතා ඉක්මනින් ස්ථීර කර ගැනීම සඳහා රජයක් ලෙස ගත හැකි සෑම ක්‍රියාමාර්ගයක්ම ගන්නවා. අපේ ප්‍රධාන අභිප්‍රාය වන්නේ අපේ රටේ පුරවැසියන් දුප්පත්භාවයෙන් නිදහස් කර ගැනීමයි. ඒ නිසා ජාතික ජන බලවේගය ආණ්ඩුව මේ රටේ ජනතාව දුප්පත්භාවයෙන් නිදහස් කර ගන්නා ආණ්ඩුව බවට පත් කරනවා.
ඒ වගේම අපේ රටේ සංචාරක කර්මාන්තයට විශාල විභවතාවක් තිබෙනවා. ඇල්ල සංචාරක පරාදීසයක් බවට පත්ව තිබෙනවා. සංචාරක කර්මාන්තයේ විශේෂ කලාප තෝරාගෙන ඒ විශේෂ කලාපවල තිබෙන විශේෂ ගැටලු විසඳීම සඳහා විශේෂ මෙහෙයුම් ඒකකයක් ගොඩනැඟිමට බලාපොරොත්තු වෙනවා. ඒ අනුව මෙම වසර ලංකාවට වැඩිම සංචාරකයන් පැමිණෙන වසර බවට පත් කළ හැකි බවට වන සහතිකය අපි ඔබට ලබා දෙනවා.
ඒ වගේම මේ වසර ලංකාව වැඩිම අපනයන සිදු කරන වසර බවට පත් කිරීමට අපි සැලසුම් කර තිබෙනවා. එක්සත් ජනපදය සමග බදු ගැටලුව පිළිබඳ සාකච්ඡා කිරීමට අපේ නියෝජිත කණ්ඩායමක් සූදානම්ව සිටිනවා. කෙසේ හෝ මෙම ගැටලුව රටට හිතකර අන්දමින් විසඳා ගැනීම සඳහා අපි උත්සාහ කරනවා. ඒ සමගම ලංකාවේ වසරක් තුළ වැඩිම ඩොලර් ප්‍රමාණයක් වැඩම අපනයන ආදායමක් උපයන වසර බවට 2025 වසර පත්කරගත හැකි කියලා අපි ඔබට සහතිකයක් ලබා දෙනවා. නැවත වරක් අපේ රටේ ආර්ථික අර්බුදයක් සහ කඩාවැටීමක් නොවන ආකාරයෙන් වසරින් වසර ක්‍රමානුකූලව මේ රටේ ආර්ථිකය අපි ඉදිරියට ගෙන යනවා.
අද රටේ සියලුදෙනාටම නීතිය ක්‍රියාත්මක කිරීමට ජාතික ජන බලවේගය ආණ්ඩුව බැඳී සිටිනවා. මේ රටේ සිදුවූ සියලු අපරාධ පිළිබඳ අද පරීක්ෂණ ඉතා හොඳින් ක්‍රියාත්මක වෙනවා. ඉතා වැදගත්, රටම බලා සිටින පරීක්ෂණයක විමර්ශන දියත් වෙමින් තිබෙනවා. එහෙත් විමර්ශනයේ ඉදිරි පියවර ඉතාමත් සූක්ෂමව හා ප්‍රවේසම් සහගතව කළ යුතුව තිබෙනවා. ඒ නිසා ඇතැම් කරුණු ඔබට දැන්ම දැන ගැනීමට නොහැකි වේවි.
විමර්ශන ඉතා හොඳින් සිදුවන බවට සහතිකය මට ඔබට ලබාදිය හැකියි. කට ඇරපු නැති අය දැන් කට අරින්න පටන් ගෙන තිබෙනවා. සාක්ෂි දීමට බියේ සිටි අය දැන් සාක්ෂි දීමට පටන් ගෙන තිබෙනවා. සම්බන්ධ නැහැ කියපු අයගේ සබඳතා හෙළිදරව් වෙමින් තිබෙනවා. ඒ නිසා විමර්ශන නිසි ලෙස සිදු වෙනවා. අපි මේ රටේ කිසිදු අපරාධයක් කාලයේ වැලි තලාවට යටපත් වීමට ඉඩ නොතබා පුරවැසියන්ට සාධාරණය ඉටු කරන බවට මම සහතික වෙනවා.
ඒ නිසා අපි මෙම කටයුතු සාර්ථක කර ගනිමින් මේ රට ඉදිරියට ගෙන යාමට නම් නගර සභා සහ පළාත් සභා ශක්තිමත් කර ගත යුතුව තිබෙනවා. සොරකම් නොකරන මහජනතාවගේ මුදල් මහජනතාව වෙනුවෙන් පමණක්ම යොදවන පිරිසක් ඊට පත්කරගත යුතු වෙනවා. ඒ වෙනුවෙන් මෙම මැයි 06 වනදා ඔබ තම යුතුකම ඉටු කරනු ඇතැ’යි අපි විශ්වාස කරනවා.
(-නුවරඑළිය ජන රැලිය – 2025.04.19-) ජනපති තලවකැලේදී කියයි මීට පෙර ආණ්ඩු නිර්මාණය වූයේ ආණ්ඩු බලයට පත්වන අය වෙනුවෙන් වුවත් ජාතික ජන බලවේගය ආණ්ඩුව සෑම තීරණයක්ම ගන්නේ පොදු ජනතාව වෙනුවෙන් බව ජනාධිපති අනුර කුමාර දිසානායක මහතා පැවසීය. මේ රටේ ජනතාව ජාතික ජන බලවේගය කෙරෙහි තැබු විශ්වාසය කිසිදු අයුරකින් බිඳ වැටීමට ඉඩ නොදෙන බව ප්‍රකාශ කළ ජනාධිපතිවරයා […]
(-නුවරඑළිය ජන රැලිය – 2025.04.19-)
ජනපති තලවකැලේදී කියයි
මීට පෙර ආණ්ඩු නිර්මාණය වූයේ ආණ්ඩු බලයට පත්වන අය වෙනුවෙන් වුවත් ජාතික ජන බලවේගය ආණ්ඩුව සෑම තීරණයක්ම ගන්නේ පොදු ජනතාව වෙනුවෙන් බව ජනාධිපති අනුර කුමාර දිසානායක මහතා පැවසීය.
