(-Colombo, November 8, 2024-) මාතර නිල්වලා ගඟේ ඉදි කර තිබෙන ලවණ බාධකය, ඒ අවට ප්‍රදේශයේ ගංවතුර තත්ත්වය ඉහළ යාමට හේතු වී ඇති බවට මෙන්ම කරදිය කුඹුරු කරා පැමිණීම හේතුවෙන් වගා හානි වන බවට ප්‍රදේශවාසීන් මෙන්ම ගොවි ජනතාව වෙතින් කරුණු ඉදිරිපත් වී ඇත. ඒ සම්බන්ධයෙන් කරුණු සොයා බලා, කඩිනමින් විසඳුම් ලබා දීම සඳහා ජනාධිපති ලේකම් ආචාර්ය […]
(-Colombo, November 8, 2024-)
මාතර නිල්වලා ගඟේ ඉදි කර තිබෙන ලවණ බාධකය, ඒ අවට ප්‍රදේශයේ ගංවතුර තත්ත්වය ඉහළ යාමට හේතු වී ඇති බවට මෙන්ම කරදිය කුඹුරු කරා පැමිණීම හේතුවෙන් වගා හානි වන බවට ප්‍රදේශවාසීන් මෙන්ම ගොවි ජනතාව වෙතින් කරුණු ඉදිරිපත් වී ඇත.
ඒ සම්බන්ධයෙන් කරුණු සොයා බලා, කඩිනමින් විසඳුම් ලබා දීම සඳහා ජනාධිපති ලේකම් ආචාර්ය නන්දික සනත් කුමානායක මහතා සහ වාරිමාර්ග දෙපාර්තමේන්තුව, ජාතික ජල සම්පාදන හා ජලාපවහන මණ්ඩලය සහ අදාළ අමාත්‍යාංශ නියෝජනය කරමින් පැමිණි නිලධාරීන් අතර සාකච්ඡාවක් අද (08) වැනිදා ජනාධිපති ලේකම් කාර්යාලයේදී පැවැත්විණි.
එහිදී, ඉදිකර ඇති ලවණ බාධකය හේතුවෙන් ගං වතුර තත්වයක් මෙන්ම ගොවිබිම්වලට ලවණ ජලය පැමිණීම සිදුවන්නේද යන්න සොයා බලා ඒ සඳහා ස්ථීර විසඳුම් ලබා දීම විධිමත් අධ්‍යයනයකින් අනතුරුව සිදු කළ යුතු බව එම ආයතන නියෝජනය කරමින් පැමිණි ඉංජිනේරුවන් පැවසූහ. ඒ සම්බන්ධයෙන් අධ්‍යයනය කර විසඳුම් හා යෝජනා ඉදිරිපත් කිරීමට පේරාදෙණිය විශ්වවිද්‍යාලයේ ඉංජිනේරු අංශයේ සහාය ලබා ගැනීමට කරන ලද යෝජනාවට ජනාධිපති ලේකම්වරයා මෙහිදී සිය එකඟතාව පළ කළේය.
එසේම මේ සඳහා යෝජනාවලියක් සකස් කරන ලෙස උපදෙස් දුන් ආචාර්ය නන්දික සනත් කුමානායක මහතා, පේරාදෙණිය විශ්විවද්‍යාලයීය ඉංජිනේරු අංශය සිදු කරන අධ්‍යයනයේ වාර්තාව පදනම් කරගෙන මේ සඳහා විසඳුම් ලබා දෙන ලෙසත්, එම කාර්යය ව්‍යාපෘතියේ දෙවැනි අදියර ලෙස ක්‍රියාත්මක කරන ලෙසත්, ඊට අවශ්‍ය ප්‍රතිපාදන ඉල්ලීම ඉදිරිපත් කරන ලෙසත් උපදෙස් ලබා දුන්නේය.
ලවණ බාධකය හේතුවෙන් නිල්වලා ගඟ දෙපස ජනතාවට සිය ගොවිබිම් අහිමි වීම ඇතුළු ජීවනෝපාය කෙරෙහි අහිතකර බලපෑම් සිදුවන බවට පැමිණිලි ලැබී ඇති බව සඳහන් කළ ලේකම්වරයා, එම තත්වය කඩිනමින් යථා තත්වයට පත් කිරීම රජයේ හා නිලධාරීන්ගේ වගකීම බව අවධාරණය කළේය.
මාතර දිස්ත්‍රික්කයේ ගංවතුර පාලනය කිරීම සඳහාද විධිමත් වැඩපිළිවෙළක් ක්‍රියාත්මක කළ යුතු බවත්, එම වැඩසටහන ක්‍රියාත්මක කිරීමට වාරිමාර්ග හා ජල සම්පාදන මණ්ඩලය ඒකාබද්ධව කටයුතු කළ යුතු බවත් අවධාරණය කළ ජනාධිපති ලේකම්වරයා එම ගැටලුව විසඳීමට නිසි පියවර ගන්නා ලෙස නිලධාරීන්ට උපදෙස් ලබා දුන්නේය.
(-අම්පාර ජයග්‍රාහී ජනතා රැලිය 2024.11.04-) පසුගිය ජනාධිපතිවරණයේ දී මේ රටේ ජනතාව ඉතාමත් නිර්භීත ධෛර්වන්ත තීන්දුවක් ගත්තා. දීර්ඝ කාලයක් මේ රට පාලනය කළේ දුෂිත ප්‍රභූ කණ්ඩායමක්. ඔවුන් අපේ රටේ සම්පත් බහු ජාතික සමාගම් වෙත විකුණා දැමුවා. ඔවුන් භාණ්ඩාගාරයේ ධනය හිතු හිතු සේ පාවිච්චි කළා. මහජනයාගේ දේපළ පරිහරණය කළා. මම දැක්කා ළගදී පුවත්පතක පළවී තිබෙනවා මේ අම්පාර […]
(-අම්පාර ජයග්‍රාහී ජනතා රැලිය 2024.11.04-)
පසුගිය ජනාධිපතිවරණයේ දී මේ රටේ ජනතාව ඉතාමත් නිර්භීත ධෛර්වන්ත තීන්දුවක් ගත්තා. දීර්ඝ කාලයක් මේ රට පාලනය කළේ දුෂිත ප්‍රභූ කණ්ඩායමක්. ඔවුන් අපේ රටේ සම්පත් බහු ජාතික සමාගම් වෙත විකුණා දැමුවා. ඔවුන් භාණ්ඩාගාරයේ ධනය හිතු හිතු සේ පාවිච්චි කළා. මහජනයාගේ දේපළ පරිහරණය කළා. මම දැක්කා ළගදී පුවත්පතක පළවී තිබෙනවා මේ අම්පාර දිස්ත්‍රික්කයේ හිටපු මන්ත්‍රීවරයෙක් අවුරුදු 36කට පසු නිවස බාරදුන්නා කියලා. ඒ අය මෙහෙත් එහෙමයි, කොළඹත් එහෙමයි. ඔවුන් රජයේ නිවාසවලින් ඉවත් කරන්න නඩු දාන්න අප තීන්දු කර තිබෙනවා. ඔවුන් මුළු ජීවිත කාලයම ආණ්ඩුවෙන් යැපුණු අය. මහජනයාගේ දේපොළ රිසි සේ තමන්ගේ පෞද්ගලික දේපළක් සේ පාවිච්චි කළ අය. මේ රට මහා ණය උගුලක හිර කරපු ඔවුන්, ඔවුන්ගේ පවුල්වල උදවියට හා වටේ සිටින කණ්ඩායම්වලට පමණක් සේවයක් කළ අයයි.
පසුගිය වසර 76 පුරා ආණ්ඩු මාරුවුණාට බලය මාරුවුණේ ඔවුන්ගේ පවුල් අතරයි. හැබැයි පසුගිය ජනාධිපතිවරණයේ දී මේ රටේ ජනතාව නිර්භීත තීන්දුවක් ගත්තා. පැරණි, සම්ප්‍රදායික අසාර්ථක පාලනය පලවා හැර පොදුජනතාවගේ පාලනයක් පසුගිය ජනාධිපතිවරණයේ දී මේ රටේ ජනතාව ගොඩනගා ගත්තා. එය ඉතා වැදගත් තීන්දුවක්. එය මෙරට දේශපාලනයේ ප්‍රබල හැරවුමක්. එම ජනාධිපතිවරණයේ දී ඇතැම් ස්වාමින්වහන්සේලා පවා වේදිකාවට නැගලා පන්සලේ දානේ නැති වෙයි, පෙරහැර නැති වෙයි, ආයේ පෝයට සිල්ගන්න බැරිවෙයි කිව්වා.
මුස්ලිම් ජනතාවට කිව්වා වදින්න දෙන්නේ නැහැ, රැවුල වවන්න දෙන්නේ නැහැ, ඔවුන්ගේ සංස්කෘතීන් අනුව කටයුතු කරන්න දෙන්නේ නැහැ කියලා. එපමණක් නොවයි ජාතින් අතර සැකය අවිශ්වාසය ගොඩනැගීමට මත වැපිරුවා. අපි ආවාම ගැස් පුපුරනවා, තෙල් පෝලිම් ඇති වෙනවා, කිරි පිටි පෝලිම් එනවා, ඩොලරය 400ට නගිනවා කිව්වා. ආර්ථිකය කඩා වැටෙනවා කිව්වා. ඒ විතරක් නෙවෙයි අපි ජනාධිපතිවරණය ජයග්‍රහණය කළොත් මේ රට මහා ලේ විලක් බවට පත් වෙනවා කිව්වා. අනිත් පාක්ෂිකයන්ට ගහනවා, හිංසා කරනවා කියලා කිව්වා. රට ජාත්‍යයන්තර වශයෙන් හුදකලා වෙනවා කිව්වා. විදෙස් සංවිධාන අපත් සමග කටයුතු කිරීම නතර කරයි කිව්වා. ජාතික ජන බලවේගයේ ආණ්ඩුවක් ආ විට මේ රට මහා ව්‍යසනයකට පත් වෙයි කිව්වා. නමුත් අපි ඒ සියල්ලට මුහුණ දෙමින් ඒ සියල්ල බොරු අවලාද බව තහවුරු කර තිබෙනවා.
ජාතික ජන බලවේගය ආණ්ඩුවක් හදන්න මේ රටේ ජනතාවට විශ්වාසයක් තිබුණා අපි ඒ පිළිබඳ ඔබට පළමුකොටම ස්තූතිවන්ත වෙනවා. විවිධ අවලාද නැගු වෙලාවක, රටට අනතුරක් වෙයි කියලා කිව්ව වෙලාවක පසුගිය ජනාධිපතිවරණයේ දී රටේ ජනතාව ජාතික ජන බලවේගය කෙරෙහි විශ්වාසය තැබුවා.
දැන් මහ මැතිවරණය පැමිණ තිබෙනවා. එදා එහෙම කියපු අය අද අම්පාරට එනවද, පසුගිය ජනාධිපතිවරණයේ දී ඒ දෙන්න වැඩිපුර හිටියේ නැගෙනහිර හා උතුරු පළාතේ. මේ ඡන්දෙදි එන්නේ නැත්තෙ ඇයි, ඔවුන්ට ඇවිල්ලා කියන්න දෙයක් ඉතුරු වෙලා නැහැ. අද ඔවුන් අසාර්ථක භාවයේ පතුලටම ගිලිලා තිබෙන්නේ. රැස්වීමක් පවත්වන්න බැහැ, ගෙයින් ගෙට යන්න බැහැ, සාකච්ඡාවක් පවත්වන්න බැහැ. ඔවුන්ට තවදුරටත් ජනතාවට මුහණ දෙන්න බැහැ. ඒ තරමටම ජනතාවට බොරු කිව්වා. අවලාද නැගුවා. බැරි වෙලාවත් අද ඔවුන් රැස්වීමකට ආවොත් අහන්න පෝය ඉවරද, දානේ නැද්ද, ලේ විලක් වුනාද, ඩොලරය 400 වුණාද කියලා.
දැන් රැස්වීම නැති වුණාට මාධ්‍ය සාකච්ඡා පවත්වනවා. පුටුවයි, මේසයයි, පිටි පස්සේ බැනර් එකයි, මයික් කිහිපයක් සහ කැමරා දෙකයි. මාධ්‍ය හමු පවත්වමින් නැවත අසත්‍ය, අවලාද කීමට පටන් ගෙන තිබෙනවා. ගමට එන්න බැහැ, ජනතාව ඔවුන්ට ඇහුම්කන් දෙන්නේ නැහැ, ජනතාව ඔවුන්ට ඇහුම්කන් දෙන්න එකතු වෙන්නේ නැහැ. හැබැයි මාධ්‍ය බලය උපයෝගි කරගෙන අසත්‍ය කරුණු කියන්න පටන් ගෙන තිබෙනවා. හැබැයි ඒ සියල්ලට මෙම නොවැම්බර් 14 වෙනිදා මේ රටේ ජනතාව නිසි පිළිතුරු ලබාදෙන බව අපට විශ්වාසයි.
ආණ්ඩුව තියෙන්නේ මාස 03යි කියනවා, දැන් වෙන පක්ෂවල ක්‍රියාකාරිත්වයක් තිබෙනවද, අපේ ආණ්ඩුව තියෙන්නේ මාස 03යි නම්, ගන්නේ කවුද, ගන්න කෙනෙකුත් නැහැ. ඒ නිසා ජාතික ජන බලවේගය ආණ්ඩුව මේ රට හදලා මිසක් ආපසු හරවන්න බැරි බව මේ සියලූදෙනා තේරුම් ගත යුතුයි. මේ කතා ඔවුන් දුකට කියන කතා. ඔවුන් කවදාවත් හිතුවේ නැහැ ඔවුන් අතින් මේ විදියට බලය ගිලිහෙයි කියලා. ඔවුන් හැමදාම හිතුවේ ඔවුන්ගේ කණ්ඩායම් අතරේ බලය තියාගන්න පුළුවන් කියලා. ඔවුන් කවදාවත් නොසිතු දෙයක් සිදු වුණා.
අද ජනතාවගේ විශ්වාසය එන්න එන්න ජාතික ජන බලවේගය ආණ්ඩුවට වැඩි වෙනවා. ආණ්ඩුවක් තියෙනවද, නැද්ද කියලා තිරණය කරන්නේ රටේ ජනතාව. ඔබ දන්නවා පසුගිය 2019 ජනාධිපතිවරණයේ දී ලක්ෂ 69ක් ඡන්ද ලැබුණා. ජනතාව හිටියා. විධායක බලය තිබුණා. 2020 පාර්ලිමේන්තු මැතිවරණයේ දී 2/3ක් ලැබුණා. විශාල ජනවරමක් තිබුණා. විධායක බලය තිබුණා, පාර්ලිමේන්තුවේ 2/3 තිබුණා. හැබැයි ආණ්ඩුව දිව්වේ අවුරුදු දෙක හමාරයි. විධායක බලය සහ පාර්ලිමේන්තු බලය තිබුණට ආණ්ඩුව දුවන්නේ නැහැ. ආණ්ඩුව දුවන්න නම් ජනතා විශ්වාසය තිබිය යුතුයි.
පසුගිය ජනාධිපතිවරණයේ දී අපට ඡන්දය නොදුන් අය ඉන්නවා. බයට, අවබෝධයක් නොමැතිකම හෝ අනෙක් පක්ෂ සමග තිබෙන බැදීම නිසා හෝ එම පක්ෂ විසින් අප පිළිබඳ කරන අසත්‍ය චෝදනාවලට හසු වී හෝ කුමන හේතුවක් නිසා හෝ අපට ඡන්දය නොදුන් ජනතාවක් සිටියා. නමුත් ජනාධිපතිවරණයේ දී අපට ඡන්දය නොදුන් ජනතාවත් මෙම නොවැම්බර් 14 වෙනිදා මැතිවණයේ දී අපට ඡන්දය ලබාදෙනවා. ඒ කියන්නේ එන්න එන්නම ජනතාවගේ විශ්වාසය දිනා ගන්නවා. පාර්ලිමේන්තු මැතිවරණයෙන් පසුව අපි ශක්තිමත් කැබිනට් මණ්ඩලයක් හදලා මේ රට ගොඩනැගීම සඳහා වන වැඩපිළිවෙළ ක්‍රමානුකූලව දියත් කරනවා. එය දකින, එය පේන, ඇහෙන ජනතාවට තව තවත් ජාතික ජන බලවේගය කෙරෙහි විශ්වාසය වැඩි වෙනවා.
පසුගිය ජනාධිපතිවරණයේදී මුස්ලිම් ජනතාව අපිට අඩුවෙන්නම් ඡන්දය දුන්නේ, මේ මහ මැතිවරණයේදි වැඩියෙන්ම ඡන්දය දෙන්නේ ජාතික ජන බලවේගයටයි. ඒ වගේම දෙමළ ජනතාව එදා හිතුවා අපිට දිනන්න බැරි වෙයි කියලා. ඒ වගේම අපේ පණිවිඩය ඔවුන්ට නිවැරදිව ගියේ නැතුව ඇති. ඒ නිසා ඔවුන් වෙන පක්ෂවලට ඡන්දය දුන්නා. හැබැයි මේ මහා ඡන්දෙදි ඔවුනුත් ජාතික ජන බලවේගයට ඡන්දය දෙනවා. මේ අයුරින් සිංහල, දෙමළ, මුස්ලිම් සියලු ජනතාවගේ විශ්වාසය දිනා ගන්නා ලද ආණ්ඩුව බවට අද ජාතික ජන බලවේගය ආණ්ඩුව පත්ව තිබෙනවා.
මේ අම්පාර දිස්ත්‍රික්කය දෙමළ, සිංහල, මුසිලිම් ප්‍රධාන ජන කණ්ඩායම් තුනම ජීවත්වන දිස්ත්‍රික්කයක්. මේ දිස්ත්‍රික්කයේ දේශපාලන ව්‍යාපාරය ගොඩනැගී තිබුණේ මුස්ලිම් අයට වෙනම පක්ෂ, සිංහල අයට වෙනම පක්ෂ ලෙසයි. මුස්ලිම් ජනතාව මුස්ලිම් පක්ෂවල නායකයෝ, සිංහල ජනතාව සිංහල පක්ෂවල නායකයෝ තෝරා ගන්නවා. ඒ නිසා ආගම්වලින්, සංස්කෘතීන්වලින්, භාෂාවෙන් විතරක් නෙවෙයි වෙනස්කම් තිබුණේ. පක්ෂවලිනුත් වෙනස්කම් තිබුණා. ඒ කියන්නේ අපි හැම අතින්ම බෙදුණු ජාතියක් බවට පත් වුණා. අපි ඒ බෙදීමේ ප්‍රතිවිපාකවලට මුහුණ දුන් ජාතියක්.
