(-2025.09.10 – Colombo-) පාතාලය සහ විෂමද්‍රව්‍ය මර්දනය කිරීම වෙනුවෙන් වත්මන් ආණ්ඩුව සිදුකරමින් පවතින ක්‍රියාවලියට උපරිම සහාය පළ කරන බව සමාජවාදී තරුණ සංගමය පවසයි. පාතාලය සහ විෂ මත්ද්‍රව්‍ය මර්දනය කිරීම වෙනුවෙන් ආණ්ඩුව සිදුකරමින් පවතින ක්‍රියාවලියට සහය පළ කිරීම වෙනුවෙන් සමාජවාදී තරුණ සංගමය මාධ්‍ය හමුවක් කැඳවා තිබුණි. එම මාධ්‍ය හමුව අද (10දා) ජනතා විමුක්ති පෙරමුණ ප්රධාන කාර්යාලයේදී […]
(-2025.09.10 – Colombo-)
පාතාලය සහ විෂමද්‍රව්‍ය මර්දනය කිරීම වෙනුවෙන් වත්මන් ආණ්ඩුව සිදුකරමින් පවතින ක්‍රියාවලියට උපරිම සහාය පළ කරන බව සමාජවාදී තරුණ සංගමය පවසයි.
පාතාලය සහ විෂ මත්ද්‍රව්‍ය මර්දනය කිරීම වෙනුවෙන් ආණ්ඩුව සිදුකරමින් පවතින ක්‍රියාවලියට සහය පළ කිරීම වෙනුවෙන් සමාජවාදී තරුණ සංගමය මාධ්‍ය හමුවක් කැඳවා තිබුණි.
එම මාධ්‍ය හමුව අද (10දා) ජනතා විමුක්ති පෙරමුණ ප්රධාන කාර්යාලයේදී පැවැත්විය.
සමාජවාදී තරුණ සංගමයේ අධ්‍යාපන ලේකම් මහේෂ් අඹේපිටිය සහෝදරයා ප්‍රකාශ කළේ, ආණ්ඩුව මේ වනවිට පාතාලයට හා මත්ද්‍රව්‍යයට පැවැති දේශපාලන සහාය සම්පූර්ණයෙන්ම ඉවත් කර ඇති බවයි. ඒ හේතුවෙන් විපක්ෂයේ බොහෝ පිරිස් කලබලයට පත්වී ඇති බවත්, මේ වන විට පාතාලය හා විෂ මත්ද්‍රව්‍යය ව්‍යාපාරය යොදා ගනිමින් දේශපාලන බලය පවත්වාගෙන ගිය පිරිස් වෙත සිය බලය සම්පූර්ණයෙන්ම අහිමි වී ඇති බවත් මහේෂ් අඹේපිටිය සහෝදරයා ප්‍රකාශ කළේය.
විෂමත්ද්‍රව්‍යයට එරෙහිව කටයුතු කළ ව්‍යාපාරයක් ලෙස සමාජවාදී තරුණ සංගමය ඉදිරියේදීත් ආණ්ඩුව ගෙන යන විෂ මත්ද්‍රව්‍ය විරෝධී වැඩපිළිවෙලට උපරිම සහාය දක්වන බව ද ඔහු සඳහන් කළේය.
මෙම මාධ්‍ය හමුවේදී අදහස් දැක්වූ සමාජවාදී තරුණ සංගමයේ ජාත්‍යන්තර ලේකම් අංජන සම්පත් අමරසිංහ සහෝදරයා සඳහන් කළේ, ශ්රී ලංකාවට දැරීමට ඇති සමස්ත සෞඛ්‍ය වියදමෙන් 22%ක් මත්ද්‍රව්‍ය භාවිතය හේතුවෙන් ලෙඩ රෝග වලට ලක් වූ අයට ප්‍රතිකාර කිරීම වෙනුවෙන් යෙදවීමට සිදුව තිබීම ඛේදවාචකයක් බවයි. එබැවින් මෙම විෂමද්‍රව්‍ය ව්‍යාපාරය සහමුලින්ම අවසන් කරමින්, මෙරට තරුණ තරුණියන්ට වෙනත් මාවතක් විවර කිරීමේ වගකීම මෙම ආණ්ඩුව භාර ගෙන ඇති බවට ආණ්ඩුව විසින් ගෙනයන වැඩපිළිවෙල සාක්‍ෂි සපයන බව ද ඔහු සඳහන් කළේය.
මෙම මාධ්‍ය හමුවේදී අදහස් දක්වමින් සමාජවාදී තරුණ සංගමයේ ජාතික කමිටු සාමාජික සුරංග සංජීව සහෝදරයා පැවසුවේ, මිද්දෙනිය සිදුවීමට අදාලව සලකා බැලූ විට එහි පවතින දේශපාලන පසුබිම පිළිබඳව අවබෝධයක් ලබා ගත හැකි බවයි.
එම සිදුවීමට අදාළ තැනැත්තා ශ්රී ලංකා පොදු ජන පෙරමුණේ දේශපාලන ක්‍රියාකාරිකයකු බවත්, එවැනි පසුබිමක් යටතේ නාමල් රාජපක්ෂලා මාධ්‍ය හමු පවත්වාගෙන කරනු ලබන ප්‍රකාශයන් ලැජ්ජා සහගත ප්‍රකාශයන් බවත් ඔහු සඳහන් කළේය.
පාතාලය සහ විෂ මත්ද්‍රව්‍ය මර්දනය කිරීම වෙනුවෙන් මෙරට තරුණ තරුණියන් හා සියලුම ජනතාවගේ මැදිහත්වීම ද අත්‍යවශ්‍ය බවත්, පාතාලයේ සහ විෂ මත්ද්‍රව්‍ය මර්දනය කිරීම වෙනුවෙන් ආණ්ඩුවට සහාය දැක්වීමට පුරවැසියාට ද වගකීමක් පැවරෙන බවත් ඔහු ප්‍රකාශ කළේය.
එම මාධ්‍ය හමුව සඳහා සමාජවාදී තරුණ සංගමයේ අධ්‍යාපන ලේකම් මහේෂ් අඹේපිටිය සහෝදරයා, සමාජවාදී තරුණ සංගමයේ ජාත්‍යන්තර කටයුතු ලේකම් අංජන සම්පත් අමරසිංහ සහෝදරයා, සමාජවාදී තරුණ සංගමයේ ජාතික කමිටු සාමාජික සුරංග සංජීව සහෝදරයා සහභාගී වූහ.
(-2025.08.28 – Colombo-) දකුණු කොරියානු ජනරජයේ තානාපතිනි Miyon LEE මහත්මිය හා ජනතා විමුක්ති පෙරමුණේ ප්රධාන ලේකම් ටිල්වින් සිල්වා සහෝදරයා අතර හමුවක් අද (28) පෙරවරුවේ පැලවත්ත ජවිපෙ ප්රධාන කාර්යාලයේදී පැවැත්විණි. ජනාධිපති අනුර දිසානායක සහෝදරයා ප‍්‍රමුඛ මාලිමා ආණ්ඩුව බලයට පත්වීමෙන් පසුව ගෙන යන වැඩපිළිවෙලට කොරියානු ජනරජයේ තානාපතිනිය සිය ප‍්‍රශංසාව පළ කළාය. විශේෂයෙන්ම දකුණු කොරියාව හා ශ්රී ලංකාව […]
(-2025.08.28 – Colombo-)
දකුණු කොරියානු ජනරජයේ තානාපතිනි Miyon LEE මහත්මිය හා ජනතා විමුක්ති පෙරමුණේ ප්රධාන ලේකම් ටිල්වින් සිල්වා සහෝදරයා අතර හමුවක් අද (28) පෙරවරුවේ පැලවත්ත ජවිපෙ ප්රධාන කාර්යාලයේදී පැවැත්විණි.
ජනාධිපති අනුර දිසානායක සහෝදරයා ප‍්‍රමුඛ මාලිමා ආණ්ඩුව බලයට පත්වීමෙන් පසුව ගෙන යන වැඩපිළිවෙලට කොරියානු ජනරජයේ තානාපතිනිය සිය ප‍්‍රශංසාව පළ කළාය. විශේෂයෙන්ම දකුණු කොරියාව හා ශ්රී ලංකාව අතර රාජ්‍යතාන්ත‍්‍රික සබඳතා 1977 සිට මේ දක්වා අඛණ්ඩව පවත්වා ගෙන යන බවත් එම කටයුතු ඉදිරියේදී වඩාත් ශක්තිමත්ව පවත්වාගැනීම සඳහා කටයුතු කරන බවත් පැවසුවාය.