මේ රටේ ජනතාව ජාතික ජන බලවේගය කෙරෙහි තැබු විශ්වාසය කිසිදු අයුරකින් බිඳ වැටීමට ඉඩ නොදෙන බව ප්‍රකාශ කළ ජනාධිපතිවරයා පසුගිය ජනාධිපතිවරණයේදී සහ මහ මැතිවරණයේදී ජාතික ජන බලවේගයට ඡන්දය ලබා නොදුන් පිරිස්ද ආණ්ඩුවේ ගමන නිවැරදි බව සනාථ කරන පාලනයක් රට තුළ ඇති කරන බවද ප්‍රකාශ කළේය.
එසේම මතු පරපුර ජාතිය හෝ ආගම් මුල්කරගෙන යුද්ධ නොකරන රටක් නිර්මාණය කරන බවද ජනාධිපතිවරයා අවධාරණය කළේය. වතු ජනතාවට ස්වාධීන පුරවැසියන් ලෙස ජිවත්විය හැකි පරිසරය නිර්මාණය කරන බවද ජනාධිපතිවරයා මෙහිදී සඳහන් කළේය.
ජනාධිපති අනුර කුමාර දිසානායක මහතා මෙම අදහස් පළ කළේ, නුවරඑළිය, තලවකැලේදී අද (19) පැවති “ජය නියතයි ගම අපටයි” ජයග්‍රාහී ජන රැලිය අමතමිනි.
ජන රැලිය ඇමතු ජනාධිපති අනුර කුමාර දිසානායක මහතා වැඩිදුරටත් මෙසේද පැවසීය
පහුගිය මහ මැතිවරණයේදී නුවරඑළිය දිස්ත්‍රික්කයේ ජනතාව ජාතික ජන බලවේගයට විශාල ජයග්‍රහණයක් ලබා දුන්නා. ඒ ජයග්‍රහණය අනුව නුවරඑළිය දිස්ත්‍රික්කය ජාතික ජන බලවේගයේ මන්ත්‍රීවරුන් 05 දෙනෙක් නියෝජනය කරනවා. එළැඹෙන පළාත් පාලන මැතිවරණයේදී නුවරඑළිය දිස්ත්‍රික්කයේ ජයග්‍රහණය අපට විශ්වාසයි. පසුගිය වසරේ සැප්තැම්බර් 21 වෙනිදා වන තෙක් මේ රටේ බලය තිබුණේ එක පැළැන්තියකටයි. පවුල් කිහිපයක් අත තිබූ දේශපාලන බලය සැප්තැම්බර් 21 වෙනි දා පොදු ජනතාව අතට පත්වුණා.
පවුල් කිහිපයක පාලනය නිසා ණය බරින් මිරිකුණ රටක් බිහි වුණා. ඒ නිසාම ජනතාව මේ රටින් විදේශ රටවලට ගිහින් පදිංචි වුණා. එහෙත් ජනතාව පෙරට ඇවිත් පොදු ජනතාව අතට පාලන බලය ලබා ගෙන රට නිවැරදි දිශානතියකට ගෙන ඒමට කටයුතු කළා. ජනතාව ඉතාම නිර්භීත තීන්දුවක් අරගෙන ලංකා ඉතිහාසයේ පාර්ලිමේන්තු මැතිවරණයකදී වැඩිම මන්ත්‍රීවරු පිරිසක් සහිත ආණ්ඩුවක් ජාතික ජන බලවේගයට ලබා දුන්නා. එයින් පෙනී යන්නේ ජනතාව අප කෙරෙහි තබා ඇති විශ්වාසයයි.
ඔබ අප කෙරෙහි තබා ඇති එම විශ්වාසය බිංදුවකින්වත් කඩා වැටෙන්න ඉඩ තබන්නේ නැහැ. අපට ඡන්දය ලබා නොදුන්න අයත් අපේ පාලනය දැක ජාතික ජන බලවේග නිවැරදියි කියන තැනට ගෙන ඒමට අප කටයුතු කරනවා. මේ රට ගොඩනැඟිම සඳහා හොඳම අවස්ථාව දැන් ලැබී තිබෙනවා. මීට කලින් ආණ්ඩු හැදුණේ ආණ්ඩු බලයට පත්වන අය වෙනුවෙනුයි. තාත්තා පාර්ලිමේන්තුවට ගිය විට පුතත් පාර්ලිමේන්තු යනවා. අයියා පාර්ලිමේන්තුවේ ඉන්නකොට මල්ලි මහ ඇමති වෙනවා. එයාලා ඇති තරම් මහජනයාගේ ධනය නාස්ති කළා. එයාලා එකතු කරගෙන තියෙන ධනය දිහා බැලුවහොත් මේ ආයු කාලයේදී වියදම් කරලා ඉවර කරන්න පුළුවන් කමක් නැහැ. ඒ තරම් ධනයක් ඔවුන් රැස් කරගෙන තිබෙනවා.
ජාතික ජන බලවේගය ගන්න හැම තීන්දුවක්ම ගන්නේ මේ රටේ ජනතාව වෙනුවෙනුයි. අපිට ඡන්දය දීපු හෝ අපේ පක්ෂයේ ඉන්න අයවලුන් වෙනුවෙන් නොවෙයි. අපි මේ රට හදනවා. අප මේ රට භාරගන්නා විට විශාල ලෙස කඩා වැටීමට ලක්ව තිබුණා. ගෑස් තිබුණේ නැහැ. ඉන්ධන තිබුණේ නැහැ. බැංකු පොලි අනුපාතය දිනපතා ඉහළ යන ආර්ථිකයක් තිබුණේ. ආර්ථිකය පිළිබඳ විශාල අවිනිශ්චිතතාවක් තිබුණා. අපේ පාලන කාලය ඇතුළත ක්‍රමානුකූලව ආර්ථිකය ස්ථාවර කරන්න සමත් වුණා. මෙවර සිංහල හින්දු අලුත් අවුරුද්ද තමයි මෑත ඉතිහාසයේ ජනතාව එකතු වී සතුටින්ම ගත කළ සිංහල හින්දු අලුත් අවුරුද්ද.