අවුරුදු 30ක යුද්ධයකට අපි මුහුණ දුන්නා. පාස්කු ප්‍රහාරය සිදුවුණා. සිංහල, දෙමළ, මුස්ලිම් ජනතාව අතර සැකය, ක්‍රෝධය හා වෛරය වර්ධනය වුණා. අපි බෙදුණු ජාතියක් වුණා. එකිනෙකා බෙදිලා අපිට ජාතියක් විදියට ඉදිරියට යන්න බැහැ. මේ රටේ අනාගතය සහ දරුවන්ගේ අනාගතය රදා පවතින්නේ ආර්ථික වශයෙන් අත්පත් කරගන්නා සංවර්ධනයෙන් පමණක් නොවයි. අපි මොනතරම් ප්‍රමාණයකට ජාතික සමගිය ගොඩනැගීමට සමත්ද, ඒ තරම් ප්‍රමාණයකින් මේ රට දියුණු කළ හැකියි. අපි බෙදුණු යුගය අවසන් කළ යුතුයි. අපි එකම ලාංකීය ජාතියක් බවට පත්විය යුතුයි.
අද ලංකාවේ උතුරට, නැගෙනහිරට, කඳුකරයට හා බටහිරට එකම සෙවණක් යටතේ නායකත්වය ලබාදෙන දේශපාලන ව්‍යාපාරය ජාතික ජන බලවේගය විතරයි. අද දකුණේ පක්ෂ තිබෙනවා, නැගෙනහිර පක්ෂ සමග එකතුවී ඡන්දවලට එනවා. දකුණේ පක්ෂ තිබෙනවා උතුරේ පක්ෂ සමග එක්වී ඡන්දවලට එනවා. නමුත් ජාතික ජන බලවේගය එක් පළාතකට සිමාවූ දේශපාලන බලවේගයක් නෙවෙයි. එම දේශපාලන ව්‍යාපාරය උතුර, දකුණ, නැගෙනහිර සියලුදෙනා නියෝජනය කරන දේශපාලන ව්‍යාපාරයයි.
පසුගිය ජනාධිපතිවරණයේදී අනිත් හැමදෙනාම නැගෙනහිර මුස්ලිම් ජනතාව ළගට ගියේ මුස්ලිම් පක්ෂ අල්ලගෙන. උතුරට ගියේ උතුරේ පක්ෂ අල්ලගෙන, නමුත් උතුරට, දකුණට නැගෙනහිරට එකම දේශපාලන පක්ෂයක් ලෙස ගියේ ජාතික ජන බලවේගය විතරයි. අපට මුස්ලිම් ජනතාවගෙන් සැලකිය යුතු ඡන්ද ප්‍රමාණයක් ලැබුණා. දෙමළ ජනතාවගෙන් විශාල ඡන්ද ප්‍රමාණයක් ලැබුණා. එහෙත් එය ප්‍රමාණවත් නැහැ. ඇයි එම ජනතාව තුළ විශ්වාසයක් තිබුණේ නැහැ අපි ජයග්‍රහණය කරයි කියලා. එම ජනතාව අතර අලුත් නායකයන් ගොඩනැගීමට අප අසමත් වී තිබුණා. ඒ නිසා ඔවුන් පැරණි නායකත්වයන්ටම හිර වුණා. නමුත් ජනාධිපතිවරණ ජයග්‍රහණයෙන් පසුව වැඩිම පිබිදීම ඇති වුණේ උතුරේ දෙමළ ජනතාව තුළයි. මට මෑතකදී උතුරේ දෙමළ පක්ෂයක නායකයෙක් හමු වුණා. ඔහු කියනවා මහ ඡන්දයෙන් පස්සේ අපත් සමග එකට වැඩ කරන්න ලෑස්තියි කියලා.
සිංහල, දෙමළ මුස්ලිම් සියළු ජනයාගේ විශ්වාසය දිනාගත් ව්‍යාපාරයක් ලෙස ලංකාවේ පළමු වතාවට දේශපාලන ව්‍යාපාරයක් ගොඩ නැගී තිබෙනවා. අපේ ආණ්ඩුව ඒ සියළුදෙනාගේ සංස්කෘතිය අනුව කටයුතු කිරීමේ අයිතිය, තමන්ගේ භාෂාවෙන් කටයුතු කිරීමට ඇති අයිතිය ආරක්ෂා කරනවා. කිසිඳු පුරවැසියෙක් තමන් අදහන ආගම, කතා කරන භාෂාව, සංස්කෘතිය අනුව කොන්වෙන්න බැහැ. වෙනස් කොට තකන්න බැහැ. එකම ලාංකික ජාතියක් ලෙස මේ ශ්‍රී ලංකාව ගොඩ නැගීමේ වගකීම ජාතික ජනබලවේගයේ ආණ්ඩුව අපි ඉටු කරනවා.
ගහගන්න රටක්ද, තරහ මරහ වෙන, අවිශ්වාසය, සැකය තියෙන රටක්ද අවශ්‍ය වෙන්නේ? අපිට අවශ්‍ය වෙන්නේ සමගි රටක්. එකට ජීවත් වෙන රටක්. ඒ රට අපි ගොඩ නඟනවා.
එපමණක් නොවෙයි අපි සැලසුම් ගණනාවක් සකස්කර තිබෙනවා. පළමුව ග්‍රාමීය දුප්පත්භාවය තුරන් කළ යුතුයි. දශක ගණනාවක් අපේ රටේ ආණ්ඩු හැදුනා. ඒ ආණ්ඩුවල බලය පවත්වා ගෙන යාමේ උපක්‍රමය වුණේ ගම් දුප්පත්භාවයට පත් කිරීමයි. ගම දුප්පත් වුනාම ඡන්ද දිනන්න ලේසියි. වැසිකිළි පෝච්චි දෙනවා කියලා හාල් කිලෝ දහයක් දෙනවා කියලා, තහඩු දෙකක් දෙන්නම් කියලා ඡන්දය ලබා ගන්නවා. රුපියල් දෙදාහට, කෑම පාර්සලයට රැස්වීම් සූදානම් කරන්න ගම දුප්පත් විය යුතුයි. ඔවුන්ගේ දේශපාලනය හැමදාම පැවතුණේ ගම දුප්පත් වුනොත් විතරයි. ගම දුප්පත්භාවයෙන් මුදවා ගැනීමට සැලැස්මක් ඔවුන්ට කවදාවත් තිබුණේ නෑ. අපේ ආණ්ඩුවේ ප්‍රධානම කාර්ය වෙන්නේ ගම දුප්පත්භාවයෙන් මුදවා ගැනීමයි. ජාතික ජන බලවේගය ආණ්ඩුව ග්‍රාමීය දුප්පත්භාවය තුරන් කළ ආණ්ඩුව බවට පත්වෙනවා.
ගමේ ජනතාවගේ ප්‍රධාන ආදායම් මාර්ගය කෘෂි කර්මාන්තයයි. අපි ඒ සඳහා මූලික සැලැස්මක් සකස් කර තිබෙනවා. මේ වන විටත් අපි පොහොර සහනාධාරය පහළොස් දහසේ සිට විසිපන්දහස දක්වා වැඩිකර තිබෙනවා. අපේ වී ගොවියාත් පාරිභෝගිකයාත් විශාල හිරවීමක ඉන්නවා. වී ටික සාධාරණ මිලකට විකුණන්න බැහැ. පාරිභෝගිකයාට සාධාරණ මිලකට සහල් ගන්නත් බැහැ. අපි මේ තත්වය වෙනස් කරනවා. පහුගිය කන්නවල ආණ්ඩුව එක වී ඇටයක් අරගෙන නැහැ. අද ගොවීන් ළඟ වී නැහැ. වී තිබෙන්නේ ව්‍යාපාරිකයන් අතේයි. ඒ නිසා ඔවුන් මිල පාලනය කරන තත්වයකට පැමිණ තිබෙනවා. අපි මේ තත්වය වෙනස් කරනවා.
වී අළෙවි මණ්ඩලයත්, ආහාර කොමසාරිස් දෙපාර්තමේන්තුවත් සතුව තිබෙන සියළු ගබඩා ප්‍රතිසංස්කරණය කිරීමට අප උපදෙස් ලබාදුන්නා. එළඹෙන මහා කන්නයේ සහතික මිලකට වැඩිම වී ප්‍රමාණය මිලදී ගැනීමට මේ ආණ්ඩුව සැළසුම් සකස් කර තිබෙනවා. මින්පසු සහල් සඳහා වෙළෙඳපොලේ විකෘතියක් හදන්න බැහැ. අපි කුඩා මෝල් හිමියන් සංවිධානය කරනවා. ලක් සතොස සමූපකාර ජාලය හරහා සහල් විකුණනවා. ආණ්ඩුවේ ගබඩාවේ වී තිබෙනවා. අඹරන්න පොඩි මෝල් හිමියෝ ඉන්නවා. විකුණන්න සමූපකාර ජාලය තිබෙනවා. එවිට ගොවියාටත් සාධාරණ මිලක් ලැබෙනවා. පාරිභෝගිකයාටත් සාධාරණ මිලකට සහල් මිලදී ගත හැකියි. එවිට ගොවි ජනතාවගේ අතට වැඩියෙන් මුදල් ගලා එනවා.
ඊළඟට ග්‍රාමීය ජනතාව දුප්පත්භාවයෙන් මුදවා ගැනීමට නම් ප්‍රධාන දේ අධ්‍යාපනයයි. ගමේ දරුවා ඉගෙන ගත හොත් දුප්පත්භාවයෙන් එළියට පැමිණිය හැකියි. ඒ නිසා මේ රටේ අධ්‍යාපනය ඉහළ නැංවීම සඳහා කටයුතු කරනවා. එක දරුවෙක් අධ්‍යාපනයෙන් එළියට වැටෙන්න දෙන්නේ නැහැ.
ඒ විතරක් නෙවෙයි මේ පළාත්වල කිරි නිෂ්පාදනය ප්‍රධාන කර්මාන්තයක් බවට පත්කළ හැකියි. ඒ සඳහා තෘණබිම් ලබාදීම, කිරි මිලදී ගැනීමේ මධ්‍යස්ථාන ශක්තිමත් කිරීම ආදි වැඩපිළිවෙලක් මගින් කිරි කර්මාන්තය හරහා ගැමියා දියුණු කරනවා. ඒ වගේම ඇතැම් ප්‍රදේශ සංචාරක ව්‍යාපාරයට ඉතාමත් යෝග්‍ය තෝතැන්නක්. සංචාරක ව්‍යාපාරය පිළිබඳ විශාල සැලැස්මක් අපි සකස් කර තිබෙනවා. අපි 2025 වසර ලංකාවට සංචාරකයින් වැඩියෙන්ම පැමිණෙන වසර බවට පත් කරනවා.
ඒ විතරක් නෙවෙයි රාජ්‍ය සේවයේ කාර්යක්ෂමතාව අපි ඇති කරනවා. ඒ වගේම අපගේ ස්වභාවික සම්පත් වන නව කර්මාන්ත පද්ධතියකට අපි පියවර තබනවා. මේ සියල්ල ඉතා හොඳින් සැලසුම් කර අපි දියත් කළොත් මේ රට ලෝකයේ දියුණුම රටක් බවට පත් කළ හැකියි.
පහුගිය කාලේ පාලකයෝ අපේ රට දුප්පත්භාවයේ රටක්, ණය ගෙවා ගන්න බැරි රටක්, ලෝකයේ අපකීර්තියට ලක්වුණු රටක් බවට පත් කළා. ජාතික ජන බලවේගය අපි මේ රට පොහොසත් රටක්, ලෝකය පිළිගන්නා දියුණු රටක් බවට පත් කරනවා. මේ සිහිනය අපි කාලයක් තිස්සේ දැක්කා. අපේ ජීවිත කාලයේ වැඩි කාලයක් මේ වෙනුවෙන් පොර බැදුවා. දැන් එය සාර්ථක කර ගැනීමේ අවස්ථාව අපට ලැබී තිබෙනවා.
ඒ නිසා අපි ඔබට එක සහතිකයක් දෙනවා. ඔබ අප කෙරෙහි විශ්වාසය තබා ඡන්දය දුන්නා. අපි ඔබේ විශ්වාසය ආරක්ෂා කරමින් මේ රට ගොඩ නගනවා. මේ රට ගොඩ නැගීම සඳහා දේශපාලන නායකත්වය සමීපව ලබා දිය යුතුයි. ජනාධිපති දේශපාලන බලයේ එක තැනක්. පාර්ලිමේන්තුව දේශපාලන බලයේ තව තැනක්. පළාත් සභාව දේශපාලන බලයේ තව තැනක්. ප්‍රාදේශීය සභාව, නගර සභාව දේශපාලන බලයේ තව තැනක්. ඒ නිසා මේ දේශපාලන බලය පෙළ ගැසී තිබෙන්නේ ජනාධිපති, පාර්ලිමේන්තුව, පළාත් සභාව, නගර සභා හා ප්‍රාදේශීය සභා ලෙසයි. සමීපව මේ රට මෙහෙයවීම සඳහා මේ දේශපාලන බලය අවශ්‍යයයි. දැනට අපට දේශපාලන බලය තිබෙන්නේ ජනාධිපතිධුරයේ පමණයි. මේ රට ගොඩ නැගීමට එය පමණක් ප්‍රමාණවත් නැහැ.
අපට අවශ්‍ය මේ ප්‍රදේශයේ ප්‍රශ්න පාර්ලිමේන්තුවට ගෙන යාමට, ආණ්ඩුවට අවධානය යොමු කිරීමට, ජාතික සංවර්ධන සැලසුම් මේ දිස්ත්‍රික්කයේ ක්‍රියාත්මක කිරීමට මේ දිස්ත්‍රික්කයෙනුත් මහජන නියෝජිතයෝ අවශ්‍යයයි. ඒ නිසා අපි ඉතා ඉක්මණින්ම නොවැම්බර් මාසයේ 14වෙනිදා ඊළඟ දේශපාලන බලය තිබෙන පාර්ලිමේන්තුවේ බලය අත්පත් කරගත යුතුයි. එවිට ජනාධිපතිධුරය තිබෙනවා. පාර්ලිමේන්තුව තිබෙනවා. ඉතා ශක්තිමත් කැබිනට් මණ්ඩලයක් හදන්න අවශ්‍යයි. පළාත් සභාත් ලබන වසරේ පැවැත්වීමට අප සැලසුම් කර තිබෙනවා. පළාත් පාලන ඡන්දත් අපි පවත්වනවා. එවිට දේශපාලන ව්‍යූහය හරියටම තිබෙනවා. දැන් සැලසුම් සකස් කරනවා. බිම්මට්ටම දක්වා ක්‍රියාත්මක කිරීමට එහා යාන්ත්‍රණය තිබෙනවා.
දැන් ඉන්නේ ඇමතිවරු තුනයි. ජනාධිපති, අගමැති, ඇමති, තුනයි. අපි ශක්තිමත් කැබිනට් මණ්ඩලයක් හදන්න ඕන. විසිපහට අඩුයි. මෙතෙක් කල් අපේ රටේ කැබිනට් මණ්ඩල හැදුණේ ඥාතීන්ට, මිතුරන්ට ඇමතිධුර ලබාදෙන්න. ජාතික ජන බලවේගය පලමු වතාවට විද්‍යාත්මක ඇමති මණ්ඩලයක් හදනවා. හැම විෂයක් පිළිබඳවම අවබෝධය තිබෙන, ගැලපෙන විෂයයන් ඒකාබද්ධ කර ඇති, අත්දැකීම් සහිත, අදූෂිත, අවංක, බාරදෙන කටයුතු නිම කිරීමට ධෛර්ය තිබෙන මිනිසුන්ගෙන් කැබිනට් මණ්ඩලය හදනවා.
පළමු කොට මේ රට ගොඩ නැගීමට දේශපාලන ප්‍රමිතීන් තිබිය යුතුයි. අපේ රටේ දේශපාලනකයාට, දේශපාලනයට ප්‍රමිතීන් නෑ. හිතෙන ඕනම දෙයක් දේශපාලකයාට කළ හැකියි. ඔබ දන්නවා මේ දිනවල ලියාපදිංචි නොකළ වාහන සොයා ගන්නවා. රේගුවෙන් පන්නපු වාහන, පාවිච්චි කර තිබෙන්නේ ඇමතිවරු. ඔබ අංක තහඩුවක් නැති වාහනයක් පාරට දාන්නනේ නෑ. නමුත් ඇමති ලියාපදිංචි නොකළ වාහන දුවනවා. ඒ කියන්නේ ඇමති නීතියට යටත් නෑ. ඔවුන්ට රේගුවෙන් වාහන ගේන්න අවශ්යක නෑ. ඔවුන්ට පන්නලා වාහන ගේන්න පුලුවන්. ඔවුන්ගේ වාහනවලට අංක තහඩු අවශ්යක නෑ. මේ තමයි අපේ රටේ දේශපාලනය. අපි මේ දේශපාලනයට ප්‍රමිතියක් ගේනවා.
ජනාධිපතිවරයා තමන්ගේ කාර්යන් සඳහා මහජන මුදල් උපයෝග කර ගත යුත්තේ කොපමණද? ජනාධිපතිවරයා යැපිය යුත්තේ මහජන මුදල්වලින් කොපමණ ප්‍රමාණයකින්ද? ඒ සඳහා ප්‍රමිතියක් සකස් කළ යුතුයි. ජනාධිපතිත් ප්‍රමිතිගතයි. ඇමති මණ්ඩලයටත් ප්‍රමිතියක් තිබෙනවා. මන්ත්‍රීවරුන්ටත් එහෙමයි. හිටපු ජනාධිපතිවුරන්ටත් එහෙමයි.
කෝකියෝ අවශ්‍යද හිටපු ජනාධිපතිලගෙ ගෙවල්වලට? ඉල්ලා තිබෙන කෝකියෝ ප්‍රමාණය දැක්කම මම හිතුවා පැරදුනාට පස්සේ රෙස්ටෝරන්ට් එකක් දාන්න යන්නේ කියලා. නැත්නම් එච්චර කෝකියෝ මොකටද? දේශපාලනයට ප්‍රමිතියක් නෑ. ජනාධිපතිවරුන්ට විශාල ගෙවල් හදලා තිබෙනවා. හිටපු ජනාධිපතිවරුන්ට සීමාවක් නෑ. වාහනවල සීමාවක් නෑ. ආරක්ෂකයන් දෙනවා සීමාවක් නෑ. මේවා සීමා කරන්න අවශ්යි නැද්ද? ඒක පළි ගැනීමක්ද? අපේ රටේ දේශපාලනය ප්‍රමිතිගත කළ යුතුයි. ඒ කාර්යය ජාතික ජන බලවේගය ආණ්ඩුව කරනවා. දේශපාලකයා නීතියට යටත් විය යුතුයි. දේශපාලකයා නීතියට වඩා උඩින් ඉන්න බෑ. එහෙම රටක් අපි හදනවා.