ශ්රී ලංකාවේ කර්මාන්ත හා කෘෂිකර්මාන්ත ක්ෂේත්රයේ සංවර්ධනය වෙනුවෙන් දකුණු කොරියාවේ අත්දැකීම් සහ තාක්ෂණික සහාය උපරිමයෙන් ලබා දීමටත් මෙරට කර්මාන්ත ක්ෂේත්රයේ ආයෝජනය කිරීමේ අවස්ථාවන් සඳහා කොරියානු ව්‍යවසායකයින් දිරිගැන්වීමටත් කටයුතු කරන බව තානාපතිනිය ප්‍රකාශ කළාය. දූෂණයෙන් තොරවීම ජාත්‍යන්තරයේ ශ්රී ලංකාවේ ප‍්‍රතිරූපය ඔසවා තැබීමට අවස්ථාවක් උදාකර දී ඇති බව පැවසූ දකුණු කොරියානු තානාපතිනිය, විදේශ ආයෝජන කැඳවා ගැනීමට මෙන්ම විදේශීය ව්‍යාපාරිකයන්ට ශ්රී ලංකාවට පැමිණීමට මෙම පරිසරය ඉතාමත් යෝග්‍ය බව පෙන්වා දුන්නාය.
ජාතික ජන බලවේගයේ පාලනය යටතේ මෙරට වංචාව දූෂණය නැවැත්වීම වෙනුවෙන් උපරිම ක්‍රියාමාර්ග ගනිමින් සිටින බවත් මෙතෙක් කල් පැවති දූෂිත දේශපාලන සංස්කෘතිය මාලිමා ආණ්ඩුව යටතේ අවසන් කර ඇති බවට සහතිකයක් ලබා දිය හැකි බවත් ටිල්වින් සිල්වා සහෝදරයා අවධාරණය කළේය.
(-2025.08.26 – Colombo-) – ජනපති මහා සංඝරත්නයෙන් ඉල්ලා සිටී මහජනයාගේ ධනය කෝටි ප්‍රකෝටි ගණනින් විනාශ කිරීමට ලැබෙන වරමක් ලෙස දේශපාලන බලය භාවිත කිරීමට මින් මතු ඉඩ නොතබන බව ජනාධිපති අනුර කුමාර දිසානායක මහතා අවධාරණය කළේය. ජනාධිපති වරයා මේ බව සඳහන් කළේ අද (26) පස්වරුවේ අරලිගයහ මන්දිරයේ පැවති ජාතික භික්ෂු දින සැමරුම් උත්සවය අමතමිනි. තමන්ට තිබෙන […]
(-2025.08.26 – Colombo-)
– ජනපති මහා සංඝරත්නයෙන් ඉල්ලා සිටී
මහජනයාගේ ධනය කෝටි ප්‍රකෝටි ගණනින් විනාශ කිරීමට ලැබෙන වරමක් ලෙස දේශපාලන බලය භාවිත කිරීමට මින් මතු ඉඩ නොතබන බව ජනාධිපති අනුර කුමාර දිසානායක මහතා අවධාරණය කළේය.
ජනාධිපති වරයා මේ බව සඳහන් කළේ අද (26) පස්වරුවේ අරලිගයහ මන්දිරයේ පැවති ජාතික භික්ෂු දින සැමරුම් උත්සවය අමතමිනි.
තමන්ට තිබෙන බලය අසීමිත ලෙස ධනය එක්රැස් කර ගන්නා මෙවලමක් ලෙස භාවිත කළ සහ මහජනතාවගේ මුදල් හිතු මතේ වැය කළ විනාශකාරී ගමන නැවත හැරවීම සඳහා තිර අදිටනෙන් කටයුතු කරන බව මෙහිදී අවධාරණය කළ ජනාධිපතිවරයා කුමන ඝෝෂාවක් තිබුණද එම ගමන ආපසු හරවන්නේ නැති බවත්, වත්මන් රජය එම වගකීම ඉටු නොකළහොත් කිසිදු රජයක් එය සිදු නොකරනු ඇති බවත් ප්‍රකාශ කළේය.
එබැවින් ධෛර්යයෙන්, විශ්වාසයෙන් සහ උජුපටිපන්න ගුණයෙන් යුතුව වඩා යහපත් සමාජයක් ගොඩනැගීමට එක්ව පෙරට යමු’යි ජනාධිපතිවරයා මෙහිදී මහා සංඝරත්නය ඇතුළු සියලුදෙනාට ආරාධනා කළේය.
“කාලො අයං තෙ” – “මේ ඔබට කාලයයි” තේමාව යටතේ පැවති මෙම සැමරුම සඳහා දිවයින පුරා සිටින භික්ෂුන් වහන්සේ පන්දහසකට ආසන්න ප්‍රමාණයක් වැඩම කර සිටියහ.
ජනාධිපති අනුර කුමාර දිසානයක මහතා මෙහිදී සිදු කළ සම්පුර්ණ කතාව
ජාතික භික්ෂු පෙරමුණ අගෝස්තු 26 වන දා ජාතික භික්ෂු දිනය ලෙස නම් කර දීර්ඝ කාලයක් අපේ මහා සංඝරත්නය සහ පොදු සමාජය සමඟ අපේ රට පිළිබඳව, එකිනෙකාට පැවරෙන කාර්යභාරය පිළිබඳව සාකච්ඡාවක නිරත වුණා.
වර්තමානයේද අප හමුවේ පවතින අභියෝග සහ අප වෙත පැවරී ඇති කාර්යභාරය පිළිබඳව අපේ මහා සංඝරත්නය සහ පොදු සමාජය සමග සාකච්ඡා කිරීම අවශ්‍ය වී තිබෙනවා. එම අවස්ථාවට මට ආරාධනා කිරීම පිළිබඳව විශේෂයෙන් ජාතික භික්ෂු පෙරමුණේ සංවිධායක ස්වාමීන් වහන්සේලාට බෙහෙවින් ස්තූතිවන්ත වෙනවා.
අපේ සංඝ සමාජයට අපේ රට පිළිබඳවත්, ජනතාව පිළිබඳවත් ඒ වගේම අපේ රටේ පාලනය පිළිබඳවත් අත්හළ නොහැකි ඓතිහාසික උරුමයක් සහ වගකීමක් තිබෙනවා. ඒ වගකීම ඇති වන්නේ අපේ මහා සංඝරත්නය ඓතිහාසිකව ඉටු කරන ලද මහා කාර්යයක ප්‍රතිඵලය නිසයි. එසේ නොමැතිව ව්‍යවස්ථාව තුළ අපේ මහා සංඝරත්නයට පාලනය පිළිබඳ තිබෙන වගන්ති මත නොවෙයි. දිගුකාලයක් අපේ මාතෘ භූමිය පිළිබඳවත්, අපේ පොදු ජනයා පිළිබඳවත්, පාලකයන් පිළිබඳවත් දක්වන ලද ඓතිහාසික මැදිහත් වීම හේතු කර ගෙනයි. ජනාධිපතිවරයා ලෙස මට බලය පවරා තිබෙන්නේ ව්‍යවස්ථාවෙන්. හැබැයි, ඔබවහන්සේලාට වගකීම සහ යුතුකම් පවරා තිබෙන්නේ උරුමයෙන්.
ලංකේය සමාජය මේ දක්වා වර්ධනය වීමේදී මිහිඳු මහ රහතන් වහන්සේගේ ආගමනය සමඟ පැමිණි බුදු දහම විශාල පිටිවහලක් වුණා. ඒ වගේම අපේ සාහිත්‍යය, ලේඛන කලාව මේ දක්වා වර්ධනය වීමේදී අපේ මහා සංඝරත්නය ඓතිහාසිකව සිදු කළ කාර්යභාරය විශාලයි. නිදහස් අධ්‍යාපන පනත ගෙන එන අවස්ථාවේදී අපේ යක්කඩුවේ ශ්‍රි පඤ්ඤාරාම නායක ස්වාමින්වහන්සේ, නාත්තණ්ඩියේ පඤ්ඤාකර නායක ස්වාමින්වහන්සේ, කොටහේනේ පඤ්ඤාකිත්ත නායක ස්වාමින්වහන්සේ සහ වල්පොල රාහුල නායක ස්වාමින් වහන්සේ ඇතුළු මහා සංඝරත්නය විසින් සිදුකරන ලද කාර්යභාරය අතිවිශාලයි.
එම රාජ්‍ය මන්නත්‍රණ සභාවේදී නල්ලයියා කියන මන්ත්‍රීවරයා මෙසේ ප්‍රකාශ කළා. “භික්ෂුන් වහන්සේ පිරිස නොවන්නට මේ පනත සාකච්ඡා කිරීමක් හෝ වන්නේ නැහැ” කියලා. ඒ තමයි උරුමය, ඒ වගේම අපේ රට යටත් විජිතයක් බවට පත් වූ විට, ඒ සෑම අවස්ථාවකදීම අපේ රටේ නිදහස පිළිබඳවත්, ජනතාවගේ නිදහස පිළිබඳවත් ශ්රී සුමංගල නායක හිමියන් ඇතුළු එවකට වැඩ සිටි මහා සංඝරත්නය විශාල සටනක් ගෙන ගියා. එය තමයි අපේ මහා සංඝරත්නය වෙත පැවරී තිබෙන මාතෘ භූමියේ නිදහස පිළිබඳ උරුමය.