ජනතාවට පහසුකම් සහිත ජන ජීවිතයක් උරුම කර දීම සඳහා අප ක්‍රමානුකූලව තීන්දු තීරණ ගනිමින් තිබෙනවා. රාජ්‍ය සේවයේ අවශ්‍යතාව අප හොඳින් දැන ගෙන තිබෙනවා. කෝටි 14,000ක් රාජ්‍ය සේවක වැටුප් සඳහා වෙන් කර තිබෙනවා. මහා මාර්ග ඉදිකිරීම් සඳහා මුදල් වෙන් කර තිබෙනවා. මේ වසර සඳහා ප්‍රාග්ධන වියදම් ලෙස විශාල ලෙස මුදල් වෙන් කර තිබෙනවා. එම මුදල් වියදම් කිරීමට හැකි වේ දැ’යි පොඩි සැකයක් තිබෙනවා. ඒ නිසා රාජ්‍ය සේවයට අලුතින් 30,000ක් බඳවා ගැනීමට තීන්දුවක් ගත්තා. රැකියාව සඳහා ලියුම් ගන්න කිසි කෙනෙක් මන්ත්‍රී ගාවට යා යුතු නැහැ. අපි පත්තරේ දැන්වීම දාන්නම්, විභායට වාඩි වී වැඩිම ලකුණු ගන්න දරුවා රාජ්‍ය සේවයට බඳවා ගන්නවා. එහෙමයි රට හදන්නේ.
පොලිසිය සඳහා අලුතින් 10,000ක් බඳවා ගැනීමට තීන්දු කර තිබෙනවා. මේ වසරේදී 2000ක් පොලිසියට බඳවා ගන්නවා. එම 2000න් 500ක් දෙමළ තරුණ තරුණියන් බඳවා ගැනීමට අප තීන්දු කර තිබෙනවා. තමන්ගේ මව් භාෂාවෙන් පැමිණිල්ලක් දාන්න බැරි නම්, රාජ්‍ය ආයතයකට ගොස් දෙමළෙන් ලිපි ලේඛනයක් ගන්න බැරි නම් ඒ අයට හිතෙන්නෙ නෑ මේක මගේ මවු රට කියලා. එම නිසා අපි සෑම දෙනාගේම මවු රට ලෙස ජීවත් විය හැකි රටක් නිර්මාණය කරනවා.
උතුරේ ජනතාව දෙමළ නායකයින් දෙමළ පක්ෂවලින් තෝරන්න කල්පනා කරනවා. දකුණේ ජනතාව සිංහල පක්ෂවලින් බෞද්ධ නායකයන් තෝරනවා. නැගෙනහිර ජනතාව මුස්ලිම් පක්ෂවලින් මුස්ලිම් නායකයින් තෝරනවා. කඳුරට ජනතාව කඳුකරයේ පක්ෂ තෝරනවා. එහෙත් ලංකා ඉතිහාසයේ පළමු වතාවට පසුගිය මහ මැතිවරණයේදී උතුරේ ජනතාවත්, දකුණේ ජනතාවත්, නැගෙනහිර ජනතාවත්, කඳුරට ජනතාවත් ජාතික ජන බලවේගය තෝරා ගත්තා. ක්‍රෝධය වෛරය වපුරන දේශපාලනය වෙනුවට ජාතික සමගිය තෝරන ජනතාවක් එකතු වී තිබෙනවා. මෙය ජනතාව ලැබූ ජයග්‍රහණයක්.
අපි ජනතාවගේ අදහස් ප්‍රකාශ කිරීමේ අයිතියට ගරු කරනවා, ඕනෑම දේශපාලන මතවාදයක් දැරීමේ අයිතියට ගරු කරනවා. එහෙත් ජාතිවාදී කිසිදු කරුණකට අපි මින් ඉදිරියට ඉඩ තබන්නේ නැහැ. ඒ සඳහා අවශ්‍ය නම් නීති ගෙන ඒමටත් කටයුතු කරනවා. මේ රටේ ඉපදෙනවා නම්, මේ රටේ ආර්ථිකයට දායකත්වය සපයනවා නම්, මේ රටේ මියැදෙනවා නම්, ඔවුන් ශ්‍රී ලාංකිකයෝ. ඒ සියලුදෙනාටම තිබෙන්නේ එකම අයිතිවාසිකම්. සියලුදෙනාගේම අයිතිවාසිකම් එක සමානව පිළිගන්න ආණ්ඩුවක් අපි නිර්මාණය කර තිබෙනවා.
අපේ දරුවන්ගේ පරම්පරාව කිසි දිනක ජාතිය හෝ ආගම් මුල් කරගෙන යුද්ධ කරන්නේ නැති රටක් අපි හදනවා. අපි බලය ගන්නේ මන්ත්‍ර පොල්ලක් අතේ තියාගෙන නොවෙයි. අපි බලය ගන්නෙ සාමාන්‍ය ජනතාව ලෙසයි. එහෙත් අපට අරමුණක් තිබෙනවා. ඒ අරමුණ වෙනුවෙන් අපි කැප වී තිබෙනවා.
අපි රාජ්‍ය සේවකයන්ගේ අවම වැටුප විශාල ලෙස වැඩි කළා. භාණ්ඩාගාරයේ ධනය ජනතාව වෙත යා යුතුයි කියන විශ්වාසයේ අප සිටිනවා. අධ්‍යාපනය වෙනුවෙන්, සෞඛ්‍යය වෙනුවෙන් විශාල ලෙස මෙවර අයවැයෙන් මුදල් වෙන් කළා. දැනට තිබෙන අපේ අධ්‍යාපනය දෙමාපියන්ට බරක් වගේම දරුවන්ට පීඩාවක් වෙලා තිබෙනවා. එම නිසා 2026 වසරේදී අධ්‍යාපන ප්‍රතිසංස්කරණයක් සිදු කිරීමට අපි කටයුතු කරනවා. හය ශ්‍රේණිය සහ පළමුවන ශ්‍රේණියේ අධ්‍යාපන ප්‍රතිසංස්කරණය ලබන වසරේ සිට ආරම්භ කරනවා. ග්‍රාමීය දුප්පත්භාවය තුරන් කිරීමේදී ප්‍රධානම ඉලක්කය වන්නේ අධ්‍යාපනයට හොඳ අවස්ථාවක් ලබා දීමයි. අපි මහපොළ ශිෂ්‍යාධාර වැඩි කලා. විශේෂ වැටුප්තල හරහා විද්‍යාව විෂයයන් වලට අදාළ ගුරුවරුන් බඳවා ගැනීමටත් සැලසුම් කර තිබෙනවා.