(-Colombo, November 5, 2024-) ජනාධිපතිවරණයේදී ජනතාව ගත්ත නිවැරදි තීරණය සම්බන්ධයෙන් අපි ස්තුතිවන්ත වෙනවා. අපි රටට ඉදිරිපත් කළ ප්‍රතිපත්ති මාලාව ක්‍රියාත්මක කරන්න ශක්තිමත් පාර්ලිමේන්තු බලයක් අවශ්‍ය වෙනවා. ඒ ශක්තිමත් ස්ථාවර බලය පාර්ලිමේන්තුවෙන් ලබාදෙන්න කියලා ජනතාවගෙන් ඉල්ලනවා. ජනාධිපතිවරණයේදී ජනතාව විසින් පරාජයට පත්කළ පැරණි දේශපාලනයේ සිටි අයට ඒ පරාජය දරා ගන්න අමාරුයි. ඒ නිසා ඔවුන් මාලිමාවට විරුද්ධව නැවත […]
(-Colombo, November 5, 2024-)
ජනාධිපතිවරණයේදී ජනතාව ගත්ත නිවැරදි තීරණය සම්බන්ධයෙන් අපි ස්තුතිවන්ත වෙනවා. අපි රටට ඉදිරිපත් කළ ප්‍රතිපත්ති මාලාව ක්‍රියාත්මක කරන්න ශක්තිමත් පාර්ලිමේන්තු බලයක් අවශ්‍ය වෙනවා. ඒ ශක්තිමත් ස්ථාවර බලය පාර්ලිමේන්තුවෙන් ලබාදෙන්න කියලා ජනතාවගෙන් ඉල්ලනවා. ජනාධිපතිවරණයේදී ජනතාව විසින් පරාජයට පත්කළ පැරණි දේශපාලනයේ සිටි අයට ඒ පරාජය දරා ගන්න අමාරුයි. ඒ නිසා ඔවුන් මාලිමාවට විරුද්ධව නැවත නැවතත් විවිධ අවලාද අපහාස සහ බොරු ප්‍රචාර ගෙනයන්න පටන්ගෙන තිබෙනවා. ඔවුන් ජනතාව නොමග යවන්න දරන උත්සාහය පරාජය කළ යුතුයි. ජනාධිපතිවරණයට පෙර සමාජයට බොරු කීම පිළිබඳව තවමත් ඔවුන් සමාව ගත්තේ නැහැ. ඒ පරාජිත කණ්ඩායම් ජාතිවාදය සහ ආගම්වාදය ඇවිස්සීමේ කැත අවලස්සන ප්‍රචාර ගෙනගියා. දේශපාලන විවේචන ඉදිරිපත් කිරීම ප්‍රශ්නයක් නොවෙයි. නමුත් එවැනි ආගම් සහ ජාති පටලවා ගත් බොරු ප්‍රචාර ගෙනයාම සමගි ජන බලවේගයේ සහ රනිල් වික්‍රමසිංහගේ වේදිකාවල දිගින් දි්‍රටම ගෙන ගියා. අනුර දිසානායක සහෝදරයා ජයග්‍රහණය කළොත් රට ලේ විලක් වීම පිළිබඳව විශාල ප්‍රචාරයක් ගෙන ගියා. නිවාස ඇතුළු දේපළ ගිනි තබන බවටත් ප්‍රචාරය කළා.
ජනාධිපතිවරණය අවසන් වී සති හයක් ගතවී තිබුණත් අපේ රටේ ඉතිහාසයේ පශ්චාත් මැතිවරණ ප්‍රචණ්ඩ ක්‍රියා කිසිවක් සිදු නොවුණු මැතිවරණයක් ලෙස වාර්තාවක් අපි තබා තිබෙනවා. අපේ ප්‍රතිපත්තිය අනෙකා රිදවීම නොව, අනෙකාව දිනාගැනීමයි. ඔවුන් ජනාධිපතිවරණයට පෙරත් බොරු ප්‍රචාර කළ බව අමතක කර, දැන් තව තව බොරු කියමින් යනවා. ජනතාවට බොරු කියා නොමග යැවීම සමාජ අපරාධයක්. විශේෂයෙන් සමගි ජන බලවේගයේ වේදිකාවලට ගොඩවුණු භික්ෂූන් වහන්සේලා පවා කීවේ අපේ ජයග්‍රහණයක් තුළ පන්සල් විනාශ කර, පෙරහැර කරන්න ඉඩ නොදී කාම්බෝජයේ වගේ තත්වයක් ඇතිකරන බව කීවා. භික්ෂූන් ඝාතනය කරාවි යැයි කීවා. අවසන් පෝය බවත් කීවා. එවැනි භීතියක් හැදුවත් අනුර සහෝදරයා ජනාධිපති වූ පසු සියලුම නිකායන්වල මහා නායක හාමුදුරුවන් වහන්සේලා හමුවීමට ගියා. ඒ වගේම දළදා මාලිගාවට, ශ්‍රී මහා බෝධීන් වහන්සේ වැඳපුදා ගන්නත් ගියා. අපේ අගමැති හරිනි සහෝදරිත් ගියා. ඒ සියලු අවස්ථාවලදී මහා නායක හාමුදුරුවන් වහන්සේලා ඇතුළු භික්ෂූන් වහන්සේලා ආශිර්වාද කළා. එහෙම තිබියදී අර බොරු ප්‍රචාර ගෙන ගිය අය නැවත වරක් 14දා ඡන්දය ඉවර වුණු වහාම ඇඳිරි නීතිය දමා පෝයට සිල් ගන්න අවස්ථාව අහිමි කරන බව කියනවා. ආගම් පටලවා ගෙන මෙතරම්ම බොරු කියන අය අතිශය විනාශකාරියි. එවැනි බොරුකාරයන් දේශපාලනිකව පරාජයට පත්කරන්න ඕනෑ. ඒ සමාජ විරෝධී ප්‍රචාර පරාජය කරන්න ඕනෑ.
මැතිවරණ කොමිෂන් සභාව සමග සාකච්ඡා කිරීමේදී ඡන්දයට නොවැම්බර් 14දා හැර වෙන දිනයක් යොදාගැනීමේ ගැටලුව ඔවුන් පැහැදිලි කළා. උසස් පෙළ විභාගය යෙදී ඇති බැවින් 14න් පසුව මැතිවරණය පැවැත්වීමට දිනයක් ගත නොහැකි බව කීවා. 14වැනිදා ඡන්දය පැවැත්වූවාම 15 වැනිදා සිල් ගන්න අයට කිසිම බාධාවක් වෙන්නේ නැහැ. පෙරහැර පවත්වන්නත් පුළුවන්. ජනාධිපතිවරණයට කලින් කීව බොරුව අතේ පත්තු වී තිබියදී දැන් ආපසු ඒ වර්ගයේම බොරුවක් විලිලැජ්ජා නැති ආකාරයෙන් සමගි ජන බලවේගය ප්‍රචාරය කරනවා. ආගම සම්බන්ධයෙන් මේ කියන බොරුවලට ආගමික නායකයින් විරෝධය පළකළ යුතුයි කියලා අපි විශ්වාස කරනවා. බෞද්ධාගමට අමතරව ඉස්ලාම් ආගම සම්බන්ධයෙනුත් මෙවැනිම බොරු ප්‍රචාරය කරනවා. ආගම අදහන්න නිදහස නැතිවෙයි, මුස්ලිම් අයගේ රැවුල කපයි වගේ ඉතාම අසත්‍ය කුමන්ත්‍රණකාරී ප්‍රචාර ගෙන ගියා. අපේ සමහර සහෝදරවරු කළ ප්‍රකාශ කෑලි කපලා සංස්කරණය කරමින් විකෘති අදහස් නැවත නැවතත් සමාජගත කරමින් සිටිනවා. ඔවුන් දන්න එකම දේ බොරු කියන එක විතරයි. ආගමික විශ්වාසයන් මත පදනම්ව ජාතිවාදය මත විපක්ෂය විසින් ජනතාව මත පටවන බොරු අවලාද විශ්වාස කරන්න එපා කියලා සියලුම ජනතාවගෙන් ඉල්ලනවා. ජාති හෝ ආගම් භේද නැති ශ්‍රී ලාංකික ජාතිය නිර්මාණය කිරීමේ අරමුණ වෙනුවෙන් ජාතික ජන බලවේගය ක්‍රියා කරනවා.
මේ ප්‍රචාරයන් උතුරේ ජනතාව අතරටත් ගෙන යනවා. විකෘති කරන ලද වීඩියෝ පට යොදා ගනිමින් ගෙනයන බොරු ප්‍රචාර සම්බන්ධයෙන් කරුණු රැසක් හෙළිවී තිබෙනවා. මිනිසුන්ට බොරු කියන මෙවැනි කණ්ඩායම් පරාජය කර, ජාතික සමගිය ගොඩනැගිය හැකි, රට ගොඩනැගිය හැකි ජාතික ජන බලවේගයේ කණ්ඩායම ජයග්‍රහණය කරවන ලෙස ඉල්ලා සිටිනවා.
පරාජයට පත්වූ රනිල් වික්‍රමසිංහ නැවත වටයකින් බොරු කියමින් විහිළු සපයමින් ජනතාව නොමග යැවීමට උත්සාහ කරනවා. රනිල් වික්‍රමසිංහගෙන් ව්‍යවස්ථාව ගැන ඉගෙන ගන්න කියලා ඔහු කියලා තිබුණා. ව්‍යාවස්ථාව සහ ප්‍රජාතන්ත්‍රවාදය ගැන කතා කරන්න එයාට කිසිම අයිතියක් නැහැ. ව්‍යවස්ථානුකූලව තිබුණු ඡන්ද කඩාකප්පල් කරපු, ප්‍රජාතන්ත්‍රවාදය විනාශ කරපු, අධිකරණය නියෝග පවා නොතකා හරිමින් වැඩ කරපු රනිල් වික්‍රමසිංහගෙන් ඉගෙන ගන්න තියෙන්නේ ඒකාධිපතිවාදය ගැන මිස ප්‍රජාතන්ත්‍රවාදය සහ ව්‍යවස්ථාව ගැන නොවෙයි. පැරදුනාට පස්සෙත් ආණ්ඩුවෙන් කෝකියෝ 16 දෙනෙකු ඉල්ලා සිටියා නම්, ඒ කාලයේ කොහොම පාවිච්චි කරන්න ඇත්ද? රනිල් වික්‍රමසිංහ 1977 සිට ජීවත් වුණේ මහජන මුදල්වලින්. දේශපාලනයෙන් පරාජය කළ පසුවත් මහජන මුදල්වලින් ජීවත් වෙන්න ඉල්ලනවා. ජනතාව රනිල් වික්‍රමසිංහ සම්බන්ධයෙන් තීරණය අරගෙන තිබෙනවා, දැන් පරාජය පිළිගෙන පාඩුවේ ජීවත් වෙන්න කියලා අපි මතක් කරනවා.
අපි ගැන විරුද්ධවාදීන් කියපු කතා සියල්ලම ගෙවී ගිය මාස එකහමාර තුළ බොරුවී තිබෙනවා. මහ මැතිවරණයට රාජ්‍ය බලය පාවිච්චි නොකර, මහජනතාවගේ සම්පත් භාවිතා නොකර, ජනතාවට බියෙන් සැකයෙන් තොරව ඡන්දය පාවිච්චි කළ හැකි පසුබිමක් සකස් කර තිබෙනවා.
ජනාධිපති ඇතුළු තුන්දෙනෙක් ගෙන් සමන්විත කැබිනට් මණ්ඩලයක් දැන් රට පාලනය කරනවා. මැතිවරණයෙන් පසුව ආණ්ඩුවක් පිහිටුවා බොහෝ කටයුතු සිදුකරන්න තිබෙනවා. ඒ අතර ජනතාවට දිය හැකි සහන ලබාදී අලුත් මාර්ගයක රට ගමන් කරනවා කියන යථාර්ථවාදී හැඟීම අපි තහවුරු කර තිබෙනවා. ඒ නිසාම පසුගිය ජනාධිපතිවරණයේදී අපට ඡන්දය නොදුන් බොහෝ පිරිසක් මේ වර අපට ඡන්දය ලබාදෙන්න පෙළ ගැසී සිටිනවා. බෞද්ධ, හින්දු, ඉස්ලාම්, කිතුනු සියලු ජනතාවගෙන් ඉල්ලා සිටින්නේ මෙවැනි බොරු ප්‍රචාර ගෙන යන අයට තවදුරටත් ඉඩනොදී ඔවුන් පරාජය කිරීමට එක්වන ලෙසයි. ඉදිරි දවස් කිහිපය තුළත් තවදුරටත් බොරු කියාවි. ඒ බොරු අවලාද ප්‍රතික්ෂේප කරමින් ජාතික ජන බලවේගයට ශක්තිමත් පාර්ලිමේන්තු බහුතර බලයක් ලබාදෙන ලෙස ඉල්ලා සිටිනවා.
මාධ්‍යවේදීන් නැගූ ප්‍රශ්නවලට පිළිතුරු
ප්‍රශ්නය: උදය ගම්මන්පිල ඇතුළු අය කියන්නේ ඔබලා බොරු කියමින් බලයට පත්වුණු බවයි. ඒ ගැන මොකද කියන්නේ?
පිළිතුර: උදය ගම්මන්පිල කියන්නේ බොරුවෙන්ම ජීවත්වෙන කෙනෙක්නේ. අපි කිව්වා කියලා කියන්නෙත් බොරු. ඒගොල්ලොම බොරු කියලා ඒ බොරු අපි කිව්වා කියන එකයි, ඒගොල්ලන්ගේ දේශපාලනය. උදය ගම්මන්පිය මහත්තයාට තිබෙන කුලප්පුව, අසනීපය අපට තේරෙනවා. පාස්කු ප්‍රහාරය සම්බන්ධයෙන් පරීක්ෂණ නිසි පරිදි පැවැත්වූයේ රවී සෙනෙවිරත්න, ශානි අබේසේකර මහත්වරු ඇතුළු කණ්ඩායමක්. ගෝඨාභය බලයට ආ ගමන් ඔවුන්ව ඒ පරීක්ෂණවලින් ඉවත්කර, හිරේත් දැම්මා. ඒ පරීක්ෂණ සම්බන්ධයෙන් හොඳම තොරතුරු දන්නා දෙන්නාට නැවත එම වගකීම් පැවරුවාම උදය ගම්මන්පිලව ඉත්තෙකුට දැම්ම පිටිපස්සේ ඉන්න අය ගැන අපි දන්නවා. උදය ගම්මන්පිල කියන ඔය වාර්තාව පරීක්ෂණ වාර්තාවකුත් නොවෙයි. අධිකරණ වාර්තාවකුත් නොවෙයි. වෙනත් පිළිගත් කොමිසමක වාර්තාවකුත් නොවෙයි. රවි සෙනෙවිරත්න සහ ශානි අබේසේකරගෙන් පළිගන්න පත් කළ කමිටුවක වාර්තාවක් ඒක රහස් වාර්තාවකුත් නොවෙයි, එක කවුරුත් පිළිගන්නේ නැහැ. හැමදාම ප්‍රෙස් තිය තියා උදය ගම්මන්පිල ඔය ගැන කියවනවා.
ප්‍රශ්නය: එල් බෝර්ඩ් කට්ටිය පාර්ලිමේන්තුවට යවලා රට ගොඩගන්න බැහැ කියනවා.
පිළිතුර: එල් බෝර්ඩ් නැති කට්ටිය යවලා තමයි මහජන මුදල් හොරකම් කරලා රට විනාශ කළේ. අපේ එන්නේ එල්බෝර්ඩ් අය නොවෙයි. ඒ අය පාර්ලිමේන්තුවේ හිටපු නැති අය වුවත් මහජනතාව එක්ව දීර්ඝ කාලයක් දේශපාලනය කළ අයයි. සමහර අය පළාත් සභාවේ, ප්‍රාදේශීය සභාවල සිටි අයයි. තව පිරිසක් බිම් මට්ටමෙන් ජනතාව එක්ක වැඩ කළ අය. ඒ ගොල්ලෝ පළපුරුද්ද කියන්නේ මහජන මුදල් නාස්ති කිරීම, හොරකම් කිරීම වගේ දේවල්වලට විතරයි. ඒ වගේම ඒ කියන හැමෝම පාර්ලිමේන්තුවට එනකොට නවකයන් තමයි. ඉගෙන ගන්නේ ඊට පස්සේ. කලින් තිබුණු අමාත්‍යාංශ 28ක් 15කට අකුළලා අපේ තුන්දෙනෙක් පවත්වාගෙන යනවා. ඇමතිවරු, නියෝජ්‍ය ඇමතිවරු, සහ රාජ්‍ය ඇමතිවරු 60දෙනෙක් විතර කරගෙන ගිය කටයුතු අපේ තුන්දෙනා කරගෙන යනවා. මාලිමාවට කියන්න දෙයක් නැති වුණාම කියන කතා තමයි ඔය. නමුත් ජනතාව ඔය කතාව ප්‍රතික්ෂේප කරනවා. ශක්තිමත් බහුතර පාර්ලිමේන්තු බලයක් අපට ලබාදෙන්න පෙළ ගැසී සිටිනවා.
ප්‍රශ්නය: සහල් මිල සම්බන්ධයෙන් ඇති වී තිබෙන ප්‍රශ්නයට දෙන පිළිතුර මොකක්ද?
පිළිතුර : මේ වන විටත් මහා පරිමණ මෝල් හිමියන් සහ කුඩා හා මධ්‍ය පරිමාණ මෝල් හිමියන් සමග සාකච්ඡා පවත්වා තිබෙනවා. සැලැස්මක් නැතිව පවත්වාගෙන ගිය ක්ෂේත්‍රයක කාලාන්තරයක් තිබුණු ප්‍රශ්නයක් මේක. ආණ්ඩුව මිලදී ගැනීම නතර කිරීම නිසා සහල් මෝල් හිමියන් කිහිපදෙනෙකු ගොවියාගෙන් අඩු මිලට වී මිලදී ගත්තා. ඒ අර්බුදය විසඳන්න විද්‍යාත්මක නිවැරදි සැලසුම් සකස් කර ක්‍රියාත්මක කරන්න අපි පියවර ගෙන තිබෙනවා. විශේෂයෙන්ම පොහොර ප්‍රශ්නය ඇති කළ පසු වී වගේම පොල් අස්වැන්න අඩුවී හිඟයක් ඇති වී මිල ඉහළ යාමේ ප්‍රශ්නයක් තිබෙනවා. 1977 ඉඳලා සිදුකළේ අපේ රටේ තිබුණු සශ්‍රීක පොල් ඉඩම් කට්ටිකර විකිණීමයි. ඊළඟට පොල් පොහොර මිල විශාල වශයෙන් වැඩි කළා. පොහොර යෙදිය නොහැකි නිසා, පොල් අස්වැන්න අඩු වුණා. ඒ වගේම ප්‍රමාණවත් තරම් අලුතින් පොල් වගා කළේ නැහැ. ඒ වගේම දැන් රිලව් ඇතුළු සතුන්ගෙන් තිබෙන ප්‍රශ්නයත් ලොකුම ප්‍රශ්නයක් මේ වැනි ගැටලුවලට විද්‍යාත්මක දිගු කාලීන විසඳුම් අවශ්‍යයි. අපි ආණ්ඩුවක් ගොඩනංවලා මේ ප්‍රශ්න වෙනුවෙන් ඵලදායී ස්ථිර විසඳුම් ලබා දෙනවා.