එහිදී ආණ්ඩුකාර මෙට්ලන්ඩ් මේ සම්බන්ධයෙන් එංගලන්තයට වාර්තාවක් යවනවා. ඒ වාර්තාවේ මෙහෙම සඳහන් වෙනවා. “පූජකයන්ගේ බලපෑම ඉතා විශාලයි. බොහෝ අවස්ථාවලදී මුදලිවරුන්ගේ බලපෑමටත් වඩා විශාලයි”. එය තමයි අපේ මහා සංඝරත්නයේ තිබෙන ඓතිහාසික උරුමය.
අපේ මාතෘ භූමියේ නිදහස පිළිබඳවත්, ජනතාවගේ අයිතිවාසිකම් පිළිබඳවත් කරන ලද ඓතිහාසික කාර්යභාරයේ උරුමය තමයි ඔබවහන්සේලාගේ දෙවුර මත පැවරී තිබෙන්නේ. මම සිතනවා ඒ උරුමයේ වැදගත් සන්ධිස්ථානයක් තමයි පසුගිය ජනාධිපතිවරණය සහ මහ මැතිවරණය. අපේ රට විනාශකාරී අන්තයකටම ගමන් කර තිබූ අවස්ථාවක එම තත්ත්වයෙන් අපේ රටත්, ජනතාවත් නිදහස් කර ගැනීමේ අරගලයේදී අපේ මහා සංඝරත්නය එම ඓතිහාසික උරුමය නැවත සපථ කොට පෙන්වා දුන්නා. ඔබ වහන්සේලා මෙම පරිවර්තනයේදී සුවිශේෂී කාර්යභාරයක් ඉටු කළා. ඉතා දූෂ්කර පරිච්ඡේදයක සිට ජයග්‍රහණය දක්වා ඔබ වහන්සේලා විසින් කරන ලද කාර්යභාරය ඉතා විශාලයි.
දැන් අපට පැවරී තිබෙන වගකීම කුමක්ද. අප හමුවේ තිබෙන්නේ කුමන අන්දමේ රටක්ද, එක පැත්තකින් වගකිව යුතු, වගකීම් සහිත රාජ්‍ය ආයතන සහ රාජ්‍ය නිලධාරි තන්ත්‍රය විශාල බිඳ වැටීමකට භාජනය වී තිබෙනවා. නියෝජ්‍ය පොලිස්පතිවරයාගේ බිරිඳ නිදන් කඩන්න යනවා. හමුදාවේ උසස් නිලධාරීන් නිදන් හාරන්න ගිහින් තිබෙනවා. බන්ධනාගාරයේ උසස් නිලධාරීන් කිසිදු වග විභාගයකින් තොරව, අනුමැතියකින් තොරව සිරකරුවන් නිදහස් කරනවා. ආගමන විගමන දෙපාර්තමේන්තුව පාතාල නායකයින්ට පාස්පෝට් හදනවා. හමුදා කඳවුරු වලින් ටී 56 අවි එළියට පිටවී තිබෙනවා. තමන්ගේ වගකීම මුදල්වලට හිලව් කර තිබෙනවා. තාන්න මාන්න වලට හිර කර තිබෙනවා.
ඒ හා සමානව ආර්ථික දේහයටත් බලපෑම් එල්ල කර තිබෙනවා. මාතර ප්‍රදේශයේ ඉදිකර තිබෙන සමහර ගොඩනැගිලි ඉදිකිරීමට හේතුවක් නැහැ . ඒ ඒ අමාත්‍යවරයා පාර්ලිමේන්තුවට පැමිණෙන ප්‍රදේශය අනුව ඒ ප්‍රදේශයට ගොඩනැගිලි ඉදිකර තිබෙනවා. එම ගොඩනැගිලි ඵලදායි කටයුත්තකට ලබාගෙන නැහැ. ඒ අනුව ආර්ථිකය විනාශකාරී තැනකට පත්වී තිබුණා.
අපේ තේ වගාවට, රබර් වගාවට සිදු වී තිබෙන දේ ඉතාම ඛේදනීයයි. අපේ පොල් ගසකින් ගෙඩි අසූවක් ගන්න පුළුවන්. නමුත් දැන් තිබෙන පොල් ගස්වලින් ගෙඩි 30-40ක් පමණයි ලබා ගන්න පුළුවන්. මුළු ආර්ථික දේහයම කඩා වැටිලා.
නීතියේ ආධිපත්‍ය බිඳ වැටිලා තිබුණා. බලය තිබෙන අයට එක නීතියක්, දුප්පත් අයට තවත් නීතියක් තිබුණේ. නීතියෙන් බේරෙන්න පුළුවන් කියලා සංස්කෘතියක් නිර්මාණය වෙලා තිබුණා. තමන්ට තමන්ගෙන් පසු පරම්පරාවට බලය පෙළගස්වන්නේ කොහොමද කියන න්‍යාය පත්‍රයකට කොටුවී තිබුණා. තමන්ට තිබෙන බලය අසීමිත ලෙස ධනය එක්රැස් කර ගන්න මෙවලමක් ලෙස භාවිතා කර තිබුණා.
මේ විනාශකාරී ගමන නැවත හැරවීම සඳහා තිර අදිටනෙන් යුතුව කටයුතු කරනවා. කුමන ඝෝෂාවක් තිබුණත් මේ ගමන ආපසු හරවන්නේ නැහැ. මා හෝ මාගේ රජය මේ කටයුත්ත නොකරන්නේ නම් කිසිදු රාජ්‍යයක් මේ කටයුත්ත නොකරනු ඇති.
පළමුව සෑම දෙනාම නීතිය ඉදිරියේ සමාන විය යුතුයි. එවැනි සංස්කෘතියක් අප නිර්මාණය කරනවා. ධනය, බලය, ඉතිහාසය ඒ කිසිවක් අදාළ වන්නේ නැහැ. අප රටේ කවර හෝ දිනක අපරාධයකට හවුල් වී තිබෙනවා නම්, කවර හෝ තැනක දූෂණයකට හවුල් වී තිබෙනවා නම්, කවර හෝ දිනක බලය අනිසි ලෙස භාවිතා කර තිබෙනවා නම් ඒ සෑම කෙනාම නීතිය හමුවට ගෙන ඒම සඳහා උපරිම ප්‍රයත්න දරනවා. එය පළිගැනීමක් නෙවෙයි. දඩයම් කිරීමක් නෙවෙයි. මහජනතාවට විශ්වාසයක් සකස් කරන්න පුළුවන් එලෙසයි. නීතියේ පොදු සංකල්පය නීතිය ඉදිරියේ සෑම දෙනාම සමාන බවයි. එය අප ස්ථාපිත කරනවා. රාජ්‍ය පොදු පුරවැසියා පිළිබඳ නීතිය යුක්තිය පිළිබඳ සාධාරණ විශ්වාසයක් ඇති කරනවා. දේශපාලකයාටත් තමන්ට ලැබෙන බලය රිසි රිසි සේ මහජනයාගේ ධනය විනාශ කරන බලයක් ලෙස නොහැඟෙන ආකාරයට සකස් කරනවා. අපිට අණ පනත් වලින් ලැබී තිබෙන බොහෝ දේවල් මේ වන විටත් අත ඇර තිබෙනවා. පාලකයා පොදු පුරවැසියා ඉදිරියේ හෘද සාක්ෂියක් සහිතව කටයුතු කළ යුතුයි. පාලකයා පොදු පුරවැසියා ඉදිරියේ ඇති තරම් ධනය නාස්ති කර රට හදන්න එකතු වන්න කියා පොදු පුරවැසියාට ආරාධනා කරන්න බැහැ. මහජනයාගේ ධනය කෝටි ප්‍රකෝටි ගණනින් විනාශ කිරීමට ලැබෙන වරමක් ලෙස දේශපාලන බලය භාවිතා කිරීමට මින් මතු ඉඩ තබන්නේ නැහැ.
හිටපු ජනාධිපතිවරයෙක්ට නිවසක් ලබා දිය යුතු යන්න පනතේ තිබුණත් නිවසේ ප්‍රමාණය අලුත් වැඩියා කිරීමේ මුදල් එහි සඳහන් වී නෑ. එම නිසා පාලකයෙන් එම නීතියේ සීමාව හෘද සාක්ෂියක් නොමැතිව වර්ග අඩි 30,000ක නිවාස භාවිතා කිරීමට කටයුතු කරමින් සිටියා. අපි සැප්තැම්බර් මස පළමු සතියේදී මේ ප්‍රමාණ ඉවත් කරනවා. අනෙකාට කෙලින් ඉන්න කියන්න අපි මඩේ හිටපු ඉන්නක් ලෙස වැනෙන්න බලාපොරොත්තු වන්නේ නැහැ. අපි ගන්න තීන්දුව ක්‍රියාත්මක කරනවා. මහජනයාගේ ධනය හොරකම් කරන නාස්ති කාරන දේශපාලනය අවසන් කරනවා.