බීජ පර්යේෂණ ආයතනය නැවත ගොඩනඟනවා. සාධාරණ මිලකට ගොවියාට බීජ ලබා දෙන්න අපි සැලසුම් කර තිබෙනවා. වෙළඳපොළෙහි තිබෙන කෘමිනාශකවලින් හරි අඩක මිලකට කෘමිනාශක ලබා දීමට ආණ්ඩුව කටයුතු කර තිබෙනවා. වතු ජනතාවට දෛනික වැටුප 1700ක් ලබා දීමට සාකච්ඡා කරමින් තිබෙනවා. අපි වතු ජනතාවට ස්වාධීනව ජීවත්වීමට හැකි පරිසරයක් නිර්මාණය කරනවා. වත්තේ කොටස් එම පුරවැසියන්ට ලබා දීමට අවධානය යොමු කර තිබෙනවා. මේ පළාතෙන් නව ව්‍යවසායකයන් බිහි විය යුතුයි. ඒ සඳහා අවශ්‍ය ණය සහ තාක්ෂණය රජයෙන් ලබා දීමට කටයුතු කරනවා. ග්‍රෙගරි වැවට කේබල් කාර් ව්‍යාපෘතියක් ආරම්භ කිරීමට කටයුතු කරනවා. සීතාඑළිය කෝවිල අවට සංචාරක කර්මාන්තය නඟා සිටුවීමට ආධාර ලබා දීමට ඉන්දියාව කැමැත්ත පළ කර තිබෙනවා. ඔබට අවශ්‍ය අලුත් ආර්ථික අවස්ථා ලබා දීමට අපි කටයුතු කරනවා. ආර්ථිකයේ නව පරිවර්තනයක් ඇති කරමින් සියලු ජනතාවගේ ජීවන තත්ත්වය උසස් කිරීමට අපි කටයුතු කරනවා.
පුරවැසියාට පවුලේ වෛද්‍යවරයෙක් ලබා දීමට අපි කටයුතු කරනවා. එය මේ වසර තුළ නියමු ව්‍යාපෘතියක් ලෙස ක්‍රියාත්මක කරනවා. පොදු ප්‍රවාහනය නංවාලීමටත් අපි කටයුතු කරනවා. නව ප්‍රවාහන පද්ධතියක් ඇති කිරීමට මෙවර අයවැයෙන් මුදල් වෙන් කර තිබෙනවා. එය නගරවල නියමු ව්‍යාපෘතියක් ලෙස සිදු කරමින් ගම දක්වා ගෙන යාමට සැලසුම් කර තිබෙනවා. අපේ රටේ ජනයාගේ කිසිදු මුදලක් නාස්ති නොකරන ආණ්ඩුවක් අද බිහි වී තිබෙනවා. මහජනයාගේ මුදල් සතයක් හොරකම් කරන්නේ නැති පිරිසක් අපි සමඟ සිටිනවා. පගා ඉල්ලන්නේ නැති ආණ්ඩුවක් නිසා ආයෝජකයන් මේ රටට පැමිණෙමින් තිබෙනවා.
වංචා දූෂණ සිදු කළ අයට දඬුවම් දිය යුතු නැද්ද? වංචා දූෂණය කළ අයට දඬුවම් දීමේ වුවමනාව පොදු ජනතාවට වඩා මට තිබෙනවා . නීතිය කාටත් පොදු වීම දියණු රටක ලක්ෂණයක්.
ඉන්දියානු ආධාර යටතේ නිවාස ව්‍යාපෘතියක් නුවරඑළියට ලැබී තිබෙනවා. එය කඩිනමින් අවසන් කර ජනතාව ලබා දීමට අපි කටයුතු කරනවා. මේ සියල්ල අයිති ජනතාවටයි. මීට පෙර තිබුණේ දිය ඇල්ලක් දුටුවහොත් එයත් දේශපාලඥයාට අයිති ලෙසයි. එහෙත් වර්තමාන දේශපාලනය එහෙම නැහැ. මේ සියල්ලම ජනතාව සතු දේවල්. අපි ඒ සියල්ල ආරක්ෂා කරනවා. ඒ නිසා මැයි 06 වෙනි දා පළාත් පාලන ආයතන ජයග්‍රහණය ජාතික ජන බලවේගයට ලබා දීමට ජනතාව දෙපාරක් හිතන්න අවශ්‍ය වෙන්නේ නැහැ. මධ්‍යම ආණ්ඩුව හොරකම් නොකරන දේශපාලන අධිකාරියක් අද රටේ තිබෙන්නේ. ඒ නිසා පළාත් පාලන ආයතනත් හොරකම් නොකරන පිරිසකගෙන් පිරවිය යුතුයි. ඒ සඳහා සියලුදෙනා එකතුවෙලා වැඩ කරමු.
(-2024.04.17 ජන රැලිය – යාපනය -) – ජනපති යාපනයේ දී කියයි කුමන වේශයෙන් ජාතිවාදය යළි රට තුළ හිස එසවීමට උත්සාහ කළද එය පරාජය කිරීමට ගත හැකි සෑම පියවරක්ම ජාතික ජන බලවේගයේ ආණ්ඩුව ගන්නා බව ජනාධිපති අනුර කුමාර දිසානායක මහතා ප්‍රකාශ කළේය. ජාතිවාදය අවුලන කණ්ඩායම් ආණ්ඩුවට කුමන ආකාරයේ ලේබල් ගැසීමට උත්සාහ ගත්තද උතුරේත්, දකුණේත් ජනතාවගේ අයිතිවාසිකම් […]
(-2024.04.17 ජන රැලිය – යාපනය -)
– ජනපති යාපනයේ දී කියයි
කුමන වේශයෙන් ජාතිවාදය යළි රට තුළ හිස එසවීමට උත්සාහ කළද එය පරාජය කිරීමට ගත හැකි සෑම පියවරක්ම ජාතික ජන බලවේගයේ ආණ්ඩුව ගන්නා බව ජනාධිපති අනුර කුමාර දිසානායක මහතා ප්‍රකාශ කළේය.