(-රට හදන අපි එකට මාලිමාවට බදුල්ල දිස්ත්‍රික් විජයග්‍රාහී ජනතා රැලිය 2024.11.03-) ජනාධිපතිවරණයේදී අප ඉතාමත්ම අසීරු කඩයිම පැන්නා. දීර්ඝ කාලයක් තිස්සේ මැතිවරණ තිබුණා. ඒ හැම මැතිවරණයක්ම ජයග්‍රහණය කළේ ඒ අයයි. ඒ අය බෙදිලා ඡන්ද කරලා පස්සේ එකට එකතුවෙලා ආණ්ඩුව හැදුවා. දීර්ඝ කාලයක් එහෙට මෙහෙට දේශපාලන බලය මාරුණා. නමුත් පහුගිය ජනාධිපතිවරණයේදී බලය ජනතාව වෙත මාරු වුණා. පසුගිය […]
(-රට හදන අපි එකට මාලිමාවට බදුල්ල දිස්ත්‍රික් විජයග්‍රාහී ජනතා රැලිය 2024.11.03-)
ජනාධිපතිවරණයේදී අප ඉතාමත්ම අසීරු කඩයිම පැන්නා. දීර්ඝ කාලයක් තිස්සේ මැතිවරණ තිබුණා. ඒ හැම මැතිවරණයක්ම ජයග්‍රහණය කළේ ඒ අයයි. ඒ අය බෙදිලා ඡන්ද කරලා පස්සේ එකට එකතුවෙලා ආණ්ඩුව හැදුවා. දීර්ඝ කාලයක් එහෙට මෙහෙට දේශපාලන බලය මාරුණා. නමුත් පහුගිය ජනාධිපතිවරණයේදී බලය ජනතාව වෙත මාරු වුණා. පසුගිය ජනාධිපතිවරණයේදී බදුල්ලට කොළඹින් නායකයෝ ආවා. ජනාධිපති ආවා. හිටපු ජනාධිපතිලා ආවා. දැන් එනවද? මැයි දිනයට ඇවිත් කිව්වා වතු ජනතාවට රුපියල් 1700ක් දෙනවා කියලා. රජයේ සේවකයින්ට වැටුප් වැ ඩිකරනවා කිව්වා. කළාද? ඒ වගේම ජනාධිපතිවරණයේදී ජාතික ජන බලවේගය ජයග්‍රහණය කළොත් වෙන දේවල් පිළිබඳ විශාල අවලාද ප්‍රමාණයක් කිව්වා. ඔවුන් තමන්ගේ අතින් බලය ගිලිහී යාම වැළැක්වීම සඳහා සෑම ශතයක්ම වියදම් කළා. ඒවට මාධ්‍ය භාවිතා කළා. ඔවුන්ගේ අතේ බලය තියාගන්න උපරිම වෙර වීරිය දැම්මා. ඔවුන්ගේ උපරිම බලය පරාජය කරලා මහජන බලය ඉස්මතු කිරීමට සැප්තැම්බර් 21 වන සමත් වුණා. දීර්ඝ කාලයක් ඔවුන් අතේ තිබුණු බලය මේ රටේ ජනතාවගේ මැදිහත්වීම මත පරාජයට පත් කළා.
සමහර අය කියනවා ඡන්දෙ ටිකක් කම්මැලයි වගේ කියලා. දැන් හාල් බෙදන්න එනවද? බස් බෙදන්න එනවද? නැහැ. ඒ අය ස්වේච්ඡාවෙන්ම පරාජය බාරගෙන ඉවරයි. ඉස්සර කොළඹින් බදුල්ලට ආපු නායකයෝ දැන් කොළඹ ඉඳන් තමන්ගේ ඡන්දය කරනවා. සමහර නායකයෝ 1977 පාර්ලිමේන්තුවට ඇවිල්ල තියෙන්නේ. මන්ත්‍රීකම, ඇමතිකම, කතානායකකම, විපක්ෂනායකකම, අගමැතිකම, ජනාධිපති ධුරය ඒ සියල්ල දැරුවා. නමුත් ඡන්ද පැරදුනා. අවුරුදු 47ක් පාර්ලිමේන්තු ඉදලා විශාල මන්ත්‍රීකම්, ඇමතිකම්, විපක්ෂයනායකකම් අරගෙන නැවත නැවත ආයි එන්න හදනවා. ඒ අයට පරාජය දරාගන්න බෑ. මීට කලින් පැරදුනාට අවුලක් නෑ. මොකද පැරදුනේ ඒගොල්ලන්ගේම පැලැන්තියේ අයටයි. එයාලා හැමදාම හිතුවේ එයාලගේ පන්තිය අතේ බලය තියාගන්න පුළුවන් කියලයි. මේ වසර 76ම ඒගොල්ලන්ගේ පන්තිය අතේ බලය තිබුණේ. පවුලෙන් පවුලට බලය මාරු වුණා මිස ජනතාව අතට බලය මාරු වෙලා නැහැ. වෙනදා පරාජයන් දරාගන්න පුළුවන්. පරදින්නේ තමන්ගේ කෙනෙක්ටමයි. දිනන්නේ තමන්ගේ කෙනෙක්මයි නිසා. නමුත් මේ පරාජය ඔවුන්ට දරාගන්න බැහැ. ඔවුන් හිතනවා ඔවුන් ඉපදිලා ඉන්නෙම මේ රට පාලනය කරන්න කියලා. පොදු ජනතාව ඉන්නේ එයාලව නඩත්තු කරන්න කියලා. ඒ අය වේදිකා ගානේ ඇවිල්ල කියන්නේ දුක. ජාතික ජන බලවේගය ආණ්ඩුව මේ රට හදලා මිසක් නැවත හැරෙන්නේ නැහැ.
ඇතැම් ආණ්ඩු ඉතිහාසයේ අතරමග වැටිලා තියෙනවා. 2002 හදපු ආණ්ඩුව 2004 වැටුනා. මතක තියාගන්න ඒ වැටුන නෙමෙයි අපි එකතුවෙලා වැට්ටුවා. 2020 හදපු ආණ්ඩුව 2022 ජනතාව පලවා හැරියා. අතරමඟ ආණ්ඩු වට්ටල තියෙන්නේ ජනතාවයි. ගෝඨාභය රාජපක්ෂගේ ආණ්ඩුවට පාර්ලිමේන්තුවේ තුනෙන් දෙකක් තිබුණා. කැබිනට් මණ්ඩලයේ ඥාතීන් අටදෙනෙක් හිටියා. ලක්ෂ හැට නමයක් ඡන්දය දුන්නා. නමුත් 2022 වෙනකොට ජනතාව ආණ්ඩුව වැට්ටුවා. ඡන්දෙ දීල දවසෙන් දෙකෙන් ඒ ආණ්ඩුවෙන් ජනතාව ඉවත් වුණා. ජාතික ජන බලවේගය ආණ්ඩුව පසුගිය සැප්තැම්බර් 21වෙනිදා ඡන්දය ලබාදුන් ජනතාවට වඩා දැන් මාලිමාව වටා ජනතාව එකතු වෙමින් තිබෙනවා. ජනාධිපතිවරණයේදී ඡන්දය නොදුන් ජනතාවත් අප සමග එකතුවෙමින් තිබෙනවා. අප ජනතාවගේ විශ්වාසය දිනා ගනිමින් ඉදිරියට යන ආණ්ඩුවක්. එය කිසිසේත් වට්ටන්න බැහැ. ඒගොල්ලෝ කවුරුත් ඇවිල්ලා ආණ්ඩුව ඉල්ලනවද? දැන් ඉල්ලන්නේ විපක්ෂය. එයාලම පිළිඅරගෙන තිබෙනවා නියත පරාජය. ඔවුන්ට ආණ්ඩුවක් හදන්න හිතන්නවත් බැහැ.
ජනාධිපතිවර්ණයේදී ඒ අය අපට නැගූ අවලාද නිසාම දැන් වෙනකොට වේදිකාවක දේශපාලන ව්‍යාපාරයක් කරන්න බැරි තැනට ඔවුන් පත්වෙලා. මොකද වේදිකාවට නැගල ඒගොල්ලෝ ඡන්ද ව්‍යාපාරය කරද්දී ජනතාව ඔවුන්ගෙන් අහන ප්‍රශ්නවලට උත්තර දෙන්න විදිහක් නැහැ.
ශක්තිමත් දේශපාලන නායකත්වයක් ජනතාවට දෙන්න ඕනේ.
පාර්ලිමේන්තුව, පළාත් සභාව, ප්‍රාදේශීය සභා හරහා තමයි එම දේශපාලන බලය ගොඩනැගෙන්නේ. ගමේ ප්‍රශ්න විසඳන්න, රටට විනයක් හදන්න, රාජ්‍ය සේවය ශක්තිමත් කරන්න සමීප දේශපාලන නායකත්වය අවශ්‍ය වෙනවා. දේශපාලන නායකත්වයක් තිබෙන තැන්වලින් අපිට තවම බහුතර බලයක් නැහැ. අපට දැනට තියෙන්නේ ජනාධිපති පුටුව පමණයි. පාර්ලිමේන්තු බලය තවම නැහැ. ඒනිසා මේ දිස්ත්‍රික්කය නියෝජනය කරමින් ජාතික ජන බලවේගයේ විශාල පිරිසක් පාර්ලිමේන්තුවට එවිය යුතුයි. ඒකට විපක්ෂයෙන් ගිහිල්ලා හරියන්නෙ නැහැ. ඒකට යන්න ඕනේ ආණ්ඩු පක්ෂයෙන්. මේ සැරේ බලවත් ආණ්ඩුවක් හැදිය යුතුයි. අපගේ සැලසුම් ප්‍රාදේශීය වශයෙන් ඉදිරියට ගෙන යෑමට එවැනි බලවත් ආණ්ඩුවක් අවශ්‍යයි. අපේ රටට යහපත් දේශපාලන විනයක් අවශ්‍යයි. අප හැමදෙනාම නාස්තිය අවම කරමින්, දූෂණය අවම කරමින් රටේ ජනතාව බලා ගනිමින් කටයුතු කරනවා.
ඇමතිවරුන්ට ලබාදී තිබෙන වරප්‍රසාද අපි ඉවත් කරනවා. ඉන්න ජනාධිපතිවරණයාට පමණක් නෙවෙයි හිටපු ජනාධිපතිවරුන්ගේ වරප්‍රසාදත් අවම කිරීමට අප කටයුතු කරනවා. මහජන ධනය නිරපරාදේ වියදම් කිරීමට අප ඉඩ තියන්නේ නෑ. ඒ සඳහා නිසි ප්‍රතිපත්තියක් සකස් කරනවා. අපි කිසි කෙනෙකුගෙන් පළිගන්නවා නොවෙයි. යහපත් දේශපාලන ප්‍රමිතියක් සකස් කරනවා. එහෙම ප්‍රමිතියක් ඕන නැද්ද? තමන්ට රිසිසේ රට පාලනය කරන යුගය අපි අවසන් කරනවා. ජනාධිපතිවරයාගේ සිට ප්‍රාදේශීය සභා මන්ත්‍රීවරයා දක්වා යහපත් දේශපාලන ප්‍රමිතීන් සකස් කරනවා. දැනට තිබෙන අයාලේ යන දේශපාලනය ප්‍රමිතිගත කරනවා. දැනට තිබෙන පාර්ලිමේන්තු ප්‍රමිතියෙන් තොර පාර්ලිමේන්තුවක්. මුදලට විකිණෙන මන්ත්‍රීවරු ඉන්න, අපරාධකරුවන් ඉන්න පාර්ලිමේන්තුවක්. මෙවැනි පාර්ලිමේන්තුවක් ප්‍රමිතිගත කරන්න ඕන නැද්ද?
මහජනයාගෙන්ම යැපිලා, මහජන ධනයෙන් ගත්ත වාහන පැරදිලා යනකොටත් අරගෙන යනවා. මේ පරපුටු දේශපාලන නවත්තන්න ඕන. ඒ සඳහා පාර්ලිමේන්තු බලය ඇති කිරීමට බදුල්ල දිස්ත්‍රීක්කයෙන් වැඩි මන්ත්‍රී ධුර ප්‍රමාණයක් පාර්ලිමේන්තුවේ පිරවිය යුතුයි.
ගැඹුරුතම ආර්ථික අර්බුදයට ලක්වී තිබෙන රටක් අපට දුන්නේ. ඒ නිසා මේ ආර්ථික තත්වය යටතේ ජනතාවගේ අවශ්‍යතාවන් ලබාදෙමින් පවත්වාගෙන යාම තමයි අපි මේ කාලයේ සිදු කළේ. මේ දින ගණනට ආයෝජකයන්ගේ විශ්වාසය, ගොවි ජනතාවගේ විශ්වාසය, ධීවර ජනතාවගේ විශ්වාසය දිනා ගැනීමට අප සමත් වුණා. ඩොලරය තුන්සියට අඩුවෙන් පවත්වාගෙන යාමට අප සැලසුම් හැදුවා. ගෑස් හිගයකින් තොරව ලබාදීමට අපි සැලසුම් හැදුවා. ආර්ථිකය කඩා නොවැටි ඉදිරියට යාමට අප මැදිහත් වී තිබෙනවා. පාර්ලිමේන්තු බලයත් සමග ආර්ථිකයේ හැරුම් ලක්ෂයක් ඇති කිරීමට අපි සැලසුම් සකස් කර තිබෙනවා. කෘෂිකර්මාන්තය දියුණු කිරීමට, රාජ්‍ය සේවාව කාර්යක්ෂම කිරීමට, රාජ්‍ය ආයතන ඩිජිටල්කරණය කිරීමට, සංචාරක කර්මාන්තය ප්‍රවර්ධනය කිරීමට අප සැලසුම් සකස් කර තිබෙනවා. 2025 වසර ලංකාවට වැඩිම සංචාරකයින් පැමිණි වසර බවට අප පත් කරනවා. ආර්ථිකයට පණ පොවන්න අප සැලසුම් හදනවා. ග්‍රාමීය ජනතාව දුප්පත් භාවයෙන් මුදා ගැනීම සඳහා සැලැස්ම අප සකස් කර තිබෙනවා. අධ්‍යාපනය විශාල ප්‍රතිසංස්කරණයක් ඇතිකිරීමට අපේක්ෂා කරනවා. සෑම දරුවෙක්ම හැකියාව නිපුණතාවය සහිත දරුවෙක් ලෙස පාසලෙන් එලියට ඒම සඳහා අප වැඩපිළිවෙළක් සකස් කර තිබෙනවා.
ක්ලීන් ශ්‍රී ලංකා වැඩසටහන යටතේ කැළි කසළ නැති දකුණු ආසියාවේ හොඳම රට බවට පත් කරනවා. විනයක් ඇති ශ්‍රී ලංකාවක් නිර්මාණය කරනවා. විද්‍යා හා තාක්ෂණ ක්ෂේත්‍රය දියුණු කිරීමට කටයුතු කරනවා. කර්මාන්ත ක්ෂේත්‍රයේ නවෝදයක් ඇති කිරීමට අප කටයුතු කරනවා. කඩා වැටුණු රට, ලෝකය ඉස්සරහ අසරණභාවයට පත්වී තිබුණු රට, යළි පුනරුදය කරා කැඳවීම අප ආරම්භ කර තිබෙනවා. ඩිජිටල්කරණ ව්‍යාපෘතිය සඳහා මේ රටේ එම ක්ෂේත්‍රයේ ඉහළම දැනුමක් තියෙන පුද්ගලයා අප සමග වැටුප් රහිතව ස්වේච්ඡාවෙන් එකතුවී සිටිනවා. එහෙමයි අප වැඩ කරන්නේ. මේ රටේ ජනතාව සමග පොර බඳිමින් මේ රට ගොඩනැගීම සිදු කරන එකම ආණ්ඩුව ජාතික ජන බලවේගයේ ආණ්ඩුවයි. මේ ආණ්ඩුව රට හදන ගමන් ජනතාව බලාගන්න ආණ්ඩුවක් බවට පත්වී තිබෙනවා. එහෙම ආණ්ඩුවක් කවදාවත් පත් වුණේ නැහැ. අනාගත පරම්පරාව දුක් විඳින්නේ නැති රටක් අපි නිර්මාණය කරමු. ඒ වෙනුවෙන් ඔබ සියලු දෙනාට එක්වෙන ලෙස ආරාධනා කරනවා.
“1994 සිට අපි ඉල් විරුවන්ගේ කොඩිය මේ ජයග්‍රහණය දක්වා විවිධ මර්දන සහ අපහාස, අවලාද තුළින් අරගෙන ආවා.”
-ජාතික ජන බලවේගයේ බදුල්ල දිස්ත්‍රික් විධායක සභික සහ බදුල්ල දිස්ත්‍රික් අපේක්‍ෂක, සුදත් බලගල්ල-
පසුගිය කාලයේ අපට මඩ, අවලාද ගසන අය විශේෂයෙන් වැඩිහිටි අම්මා, තාත්තලා බය කළා. ඒ වුනාට එයාලගේ පාලනය නිසා මේ වැසි සමයේ අවුරුදු හැත්තෑව, අසූව වුණු අපේ ආදරණීය අම්මලා, තාත්තලාට සහ ආච්චිලා, සීයලාටත් කැත්ත උදැල්ල අරගෙන හේනට යන්නට සිදු වී තිබෙනවා. නමුත්, අපේ පාලනයක් තුළ ඒ වැඩිහිටි අම්මා, තාත්තලාට සුවපහසු ජීවිතයක් ගත කරන්න අවශ්‍ය වටාපිටාව, පහසුකම් සලසා දෙනවා. දේශපාලන ඉතිහාසයේ නොවැම්බර් මාසය කියන්නේ අපේ පක්ෂය සුවිශාලම මර්දනයකට ලක් කරපු කාලයක්. අපේ පක්ෂයේ හැටදහසකට වැඩි පිරිසක් ඝාතනය කළා. ඒ විරුවන් සමරන ඉල් මාසයයි මේ. අපට වඩා හොඳ ජීවිතයක් ගොඩනඟා දෙන්න බිහි වුණු ආදරණීය සගයන් වධවේදනාවලට ලක් කර ඝාතනය කළා. ඉන් පසුව 1994 සිට අපි ඒ සගයන්ගේ කොඩිය මේ ජයග්‍රහණය දක්වා විවිධ මර්දන සහ අපහාස, අවලාද මැද අරගෙන ආවා.