භාණ්ඩාගාරයට එන ධනය භාණ්ඩාගාරයට එන්න කලින් විවිධ තැන්වල නැවතී තිබුණා. සමහර මුදල් ඇමතිවරුන්ට හරවාගෙන තිබුණා. ඉදිරියට එවැනි දෙයක් සිදුවන්න දෙන්නේ නැහැ. මහජනයාගේ ධනය අයුතු ලෙස හිමිකරගෙන තිබෙන කිසිවක් භාවිතා කිරීමට ඉඩ දෙන්නේ නැහැ. එය නැවත පවරා ගන්නවා. ඈත ගම්වල දුවා දරුවන් නිසි අධ්‍යාපනයක් නැතුව දුක් විඳිමින් ජීවත් වෙනවා. නිසි සෞඛ්‍ය ක්‍රමයක් නැතුව ඈත ගම්වල ජනතාව දුක් විඳිනවා. අයුතු ලෙස කවර හෝ පුරවැසියෙක් මහජනතාවගේ මුදල් අත්පත් කරගෙන තිබෙනවා නම් එය නැවත පවරා ගන්නවා. ඉදිරියටත් රාජ්‍ය නිලධාරියෙක් හෝ දේශපාලනඥයෙක් එවැනි සිදුවීමක් සිදු කරන්න දෙපාරක් හිතන තරමට නීතිය තදින් ක්‍රියාත්මක කරනවා.
පහුගිය වසර 75 එහෙම අයවැය ලේඛනයක් ඉදිරිපත් කළා. එහිදී අපේක්ෂා කළ ආදායම ලබාගෙන නැහැ. නමුත් ඊට වඩා වැඩිපුර වියදම් සිදුකර තිබෙනවා. නමුත් ලංකාවේ පළමු වතාවට අප අපේක්ෂා කළ ආදායමට වඩා වැඩි ආදායමක් ලබාගෙන තිබෙනවා. අපේක්ෂා කළ වියදමට වඩා වියදම අඩු කිරීමට වත්මන් රජය කටයුතු කර තිබෙනවා. භාණ්ඩාගාරයට එන ධනය වෙන වෙන තැන් වලට හැරවීමට අප කටයුතු කර නැහැ. භාණ්ඩාගාරයට රුපියල් අවශ්‍ය වගේම රටට ඩොලර් අවශ්‍යයි.
ඩොලර් සංචිතය ගොඩනැගීමට සංචාරක ව්‍යාපාරය, විදෙස්ගත ශ්රී ලාංකිකයන් එවන ලද මුදල්, විදෙස් ඍජු ආයෝජන බලපානවා. මේ ක්ෂේත්‍ර තුනේම වාර්තාගත ආදායමක් මේ වසරෙ ලබා ගැනීමට වත්මන් රජය සමත්ව තිබෙනවා. ශක්තිමත් ඩොලර් සංචිතයක් ඇති කිරීමට අප කටයුතු කරනවා. වසා දමා තිබූ ආර්ථිකය නැවත විවෘත කරමින් ඉදිරියට ගෙන යාමට රජය කටයුතු කළා. ඩොලර් කෝටි 130කට ආසන්න වාහන ණයවර ලිපි විවෘත කර තිබෙනවා.
පාසල් පද්ධති යළි ස්ථානගත කිරීමට අපි අදහස් කරනවා. ළමයි දෙන්නයි ගුරුවරු හතරයි. ඒ ළමයින්ට හෝ ගුරුවරුන්ට වැඩක් නැහැ. මේ අපේ රටේ පාසල්වලින් ආසන්න වශයෙන් 18%ක ළමයි 50ට වඩා අඩුයි. පාසල් 10000කට මදක් වැඩි සංඛ්‍යාවෙන් එක්දාස් හාරසීයකට ආසන්න සංඛ්‍යාවක ළමයි 50ට අඩුයි. පාසල් පන්දහස් ගණනක ළමයි 200ට වඩා අඩුයි. මේවා පාසල් නෙවෙයි. පැරණි වාර්තාවකට අනුව ළමයි 30,000ක් සාමාන්‍ය පෙළ නොකර පාසල් හැර යනවා. අපි සැලැස්මක් හදනවා. කිසි දරුවෙක් සාමාන්‍ය පෙළ ලියන්නේ නැතුව පාසලින් එලියට එන්න බෑ. එහෙම දරුවෙක් ඉන්නවා නම් ආණ්ඩුවේ නිලධාරින් ගිහින් බලන්න ඕනේ එහෙම වෙන්න හේතුව මොකක්ද කියලා.
අපේ දුප්පත්භාවය නූගත්භාවයත් සමඟ ගැට ගැසී තිබෙනවා. අපේ රිමාන්ඩ් වන සිරකරුවන් ගෙන් 70%කට වැඩිය ප්‍රමාණයක් අටේ පන්තියට පෙර පාසල හැර ගිය අයයි. අධ්‍යාපනයයි අපරාධයි අතර සම්බන්ධයක් තිබෙනවා. අධ්‍යාපනය හා මත්ද්‍රව්‍ය අතර සම්බන්ධයක් තිබෙනවා. සමාජය පරිවර්තනය කිරීමේදී වැදගත්ම කාරණය වන්නේ අධ්‍යාපනයයි. හැබැයි අපේ තිබුණ අධ්‍යාපනය ඒ කාර්යය ඉටු කිරීමට අසමත් වී තිබෙනවා. ඒ නිසා අධ්‍යාපනයේ විශාල පරිවර්තනයක් පිළිබඳව අප සාකච්ඡා කරමු. සංවාද කරමු. ගැටළු තිබෙනවා නම් අපේ ස්වාමීන් වහන්සේලා ඒ බව අප දැනුවත් කරන්න. ඒ තුළින් අපි අපේ දරුවන්ට ලෝකයත් සමඟ ගැලපිය හැකි අධ්‍යාපනය ක්‍රමයක් කිර්මාණය කිරීමට අපි අපේක්ෂා කරනවා.
අපේ සෞඛ්‍ය පද්ධතිය සඳහා නව මාවතක් අපට අවශ්‍යයි. අවුරුද්දකට මිලියන 40ක් රජයේ රෝහල්වල බාහිර රෝගී අංශයෙන් බෙහෙත් ගන්නවා. පෞද්ගලික අංශයෙන්තු මිලියන 40ක් බෙහෙත් ගන්නවා. ඒ අනුව වසරකට මිලියන 80ක් රජයේ හෝ පෞද්ගලික අංශයේ රෝහල්වලින් බෙහෙත් ගන්නවා. ජනගහනය මිලියන 22ක් වගේ. හැබැයි ඉස්පිරිතාලෙට යනවා මිලියන 80ක්. ඒ කියන්නේ ආසන්න වශයෙන් එක් අයෙක් හතර වතාවක්වත් රෝහලට යන සංස්කෘතියක් තිබෙනවා. ඒ වැරදි සෞඛ්‍ය දේහයක්. ඒ නිසා සෑම පවුලකටම පළමු ප්‍රාථමික වෛද්‍යවරයෙක් වශයෙන් යොදන්න අපි උත්සාහ කරනවා. ලෙඩා සුදුසු ස්ථානයට යොමු කළ යුත්තේ වෛද්‍යවරයායි. එසේ නැතුව එය තීරණය ගත යුත්තේ රෝගියා නෙවෙයි.
ඒ වගේම මෙරට ක්‍රීඩා ක්ෂේත්රයේ විශාල පරිවර්තනයක් සිදු කළ යුතුව තිබෙනවා. ක්‍රීඩාව, සෞඛ්‍ය, අධ්‍යාපනය විසින් තමයි යහපත් ගුණාංගවලින් පිරිපුන් පුරවැසියන් බිහි කරන්නේ. අද මේ රටේ අපරාධ සිදුවීම් පිටුපස තිබෙන්නේ මේ සමාජය බිඳ වැටීමේ විශාල ඛේදවාචකයේ ප්‍රතිවිපාකයි.
අද අපේ ස්වාමීන්වහන්සේලා දන්නවා අද අපට වාර්තාවන සිදුවීම් ගත් විට මේ සිදුවීම් විශාල ප්‍රමාණයක් අපේ සමාජය බිඳ වැටීමේ ඛේදවාචකයේ ප්‍රතිවිපාක. මම මෑතකදී ලංකාවේ පළාත්භාර නියෝජ්‍ය පොලිස්පතිවරු කැඳෙව්වා. ඔවුන් මට කිව්වා ලංකාවේ දැනට වැඩියෙන්ම වාර්තාවන අපරාධ ලිංගික අපරාධ කියලා. ඒ අතරිනුත් වැඩියෙන්ම වාර්තා වන්නේ ළමා ලිංගික අපරාධ. ඇයි මේ සමාජය යහපත් ලෙස පරිවර්තනය වී නැහැ. අධ්‍යාපනය, සෞඛ්‍ය, ක්‍රීඩාව හා ආර්ථිකය මේ කිහිපයක ඒකාබද්ධ වූ විට පමණයි යහපත් පුරවැසියෙක් ගොඩනැගිය හැකි වන්නේ. අපේ මහා සංඝරත්නය ගම්, නියම් ගම් කරා වැඩම කරමින් යහපත් සමාජයක් පිළිබඳ දේශනාව, ඔහුගේ ඇයගේ යුතුකම් පිළිබඳ දේශනාව, සමාජය පිළිබඳ තමන්ට තිබෙන වගකීම පිළිබඳ දේශනාව අලුත් සමාජ පරිවර්තනයක් සඳහා අවධිකල යුතු කාලය එළැඹ තිබෙන බව අපි විශ්වාස කරනවා.