ජාතිවාදය අවුලන කණ්ඩායම් ආණ්ඩුවට කුමන ආකාරයේ ලේබල් ගැසීමට උත්සාහ ගත්තද උතුරේත්, දකුණේත් ජනතාවගේ අයිතිවාසිකම් ආරක්ෂා කරමින් රට තුළ ජාතික සමගිය ගොඩනැඟීමට කැප වන බවද ජනාධිපතිවරයා අවධාරණය කළේය.
ජනාධිපති අනුර කුමාර දිසානායක මහතා මේ බව ප්‍රකාශ කළේ “ජය නියතයි ගම අපිටයි” ජන රැලි මාලාවේ තවත් ජන රැලියකට අද (17) යාපනයේදී එක් වෙමිනි.
ආණ්ඩුව කිසි විටෙක, කිසිදු පළාතක ජනතාවකගේ අයිතිවාසිකම් හෝ උරුමයන් උදුරා ගැනීමට කිසිසේත් කටයුතු නොකරන බවද මෙහිදී පැවසූ ජනාධිපතිවරයා තිස්ස විහාරයේ ගැටලුව විසඳීමට නම් ඒ මත තිබෙන දේශපාලනය ඉවත් විය යුතු බවද සඳහන් කළේය.
යාපනය යළි යථා තත්ත්වයට ගෙන ඒමට ගත හැකි සෑම පියවරක්ම ගන්නා බවත්, යුද්ධයේ අමිහිරි ඉතිහාසය සහ අප අමතක කළ යුතු ඉතිහාසය නැවත නැවත පෑරීමට ඉඩ නොදෙන බවත් පැවසූ ජනාධිපතිවරයා යාපනයේ ජනතාවගේ ගැටලු විසඳමින් නව නගර සැලැස්මක් ඔස්සේ යාපනය යළි ගොඩනැඟීමට කටයුතු කරන බවද පැවසීය.
අතුරුදහන් වූවන්ගේ දෙමාපියන් සහ ඥාතීන් අත්විඳින වේදනාව තමා හොදින් දන්නා බවද සඳහන් කළ ජනාධිපතිවරයා එම වේදනාව සමනය වීමට නම් ඔවුන් සත්‍යය දැන ගත යුතු බවත්, සත්‍යය එළිදරව් කිරීම වෙනුවෙන් ආණ්ඩුවක් ලෙස අවශ්‍ය කටයුතු සිදු කරන බවත් පැවසීය.
රටේ ජනතාව එක්ව ජාතික ජන බලවේගය ආණ්ඩුව පත් කර ගත්තේ අලුත් පරිඡේදයක් රට තුළ ආරම්භ කිරීමට බව වැඩිදුරටත් සඳහන් කළ ජනාධිපති අනුර කුමාර දිසානායක මහතා මේ ආරම්භ වී තිබෙන්නේ කළු අතීතය අවසන් කර අලුත් අනාගතයක් කරා රට ගෙන යන නව පරිච්ඡේදයක් බවත් යළි ගොඩනැඟෙමින් තිබෙන රටට පැමිණ ආයෝජනය කරන ලෙස තමා දෙමළ ඩයස්පෝරාවට ආරාධනා කරන බවත් පැවසීය.
ජනරැලිය ඇමතු ජනාධිපතිවරයා වැඩිදුරටත් මෙසේද පැවසීය.
පසුගිය පාර්ලිමේන්තු මැතිවරණයේදී මේ යාපනය දිස්ත්‍රික්කයෙන් ඓතිහාසික ජයග්‍රහණයක් ජාතික ජන බලවේගයට ලබා දීම පිළිබඳව මම පළමුවෙන්ම ඔබට ස්තුතිවන්ත වෙනවා. මේ රටේ හැමදාම මැතිවරණවලදී සිදු වුණේ ජනතාව අතර බෙදීමක් ඇති වීමයි. එහෙත් පසුගිය මහ මැතිවරණයේදී උතුරේ, දකුණේ සහ නැගෙනහිර සිංහල, මුස්ලිම්, දෙමළ සියලු ජනතාවගේ තෝරා ගැනීම වුයේ ජාතික ජන බලවේගයයි. පසුගිය මැතිවරණයේදී බෙදෙනවා වෙනුවට ජනතාව රට වෙනුවෙන් එකතු වුණා. එසේ එක් වූ අප යළි කිසිදිනක නැවත බෙදිය යුතු නැහැ. එකිනෙකා බියෙන් සැකෙන් ජීවත් වන රටක් අපට අවශ්‍ය නැහැ.
ජාතික ජන බලවේගයේ ආණ්ඩුවේ අපේක්ෂාව සිංහල, දෙමළ, මුස්ලිම් සියලුදෙනා එකට ජීවත්වන, එකට මියැදෙන එකම මාතෘ භූමියක් ලෙස, මේ රටේ සෑම පුරවැසියෙකුටම සමාන අයිතිවාසිකම් ලැබෙන සාධාරණ රටක් ගොඩනැඟීමයි. අපි එකිනෙකාට වෛර කරගෙන තිබෙනවා. යුද්ධ කරගෙන තිබෙනවා. එහෙත් අපිට කිසිවක් ඉතිරි වුණේ නැහැ. අපට ඉතිරි වුණේ විනාශ වූ උතුරු පළාතක්, දරුවන් අහිමි වූ දෙමාපියන් පමණයි. ඥාතීන්, මිතුරන් සියලුදෙනා අපිට අහිමි වුණා. උතුරේත්, දකුණේත් එය සිදු වුණා. නැවත එවන් යුගයක් අපට අවශ්‍ය නැහැ. අප දැන් එය අවසන් කළ යුතුයි. අපේ පරම්පරා යුද්ධ කරගත්තා. ගහගත්තා. එහෙත් අපේ දරුවන්ගේ පරම්පරාවට යුද්ධ කරගන්නේ නැති රටක්, ගහගන්නේ නැති රටක් සහ සියලුදෙනා සමගියෙන් ජිවත්වන රටක් ජාතික ජන බලවේගය විසින් ගොඩනඟන බවට මම ඔබට සහතික වෙනවා.