ඌව වෙල්ලස්සට කුඩාපොළ හාමුදුරුවෝ, ගොංගාලේ ගොඩ බණ්ඩලා, දොරේසාමිලා, මඩුගල්ලේලා, වීර කැප්පෙට්ටිපොළලා වාගේ ජීවිත පරිත්‍යාග කළ වීරයන්ගේ පසුබිමකුත් තිබෙනවා. ඔවුන්ගෙන් පැවත එන අපි දොළොස් දෙනකු මාලිමාවේ ජයග්‍රහණය වෙනුවෙන් කැපවී ක්‍රියා කරන්න මහා මැතිවරණයට ඉදිරිපත් වී සිටිනවා. මේ වේදිකාවේ ඉන්න අපි කවුරුත් වාගේම වේදිකාව ඉදිරිපිට වැස්සේ නොසෙල් වී සිටින ඔබ කවුරුත් සැප්තැම්බර් 21 ජනාධිපතිවරණයේ ජයග්‍රහණය වෙනුවෙන් රොද බැඳුණ අයයි. ඒ ජයග්‍රහණය නොවැම්බර් 14 වැනිදා තවත් ශක්තිමත්ව පාර්ලිමේන්තු බලයක් බවට ගෙන යාමේදී බදුල්ල දිස්ත්‍රික්කයේ අප හැමෝටම සුවිශේෂී කාර්යභාරයක් ඉටු කරන්නට තිබෙනවා. 14 වැනිදා ඓතිහාසික ජයග්‍රහණයකට බදුල්ල දිස්ත්‍රික්කයේ සියලුම දෙනාට දායක වන ලෙස ඉල්ලා සිටිනවා.
“සැප්තැම්බර් 21 වැනිදා ලැබූ ජය නොවැ. 14 තවත් ශක්තිමත් වන බව මේ ජනතාවගේ උද්යෝගයෙන් සහතික වෙනවා”
-ජාතික ජන බලවේගයේ බදුල්ල දිස්ත්‍රික් විධායක සභික, බදුල්ල දිස්ත්‍රික් අපේක්‍ෂිකා, අම්බිකා සැමුවෙල්-
‘පොහොසත් රටක් – ලස්සන ජීවිතයක්’ ගොඩනැඟීම අරමුණු කරගෙන සැප්තැම්බර් 21 වැනිදා ලැබූ ජයග්‍රහණය නොවැම්බර් 14 වැනිදා තවත් ශක්තිමත් කරන බව මේ ජනතාව දකින විට සහතික වෙනවා. මාගේ දෙමාපියනි, සහෝදර, සහෝදරියනි, සිංහල, දෙමළ, මුස්ලිම් සියලු ජාතිකත්වයන් සහ සියලු ආගම්වල අප සියලු දෙනා එකම පරමාර්ථයකින් එකමුතු වී රට ගොඩනැඟීමේ ශ්‍රමදානයට එකතු වෙමු කියන පණිවුඩය ඔබ සියලු දෙනාටම මා ලබා දෙනවා. අවුරුදු හැත්තෑහයක් පුරා ජාතිවාදය, ආගම්වාදය පතුරුවමින්, අප බේදකරලා ඔවුන් පාලනය ගෙන ගියා. ඒ තත්වය පරාජය කරමින්, ජාතික ජන බලවේගයේ සෙවණට අප හැමෝ ම එකතුවී එකමුතුභාවයේ බලය පෙන්වමින්, නොවැම්බර් 14 වැනිදා ජයග්‍රහණය කරනවා. ඊට පසුව මේ දේශපාලනය, සමාජය, සංස්කෘතිය, ආගමික යන සියලු ආකාරයෙන් නව පුනරුද යුගයකට පා තබන්න අප සියලු දෙනා එකමුතු විය යුතුයි. ඒ වාගේම ජාතික ආර්ථිකය ගොඩනඟන්න ඉතා ඉක්මනින්ම අත්වැල් බැඳගෙන කැප වෙමු කියන පණිවුඩය මම ඔබ සියලු දෙනා හමුවේ තබනවා.
“එදා අපිට ඔරවපු ගොරවපු අයත් අද අපේ ජයග්‍රහණය ප්‍රාර්ථනා කරනවා…”
-ජාතික ජන බලවේගයේ බදුල්ල දිස්ත්‍රික් විධායක සභික, මහා මැතිවරණ අපේක්‍ෂක, දිනදාස රත්නායක-
මේ වේදිකාවේ දී පුංචි කතාවක් කියන්න කල්පනා කළා. දහවල් දොළහෙන් පස්සේ ගමකට හිරු එළිය වැටෙන එක බාධාවක්වී තිබුණු කන්දක් ඉවත් කරන්න ගමේ කිහිප දෙනෙක් විතරක් මුලින් එකතු වුණා. කන්ද කපලා, හිරු එළිය වැටෙන්න සලස්වන්න ඕනෑ බව මුලින්ම කිව්ව පුද්ගලයා කෙරෙහි මුළු ගමේම පිරිස අවඥාවෙන් බැලුවා. නමුත්, ඔහු අවලාද, අවඥා මැද්දේ ඒ කන්ද කපන්න ක්‍රියා කළා. ඒ අතරේ ටික කාලයකට පසුව තවත් පිරිසක් එකතු වී දැවැන්ත ශ්‍රමදානයකට මුලපිරුවා. අන්න ඒ වාගේ තමයි අපේ දේශපාලනයත්. ඉදිරියේ තියෙන දැවැන්ත ශ්‍රමදානයකට සූදානමින් අප වටා එක් වූ මහා සෙනඟක් මෙතැනට රැස් වී සිටිනවා. එළැඹෙන 14 වැනිදා මේ ගමට, මේ රටට, අපේ රටේ සමස්ත ජනතාවට හිරු උදා කිරීමේ දැවැන්ත ශ්‍රමදානයට අපි සූදානමින් සිටිනවා. 1994 බණ්ඩාරවෙල නගරයේ කැට හොල්ලමින්, ආධාර එකතු කළ අපිට ඔරවපු, ගොරවපු පිරිසක් හිටියා. එදාත් අපි මේ කැප කිරීම් කළේ මේ සමස්ත රට පොහොසත් රටක් කරමින්, සියලුම ජනතාවට ලස්සන ජීවිතයක් උදාකර දීම වෙනුවෙන් ඇප-කැප වීමෙන් බව මතක් කර දෙනවා. ඒ වෙනුවෙන් එළැඹෙන 14 වැනි දින සියලුම දෙනා පෙළගැසී ඡන්දය ලබාදෙන ලෙස ඉල්ලා සිටිනවා.
“පාට, පක්ෂ විදියට අප බෙදා සිටි යුගය නොවැම්බර් 14 වැනිදා සදහටම අවසන් කරමු.”
-ජාතික ජන බලවේගයේ බදුල්ල දිස්ත්‍රික් විධායක සභිකා, ‘එන්.පී.පී. කාන්තාවෝ’ සංවිධානයේ විධායක සභිකා, මැතිවරණ අපේක්‍ෂිකා, නීතිඥ උපේක්‍ෂා විජේතුංග-
අප සියලු දෙනාම මේ අවස්ථාවේ දී එකම ඉනිමඟක කොටස් හැටියට රට ගොඩනැඟීම වෙනුවෙන් ඒකරාශී වී සිටිනවා. විශේෂයෙන් ම ආදරණීය කාන්තාවාන්ගෙන් මා ඉල්ලා සිටින්නේ 1931 සර්වජන ඡන්ද බලය ලැබුණු දා ඉඳලා දේශපාලන අයිතිය ලැබුණත්, තවමත් දේශපාලනයේ දී දෙවැනි පුරවැසියෙක් ලෙස සැලැකීම අවසන් කරන්න එක් වන ලෙසයි. ඒ දෙවැනි පෙළ සිටින කාර්යභාරයක් ඉටු කළ අවසන් කර රට ගොඩනැඟීමේ කාර්යභාරයට ප්‍රමුඛම නායකත්වයක් ලබා දෙන්න පෙරට එන ලෙස ඉල්ලා සිටිනවා. ප්‍රබලතම ජනාධිපතිවරයෙක් පත් කර ගන්න සැප්තැම්බර් 21 වැනිදා ලබා දුන් දායකත්වය තවත් කිහිප ගුණයකින් වර්ධනය කර ගනිමින්, නොවැම්බර් 14 වැනිදා ශක්තිමත් ආණ්ඩුවක් පිහිටුවන්න දායක වෙමු. පාට, පක්ෂ විදියට අප බෙදා සිටි යුගය නොවැම්බර් 14 වැනිදා සදහටම අවසන් කරමු. ජාතික ජන බලවේගය අප සියලු දෙනාම එකම කඳවුරකට ගෙන ආවා. ඒ අප තුළ ඇති ශක්තිය අවදි කරමින්, රට ගොඩනඟමු. ඒ වෙනුවෙන් හොඳම තැන ජාතික ජන බලවේගය බවත්, සාධාරණ සමාජයක නිදහස් කාන්තාවන් ලෙස ජීවත් වීම වෙනුවෙන් අපි හැමෝ ම එකතු වෙමු. ලොව ශක්තිමත්ම පාර්ලිමේන්තුව ගොඩනැඟීමට අප සියලුම දෙනා එකතු වෙමු.
“බදුල්ල දිස්ත්‍රික්කයෙන් ලබා දිය යුතු ලොකුම ශක්තිය අපි ලබා දෙනවා.”
-ජාතික ජන බලවේගයේ බදුල්ල දිස්ත්‍රික් විධායක සභික, ‘අදිටන’ විශ්‍රාමික සාමුහිකයේ බදුල්ල දිස්ත්‍රික් විධායක සභික, බදුල්ල දිස්ත්‍රික් පාර්ලිමේන්තු අපේක්‍ෂක, විශ්‍රාමික නාවික හමුදා කමාන්ඩර්, බණ්ඩාර විස්සුන්දර-
අහිංසක ජනතාවගේ ඡන්දයෙන් මෙතෙක් බලය ලබා ගත් අය මේ රටේත්, බදුල්ල දිස්ත්‍රික්කයේත් පොදු ජනතාවගේ ප්‍රශ්න විසඳුවේ නැහැ. නමුත්, ජාතික ජන බලවේගයේ අපි මේ වන විටත් බදුල්ල දිස්ත්‍රික්කය සංවර්ධනය කරමින්, ජනතාවගේ ජීවන තත්වයන් උසස් කිරීමට සැලැසුම් සකස් කර අවසන්. එම සැලැසුම් සහ ප්‍රතිපත්ති වටා පසුගිය ජනාධිපතිවරණයේ දීත් ඒකරාශී වූ අය තවත් දෙතුන් ගුණයකින් වර්ධනය කරමින්, බදුල්ල දිස්ත්‍රික්කය ජය ගන්නා බව විශ්වාසයි. අප මෙම මැතිවරණයට ඉදිරිපත් වී සිටින්නේ අබමල් රොණක තරමින්වත් පෞද්ගලික ලාභ, ප්‍රයෝජන අපේක්ෂාවෙන් නොවෙයි. මේ ප්‍රදේශයට, රටට ඉටු කළයුතු වගකීමක් ඉටු කිරීමටයි අප ඉදිරිපත් වී සිටින්නේ. අඹ ඇටයක් සිටවූ සීයා වගේ යුතුකම පමණක් ඉටු කරනවා. අප සියලු දෙනාම ඒ වගේ යුතුකම ඉටු කිරීමට කැපවී සිටිනවා. බදුල්ල දිස්ත්‍රික්කයේ මෙතෙක් සිටි දූෂිතයන්ගේ දේශපාලනය මෙම 14 වැනිදා සදාකාලිකව අවසන් කරනවා. රටේ ප්‍රගතිය වෙනුවෙන් බදුල්ල දිස්ත්‍රික්කයෙන් ලබාදිය යුතු ලොකුම ශක්තිය ලබා දෙනවා. ඒ වෙනුවෙන් මන්ත්‍රී ආසන වැඩිම ප්‍රමාණයක් බදුල්ල දිස්ත්‍රික්කයෙන් ලබාදීමට පෙළගැසෙන ලෙස සියලුම දෙනාගෙන් ඉල්ලා සිටිනවා.
“ගුරුවරු දණගස්වන නූගත් දේශපාලකයන් වෙනුවට අපි වැදගත් කණ්ඩායමක් අපි ඉදිරිපත් කළා”
-ජාතික ලැයිස්තු අපේක්‍ෂක, මහාචාර්ය රුවන් රණසිංහ-
මෙතෙක් කාලයක් සංවර්ධනයේ නාමයෙන් ජනතාව රවටා දූෂිත දේශපාලන සංස්කෘතියක් පවත්වාගෙන ගිය තත්වය අවසන් කරන්න පසුගිය 21 වැනිදා අපේ අම්මලා, තාත්තලා ඇතුළු සියලුම දෙනා නිර්භීත තීරණයක් ගත්තා. ඌව පළාතේ, බදුල්ල දිස්ත්‍රික්කයේ දුක් විඳින ආදරණීය අම්මා, තාත්තලාට හොඳ ආර්ථිකයක් ගොඩනඟා දෙන්න, දූ දරුවන්ට නිසි අධ්‍යාපනයක් ලබා දෙන්න, ජනතාවට හොඳ සෞඛ්‍ය සේවයක් ලබාදෙන්න අවස්ථාවක් මේ 14වැනිදා මහ මැතිවරණයෙන් උදා වෙනවා. බදුල්ල කියන්නේ ලස්සන දිස්ත්‍රික්කයක්. නමුත්, මේ දිස්ත්‍රික්කයේ ජනතාවගේ ජීවිත මෙතෙක් සිටි පාලකයන් අවලස්සන කර තිබෙනවා. ගුරුවරු දණගස්වන නූගත් දේශපාලකයන් වෙනුවට ජාතික ජන බලවේගයෙන් අදූෂිත, රට ගැන ජනතාව ගැන ආදරයක් තිබෙන, උගත්, වැදගත් කණ්ඩායමක් ඉදිරිපත් කර තිබෙනවා. මේ කණ්ඩායම ඉදිරිපත් වී සිටින්නේ මුළු රටේම සිදු කළ යුතු සමාජ-ආර්ථික පරිවර්තනයේ බදුල්ල දිස්ත්‍රික්කයට අදාළ වැඩ කොටස සිදු කිරීමටයි.
ජනතාව පීඩාවට පත් කරමින්, පාලකයන් සුර සැප විඳි කාලය අවසන් කිරීමේ කාර්යභාරයත් 14වැනිදා ගොඩනඟන පාර්ලිමේන්තුවට පැවරී තිබෙනවා. ඒ නිසා බදුල්ල දිස්ත්‍රික්කයෙන් වැඩිම පිරිසක් ජාතික ජන බලවේගය තුළින් පාර්ලිමේන්තුවට යවමු. සංවර්ධනයේ අරුණලු මේ රටට ගෙනා හැක්කේ මාලිමාවේ අපේක්‍ෂකයන්ට පමණයි. තාත්තා කියපු පණිවුඩය අහිංසක ජනතාවට නොකියා මේ රටේ ජනතාවගෙන් තුන්සීයකට ආසන්න පිරිසක් බෝම්බ ප්‍රහාරවලට ගොදුරු වීමට ඉඩහැරපු අය දැන් මනාප හොයන්න දිස්ත්‍රික්කය පුරා යනවා. ඒ අය වෙනුවට ජනතාව වෙනුවෙන් උපරිම කැප වීමෙන් ක්‍රියා කරන ජාතික ජන බලවේගයේ වැඩිම පිරිසක් බදුල්ල දිස්ත්‍රික්කයෙන් තෝරා යවමු. මෙතෙක් පාලන බලයේ සිටියේ ඔවුන් ඉදිරියේ දණින් වැටෙන ජනතාවක් හැමදාමත් නඩත්තු කරගෙන යාම වෙනුවෙන් ක්‍රියා කළ පිරිසක්. එම තත්වය වෙනස් කිරීම වෙනුවෙන් බදුල්ල දිස්ත්‍රික්කයෙන් වැඩි ම පිරිසක් පාර්ලිමේන්තුවට තෝරා පත් කර යවමු.
“අවුරුදු හැත්තෑහයක විනාශය මාසයක කෙටි කාලයකින් නිවැරැදි කරන්න බැහැ”
-ජාතික ජන බලවේගයේ ජාතික විධායක සභික, බදුල්ල දිස්ත්‍රික් කණ්ඩායම් නායක, සමන්ත විද්‍යාරත්න-
අද වෙන කොට මේ රටේ නිල්, කොළ දේශපාලනය බිම ඇදවැටී හමාරයි. දූෂිත දේශපාලකයන්ගේ කාලය හමාර කර ජනතාවාදී පාලනයක ආරම්භක පරිච්ඡේදය ලියන්න සැප්තැම්බර් 21වැනිදා පටන් ගත්තා. සාම්ප්‍රදායික දූෂිත දේශපාලනයට මේ මාතෘභූමියේ ඉඩක් නැති බව ස්ථිර කරන දවස නොවැම්බර් 14 වැනිදාට යෙදී තිබෙනවා. ඒ වෙනුවෙන් බදුල්ල පුරවරය සූදානම් කිරීමේ මහා රැලියක් වෙනුවෙන් වැසි නොතකා මේ ජන ගඟ එකතු වී සිටිනවා. මේ වේදිකාවේ සිටින අපේක්‍ෂකයන් දොළොස් දෙනා අතුරින් වැඩිම පිරිසක් පාර්ලිමේන්තු මන්ත්‍රීවරුන් බවට පත් කරන බව ස්ථිරයි. ඒ වාගේම ජාතික ලැයිස්තුවේ අපේක්‍ෂක, මහාචාර්ය රුවන් රණසිංහත් මේ වේදිකාවේ ඉන්නවා.