අපේ මහා සංඝරත්නයට පැවරී තිබෙන සහ ඓතිහාසික වශයෙන් උරුමය සහ පාලකයන් ලෙස අපට පැවරී තිබෙන කාර්යයක් තිබෙනවා. ඒ වගේම මිනිසෙක් ලෙස මම ඉටු කළ යුතු යුතුකම වගේම, ජනාධිපතිවරයා ලෙස මට කාර්යයක් පැවරී තිබෙනවා, ඒ වගේම මිනිසෙක් ලෙස මට යුතුකමක් තිබෙනවා. එය මම හඳුනාගෙන තිබෙනවා. ඒ නිසා පාලකයාද, මහා සංඝරත්නයද, ආගමික පූජකවරුන්ද, බොදු සමාජයද එක විට එකට හුසුමක් ගත්තොත් මේ සමාජය ඉතා වේගයෙන් අලුත් පරිවර්තනයකට ලක් කළ හැකියි.
මම හිතනවා මෙය තමයි අවස්ථාව. හැබැයි මෙම නව පරිවර්තනයේදී බියට පත්වන කණ්ඩායමක් සිටිනවා. ඔවුන් නව පරිවර්තනයට සූදානම් නැහැ. නීතිය කාටත් සාධාරණයි පැවසු විට කඩිගුල ඇවිස්සුණා වගේ දගලන්නේ ඇයි. ඔවුන්ගේ හෘද සාක්ෂිය දන්නවා ඔවුන් අපරාධකරුවන් බව, වංචනිකයන් බව. ඒ නිසා නීතිය ඉදිරියේ සියලුදෙනා සමානයි යන සංකල්පයට ආශිර්වාද කරන්න ඕන. නරක දේ වෙනුවට නරක දෙයක් දෙන එක අසීරු නැහැ. පසුගිය ඉතිහාසයේම සිදු වුණේ එයයි. හැබැයි අපිට දැන් නරක දෙයක් වෙනුවට හොද දෙයක් දෙන්න වෙලා තිබෙන්නේ. අපි හමුවේ තිබෙන සියල්ල නරක දේවල්. අපේ ව්‍යායාමය මේ නරක දේ වෙනුවට හොද දෙයක් දෙන එකයි. ඒ සඳහා ධෛර්ය, විශ්වාසය, අත් නොහැරීමේ ගුණාංගය මේ සියල්ල තිබිය යුතුයි. මා සිතනවා අප සතුව එය තිබෙනවා.
අපේ පළමු පියවර සාර්ථකව අවසන් කොට තිබෙනවා, හැබැයි දෙවැනි පියවර ඊටත් වඩා දුෂ්කර ව්‍යායාමයක්, මහා සංඝරත්නය ඇතුළු අප සියලුදෙනා එක් වී අපේ රට මීට වඩා හොද යහපත් රටක් බවට පත් කිරීමට, මේ වියළුණු, තෙතමනයක් නොමැති සමාජයට තෙතමනය සහ යළි ජීවය කැටුව ඒමට එක්ව වැඩ කරමු කියා ඉල්ලා සිටිනවා.
(-2025.08.12 – Colombo-) • තරුණ ව්‍යාපාරය රටේ අනාගතය භාර ගන්නා නියමුවන් බිහි කරන ව්‍යාපාරය බවට පත්ව තිබෙනවා – ජනපති නව දේශපාලන පරිවර්තනය සමඟ මෙරට තරුණ ව්‍යාපාරය තවදුරටත් දේශපාලන අතකොළුවක් බවට පත් නොවී, රටේ අනාගතය භාර ගැනීමට සිටින නියමුවන් බිහි කරන ව්‍යාපාරයක් බවට පරිවර්තනය වී තිබෙන බව ජනාධිපති අනුර කුමාර දිසානායක මහතා පැවසීය. තම දේශපාලන බලය […]
(-2025.08.12 – Colombo-)
• තරුණ ව්‍යාපාරය රටේ අනාගතය භාර ගන්නා නියමුවන් බිහි කරන ව්‍යාපාරය බවට පත්ව තිබෙනවා
– ජනපති
නව දේශපාලන පරිවර්තනය සමඟ මෙරට තරුණ ව්‍යාපාරය තවදුරටත් දේශපාලන අතකොළුවක් බවට පත් නොවී, රටේ අනාගතය භාර ගැනීමට සිටින නියමුවන් බිහි කරන ව්‍යාපාරයක් බවට පරිවර්තනය වී තිබෙන බව ජනාධිපති අනුර කුමාර දිසානායක මහතා පැවසීය.
තම දේශපාලන බලය ආරක්ෂා කර ගැනීමේ කොටස්කරුවන් ලෙස නොව, තරුණ පරපුරට හිමි තැන ලබා දෙමින්, සිය අනාගතය තීරණය කිරීමේ ශක්තිය ඇති තරුණ ප්‍රජාවක් නිර්මාණය කිරීම රජයේ අරමුණ බව පැවසූ ජනාධිපතිවරයා, තරුණ තරුණියන් මෙරට සංවර්ධන මාවතේ නියමුවන් සහ කොටස්කරුවන් බවට පත් කෙරෙන වැඩසටහන තරුණ ව්‍යාපාරය මඟින් ආරම්භ කිරීමට සූදානම් බවද අවධාරණය කළේය.
ජනාධිපති අනුර කුමාර දිසානායක මහතා මේ බව සඳහන් කළේ අද (12) පෙරවරුවේ කොළඹ සුගතදාස ගෘහස්ථ ක්‍රීඩාංගණයේ පැවති “Youth Club”ජාතික තරුණ සමුළුව අමතමනි.
අනාගත තරුණ පරපුර ලෝකය හමුවේ රට දිනවන සහ අනෙකා පිළිබඳ සහකම්පනයෙන් යුත් තරුණ පරපුරක් විය යුතු බව මෙහිදී පෙන්වා දුන් ජනාධිපතිවරයා අනාගත රට භාර ගැනීමට සුදුසුකම් සහිත එම තරුණ පරපුර නිර්මාණය කිරීමට රජය කැප වී සිටින බවත්, එම සුදුසුකම්ලාභීන් බවට පත්වන ලෙස මෙරට සමස්ත තරුණ පරපුරෙන් ඉල්ලා සිටින බවත් පැවසීය.
මෙවර ජාතික තරුණ සමුළුව පැවැත්වුණේ වසර 32කට පසුව වීම විශේෂත්වයක් වන අතර, දිවයින පුරා තරුණ තරුණියන් 6000කට අධික පිරිසක් ඊට එක්ව සිටියහ. ජාතික තරුණ සමුළුවට පෙර රට පුරා ප්‍රාදේශීය මට්ටමින් “Youth Club” පිහිටුවීම ආරම්භ කළ අතර, අද පැවති ජාතික සමුළුවේදී නව නිලධාරී මණ්ඩලය හඳුන්වා දීම සිදු විය.
ජාතික තරුණ සමුළුවට සහභාගී වීම නිමිත්තෙන් ජනාධිපති අනුර කුමාර දිසානායක මහතා වෙත සිහිවටන තිළිණයක්ද පිළිගැන්විණි.
ජාතික තරුණ සමුළුව ඇමතූ ජනාධිපති අනුර කුමාර දිසානායක මහතා වැඩිදුරටත් මෙසේද පැවසීය.
මම හිතනවා මෑත කාලයේ තරුණ සමුළුවක් පිළිබඳව වැඩිම සාකච්ඡාවට හා ආන්දෝලනයට ලක් වූ සමුළුව මෙයයි. සාමාන්‍යයෙන්, අපේ රටේ බොහෝ ක්ෂේත්‍ර යම් දේශපාලන අධිකාරියක බල අවශ්‍යතාවෙන් පෙළගස්වා තිබුණා. කිසිසේත්ම තරුණයෙක්ට තමන්ගේ දක්ෂතාව හා අපේක්ෂා ඔස්සේ ඉදිරියට ඒම සඳහා අවස්ථාවක් මේ තරුණ ව්‍යාපාරය තුළ තිබුණේ නැහැ.