තවදුරටත් අපේ රටේ ජාතිවාදය නැහැ. ජාතිවාදය අවශ්‍ය දේශපාලනඥයන්ටයි. ඔබ දන්නවා තිස්ස විහාරය කේන්ද්‍ර කරගෙන ප්‍රශ්නයක් තිබෙනවා. පසුගිය පාර්ලිමේන්තු උපදේශක කාරක සභාවේදී මම ප්‍රකාශ කළා තිස්ස විහාරයේ ප්‍රශ්නය විසඳන්න පහසුයි. ඒ ප්‍රශ්නය පසුබිම් කරගෙන ක්‍රියාත්මක වන උතුරේ සහ දකුණේ දේශපාලනය ඉන් ඉවත් විය යුතුයි කියලා. තිස්ස විහාරයේ ප්‍රශ්නය විසඳිය හැකියි ඒ මත තිබෙන දේශපාලනය ඉවත් කළහොත්. විහාරාධිපති ස්වාමින් වහන්සේ, එම ගමේ ජීවත්වන පුරවැසියන්, නාග විහාරයේ ස්වාමීන් වහන්සේ එකතු වුණොත් මේ ප්‍රශ්නය විසඳිය හැකියි. දේශපාලනඥයන්ට නැවත අවශ්‍ය ජාතිවාදයයි. අපි ආණ්ඩුවක් ලෙස කිසි විටෙක, කිසිදු පළාතක ජනතාවකගේ අයිතිවාසිකම් හෝ උරුමයන් උදුරා ගැනීමට කිසිසේත් කටයුතු කරන්නේ නැහැ. මේ රටේ කොතැනක පුරාවස්තුවක් හමු වුණත්, කොතැනක ඓතිහාසික නටඹුන් හමු වුණත් අපි සිංහල, දෙමළ, මුස්ලිම් කියා බලන්න අවශ්‍ය නැහැ. අපි ඒ දෙස බැලිය යුත්තේ රටේ උරුමයක් ලෙසයි. එහෙත් දැන් පුරාවස්තු සහ ඓතිහාසික නටඹුන් මතු වූ විට එය සිංහලද, දෙමළද කියලා හොයනවා. එය ජාතිවාදියාගේ ස්වභාවයයි. එහෙත් ඒවා ආරක්ෂා කරගෙන අනාගත පරපුර වෙනුවෙන් රැක දීම වෙනුවෙන් අපි කටයුතු කරනවා.
මෙම ජාතිවාදී පිරිස් ජනතාවගෙන් ප්‍රතික්ෂේප වුණා. එහෙත් යළි එම ජාතිවාදය මත රට තුළ ගැටුම් ඇති කිරිමට උත්සාහ කරනවා. එහෙත් මොන වේශයෙන්, මොන ආකාරයෙන් යළිත් ජාතිවාදය නැගිටීමට උත්සාහ කළත් එය පරාජයට පත් කිරීමට ජාතික ජන බලවේගයේ ආණ්ඩුව ගත හැකි සෑම පියවරක්ම ගන්නා බව මම ඔබට ප්‍රකාශ කරනවා. අපට ජාතික සමගිය අවශ්‍යයි. මෙම යාපනයේ පාරම්පරික දේශපාලන නායකයෝ සිටියා. පාරම්පරික පක්ෂ තිබුණා. මෙම විශාල පක්ෂ තිබියදී, මහා නායකයන් සිටියදී ඔබ අප කෙරෙහි විශ්වාසය තැබුවා. කුමන දුෂ්කරතා හමුවේ වුවද ඔබ අප කෙරෙහි තැබූ විශ්වාසය කිසිසේත් බිඳ වැටීමට ඉඩ නොදෙන බව මම ඔබට සහතික වෙනවා. ඔබ අප කෙරෙහි විශ්වාස තබමින් විසඳා ගැනිමට අපේක්ෂා කරන ප්‍රශ්න තිබෙනවා. අපි ඒවා විසදනවා. කුමන ආකාරයේ ලේබල් ගැසීමට උත්සාහ කළත් ජාතිවාදී කණ්ඩායම් කුමන ආකාරයේ විරෝධතා පළ කළත් අපි ඔබේ අයිතිවාසිකම් ආරක්ෂා කරමින් ජාතික සමගිය ආරක්ෂා කිරීම වෙනුවෙන් ගත යුතු සියලු පියවර ගන්නවා.
පළමුවෙන්ම ආරක්ෂක හේතුන් මත ආණ්ඩුවට පවරා ගත් ජනතාවට අයත් ඉඩම් නිදහස් කිරීමට කටයුතු කරනවා. තවදුරටත් ආරක්ෂක හේතුන්වලට මුවා වෙමින් ජනතාවගේ ඉඩම් ආණ්ඩුව අතේ තබා ගැනීමට අයිතියක් නැහැ. නිදහස් කළ හැකි හැම ඉඩමක්ම නිදහස් කරනවා. ඔබ ඉඩම්වල පදිංචි වෙන්න. වගා කරන්න. අපි වැඩ කරන්නේ යුද්ධයක් එයි කියා බලාගෙන නොවෙයි, යුද්ධය එන එක නතර කරන්නයි ජාතික ජනබලවේගය වැඩ කරන්නේ. ආණ්ඩුවක වගකීම එයයි.