අපට හැමදාම දුප්පත්කම උරුම කළ උන්ගේ යුගය අවසන්. දළ ජාතික නිෂ්පාදිතයට අඩුම දායකත්වය ලබා දෙන්නේ ඌව පළාතෙන් බව මුදල් අමාත්‍යාංශයේ පසුගිය වාර්තාවෙන් පෙන්වාදී තිබෙනවා. ඒ ප්‍රමාණය සියයට හතරයි. බදුල්ල දිස්ත්‍රික්කයේ මුළු පවුල් සංඛ්‍යාවෙන් සියයට 72ක් සහනාධාර මතයි ජීවත් වෙන්නේ. පවුල් 115,689ක් ‘අස්වැසුම’ ලබනවා. නිමල් සිරිපාලලා, හරීන් ප්‍රනාන්දුලා මේ දිස්ත්‍රික්කයේ මොනවද කළේ කියලා අපි අහනවා. අපේ මිනිස්සු හැමදාමත් දුප්පත්කමේ තියලා හාල්, කොපි පොත්, ත්‍රිවීල් ටයර්, අරක්කු, සල්ලි බෙදලා ඡන්ද කාලයේ දී දුප්පත් මිනිසුන්ව රැවැට්ටුවා. ඒ රැවටූ යුගය මෙවර සදහටම අවසන් බව මෙතෙක් සිටි පාලකයන්ට මතක් කරනවා. අප අපේ දෑත්වලින් මේ දිස්ත්‍රික්කය, මේ පළාත, මේ රට ගොඩනඟන්න ඕනෑ. අප දුප්පත් වී සිටින්නේ උන්ගේ වරදින් මිස ජනතාවගේ වරදින් නොවෙයි. උමා ඔය නිම්නය, බදුලු ඔය නිම්නය, ලොක්ගල් ඔය නිම්නය, මැණික් ගංගා නිම්නය මේ දිස්ත්‍රික්කය කිරිවලින් ස්වයංපෝෂිත කරන්න පුළුවන් ස්වාභාවික සම්පත් ආකරයක්. දැනට අපේ කිරි අවශ්‍යතාවෙන් සියයට 65ක් ආනයනය කරනවා. අපේ පාලනයේ මුල් වසර පහ අවසන් වන විට ලංකාවට අවශ්‍ය කිරි සම්පූර්ණයෙන් ම මේ රටේ නිෂ්පාදනය කරන්න අපි සූදානම්. ඒ වෙනුවෙන් බදුලු නිම්නය කිරි නිම්නයක් කරන්න අප ක්‍රියා කරනවා. එළවළු ගොවීන්ට සාධාරණ මිලක් ලබා දෙන්න අවුරුදු හැත්තෑහයක් පුරා සිටි පාලකයන්ට බැරි වුණා. ජනාධිපති සහෝදරයා දිවුරුම් දීලා අදට දවස් හතළිස්දෙකයි. අවුරුදු හැත්තෑහයක විනාශය කෙටි කාලයකින් නිවැරැදි කරන්න බැහැ.
අද බදුල්ලේ මේ ක්‍රීඩාංගණය අතුරුසිදුරු නැතිව පිරී යන කොට මෙතෙක් සිටි පාලකයන්ට මැතිවරණ ව්‍යාපාරයක්වත් කරන්න බැරිව සිටිනවා. මේ දිස්ත්‍රික්කය පුරා විසිරී සිටින වී ගොවීන්, එළවළු ගොවීන් ඇතුළු සමස්ත ගොවි ජනතාව ගොඩ ගන්න ජාතික ජන බලවේගයට හැකියි. නිමල් සිරිපාලලා කොමිස් මුදල් බලාගෙන චාමර දසනායකලත් එක්ක වැඩ කළ හැටි බොහෝ දෙනෙක් දන්නවා. ඔවුන්ට මේක ධන උල්පතක් කරගෙන ජනතාව හැමදාමත් දුප්පත් බවේ ගිල්වාගෙන සිටියා. නමුණුකුල කඳුවැටියේ සිට නාරංගල කඳු දක්වා මනරම් පරිසරය වාගේම ඇදහැලෙන දියඇලි මුල්කරගෙන සංචාරක කර්මාන්තයට යෝග්‍ය ප්‍රදේශයක් බවට මේ බදුල්ල පත් කරනවා. ඒ වෙනුවෙන් සියලු සැලැසුම් සකස් කර අවසන්. විදේශ සංචාරකයන් හට මේ අවුරුදු හැත්තෑහයක පාලකයන් ඉදි කළ කිසිවක් නරඹන්න නැහැ. ඔවුන් බංකොළොත් රටක් විතරයි ඉතිරි කළේ. මේ රට පෙරළා දාපු බංකොළොත් රියැදුරන්ට නැවත ජනතා වරමක් ලැබෙන්නේ නැහැ.
ජනතාවාදී පාලනයක් පිහිටුවා රට ගොඩනැඟිය හැක්කේ ජාතික ජන බලවේගයට පමණයි. ජනතාවාදී මහජන ආණ්ඩුවක් මෙම 14වැනිදා පිහිටුවාගෙන මේ කපේට නොවැටෙනා පාලනයක් ස්ථාපනය කරනවා. ඒ පාලනය වැටෙන්නේ නැත්තේ ජනතාවට දීපු සියලු පොරොන්දු ඉෂ්ට කරන නිසයි. අපට ඡන්දය නොදුන් කෙනාත් ඊ ළඟ වතාවේ අපට ඡන්දය ලබාදෙන තත්වයට රට ගොඩනඟනවා. සිංහල, දමිළ, මුස්ලිම් සියලු ජනතාව වෙනුවෙන් පොහොසත් රටක් ගොඩනඟන්න අප සූදානම්. ඒ වාගේම මහා සංඝරත්නය ප්‍රමුඛ පූජ්‍ය පක්ෂයේ සියලු දෙනාත්, වෙනත් සකලවිධ බලවේග සියල්ලත් ජාතික ජන බලවේගය වටා එකමිටට එකතු වී සිටිනවා. ඒ නිසා ජාතික ජන බලවේගයේ ආණ්ඩුවක් වට්ටන්න කිසිවකුට බැහැ. අපේ සංවිධාන බලය ආණ්ඩුව පිහිටුවීමෙන් පසුව තවත් තර කරනවා. කොට්ඨාස සභා දැවැන්ත බලයක් සහිත සංවිධාන බවට පත් කරනවා. අපට විරුද්ධව ගෙන ගිය සියලු බොරු ප්‍රචාර ජනතාව හෙඳින්ම තේරුම්ගෙන සිටිනවා. අලුතින් මොන ප්‍රචාර ගෙන ගියත්, සිංහල, දෙමළ, මුස්ලිම් ජනතාව කිසි දිනක නැවත රැවටෙන්නේ නැහැ. වසර හැත්තෑහයක් දස අතේ පටළවපු නූල් බෝලය එකින් එක හෙමිහිට ලිහන්න ඕනෑ. මහා භාණ්ඩාගාරය හිස් කරලා තියෙන්නේ. ඒ තත්ත්වය තුළ සල්ලි අච්චු ගහන බවත්, ණය ගන්නා බවත් කියමින්, කෑගහගෙන යනවා. ලංකාවට ඕනෑ වෙලාවට සල්ලි අච්චු ගහන්නත් ඕනෑ. ණය ගන්න අවශ්‍ය වෙලාවට ණය ගන්නත් ඕනෑ. ජාතික ජන බලවේගයේ රජයක් යටතේ කිසිම ගසාකෑමකින් තොරව ඒ ආර්ථික ක්‍රියාකාරකම් නිසි පරිදි සිදු කරනවා. ඒ වෙනුවෙන් ශක්තිමත් ආණ්ඩුවක් ගොඩනඟන්න බදුල්ල දිස්ත්‍රික්කයෙන් උපරිම දායකත්වයක් ලබන 14 වැනිදා ලබාදෙන ලෙස සියලු දෙනාගෙන් ඉල්ලා සිටිනවා.
(-මොණරාගල ජයග්‍රාහී ජනතා රැලිය 2024.11.04-) මොණරාගලට වර්ෂාව තිබ්බට වැල්ලවායට තමයි ජනගඟ ගලලා තිබෙන්නේ. දහස් සංඛ්‍යාත ජනතාව මෙතැනට සහභාගී වෙලා කියන්නේ අන් කවරක්වත් නොවෙයි, ජනාධිපතිවරණය සඳහා තැබූ පියවර නොවැම්බර් 14 වැනිදා ශක්තිමත්ව ඉදිරියට ගෙනයන බවයි. ලංකා ඉතිහාසයේ පීඩාවට පත්වුණු ජනතාව දීර්ඝ කාලයක් පීඩාවට එරෙහිව සටන් කළා. කන්ද උඩරට ගිවිසුම අත්සන් කරලා අපේ රට මුළුමනින්ම විදේශිකයින්ට පාවා […]
(-මොණරාගල ජයග්‍රාහී ජනතා රැලිය 2024.11.04-)
මොණරාගලට වර්ෂාව තිබ්බට වැල්ලවායට තමයි ජනගඟ ගලලා තිබෙන්නේ. දහස් සංඛ්‍යාත ජනතාව මෙතැනට සහභාගී වෙලා කියන්නේ අන් කවරක්වත් නොවෙයි, ජනාධිපතිවරණය සඳහා තැබූ පියවර නොවැම්බර් 14 වැනිදා ශක්තිමත්ව ඉදිරියට ගෙනයන බවයි. ලංකා ඉතිහාසයේ පීඩාවට පත්වුණු ජනතාව දීර්ඝ කාලයක් පීඩාවට එරෙහිව සටන් කළා. කන්ද උඩරට ගිවිසුම අත්සන් කරලා අපේ රට මුළුමනින්ම විදේශිකයින්ට පාවා දුන්නාට පසුව 1818 කැරැල්ලක් ඇතිවුණා. ඒ වෙල්ලස්සේ කැරැල්ලයි. මේ මුතුන් මිත්තන් තමන්ගේ අයිතිය වෙනුවෙන් එදා සටන් කළා. එය ජයග්‍රහණයෙන් කෙළවර කරගන්න බැරිවුණා. කැරැල්ලට නායකත්වය දුන්නු ජාතික වීරවරයන් කිහිප දෙනෙක් සුදු අධිරාජ්‍යවාදීන් විසින් ඝාතනය කළා.
1848දී මාතලේ දිසාවෙන් නැවත කැරැල්ලක් පටන් ගත්තා. එම කැරැල්ලත් සුදු අධිරාජ්‍යවාදීන් විනාශ කර දැමුවා. 1948 පසුවත් තරුණයෙන් තම අයිතීන් වෙනුවෙන් කැරළි ආරම්භ කළා. සියවස් දෙක තුනක් තිස්සේ අපේ රටේ පුරවැසියන් මේ පීඩනයන්ට එරෙහිව සටන් කළා. අයිතිවාසිකම් වෙනුවෙන් සටන් කළා. අපේ රටේ පීඩාවට පත් කරන ලද, අපේ රටේ මහජන ධනය කෝටි ප්‍රකෝටි ගණන් නාස්ති කරන ලද, අපේ රටේ පාලනය පවුල් කිහිපයක් අතේ තිබුණු යුගය පහුගිය ජනාධිපතිවරණයේදී පරාජය කිරීමට ජනතාව සමත් වුණා. දීර්ඝ කාලයක් අයිතිවාසිකම් අහිමි වූ ජනතාව කරන ලද අරගලය පහුගිය සැප්තැම්බර් මාසයේදී ජයග්‍රහණයෙන් කෙළවර කළා. මේ ජයග්‍රහණය අපි ලේසියෙන් අත්හරිනවද? නැහැ. නොවැම්බර් මාසේ 14 වැනිදා අපට සහතික වශයෙන් කියන්න පුළුවන් තවත් ශක්තිමත් ජයග්‍රහණයක් අප වෙත ලැබෙන බව. ජනාධිපතිවරණයේදී ලැබූ ජයග්‍රහණයට වඩා මහා ඡන්දේදි ලැබෙන ජයග්‍රහණය ලොකුද පොඩිද? ලොකුයි. ජනාධිපතිවරණයේදී අපට ඡන්දය නොදුන් ජනතාවත් අපට මෙවර ඡන්දය ලබාදෙනවා. ජනාධිපතිවරණයේදී ඉතා නිර්භීත පියවරක් ජනතාව තැබුවා.
ජනාධිපතිවරණයේදී ජාතික ජන බලවේගයට විවිධ අවලාද නැගුවා. එවැනි අවලාද ගොඩනගද්දීත් ජනතාව ඒවා මායිම් නොකර ජාතික ජන බලවේගය විශ්වාස කළා. මේ රටේ ජනතාව නිර්භීත තීන්දුවක් ගත්තා. ඒක වැදගත් තීන්දුවක්. මීට කලින් ආණ්ඩු මාරු උනේ එයාලගේ අතින් එයාලගේ අතකටමයි. එයාලගේ පවුලකින් එයාලගේ පවුලකටමයි. ඔවුන් හැමදාම කළේ බෙදිල ඡන්දය කරලා එකට ආණ්ඩු කිරීමයි. දැන් ඒ පක්ෂ කොහෙද? මේ වැල්ලවායේ කෙනත් එහෙම තමයි. බෙදිලා ඡන්ද කරනවා එකට ආණ්ඩු කරනවා. පහුගිය ජනාධිපතිවරණයේදි කිව්වා අගමැතිකම මොණරාගලට කියලා. මතකද? එයාලා අතර ඇත්ත විරසකයක් තිබුණෙ නෑ. එයාලා අතර ප්‍රතිපත්ති වෙනසක් තිබුණේ නෑ. එයාලා කවදාවත් පරාජයට පත්වුණාට සැකයක් තිබුණේ නෑ. මොකද බලය මාරු උනේ තමන්ගේ පිලෙන් තමන්ගේ පිලටමයි. නමුත් පහුගිය සැප්තැම්බර් මාසයේදී දූෂිත නාස්තිකාරී ප්‍රභූ පාලනයෙන් පොදු ජනතාව අතට බලය මාරුවී තිබෙනවා. දැන් ඒ අයට ගොඩක් රිදෙනවා. එයාලා හැමදාම හිතාගෙන හිටියේ රට පාලනේට උපන් පවුල් කියලා. මේ රට පාලනය කරන්න ඒගොල්ලන්ගේ පරම්පරාවෙන් එන බූදලේ කියලා හිතාගෙන හිටියේ. ඒ දූෂිත ප්‍රභූ පාලනයෙන් පොදු ජනතාව අතට බලය අමාරු වුණා. රිදෙනනේ නැද්ද? දැන් නැවත උත්සාහ කරනවා ආණ්ඩුව වට්ටන්න. මොකද කියන්නේ? පරාජයට පත් කරන්න දෙනවද? වට්ටන්න දෙනවද? මේ ආණ්ඩුව වට්ටන්න බැහැ.
ජාතික ජන බලවේගය ජයග්‍රහණය නොකළා නම් අර ඡන්ද ඉල්ලන්නේ නැති හැට දෙකම නැවත ඡන්දේ ඉල්ලනවා. ඒ තරමට ඒගොල්ලෝ අද වෙනකොට වේදනාවට පත්වෙලා තිබෙනවා. එයාලා හැමදාම හිටියේ ජනතාව රවට්ටලා, ජනතාව බියවද්දලා ඡන්ද කරන්නයි. චණ්ඩින්ගේ පාලනය අප අවසන් කරලා තිබෙනවා.
සාමාන්‍යයෙන් ගම්වල අම්මලා තාත්තලා බයගන්වල තමයි මේ අය රට පාලනය කළේ. වීරප්පන් පාලනය කළා වගේ තමයි අපේ අප්පන්ලා රට පාලනය කළේ. අපට ඡන්දය දෙන්න පුළුවන්, අපට ඡන්දයක් නොදෙන්න පුළුවන්. නමුත් ඒ හැම පුරවැසියාගේම නිදහස සුරකින්න අපි බැඳී සිටිනවා. අද සෑම දේශපාලන ව්‍යාපාරයකටම දේශපාලනය කිරීමේ අයිතිය තහවුරු කර තිබෙනවා. එහෙම අයිතියක් තිබුණට අද විපක්ෂය කාර්යාල නෑ. ඒක අපේ වැරැද්දක් නෙවෙයි. අපි හැම කෙනාටම නිදහසේ දේශපාලනය කරන්න අවස්ථාව ලබාදී තිබෙනවා. රටක් ඉදිරියට යන්නේ රටක් බය කරලා වීරප්පන්ලා වගේ නායකයන් නිසා නෙවෙයි. ප්‍රජාතන්ත්‍රවාදය ස්ථාපිත කිරීමෙන් පමණයි රටක් ඉදිරියට යන්නේ. දේශපාලකයන් නීතියට යටත් වෙන්න ඕනෑ. දේශපාලන ප්‍රතිපත්ති ප්‍රමිතීන් රාමුවක් ඇතුලේ තියෙන්න ඕනෑ. දේශපාලනඥයෝ හිතනවා නම් නීතිය තියෙන්නේ පොදු මිනිස්සුන්ට, අපිට නෙවෙයි කියලා ඒක දේශපාලන සංස්කෘතියේ වරදක්. නීතිය සියලුදෙනාටම පොදුයි. අපි ඒ සංකල්පයට පණ පොවනවා.
ජනාධිපති ලේකම් කාර්යාලය පමණක් වාහන තියෙනවා 863ක්. මොණරාගල ඩිපෝවේ බස් කීයක් ඇතිද? ඇති තරම් වාහන පාවිච්චි කරන්න පුළුවන් ඒ අයට. කෝ නීතියක්. කෝ ප්‍රමිතියක්.
මේ දේශපාලන සංස්කෘතිය වෙනස් කළ යුතුයි. එයාල හිතෙනවා ජනතාවගේ මුදල් එයාලට රිසිසේ පාවිච්චි කරන්න පුළුවන් කියලා. ඒක නිසා දේශපාලනය ප්‍රමිතිකරණයකට ලක් කරන්න ඕන නැද්ද? එයට හිටපු සහ ඉන්න සියලූ ජනාධිපතිවරු ඇතුළත්.
හිටපු ජනාධිපතිවරු ඉන්නේ නගරයක. හූවක දුර නැහැ රජයේ රෝහලට. හූවක දුර නැහැ පෞද්ගලික රෝහලට. නමුත් පැය 24ම ගිලන් රථයක් මිදුලේ තියාගෙන ඉන්නවා. නමුත් ගම්වල රෝහල්වලට ගිලන් රථ නෑ. ඒවා ගන්න ඕනේ නැද්ද? කොළඹ ගෙවල් තියෙනවා නමුත් ආණ්ඩුවේ නිවාසවල ඉන්නවා. ඒවා ගන්න ඕන නැද්ද? මොනවද මේ වටිනාකම්. අපි යහපත් දේශපාලන සංස්කෘතියක් මේ රටේ නිර්මාණය කරනවා.
මේ රටේ ඕනෑම පුරවැසියෙකුට ආණ්ඩුවෙන් කාර්යක් කරගන්න ගියොත් කප්පං ගෙවන්න වෙනවා. ජාතික ජන බලවේගය මේ සියලූම දේ නතර කරනවා. හෝටලයක් දාන කෙනෙකුට සුදුසුකම් තිබෙනවා නම් අපි ඉඩමක් දෙනවා. හැබැයි කප්පම් ගන්නේ නැහැ. අපේ රටේ පුනර්ජනනීය බල ශක්තියට විශාල විභවයක් තියෙනවා. ඒ සඳහා එන ආයෝජකයෙකුට අවස්ථාව දෙන්න පගා දෙන්න ඕනේ නෑ. වැඩක් කරගන්න පගා දෙන්න ඕනෑ වෙන දේශපාලන සංස්කෘතිය ජාතික ජන බලවේගය අවසන් කළා.