ඔබ දිස්ත්‍රික්කවලට ගියාම ඔබේ දිස්ත්‍රික්කයේ දේශපාලන නායකත්වය හෝ අනෙක් ආයතනවල නායකත්වය හෙබවීමේදී ප්‍රමුඛතාව ලැබුණේ කාටද? ප්‍රමුඛතාව ලැබුණේ පැරණි දේශපාලන නායකත්වයේ දුවලා, පුතාලට, එසේත්, නැත්නම් ඥාතීන්ටයි. ඒ නිසා තරුණ ව්‍යාපාරය සැලකිය යුතු ප්‍රමාණයකින් එම බල අධිකාරීන්ගේ දේශපාලන වුවමනා සමඟ පෙළගස්වා තිබුණා. දිගු කාලයක් තමන්ගේ දේශපාලන බලය, පවුල් බලය ආරක්ෂා කර ගැනීම සහ ඥාති පරපුර බලයේ රඳවා ගැනීම සඳහා වූ මෙවලමක් ලෙස මෙම තරුණ ව්‍යාපාරය ගොඩනැඟී තිබුණා.
හැබැයි, රටේ ඇති වූ නව දේශපාලන පරිවර්තනය සමඟ මෙම තරුණ ව්‍යාපාරය තවදුරටත් දේශපාලන වුවමනාවලින් පෙළුන අතකොළුවක් බවට පත් නොවී, රටේ අනාගතය භාර ගැනීමට සිටින නියමුවන් බිහි කරන ව්‍යාපාරයක් බවට පරිවර්තනය වී තිබෙනවා. එය මෙම තරුණ සමුළුව දක්වා අප පැමිණි ගමන්මඟ තුළ සනිටුහන් වී තිබෙනවා.
ඇතැමුන් කලබල වීම පුදුමයක් නොවෙයි. සැබැවින්ම, අද අප සිදු කරන්නේ අපේ තරුණ තරුණයින්ට ඔවුන්ට හිමි තැන සහ ඔවුන්ගේ අනාගතය කවරාකාරයෙන් නිර්මාණය විය යුතුද, කවර වගකීම් දැරිය යුතුද යන වගකීම සහිත තරුණ නායකත්වයක් ගොඩනැඟීමයි. එසේ නැතිව, ඔබ ගොඩනැඟිය යුත්තේ කිසිසේත්ම පවුල් පාලන පරම්පරාවලට දිගු කාලයක් බලය ආරක්ෂා කර ගැනීම සඳහා වූ කාර්යයක කොටස්කරුවන් ලෙස නොවෙයි.
රටේ අනාගතය පවතින්නේ තරුණ තරුණියන් අත බවට කියමනක් තිබෙනවා. එහෙත් අපගේ අභිලාෂය වන්නේ ඔබේ අතේ පවතින බව කියන අපේ රටේ අනාගතයේ සැබෑ භාරකරුවන් බවට ඔබව පත් කිරීමයි. විශේෂයෙන්ම, එක් කරුණක් අප ඔබට මෙතනදී පැහැදිලි කර දීමට කැමතියි. අද අපි ජනාධිපති ධුරය, අමාත්‍ය ධුර, මෙන්ම පාර්ලිමේන්තුව නියෝජනය කරනවා. හැබැයි, මේ පුටුවේ වාඩි වන විටම, අපි ඉන් බැහැලා යන දිනයක් හිතේ තබා ගෙන තමයි, අපි එහි අසුන් ගෙන තිබෙන්නේ. අපිට මේ පුටුවල චිරාත් කාලයක් වැජඹීමේ අරමුණක් නැහැ. අපිට ඉතාමත් පැහැදිලි සද්-වුවමනාවක් තිබෙනවා. මේ රට ඉතා විනාශකාරී කණ්ඩායමක් අතේ තිබුණා. ඒ කණ්ඩායමෙන් දේශපාලන බලය අප අතට හුවමාරු කරගෙන තිබෙනවා. ඒ හුවමාරු කර ගත් බලය, ඒ බැට්න් එක නුදුරු කාලයේදී ඔබට භාර දීමේ අපේක්ෂාවෙන් තමයි අපි මේ පුටුවල අසුන් ගෙන තිබෙන්නේ. අපි කිසිසේත්ම ගම් ගෑවා වගේ මේ පුටුවල ඇලවී සිටීමට අපේක්ෂා කරන්නේ නැහැ.
ඒ නිසා මේ රට භාර ගැනීමට හැකියාව, නිපුණතාව, අවංකභාවය, හෘද සාක්ෂිය තිබෙන නව තරුණ පරම්පරාවක් නිර්මාණය කළ යුතුයි. අපෙන් පසුව මේ රට භාර ගැනීම සඳහා සූදානම් පරම්පරාව අපි නිර්මාණය කළ යුතුයි. අපිට අවශ්‍ය වන්නේ මොන වගේ පරම්පරාවක්ද? එකක් වර්තමාන ලෝකය ඉතා වේගයෙන් දැනුම, උත්පාදනය වෙමින්, වර්ධනය වෙමින් ප්‍රසාරණය වෙමින් තිබෙනවා. ඈත ඉතිහාසයට ගොස් බැලුවොත් දැනුමේ මහා පිමි නිර්මාණය වූයේ දිගු වසරවලයි. එහෙත්, දැන්, අත්පත් කර ගෙන තිබෙන දැනුම විසින්ම නව දැනුම වේගයෙන් උත්පාදනය කරනවා. ඒ වගේම, නව දැනුම වේගයෙන් වර්ධනය වෙනවා, ප්‍රසාරණය වෙනවා. හැබැයි, ඒ වර්ධනය වන, ප්‍රසාරණය වන නව දැනුමේ ඇති වන මහා පිම්ම අත්පත් කර ගැනීමට සූදානම් නොවන තරුණ පරම්පරාවක් අතට මේ රට භාර නොවිය යුතුයි.
ඒ නිසා, මේ තරුණ ව්‍යාපාරය සඳහා ලෝකයේ වර්ධනය වෙමින් තිබෙන නව දැනුම වේගයෙන් උකහා ගන්න ඊට වේගයෙන් අනුගත වන නව පරම්පාරවක් නිර්මාණය කිරීම අපේ අපේක්ෂාවයි. අපේ රටේ අනාගතය එම පරම්පරාවට භාර දිය යුතුයි යන තිර අධිෂ්ඨානයක අප සිටිනවා. ඒ වගේම අප තුළ මිනිසත්කම සහකම්පනය තිබිය යුතුයි.
අපේ අධ්‍යාපන රටාව, අපේ ජීවන අරගලය මේ සියල්ල විසින් අපේ තරුණ පරපුර යම් ආත්මාර්ථකාමී පටු කුටුම්භයක සිර කර තිබෙනවා. එවැනි පිරිසක් තුළ සමාජය පිළිබඳ සහකම්පනයක් ඇති වන්නේ නැහැ. ඒ නිසා පොදු සමාජය පිළිබඳ සැබවින්ම සහකම්පනයක් තිබෙන තරුණ පිරිසක් අපිට අවශ්‍යයි. ආත්මාර්ථකාමීත්වය විසින් අපේ සමාජයේ බොහෝ ගුණාංග අයිස් වතුරේ ගිල්වා මරා දමා තිබෙනවා. සියලු යහපත් දේ මරා දමා තිබෙනවා.
අපේ රට ඉදිරියට ගෙන යමින් සමාජ සංවර්ධනයක් අත්පත් කර ගැනීමට නම් අනිවාර්යයෙන් සහකම්පනයක් සහිත සමාජයක් නිර්මාණය කළ යුතුයි. එම සමාජය නිර්මාණය කිරීමේදී මේ තරුණ ව්‍යාපාරයට විශාල වැඩකොටසක් පැවරී තිබෙනවා. ඔබ සහකම්පනයක් සහිත පුරවැසියෙක් බවට පත්විය යුතුයි කියා මම විශ්වාසය කරනවා.
ඒ වගේම තරුණ පරපුර තුළ සහජයෙන්ම තිබෙන යුක්තිය සහ සාධාරණත්වය පිළිබඳ සා පිපාසාව යළි පුබුදු කරගත යුතුයි. අයුක්තිය තිබෙන තැන යුක්තිය පිළිබඳ හඬ නැගීමට හැකි විය යුතුයි. එම හඬ නැගීම ව්‍යාජයක් නොවන්න නම් පළමුව තම තමන් යුක්තිගරුක සාධාරණ පුද්ගලයෙක් බවට පත් විය යුතුයි. අද අපේ සමාජය සැලකිය යුතු ප්‍රමාණයකින් ව්‍යාජයෙන් වෙළී තිබෙනවා. පොදු යුක්තිය පිළිබඳ කතා කරමින් සාධාරණත්වය වෙනුවෙන් පෙනී සිටීමට උත්සාහ කරනවා. හැබැයි යුක්තිය සහ සාධාරණත්වය, තම භාවිතය තුළ මොන තරම් ප්‍රමාණයකින් ගැබ් කර ගැනීමට සමත් වී තිබෙනවාද කියා සිතා බැලිය යුතුයි.