මේ ප්‍රදේශයේ විශාල මාර්ග ප්‍රමාණයක් වසා දමා තිබුණා. අපි පියවරින් පියවර ඒ පාරවල් යළි විවෘත කරනවා. ඔබ නිදහසේ කටයුතු කරන්න. කොළඹත් පාරවල් වසා දමා තිබුණා. ජනාධිපති මන්දිරය ඉදිරිපිට මාර්ගය, අරගලිය මන්දිරය ඉදිරිපිට මාර්ගය වහලයි තිබුණේ. අපි එම පාරවල් විවෘත කළා. ජනාධිපති, අගමැති මන්දිර ඉදිරිපිට පාරවල් අරින්න පුළුවන් නම් යාපනයේ පාරවල් වහගෙන ඉන්න අයිතියක් නැහැ. අපි යළි යථා තත්ත්වයට මෙම යාපනය ගෙන එනවා. යුද්ධයේ අමිහිරි ඉතිහාසය, අපි අමතක කළ යුතු ඉතිහාසය නැවත නැවත පාරන්න ඉඩ දෙන්නේ නැහැ.
අතුරුදන් වූවන් පිළිබඳ ප්‍රශ්නයක් තිබෙන බව මම දන්නවා. අපි හැකි තරම් උත්සාහ කරනවා. ඔබේ දරුවා ආණ්ඩුවට භාරදුන්නා නම් පොලිස් ස්ථානයකට හෝ හමුදා කදවුරකට භාර දුන්නා නම් ඔහුට කුමක් වූවා දැයි සොයා බැලිය යුතුයි. එය වගකීම් සහගත රජයක වගකීමක්. අතුරුදන් වූ දරුවන්ගේ දෙමාපියන්ගේ වේදනාව මම දන්නවා. සාමාන්‍යයෙන් කෙනෙක් මිය ගිය විට අපි දේහය දකිනවා. ආගමික වතාවක් සිදු කරනවා. අපි අතින්ම භූමදානය කරනවා. කාලයත් සමග අපි සුවපත් වෙනවා. එහෙත් දරුවෙක් අතුරුදන් වූ විට එසේ නොවෙයි. විශාල වේදනාවක් තිබෙනවා. මගේ ඥාති සහෝදරයාත් අතුරුදන් වුණා. ඒ නිසා මම එම වේදනාව දන්නවා. එම වේදනාව සමනය වීමට නම් දරුවන් පිළිබඳ සත්‍ය ප්‍රකාශ කළ යුතුයි. ඒ කිසිවෙකුගෙන් පළි ගැනීමට නොවෙයි. එය සාමදානය සදහා අවශ්‍යයි. අපි ආණ්ඩුවක් ලෙස එය ඉටු කරනවා. ඉතිහාසයේ ජීවත්වීමෙන් සහ එහි වේදනාවෙන් අපි මිදිය යුතුයි. අපි අලුත් පරිච්චේදයක් ආරම්භ කළ යුතුයි. ඒ වෙනුවෙන් තමයි ඔබ අප කෙරෙහි විශ්වාසය තැබුවේ. පැරණි දේ අවශ්‍ය නම් ඔබ පැරණි පක්ෂ තෝරා ගන්නවා. ඔබ අපව තෝරා ගත්තේ අලුත් දේ වෙනුවෙන්. නොබියව එම අලුත් දේ කරන බව අපි සහතික වෙනවා. එය කළ යුතුයි. අපි අපේ රටයි. අපි කවුරුත් ජීවත්වන රටයි.
එපමණක් නොවෙයි ක්‍රමානුකූලව ජනතාවගේ ජීවිත නඟාසිටුවිය යුතුයි. පැරණි පාලකයින් මේ රටේ ආර්ථිකය විශාල ලෙස බිඳ දැමුවා. ඉන්ධන, ඖෂධ ගෙන එන්න බැරි ණය ගෙවාගත නොහැකි රටක් හැදුවා. එහෙත් අපි දැන් ක්‍රමානුකූලව රටේ ආර්ථිකය ගොඩනඟමින් තිබෙනවා. අපි ඒ සදහා සෑම රටකින්ම සහාය ලබා ගන්නවා. අපේ පරමාර්ථය මේ රට ගොඩනැඟීමයි. ඒ වගේම ගොඩනැඟෙන ආර්ථිකයේ ප්‍රතිලාභ මේ රටේ ජනතාවට ලබාදීමටද අප මේ වන විට කටයුතු කරමින් සිටිනවා.
මම පසුගියදා මෙම යාපනයේ දිස්ත්‍රික් කමිටු රැස්වීමට සහභාගී වූණා. එහිදී අපිට යෝජනා ගණනාවක් ඉදිරිපත් වුණා. අපි ඒ හැම යෝජනාවකටම මෙවර අයවැයෙන් මුදල් වෙන් කළා. කන්කසන්තුරේ ජනාධිපති මන්දිරය යාපනයට වැදගත් ව්‍යාපෘතියක් වෙනුවෙන් ලබාදෙන්න මම සූදානම් බව මම එහිදී දැනුම් දුන්නා. එවන් ස්ථාන ජනතාව වෙනුවෙන් වැඩකරන ස්ථාන බවට පත් කළ යුතුයි. අපේ දරුවන්ට රැකියා උත්පාදනය වන ස්ථාන විය යුතුයි. අපි ඒ වෙනුවෙන් ඒවා නිදහස් කරනවා.
ඒ වගේම මෑත කාලයේ මේ පළාතේ පාරවල් හදන්න වෙන් කළ වැඩිම ප්‍රතිපාදනය ලෙස රුපියල් දස ලක්ෂ 5000ක් අපි මෙවර අයවැයෙන් වෙන් කළා. එපමණක් නොවෙයි, ඉතිහාසයේ ඉතාමත් කළු සිදුවීමක් යාපනය පුස්තකාලය සමඟ ගැට ගැසී තිබෙනවා. පුස්තකාලයක් විනාශ කිරීම අපේ හදවත් පෑරුවා. පුස්තකාලයකට ගිනි තැබීම තමයි ජාතිවාදයේ උච්චතම අවස්ථාව. අපි මේ වසරේ පුස්තකාලයේ පහසුකම් ඇති කිරීම වෙනුවෙන් රුපියල් කෝටි 10ක් වෙන් කළා.