රාජ්‍ය නිලධාරීන්ගෙනුත් අපි ඉල්ලන පළමු දේ තමයි කොමිස් පගා ගැනීම නතර කරන්න. පුරවැසියන්ට අපි කියන්නේ ආණ්ඩුවෙන් වැඩක් කරන්න පගාවක් දෙන්න එපා. එහෙම ඉල්ලූවොත් අපිට කියන්න, ඉල්ලන කෙනා ගෙදර යවනවා, සාමාන්‍ය ජනතාවගේ වැඩේ ඉක්මනට කරලා දෙනවා.
ගොවි ජනතාවට ඉඩම් දෙනකොට පසුගිය ආණ්ඩු කාලේ ඇමතිට පගා දෙන්න වුණා. මේ රට දූෂිත කොළණියක් බවට පත්වෙලා තිබුණා. රට යහපත් දිශාවට ගැනීමේ ප්‍රතිඵල අපි ජනතාවට ලබා දෙනවා. නමුත් රට පාලනය කරන ජනාධිපතිවරයෙකුට පමණක් බැහැ. ඒ සඳහා ශක්තිමත් පාර්ලිමේන්තුවක් අවශ්‍යයි. මොණරාගල ඔබ ඉදිරිපත් කරන නියෝජිතයා සමග ප්‍රශ්න එවන්න. අපි විසඳලා දෙන්නම්. ඒ ඒ පළාත්වල ශක්තිමත් ජනතා නියෝජිතයෝ ඉන්න ඕනෑ. ඒවා පාර්ලිමේන්තුවට අරගෙන එන්න ඕනෑ. ඒ ඒ පළාත්වල තිබෙන සම්පත් මොනවාද? ඒවයින් කරන්න පුළුවන් මොනවද කියලා ඒ නියෝජිතයා පාර්ලිමේන්තුවට යෝජනා අරගෙන එන්න ඕනෑ. ඒ සඳහා ඔබේ පළාතේ නියෝජිතයන් මාළිමාවෙන් පාර්ලිමේන්තුවට එවන්න.
නොවැම්බර් 14 වැනිදා මොණරාගලින් පාර්ලිමේන්තුව මාලිමාවෙන් වැඩි මන්ත්‍රීවරුන් පිරිසකගෙන් පුරවන්න. මෙතන ඉන්න අය පාර්ලිමේන්තුවට අලුත් වුණාට දේශපාලනයට අලුත් නැහැ. අපි පසුගිය මාස එකහමාර ඇතුළත ඉන්ධන, ගෑස්, පොහොර, හිඟයකින් තොරව ජනතාවට ලබාදීමට කටයුතු කළා. ප්‍රහාරයක් ගැන කතාවක් කරළියට ආවා. ඒ සම්බන්ධයෙනුත් ජනතාවගේ ආරක්ෂාව තහවුරු කිරීමට අපි කටයුතු කළා. අනතුරක් පිළිබඳ තොරතුරක් එනවනම් ඒ අනතුරෙන් ජනතාව මුදාගැනීමට ආණ්ඩුවට වගකීමක් තිබෙනවා. අපි ඒ වගකීම ඉටුකළා. 2019 පළපුරුදු ආණ්ඩුව මොකද කළේ. පුපුරන බව දැනfරැන හිටියා මෙච්චර පුපුරයි කියල දන්නේ නැහැ කියලා කිව්වා. ඒවා ආණ්ඩුද?
ජාත්‍යන්තර සබඳතා ශක්තිමත් කිරීමට අප කටයුතු කළා. රාජතාන්ත්‍රික නිලධාරීන් මුණ ගැසෙමින් විදේශ ප්‍රතිපත්තිය ශක්තිමත් කළා. අපි දැන් මෙතනින් එහාට යා යුතුයි. නොවැම්බර් මාසේ 14 වෙනිදා ශක්තිමත් පාර්ලිමේන්තුවක් නිර්මාණය කර රට ඉදිරියට ගෙන යා යුතුයි.
ජාතික ජන බලවේගයේ ඇමතිකම් හදන්නේ විද්‍යාත්මක ක්‍රමයටයි. ඒ සඳහා විශේෂඥ දැනුමක් සහිත පිරිසක් අපි අමාත්‍යවරුන් ලෙස පත් කරනවා. ඥාතිකම්වලට සහ මිත්‍රකම්වලට ඇමතිකම් ලබාදීමේ සංස්කෘතිය අපි නිමා කරනවා. අපේ ඇමතිවරුන්ට තියෙන්නේ වගකීමක් පමණයි. මේ රට ගොඩනගන මහජන පෙරමුණක් අප නිර්මාණය කරනවා. දේශපාලකයා, රාජ්‍ය නිලධාරියා, පොදු ජනයා එකතු කරගත් මහජන ව්‍යාපාරයක් ඇති කිරීමට ජාතික ජන බලවේගය නායකත්වය ලබාදෙනවා.
ජනවාරි පෙබරවාරි වෙනකොට අලුත් වී අස්වැන්න නෙළනවා. නමුත් අලුත් අස්වැන්න නෙළන හැම කාලෙදිම වුණේ සහල් මිල ඉහළ ගිය එකයි. එය පාලනය කරගන්න රජයේ ගබඩාවල වී තියෙන්න ඕනේ. නමුත් පසුගිය කාලේ පාලකයෙන් වී මිලදීගෙන නැහැ. වී ගබඩා හිස්. සහල් මිල සම්බන්ධ නැවත මෙලෙස අර්බුදයක් ඇතිවීමට අප ඉඩ දෙන්නෙ නෑ. සියලු ගබඩා මේ වන විට අපි ප්‍රතිසංස්කරණය කරමින් තිබෙනවා. එළඹෙන මහ කන්නේ වැඩිම වී ප්‍රමාණයක් ආණ්ඩුව මිලදී ගන්නවා. එතකොට ආණ්ඩුවේ වී තොගයක් තිබෙනවා. මෝල් හිමියන් ගාවත් වී තොගයක් තිබෙනවා. එතකොට අපට පුළුවන් තරගයක් දෙන්න. එතකොට සහල් මිල සඳහා ඒකාධිකාරයක් හදන්න බැහැ. අපි සහල් මිලේ ප්‍රශ්නයත් වී මිලේ ප්‍රශ්නයත් විසඳීමට කටයුතු කරනවා. මම ජනාධිපති ඔබ පුරවැසියා නෙවේ. අපි සියලුදෙනා මහන්සි වෙලා අපේ දරුවන්ගේ පරම්පරාවට හොඳ රටක් නිර්මාණය කරමු. මේ රට ගොඩනැගීමකින් තොරව නැවත හරවන්න දෙන්නේ නැහැ. නොවැම්බර් 14 වැනිදා විශාල ජයග්‍රගහණයක් මොණරාගලින් ලබාදෙන්න කියා ඔබට ආරාධනා කරනවා.
“වෙන වෙන පක්ෂවලට බෙදිලා හිටපු අය පවා දැන් එක මිටට මාලිමාවට එකතු වෙනවා”
-ව්‍යාපාරික, මොහොමඩ් අබ්දුල් නිසාම්-
පසුගිය ජනාධිපතිවරණය වෙනුවෙන් වැල්ලවායේ පැවැති රැලියේදී අනුර කුමාර දිසානායක සහෝදරයා කිව්වේ ජනාධිපතිවරණයෙන් පසුව අනෙකුත් පක්ෂවලට ඡන්දය දුන් අය පවා අප වටා එක්කර ගන්නා ලෙසයි. මේ රටේ ජනතාව ගැන අනුර සහෝදරයාට තිබෙන ආදරය එයින් පැහැදිලි වූවා. අසල්වාසීන් සමඟ දේශපාලනයේ විරසකකම් ඇතිකර නොගන්නා ලෙස පැහැදිළිව කියා තිබෙනවා. බදුල්ලේ, දුන්හිඳදී අනතුරට ලක් වූ බස්රථයේ සිටි දැනට බදුල්ල රෝහලේ ප්‍රතිකාර ලබන ඒ සිසු පිරිස බලන්න අපේ ජනාධිපති සහෝදරයා ගිය බව අපට දැනගන්නට ලැබුණා. බලය රැකගන්න මොණරාගල දිස්ත්‍රික්කය තුළත් ජාතිවාදය, ආගම්වාදය පැතිරූ අය අපි පසුගිය ජනාධිපතිවරණයේ දීත් දැක්කා. අද අපට එහෙම ප්‍රශ්නයක් නැහැ. එකම සහෝදර කැළක් මෙන් එකමිටට ඒකරාශී වී සිටිනවා. කාලයක් නොයෙක් පක්ෂවලට බෙදිලා හිටිය මේ රටේ හැම පුරවැසියෙක්ම මහා මැතිවරණයේදී ජාතික ජන බලවේගයට ශක්තිමත් බහුතර බලයක් ලබා දෙන්න ඒකරාශී වන ලෙස ඉල්ලා සිටිනවා.
“ගැහැනු අපි එකමිටට එකතු වෙලා යහපත් රටක් නිර්මාණය කරන්න සහය වෙනවා”
-ජාතික ජන බලවේගයේ මොනරාගල දිස්ත්‍රික් විධායක සභික, මොණරාගල දිස්ත්‍රික් අපේක්‍ෂිකා, චතුරි ගංගානි-
ලෝක දේශපාලනය තුළ අපේ රටේ ඉතිහාසය රන් අකුරින් ලියන ජයග්‍රහණයක් පසුගිය ජනාධිපතිවරණයේදී අත්කර ගත්තා. මේ රටේ ජනතාවගේ හදවත ගැහෙන රාවය දැනෙන නායකයෙක් අපි ජනාධිපති ධුරයට පත් කර ගත්තා. ඒ ජයග්‍රහණය තුළ මේ දිස්ත්‍රික්කයේ ජීවත් වෙන, මේ රටේ ජීවත් වෙන ආදරණීය කාන්තාවන් තමන්ගේ යුතුකම නිවැරැදිව ඉටුකර තිබෙනවා. ජනාධිපතිවරණයේ ජයග්‍රහණය වෙනුවෙන් වගේම මහ මැතිවරණයේ ජයග්‍රහණය වෙනුවෙනුත් කාන්තාවන් පෙරට ඇවිත් ඉන්නවා. දකුණු ආසියාවේම කාන්තාවන් දේශපාලනිකව සංවිධානය කළ හැකි වූයේ ජාතික ජන බලවේගයට පමණයි. අපේ දියණියට, නැඟණියට, අම්මාට රට ඇතුළේ මේ දක්වා සැකක් බියක් රහිතව ජීවත්වීමට නොහැකි තත්වයක් පැවතුනා. ළමා අපයෝජන වැඩිම දිස්ත්‍රික්කය මේ මොණරාගල දිස්ත්‍රික්කයයි. ස්ත්‍රී අපයෝජන සහ ස්ත්‍රී දූෂණ විශාල ප්‍රමාණයක් සිදුකර තිබෙනවා. අපට ගෞරවනීයව ජීවත් විය හැකි ආරක්‍ෂිත රටක් මේ දක්වා බිහි කර නැහැ. ඒ නිසා ගැහැනු අපි එකමිටට එකතු වෙලා වඩාත් යහපත් රටක් නිර්මාණය කර ගැනීමේ වගකීම අපට තිබෙනවා. කර්මාන්ත ශාලාවල, ගාමන්ට්වල, වෙනත් ඕනෑම රැකියා කරන ස්ථානයක වාගේම ගොවි බිමේත් අපි අපේ දරුවන් වෙනුවෙන් ජීවිත හොයන්න අප්‍රමාණව වෙහෙස මහන්සි වෙනවා. සෙවණගල, පැල්වත්ත, ඇතිමලේ උක් කර්මාන්ත ශාලාවල ගැහැනිය කොතරම් දුක් විඳිනවාද?
“පොළොන් විෂ දළ උලුප්පා ගත් – උක් යායෙ පවා ගැටෙනවා
කටුක කටු හැර පතුල් තළමින් – රුහිරු බිඳු වැටෙනවා – ඒත් අපි උක් කපනවා”
උක් වතුවල ඉන්න පොළොඟුන් වැනි විෂඝෝර සත්වයන් මැද්දේ අපි අපේ පැටවුන්ට ජීවිතය හොයන්න විඳින වේදනා ගැන මේ කවියෙන් කියැවෙනවා. අපි අපේ පැටව් වෙනුවෙන් රටක් හදන්න, හෙටක් හදන්න යුතුකමක් සහ වගකීමක් තිබෙනවා. ඒ යුතුකම සහ වගකීම ඉටුකරන කාන්තාවන්ගේ ජීවිත කොතරම් ඛේදනීයයිද? මේ තත්ත්වය වෙනස් කරන්න අපි එක් ජයග්‍රහණයක් ලබාගෙන තිබෙනවා. ඒ ජයග්‍රහණය තහවුරු කරන්න නොවැම්බර් 14 වැනිදා අපි අපේ පැටවුන්ට ශක්තිමත් අනාගතයක් ගොඩනඟන්න ක්‍රියා කරමු කියා ඉල්ලා සිටිනවා.
“ඉතිහාසයක් පුරා අප දැකපු හීනය සැබෑ කරන මිනිසුන් ඉන්නේ මාලිමාවේ පමණයි”
-ජාතික ජන බලවේගයේ දිස්ත්‍රික් විධායක සභික, ජාතික විද්වත් සංවිධානයේ මොනරාගල දිස්ත්‍රික් සභාපති, ශ්‍රේෂ්ඨාධිකරණ නීතිඥ සරත් කුමාර-
ජනාධිපතිවරණය ජයග්‍රහණය කළ අප ඉදිරියේ තවත් අභියෝග කිහිපයක් තිබෙනවා. අපේ මාතෘභූමිය බංකොළොත් කළ චෞර දේශපාලන කඳවුර මෙරට ජනතාවගේ මහජන ධනය කොල්ලකා තිබෙනවා. ඒ මහා ධනය නැවත මේ ජනතාව වෙනුවෙන් අත්පත් කර ගන්න ඕනෑ. ඒ වෙනුවෙන් අලුත් නීති සම්පාදනය කරමින්, නීති ක්‍රියාත්මක කිරීමේ අයාතන අලුතින් පිහිටුවන්න ඕනෑ. ඊට අදාළව ආණ්ඩුක්‍රම ව්‍යවස්ථාවට සංශෝධන ගෙන එන්න ඕනෑ. ආර්ථික වශයෙන් බිඳදමා තිබෙන අපේ රට ආර්ථික වශයෙන් සමෘද්ධිමත් කරන්න සැලැසුම්, ප්‍රතිපත්ති මාලාවක් අප සකස් කර තිබෙනවා. ඒ සැලැසුම් ක්‍රියාත්මක කරන්න ශක්තිමත් පාර්ලිමේන්තුවක් ගොඩනඟන්න ඕනෑ.
අප ඉදිරියේ තිබෙන අභියෝග සියල්ල ජයගත හැක්කේ ශක්තිමත් පාර්ලිමේන්තුවක් ගොඩනැඟීමෙන් පමණයි. ඒ වෙනුවෙන් අපි ඔක්කොම එකතු වෙලා සාමුහිකව ජයග්‍රහණය කරමු. ලෝක වාර්තාවක් තබමින්, තුන්දෙනකුගෙන් යුත් කැබිනට් මණ්ඩලය ජනතාවට අත්‍යවශ්‍ය සහන ලබා දෙමින්, ඉදිරියට ගෙන යමින් පවතිනවා. අපගේ සැලැසුම්වල කෙටිකාලීන ක්‍රියාමාර්ග 2025 වසරේ ආරම්භ කරනවා. අපි හැමෝගෙම දරුවන්ගේ ජයග්‍රහණ ගෙන ඒම ඒ මඟින් අප ආරම්භ කරනවා. මොණරාගල දිස්ත්‍රික්කයේ ආර්ථික වශයෙන් දුබල කර සිටින ජනතාව සවිබල ගැන්වීම අප හැමෝගෙම වගකීමක්. ඒ වගකීම ඉටු කිරීම වෙනුවෙන් ඉතිහාසයක් පුරා අප දැකපු හීනය හැබෑ කිරීමේ හැකියාව තිබෙන මිනිසුන් සිටින මාලිමාවේ අපේක්‍ෂකයන්ගෙන් පාර්ලිමේන්තුව පුරවමු කියන ඉල්ලීම කරනවා.
“අපේ ආණ්ඩුවේ අවුරුදු පහ ඇතුළත ලංකාව ආසියාවේ සතුටින්ම ඉන්න මිනිසුන්ගේ රට බවට පත් කරනවා”
-ජාතික ජන බලවේගයේ ජාතික විධායක සභික, ආසියානු සංවර්ධන බැංකුවේ දකුණ හා මධ්‍යම කලාපීය උපදේශක, මහා මැතිවරණ අපේක්‍ෂක තිස්ස ආරියරත්න-
මේ ධාරාණිපාත වැසි සමයේ මෙතැනට රොක් වී සිටින මහ පොළොවත් එක්ක පොරබදන අපේ අම්මලා, තාත්තලා ඔබ සැමදෙනාට අපි අපේ ගෞරවය පිරිනමනවා. අපි බාර ගත්තේ බංකොළොත් රටක් බව අප හැම දෙනාම දන්නවා. ඒ රට කෙටි කාලයක් තුළ ගොඩනැඟිය නොහැකි බව අපි හැමදෙනාම දන්නවා. නමුත්, ජනාධිපති, අනුර සහෝදරයා සමඟ අපි හැම දෙනාම එකාවන්ව පොරබදලා රට ගොඩනැඟීමට කැප වෙනවා. ඒ වගේම ලංකාවේ දුප්පත්කමින් දෙවැනි දිස්ත්‍රික්කය හැටියට තිබෙන මොණරාගල එම තත්වයෙන් මුදාගන්නත් පොරබදනවා. අපේ ආණ්ඩුවේ අවුරුදු පහ ඇතුළත ලංකාව ආසියාවේ සතුටින්ම ඉන්න මිනිසුන්ගේ රට බවට පත් කරනවා. ඒ වෙනුවෙන් පොරබදන්න, කැප කිරීම් කළ හැකි උගත්, බුද්ධිමත් කණ්ඩායම් ඔබේ අපේක්‍ෂකයන් හැටියට ඉදිරිපත් වී සිටිනවා.