යුක්තිය සහ සාධාරණත්වය පිළිබඳව හඬ නැඟීමම යුක්තිගරුක මිනිසෙක් බවට පරිවර්තනය කරන්නේ නැහැ. යුක්තිගරුක පුරවැසියෙක් බවට පරිවර්තනය කිරීමේ පළමු සාධකය තමන් මොන තරම් ප්‍රමාණයකින් යුක්තිගරුකද, සාධාරණව කටයුතු කරනවාද යන්නයි. ඒ නිසා ඔබ යුක්තිය වෙනුවෙන් හඬ නගන්න, සාධාරණත්වය වෙනුවෙන් පෙනී සිටින්න. ඊට පෙර ඔබ සැබෑ ලෙසම යුක්තිය සහ සාධාරණත්වය නියෝජනය කරන හෘද සාක්ෂියක් ඇති තරුණයෙක්, තරුණියක් බවට පත් වෙන්න. අප මේ රට භාර දිය යුතු වන්නේ හුදු පාවෙන මිනිස් සමූහයකට නොවෙයි. අපි රටේ අනාගතය භාර දිය යුතු වන්නේ ලෝකය සමග ඉතා සමීපව අපේ රාජ්‍යය සම්බන්ධ කරගත හැකි, සමාජය පිළිබඳ සහකම්පනයක් ඇති නව තරුණ පරපුරකටයි. ඒ නිසා අපේ ව්‍යායාමය වන්නේ මේ රට භාර දීමට සුදුසුකම් සහිත තරුණ ව්‍යාපාරයක් ගොඩනැගීමයි. ඊට අවශ්‍ය සුදුසුකම් සපුරා ගත් තරුණ පිරිසක් බවට පත් වෙන්න කියන ඉල්ලීම මම ඔබෙන් සිදු කරනවා.
අද රැකියා පිළිබඳ ප්‍රශ්නයක් මතු වී තිබෙනවා. මම පසුගිය දා මාලදිවයිනට ගියා. එහි අපේ තරුණ තරුණියන් 30,000කට ආසන්න ප්‍රමාණයක් රැකියාවල නිරත වෙනවා. හැබැයි, ඒ රජයේ ස්ථානවල නොවයි. රජය විසින් වෙනම එළියේ ආර්ථිකයක් ගොඩනඟා දී තිබෙනවා. එහෙත් අපි එළියේ හැකියා සහ දක්ෂ සහිත අයට රැකියා උත්පාදනය වන ආර්ථිකයක් ගොඩනැගීමට දිගුකලක් තිස්සේ අසමත් වුණා. එම අසමත් වීමේ ප්‍රතිඵලයක් ලෙස රැකියා සපයන ආයතනයක් බවට රාජ්‍යය පත්ව තිබෙනවා. ආණ්ඩුව යනු රැකියා සපයන ආයතනයක් නොව, රැකියා උත්පාදනය කරන ආයතනයක් බව අමතක නොකළ යුතුයි.
අපි කවුරුත් දන්නවා 20 වන සියවසේ ලෝකයේ මහා පරිවර්තන සිදු වුණා. එම සියවසට පෙර විද්‍යාඥයින් උපකල්පනය කළා මෙවැනි තාක්ෂණය සහිත රාජ්‍ය බිහි වෙයි කියලා. දේශපාලනඥයන්, ශාස්ත්‍රඥයන් උපකල්පනය කළා මෙවැනි දේශපාලන ලෝකයක් නිර්මාණය වෙයි කියලා. රාජ්‍ය ආණ්ඩු සහිත පාලනයක් වෙනුවට ජනතාව විසින් තෝරා ගන්නා ලද පාලනයක් ලෝකයේ නිර්මාණය වෙයි කියලා. ඒ වගේම, ලෝකයේ ආර්ථික විශේෂඥයන් උපකල්පනය කළා ලෝකයේ මෙවැනි ආර්ථික තත්ත්වයක් නිර්මාණය වෙයි කියලා. මේ අයුරින් අපිට 17, 18 සියවස්වල වැඩිපුර මුණ ගැසුණේ අනාගත ලෝකය පිළිබඳ පරිකල්පනයන්. මෙම උපකල්පන යථාර්ථයක් බවට පරිවර්තනය වුයේ 20 වන සියවසේදීයි.
තාක්ෂණයේ, විද්‍යාවේ, වෙළෙඳපොළෙහි, මිනිසුන්ගේ ජිවන රටාවෙහි සිදු වූ මෙම පරිවර්තනය හේතුවෙන් ලෝකයේ මහා වෙළෙඳපොළක් නිර්මාණය වුණා. හැබැයි, අපි එම වෙළෙඳපොළ අත්පත් කර ගැනීමට අසමත් වූ ජාතියක් බවට පත් වුණා. ඒ නිසා එළියේ ආර්ථිකයක් ගොඩනැඟුණේ නැහැ. ඒ අනුව රැකියා සපයන එකම ආයතනය බවට රාජ්‍යය පත් වුණා.
සුන්බුන් ගොඩක් බවට පත්ව තිබෙන රාජ්‍යය අපි නූතනත්වය කරා ගෙන ආ යුතුයි. ඒ වෙනුවෙන් අපි 62,000කට ආසන්න ප්‍රමාණයක් රාජ්‍ය සේවයට බඳවා ගැනීමට කැබිනට් අනුමැතිය ලබා දී තිබෙනවා. රැකියා ප්‍රශ්නය එතැනින් විසඳෙන්නේ නැහැ. ආණ්ඩු ක්‍රියාවලිය මගින් රැකියා උත්පාදනය වන ආර්ථිකයක් එළියේ නිර්මාණය කළ යුතුයි. අපි ඒ සඳහා සැලසුම් සකස් කර තිබෙනවා.
අපි අපේක්ෂා කරනවා මේ වසරේ මිලියන 2.5ක සංචාරකයන් අපේ රටට පැමිණෙයි කියලා. 2030 වසර වන විට මිලියන 04ක සංචාරකයින් පිරිසක් මෙරටට පැමිණේ යැයි අපි අපේක්ෂා කරනවා. මේ සමඟ සංචාරක කරමාන්තය මත පදනම් වූ ආර්ථිකයක් එළියේ ගොඩනැඟෙනවා. ආර්ථිකය විසින් රැකියා උත්පාදනය කරනවා.
ඒ වගේම වසර 2030 වන විට ඩිජිටල් ආර්ථිකය ඩොලර් බිලියන 15 දක්වා වර්ධනය කර ගැනීමට අපි අපේක්ෂා කරනවා. අපේ රටේ ජාතික නිෂ්පාදනයෙන් 12%ක් ඩිජිටල් ආර්ථිකයෙන් සැපයීම අපේ අපේක්ෂාවයි. ඒ වගේම කෘෂිකර්මාන්තය, ධීවර කර්මාන්තය, සුළු හා මධ්‍ය පරිමාණ කර්මාන්තයට ඩිජිටල්කරණය ඇතුළත් කිරීම මඟින් විශාල පරිවර්තනයක් අපි අපේක්ෂා කරනවා. ඒ වෙනුවෙන් තොරතුරු තාක්ෂණය පිළිබඳ දැනුම සහ හැකියාව ඇති තරුණ පරපුරක් අවශ්‍ය වෙනවා. එතැනදී රැකියා අවස්ථා නිර්මාණය වෙනවා. ඒ වගේම වරාය කේන්ද්‍ර කරගත් ආර්ථිකයක් ඇතුළු තවත් ක්ෂේත්‍ර ගණනාවක් මත පදනම් වූ විශාල ආර්ථිකයක් අපි සැලසුම් කර තිබෙනවා. ඒ අනුව ආණ්ඩුව මැදිහත් වී රැකියා උත්පාදනය වන රටක් ගොඩනැඟීම අපේ සැලැස්මයි.
අපේ තරුණ තරුණයින්ට තමන්ගේ හැකියාව මත, තමන්ගේ ජීවන රටාව මත තමන් කැමති වෘත්තියක යෙදීමට අවශ්‍ය වන රැකියා අවස්ථා රට තුළ නිර්මාණය කිරීමට අපි අපේක්ෂා කරනවා. ඒ වගේම විශ්වාසය තහවුරු කරන ලද ආර්ථිකයක් අද රට තුළ ගොඩනැඟීමට අපි සමත් වී තිබෙනවා. මෙම ගොඩනඟන ලද ස්ථාවරත්වය මත මේ රට සමෘද්ධිමත් රාජ්‍යයක් බවට පරිවර්තනය කිරීමේ ගමන ආරම්භ කිරීමට අපි අද සූදානම් වී සිටිනවා. එහිදී තරුණ තරුණියන් ලෙස ඔබට විශාල වගකීමක් පැවරී තිබෙනවා.