එපමණක් නෙවෙයි මේ නගර සභාව සඳහා විශාල ගොඩනැගිල්ලක් තිබෙනවා. එහෙත් කිසිම වැඩක් වෙන්නේ නැහැ. එය විශාල ගොඩනැගිල්ලක්. අපේ ගම්වල ගෙවල් ඉතා කුඩයි. අපේ නගර සභාව ඉතා විශාලයි. අපි නැවත එහි රාජකාරී ආරම්භ කළ හැකි අන්දමින් ප්‍රතිසංස්කරණය කිරීම සඳහා දස ලක්ෂ 400ක් වෙන් කර තිබෙනවා. මේවා හදලා ජනතාවගේ තැන් බවට පත් කළ යුතුයි.
ඒ වගේම උතුරු පළාතේ ජනතාව මහ පොළොවත් සමඟ හැපෙන ජනතාවක්. අපි පොහොර සහනාධාරය 15,000 සිට 25,000 දක්වා වැඩි කළා. එළවළු සහ පලතුරු වගාව සඳහාත් අපි පොහොර සහනාධාරය ලබා දීමට කටයුතු කරනවා. උතුරු පළාතේ අක්කර 16,000ක පොල් වගා කළ හැකියි. නව පොල් ත්‍රිකෝණයක් හදන්න පුළුවන්. ඒ සඳහා ආණ්ඩුව සහාය ලබා දිය යුතුයි. අපි ඒ සඳහා මිලියන 500ක් වෙන් කළා. පොල්වගා කරන ගොවීන්ට ආණ්ඩුවෙන් පොල් පැළ ලබා දෙනවා. පොල් පොහොර ලබා දෙන්නම්. පොල්වලවල් කපා බිම සකස් කරන්න මුදල් ලබා දෙන්නම්. වගා කරන්න සූදානම් වෙන්න. උතුර, දකුණ, නැගෙනහිර භේදයකින් තොරව අපි යළි මේ රට ගොඩනැඟීම සඳහා වෙහෙසෙමු.
මේ උතුරු පළාතේ සංචාරක ව්‍යාපාරයට විශාල ලෙස ඉඩප්‍රස්ථා තිබෙනවා. එහෙත් ආරුගම්බේට හෝ දකුණට යන තරම් උතුරට සංචාරකයෝ එන්නේ නැහැ. අභ්‍යන්තර ගුවන් සේවය තව දුරටත් ශක්තිමත් කර කොළඹට පැමිණෙන සංචාරකයින් ගුවනින් යාපනයට එන වැඩපිළිවෙළක් සකස් කරනවා. යාපනය නව සංචාරක ගමනාන්තයක් බවට පත් කරනවා. ලබන වසරේදී පැරණි යාපනය නිරූපණය වන ආකාරයේ නව සංවර්ධන සැලැස්මක් සහිතව යාපනය නගරය නඟාසිටුවීමට අප අපේක්ෂා කරනවා. යාපනය ඓතිහාසික නගරයක් ලෙස පිළිබිඹු විය යුතුයි. ඔවුන්ගේ සංස්කෘතිය, ඉතිහාසය පිළිබිඹු වන ලෙස යළි ගොඩනැඟීම සඳහා මේ වන විට නාගරික සංවර්ධන අධිකාරිය සැලසුම් සකස් කරනවා. ලබන වසරේ ඊට අප මුදල් වෙන් කරනවා.
ඒ වගේම යාපනයේ ජනතාවගේ පානීය ජල ගැටලුව සහ කැළිකසළ ප්‍රශ්නය විසඳීමට අපි කටයුතු කරනවා. අපි උතුර, නැගෙනහිර දකුණ භේදයකින් තොරව හැම පළාතකම ජනතාවට සලකමින් රට ඉදිරියට ගෙන යා යුතුයි කියන ආණ්ඩුවක්.
ඒ වගේම අපි දන්නවා 1983 සිට දෙමළ ජනතාව විශාල පිරිසක් මේ රට අතහැර ගියා. අද ඔවුන් ලෝකයේ විශාල ව්‍යාපාරිකයන් සහ ධනවතුන් බවට පත්ව තිබෙනවා. මම දෙමළ ඩයස්පෝරාවේ සියලුදෙනාට ආරාධනා කරනවා ඔබගේ ඥාතින් සිටින භූමිය ගොඩනඟන්න, ඔවුන්ගේ ආර්ථිකය ගොඩනඟන්න හැකිතරම් ආයෝජනය කරන්න යළි ලංකාවට එන්න කියා අපි ආරාධනා කරනවා.
දැන් මේ රට සුරක්ෂිතයි. ජාතිවාදයෙන් තොර රටක් බවට පත්ව තිබෙනවා. සෑමදෙනාගේම අයිතිවාසිකම් සාධාරණ ලෙස පිළිගන්න රටක්. හැම සංස්කෘතියකටම ගරු කරන රටක්. ඒ නිසා නැවත මේ රට ගොඩනඟන්න ඔබගේ ආයෝජන යොදවන ලෙස මම ආරාධනා කරනවා. මෙය නව පරිච්ඡේදයක් පැරණි කළු අතීතය අවසන් කර අලුත් අනාගතයක් කරා යන පරිච්ඡේදයක්. එය ඉතා වැදගත් දේශපාලන පරිවර්තනයක්. එය අපගේ අම්මලා, තාත්තලා දීර්ඝ කාලයක් පුරා ප්‍රාර්ථනා කළ දෙයක්. විවිධ ආකාරයෙන් ඔවුන් මෙවන් ආණ්ඩුවක් අපේක්ෂා කළා.
දැන් ඒ ආණ්ඩුව හදලා තිබෙනවා. මහජනතාවගේ මුදල් සතයක් සොරකම් නොකරන ආණ්ඩුවක් අද හදලා තිබෙනවා. පැරණි දේශපාලනය මේ රට දුප්පත් කළා. ජනතාව දුප්පත් කළා. එහෙත් පාලකයන් පොහොසත් වුණා. අපි එම සංස්කෘතිය අවසන් කර තිබෙනවා. දැන් සියලුදෙනා එක්වෙලා ප්‍රාදේශීය සභා සහ නගර සභා ශක්තිමත් කර ගනිමින් එම වැඩපිළිවෙළ ඉදිරියට ගෙන යමු කියා ආරාධනා කරනවා.