ඔබ තුළ දැනුම සහ ජවය තිබෙනවා. ඔබ මේ සංවර්ධනයේ නියමුවන් සහ පංගුකරුවන් බවට පත් කිරීම සඳහා වූ වැඩසටහන අපි මේ තරුණ ව්‍යාපාරය මගින් ආරම්භ කිරීමට සූදානම්. ඔබ සංවර්ධනයෙන් පිටමන් කරන ලද අය නොවෙයි. සංවර්ධනයේ මිනිස් දූවිලි නොවෙයි. අපි සකස් කර තිබෙන සංවර්ධන මාවතේ ප්රධාන කොටස්කරුවන් බවට ඔබව පත් කර ගැනීමේ අරමුණ අපිට තිබෙනවා.
විශාල කැළඹිලිකාරී පසුබිමකින් පසුව ඔබ නායකත්ව මණ්ඩලයක් පත් කරගෙන තිබෙනවා. මේ තරුණ තරුණියන්ට අපේ රටේ තරුණ ව්‍යාපාරයට ඉතා හොදින් නායකත්වය ලබා දීමේ හැකියාව ලැබෙනු ඇතැ’යි විශ්වාස කරමින් ඉදිරි අභියෝග ජය ගැනීම වෙනුවෙන් මම ඔබට සුබ පතනවා.
තරුණ කටයුතු හා ක්‍රීඩා අමාත්‍ය සුනිල් කුමාර ගමගේ, තරුණ කටයුතු නියෝජ්‍ය අමාත්‍ය එරංග ගුණසේකර, ක්‍රීඩා නියෝජ්‍ය අමාත්‍ය සුගත් තිලකරත්න යන මහත්වරු සහ පාර්ලිමේන්තු මන්ත්‍රීවරු, විදෙස් තානාපතිවරු, රාජ්‍ය නිලධාරීන් ඇතුළු ආරාධිත පිරිසක්ද, ජාතික තරුණ සේවා සභාවේ සභාපති/ අධ්‍යක්ෂ ජනරාල් නීතීඥ සුපුන් විජේරත්න මහතා ඇතුළු නිලධාරීහුද මෙම අවස්ථාවට එක්ව සිටියහ.
(-2025.08.05 – Colombo-) ඊයේ (04) ජනතා විමුක්ති පෙරමුණේ ප්රධාන ලේකම් ටිල්වින් සිල්වා සහ එක්සත් අරාබි එමීර් රාජ්‍යයේ ශ්රී ලංකා තානාපති H.E. KHALED NASSER SULAIMAN NASEER ALAMERI මහතා හමුවිය. එහිදී KHALED NASSER SULAIMAN NASEER ALAMERI මහතා ශ්රී ලංකාවේ ජනාධිපති අනුර කුමාර දිසානායක පත්වී වර්ෂයක් පිරීම සම්බන්ධයෙන් සුබ පතන බවත් දෙරට අතර පවතින දිගුකාලීන මිත්‍රත්වය සහ ශක්තිමත් […]
(-2025.08.05 – Colombo-)
ඊයේ (04) ජනතා විමුක්ති පෙරමුණේ ප්රධාන ලේකම් ටිල්වින් සිල්වා සහ එක්සත් අරාබි එමීර් රාජ්‍යයේ ශ්රී ලංකා තානාපති H.E. KHALED NASSER SULAIMAN NASEER ALAMERI මහතා හමුවිය.
එහිදී KHALED NASSER SULAIMAN NASEER ALAMERI මහතා ශ්රී ලංකාවේ ජනාධිපති අනුර කුමාර දිසානායක පත්වී වර්ෂයක් පිරීම සම්බන්ධයෙන් සුබ පතන බවත් දෙරට අතර පවතින දිගුකාලීන මිත්‍රත්වය සහ ශක්තිමත් රාජ්‍ය තාන්ත්‍රික සබඳතා තවදුරටත් වර්ධනය කර ගැනීම සඳහා ඉදිරියේදී සහයෝගය ලබාදෙන බවද දෙරට අතර සංස්කෘතික සබඳතා මෙන්ම ශ්රී ලංකාවට තාක්ෂණික ක්ෂේත්‍රයෙන්හි වර්ධනය සඳහා ලබාදිය හැකි සියලු සහයෝගය ලබා දෙන බවද සඳහන් කළේය.
මෙරට තුළ ආයෝජන අවස්ථා ඉහළ දැමීම සඳහා වඩා විනිවිදභාවයකින් වර්තමාන රජය යටතේ සිදුකිරීමේ හැකියාව පවතින බව තානාපතිවරයා පැවසීය.
මෙහිදී අදහස් දැක්වූ ටිල්වින් සිල්වා එම මිත්‍රත්වයේ සහයෝගීතා සියල්ල මෙරට පොදු ජනතාවගේ අභිවෘද්ධිය වෙනුවෙන් යොදා ගන්නා බවත් රට නැවත ගොඩනැංවීම සඳහා දූෂණයෙන් තොර රාජ්‍ය පාලනයක් ස්ථාපිත කිරීමට ස්ථිර වශයෙන්ම කටයුතු කරන බවත් ලබාදෙන සියලු රාජ්‍ය තාන්ත්‍රික සහයෝගීතාවයන් පිළිබඳව ස්තුතිවන්ත වන බවද පැවසීය.
මෙම අවස්ථාවට ජනතා විමුක්ති පෙරමුණේ ජාත්‍යන්තර අංශයේ මධු කල්පනා ද සහභාගි විය.
(-2025.07.25 – Colombo-) සහෝදරත්වය දිනය (ජූලි 23) වෙනුවෙන් යාල්දේවි දුම්රියෙන් යාපනය වෙත ගිය සමාජවාදී තරුණ සංගමය (SYU), තරුණ කටයුතු නියෝජ්‍ය අමාත්‍ය එරංග ගුණසේකර ඊයේ (24දා) කයිට්ස් හි පිහිටි එලුවතිව් දූපතට ගියහ. එහිදී වැඩසටහන් රැසක් සිදු කෙරුණු අතර, ගම් වැසියන්ට පොල් පැළ ලබාදීම ද සිදුවිය. මේ සඳහා සහභාගී වූ තරුණ කටයුතු නියෝජ්‍ය අමාත්‍ය එරංග ගුණසේකර දූපත […]
(-2025.07.25 – Colombo-)
සහෝදරත්වය දිනය (ජූලි 23) වෙනුවෙන් යාල්දේවි දුම්රියෙන් යාපනය වෙත ගිය සමාජවාදී තරුණ සංගමය (SYU), තරුණ කටයුතු නියෝජ්‍ය අමාත්‍ය එරංග ගුණසේකර ඊයේ (24දා) කයිට්ස් හි පිහිටි එලුවතිව් දූපතට ගියහ. එහිදී වැඩසටහන් රැසක් සිදු කෙරුණු අතර, ගම් වැසියන්ට පොල් පැළ ලබාදීම ද සිදුවිය.
මේ සඳහා සහභාගී වූ තරුණ කටයුතු නියෝජ්‍ය අමාත්‍ය එරංග ගුණසේකර දූපත තුළ පවතින ගැටලු පිළිබඳව විශේෂ අවධානයක් යොමු කළේය.
මෙම දූපතෙහි වෙසෙන ජනතාවට පවතින පානීය ජල ගැටලුව, ප්‍රදේශය තුළ පවතින පාසල්වල පවතින අඩුපාඩු සහ ධීවර ජනතාව මුහුණ දී සිටින ගැටලු හා තරුණ ප්‍රජාව මුහුණ පා සිටින ගැටලු පිළිබඳව මෙහිදී විශේෂ අවධානයක් යොමු කෙරුණි. මෙම දූපත තුළ පවුල් 210ක් ජීවත් වන අතර, ඔවුන්ගේ ප්රධාන ජීවනෝපාය වන්නේ ධීවර කර්මාන්තයයි.
ප්‍රදේශවාසීන් සමඟ අදහස් හුවමාරු කරගත් එරංග ගුණසේකර පැවසුවේ ප්‍රදේශවාසීන්ට පවතින ගැටළු පිළිබඳව යාපනය දිස්ත්‍රික් සම්බන්ධීකරණ කමිටුව, යාපනය දිස්ත්‍රික් සම්බන්ධීකරණ කමිටු සභාපති රාමලිංගම් චන්ද්‍රසේකරන් දැනුවත් කිරීමට කටයුතු කරන බවයි.
උතුරට සංවර්ධන ව්‍යාපෘති රැගෙන ඒමට ආණ්ඩුව විසින් සැලසුම් කර ඇති බවත්, මේ වන විටත් බොහෝ ව්‍යාපෘති ආරම්භක අදියරයේ පවතින බවත් ඔහු ප්‍රකාශ කළේය. සංවර්ධන කටයුතු සිදුකිරීමේදී උතුර දකුණේ යැයි වෙනසක් නොකොට සමස්ත ශ්රී ලංකාව ලෙසම කටයුතු කරන බව ද ඔහු කීවේය.
මෙම අවස්ථාවට යාපනයේ දිස්ත්‍රික් පාර්ලිමේන්තු මන්ත්‍රී කරුණා නාදන් ඉලන්කුමරන් ද සම්බන්ධ විය.