අපේ අපේක්‍ෂකයන් කිසිම කෙනකුට විරුද්ධව පොලිස් පොතක එක පැමිණිල්ලක්වත් ලියැවිලා නැහැ. අපේ දිස්ත්‍රික්කයෙන් ඉදිරිපත් කර සිටින නවදෙනාම උපාධිධාරීන්, විද්වතුන් වාගේම අත්දැකීම් බහුල කණ්ඩායමක්. රට ගොඩ ගන්නවා වාගේම මේ දිස්ත්‍රික්කයත් ගොඩ ගැනීමේ හැකියාව අප සියලු දෙනාටම තිබෙනවා. මේ දවස්වල අපි දිස්ත්‍රික්කය පුරාම ගෙන් ගෙට ඡන්ද ප්‍රචාරයේ යෙදෙනවා. ඒ ගමන්වල දී කරගැට පිරුණු දෑත්වලින් අපව බදාගෙන, දහදිය සුවඳින් පිරුණු සිරුරුවලින් අප ඉදිරියට ඇවිත්, පොදුවේ එකම කතාවක් කියන්නේ. අපේ දරුවන් වෙනුවෙන් හොඳ අනාගතයක් ගොඩනඟලා දෙන්න කියන ඉල්ලීම විතරයි ඔවුන් කරන්නේ. අපි ඒ ඉල්ලීම නිසැක වශයෙන්ම ඉටු කරන බව තහවුරු කරනවා.
“තනි තනි ව්‍යාපාරිකයා කරගෙන යන පලතුරු අපනයනය වෙනුවට අපනයන ගම්මාන පිහිටුවීමේ හැකියාව ගැන අපි සැලැස්මක් සකස් කරමින් සිටිනවා”
-ජාතික ජන බලවේගයේ ජාතික විධායක සභික, මොනරාගල දිස්ත්‍රික් කණ්ඩායම් නායක, ආර්. එම්. ජයවර්ධන-
ඌව වෙල්ලස්ස ගොඩනඟන බව කියමින් බලයට පැමිණි නායකයෝ හිටියා. විශේෂයෙන්ම මොණරාගල දිස්ත්‍රික්කය පොහොසත් දිස්ත්‍රික්කයක් බවට පත් කරන බවත් කිව්වා. නමුත්, පසුගිය කාලය පුරාම මොනරාගල දිස්ත්‍රික්කයේ ස්වාභාවික සම්පත් ඇතුළු සාරය උරාගන්න ඔවුන් වැව් තාවුලු පවා හෙළිපෙහෙළි කළා. ඔවුන් ආවේ අපේ ශක්තිය, අපේ ජවය සූරාගනිමින්, ඔවුන්ගේ ජීවිත ගොඩනඟා ගැනීමට බව තේරුම් ගත් ජනතාව පසුගිය සැප්තැම්බර් 21 වැනිදා ජයග්‍රාහී දිනයක් ලෙස තෝරා ගත්තා. පක්ෂ, පාට පැත්තක තබා, සිංහල, දෙමළ, මුස්ලිම්, බර්ගර්, මැලේ ජාතිකත්වයන් පැත්තක තිබ්බා. ඒ වාගේම සියලුම ආගමික නායකයන් එකට එකතු වුණා.
කාන්තාවන් එකමිටට එකතු වුණා. ගොවියෝ එකතු වුණා. වෙනත් වෘත්තිකයන් එකතු වුණා. මේ සියලුම දෙනා එකමිටට එකතු වෙලා මේ රට බංකොළොත් කළ පාලකයන් සියලු දෙනාවම නැවත පැමිණිය නොහැකි ලෙස පලවාහරින්න සමත් වුණා. ඒ ගැසූ කතිරයේ බලයෙන් මේ මැතිවරණයට ඉදිරිපත් වන්නට සිටි මේ දිස්ත්‍රික්කයේ අපේක්‍ෂකයන් හයදෙනකුට ගෙදර නවතින්න සිදුවුණා. ඒ අතර ශෂීන්ද්‍ර රාජපක්‍ෂ, සොයිසා ඇතුළු කට්ටිය මන්ත්‍රීකමක් ගන්න පොඩි චාන්ස් එකක් හරි තියෙනවද බලන්න මනාප ඉල්ලනවා. නමුත්, ගෙවල් දහයකට විතර ඇවිදලා, ආපහු හැරී යන තත්වයට ඔවුන් ඇදදැමීමට සමත් වූයේ ඔබ සියලු දෙනායි. ඒ අතර මේ වේදිකාවේ සිටින අපේක්‍ෂකයන් නවදෙනා අතුරින් අවම වශයෙන් පස්දෙනෙක් පාර්ලිමේන්තු මන්ත්‍රීවරුන් ලෙස තෝරා යවන බව ස්ථිරයි. අවුරුදු හැත්තෑහයක් තිස්සේ අපේක්ෂා කළ ජීවිතයක් ගොඩනඟා ගැනීම වෙනුවෙන් ඒ අපේ සහෝදරවරු කැප වීමෙන් ක්‍රියා කරනවා. අපි හැමදාම සිත් රිදවා ගනිමින්, දුක් විඳපු මිනිසුන්. ඒ යුගය නිමා කිරීමේ කාර්යභාරයට අප සියලුදෙනා එකාවන්ව පෙළගැසී සිටිනවා.
රට බංකොළොත් බව 2022 අප්‍රේල් 12වැනි දින ප්‍රකාශයට පත් කළ පාලකයන් පලවාහැරීමට මේ රටේ ජනතාව සමත් වුණා. ඒ ජනතාව වෙනුවෙන් අපි මේ රට හදනවා, ගොඩනඟනවා. අපි මේ රට ගොඩනඟන්නේ මෙතෙක් සිටි පාලකයන් හිතන මතන විදියට නොවෙයි. අපි මේ රට ගොඩනඟන්නේ දුක් විඳින අහිංසක ජනතාවගේ සහභාගීත්වය සහිතව ඒ ජනතාවත් එක්ක එකට අත්වැල් බැඳ ගැනීමෙන්. අපි ඒ කාර්යභාරය ඉටු කරන කොට ඔවුන්ගේ සිත් රිදෙනවා; වේදනාවට පත් වෙනවා. ඔවුන්ට ඒ සිත් රිදවීම්, වේදනාවන් දැනෙන්න ඕනෑ. පසුගිය ජනාධිපතිවරණයේ දී අනුර කුමාර දිසානායක සහෝදරයාගේ ජයග්‍රහණය වෙනුවෙන් ලෝකය පුරාම විසිරී සිටින ශ්‍රී ලාංකිකයන් වාගේම රට ඇතුළේ සියලුම ජනතාවත් එකට එක් වී සිටියා. ඒ ජනතාව මහා මැතිවරණයේ දී තවත් ශක්තිමත් බලයක් ලබා දී රට ගොඩනැඟීමට කැප වන බව ස්ථිරයි. ජනාධිපතිවරණයේ දී ජනතාව අපට ජයග්‍රහණය ලබා දුන්නේ බැංකු ගිණුම් තහනම් කරන බව, වාහන, ගෙවල් රජයට අත්පත් කර ගන්නා බව වාගේම බුද්ධාගම සම්බන්ධයෙන් තහනම් ක්‍රියාමාර්ග ගන්නා බවටත් බොරු ප්‍රචාර යැවූ පසුබිමකයි. නමුත්, අපට විරුද්ධව ඡන්දය දුන් කිසිම කෙනකුගේ සිතවත් නොරිද්දා එක රැයකින් ඓතිහාසික ආදර්ශයක් ලබා දුන්නා.
“ප්‍රජාතන්ත්‍රවාදය කියන්නේ මොකක්ද කියලා අපි තහවුරු කළා. ඒ සියල්ල කළේ අපි මේ රටේ සමස්ත ජනතාවටම ආදරය කරන නිසයි.”
මොණරාගල දිස්ත්‍රික්කයේ නිෂ්පාදනය ඉලක්ක කරගත් ආයතන කිහිපයක් තිබෙනවා. සෙවණගල ෆැක්ටරිය, පැල්වත්ත සීනි සමාගම වාගේම පෞද්ගලික අංශයට අයිති ඇතිමලේ සීනි සමාගම මේ දිස්ත්‍රික්කයේ පිහිටා තිබෙනවා. ලංකාවේ තිබෙන ප්‍රධාන සීනි නිෂ්පාදන කර්මාන්ත ශාලා අතුරින් තුනක්ම පිහිටා තිබෙන්නේ මේ දිස්ත්‍රික්කයේ. ඒ වාගේම වැව් දියෙන් වගා කරන ගොවීන් වී, එළවළු, පළතුරු වගා කරමින්, මේ රටේ ආර්ථිකයට දායක වන මිනිසුන් ඉන්නේ. තණමල්විල පැත්තේ මිරිස්, රතු ළුෑණු, රටකජු ඇතුළු ප්‍රමුඛ භෝග වගා කරනවා. බිබිල, බඩල්කුඹුර, මැදගම ප්‍රදේශවලට යන කොට රබර්, ගම්මිරිස් පවා හිටවනවා. අවුරුදු හැත්තෑ ගණනක් පුරා අපේ ආදරණීය අම්මා, තාත්තලා මේ ආකාරයෙන් කවර හෝ නිෂ්පාදන ආර්ථිකයක යෙදී සිටියාට යහපත් ජීවිතයක් ගැන දශමයකවත් දෙයක් දැනිලා නැහැ.
දකුණු වෙරළ තීරයේ සිට ඇල්ල, බණ්ඩාරවෙල දක්වා යන සංචාරකයන් වෙනුවෙන් හුවමාරු මධ්‍යස්ථානයක් බවට වැල්ලවාය වර්ධනය කිරීමේ සැලැස්මක් අපට තිබෙනවා. ඒ වාගේම මැදගම ප්‍රදේශයේ ඉතාමත් සරුසාර රඹුටන් පළදාවක් ලැබෙන බව අප කවුරුත් දන්නවා. අනෙක් පළාත්වල රඹුටන් අවාරය එන කොට මෙහේ රඹුටන් අස්වැන්න රුපියල් දහයකට, දොළහකට එක ගෙඩියක් අලෙවි කිරීමේ හැකියාව තිබෙනවා. ඒ වාගේම සිංගප්පූරුව වැනි රටවලට අපනයනය කරන්නත් සමත් වූ පිරිසක් ඉන්නවා. තනි තනි ව්‍යාපාරිකයා කරගෙන යන මෙම අපනයනය, පළතුරු අපනයන ගම්මානයක් බවට පත් කිරීමට අපි සැලැස්මක් සකස් කරමින් සිටිනවා. මැදගම ප්‍රදේශයේ මැංගුස්, දූරියන් වැනි පළතුරු වර්ග සශ්‍රීකව හැදෙනවා. ඩෝල් ලංකා සමාගම කෙසෙල් අපනයනය කරන කොට අපේ ගොවියාගේ කෙසෙල් ලෝකයට අපනයනය කළ හැකි තත්ත්වයක් මෙතෙක් සිටි පාලකයන් සකස් කර දුන්නේ නැහැ. මේ ආකාරයට රට ගොඩනැඟීමේ සමස්ත වැඩපිළිවෙළක් ජාතික ජන බලවේගය සකස් කර තිබෙනවා. එම වැඩපිළිවෙළ ක්‍රියාත්මක කර රට ජයග්‍රහණය කරා ගෙන යාමට, ‘පොහොසත් රටක් – ලස්සන ජීවිතයක්’ ගොඩනැඟීමට එළැඹෙන 14වැනිදා මහා මැතිවරණයෙන් ශක්තිමත් බහුතර පාර්ලිමේන්තු බලයක් අපට ලබා දෙන ලෙස ඉල්ලා සිටිනවා.
(-‘රට හදන අපි එකට මාලිමාවට’ ජයග්‍රාහී මහනුවර දිස්ත්‍රික් ජනතා රැලිය – 2024.11.02 – මහයියාව වේවැල්පිටිය ක්‍රීඩාංගණය-) පසුගිය ජනාධිපති ඡන්දය අපේ රටේ බලවත් දේශපාලන පරිවර්තනයක් ඇති කළ ඡන්දයක්. නොවැම්බර් 14 වැනිදා මහ මැතිවරණයෙන් සිදුකර ගැනීමට බලාපොරොත්තු වෙන්නේ දූෂිත ප්‍රභූ දේශපාලනයෙන් පොදු ජනතාව අතට ලබාගත් බලය තවදුරටත් ශක්තිමත් කර ගැනීමයි. හිටපු පාලක කණ්ඩායම් කරන ප්‍රකාශයන්ගෙන් ඔවුන් කෙතරම් […]
(-‘රට හදන අපි එකට මාලිමාවට’ ජයග්‍රාහී මහනුවර දිස්ත්‍රික් ජනතා රැලිය – 2024.11.02 – මහයියාව වේවැල්පිටිය ක්‍රීඩාංගණය-)
පසුගිය ජනාධිපති ඡන්දය අපේ රටේ බලවත් දේශපාලන පරිවර්තනයක් ඇති කළ ඡන්දයක්. නොවැම්බර් 14 වැනිදා මහ මැතිවරණයෙන් සිදුකර ගැනීමට බලාපොරොත්තු වෙන්නේ දූෂිත ප්‍රභූ දේශපාලනයෙන් පොදු ජනතාව අතට ලබාගත් බලය තවදුරටත් ශක්තිමත් කර ගැනීමයි. හිටපු පාලක කණ්ඩායම් කරන ප්‍රකාශයන්ගෙන් ඔවුන් කෙතරම් වික්ෂිප්ත වී තිබෙනවාද කියන එක පෙනෙනවා. ඔවුන් දරාගත නොහැකි මානසික වියවුලකින් පෙළෙමින් සිටිනවා.
මේ රට වැටී තිබෙන තත්වයෙන් ගොඩගැනීම සඳහා ජනතාවට නායකත්වය දී සමීපව මෙහෙයවීම් කරමින් විසඳුම් සෙවීම අවශ්‍ය වෙනවා. ඒ සඳහා අපේ තුන්දෙනෙකුගෙන් සමන්විත ආණ්ඩුව ශක්තිමත් නැහැ. අපිට අපේ ආණ්ඩුව ශක්තිමත්ව ගොඩනගා ගැනීමට වුවමනාව තිබෙනවා. ශක්තිමත් කැබිනට් මණ්ඩලයක් සහ ශක්තිමත් පාර්ලිමේන්තුවත් ගොඩනගා ගැනීම දක්වා සංක්‍රමණීය කාල පරිච්ඡේදයක් අපි ගත කරමින් ඉන්නවා. බලය ගත් මොහොතේ අපි අභියෝගයන් කිහිපයකට මුහුණ දී සිටියා. ආයෝජකයන්ට, කර්මාන්තකරුවන්ට, ආර්ථිකයට දායකත්වයක් සපයන කණ්ඩායම්වලට ආර්ථිකය පිළිබඳව විශ්වාසයක් හදන්න ඕනෑ. ආර්ථිකයේ ප්‍රධාන මෙහෙයුම්කරුවන්ට ජාතික ජන බලවේගය ආණ්ඩුව කෙරෙහි විශ්වාසය තහවුරු කරන්න අපි සමත් වී තිබෙනවා. එහි ප්‍රතිඵලයක් ලෙස ඩොලරය 300ට පහළින් තිබෙනවා. ඒ වගේම ජනතාවගේ අත්‍යවශ්‍ය සේවාවන් අඛණ්ඩව ලබාදීමේ අභියෝගය අපට තිබුණා. ඒ අභියෝගය අපි ජයග්‍රහණය කොට තිබෙනවා. විරුද්ධ පාර්ශ්වයන් කිවුවා අපි බලයට ආවොත් ලෝකයේ හුදකලා රාජ්‍යයක් බවට පත්වෙයි කියා. නමුත් අද ජාත්‍යන්තර සහාය ලබා ගැනීමට හැකියාව තිබෙන ප්‍රබල තම ආණ්ඩුව ජාතික ජන බලවේගයේ ආණ්ඩුව බවට පරිවර්තනය කොට තිබෙනවා. ඒ වගේම ලංකා දේශපාලන ඉතිහාසයේ මැතිවරණයකින් පසුව රට තුළ සාමකාමිත්වය හා ප්‍රජාතන්ත්‍රවාදය ස්ථාපිත කළා. ඉතිහාසයේ මෙතෙක් තිබුණේ මැතිවරණයකට පසුව විරුද්ධ පාර්ශ්වයන්ට පහරදීම්, ගිනි තැබීම්, වද හිංසා පැමිණවීම් අපි සම්පූර්ණයෙන්ම නතර කොට තිබෙනවා.
අද මහ මැතිවරණයකට සූදානම් වෙන අවස්ථාවක්. ලංකාවේ ඡන්ද පැවැත්වීමේ ඉතිහාසය ඉතාම ඛේදනීයයි. මැතිවරණවලදී උඩතලවින්නේ මිනිස් ඝාතන සිදුවුණා. නාවලපිටිය, ගම්පොළ ප්‍රදේශවල කාර්යාලවලට පහර දෙන, ජනතාව බියවද්දන සංස්කෘතියක් තිබුණා. පසුගිය මැතිවරණයේදී ජාතික ජන බලවේගය ජයග්‍රහණය නොකර වෙනත් පාර්ශ්වයක් ජයග්‍රහණය කළා නම්, මේ මැතිවරණය මොන වගේ වේවිද? සෑම දේශපාලන ව්‍යාපාරයකට සාධාරණ ලෙස මැතිවරණවල යෙදෙන්න තිබෙන අයිතිය අද අපි තහවුරු කොට තිබෙනවා. ඒ වගේම යහපත් දේශපාලන සංස්කෘතියක් ගොඩනගමින් තිබෙනවා.
ඒ ගොල්ලන්ට බලය තිබෙන කොට, ගම්වලට ගොස් විදුලි බල මණ්ඩලයට දාගන්න, වෙනත් ආයතනවලට රස්සා දෙන්න ඇප්ලිකේෂන් පුරවන්න දෙනවා. හාල් බෙදනවා. බඩු බෙදනවා. තමන්ගේ මැතිවරණ ව්‍යාපාරය වෙනුවෙන් රාජ්‍ය බලය කැත විදිහට යොදා ගත්තා. මහජනයාගේ ධනය, රාජ්‍ය නිලධාරීන් තමන්ගේ මැතිවරණ ව්‍යාපාරය වෙනුවෙන් යොදා ගත්තා. ජාතික ජන බලවේගයේ අපි කිසිදු ලෙසකින්වත් ආණ්ඩු බලය ඡන්ද ව්‍යාපාරය වෙනුවෙන් යොදාගෙන නැහැ. ඡන්ද කරන්නේ පක්ෂයෙන්. රට පාලනය කරන්නේ ආණ්ඩුවෙන්. මේ යහපත් දේශපාලන වෙනස්කම්, යහපත් පරිවර්තනයන් යළිත් වෙනස් කරන්න මේ රටේ ජනතාව ඉඩ දිය යුතුද? මේ ඇති කරන ලද වැදගත් දේශපාලන සංස්කෘතිය අපි රැක ගන්න ඕනෑ. 1977 සිට ඇමති හැටියට, විපක්ෂ නායක හැටියට, අගමැති හැටියට, ජනාධිපති හැටියට මහජන දේපළ තමන්ගේ ජීවිත වෙනුවෙන් පාවිච්චි කළා. පැරදුණාමත් මහජනතාවගේ දේපළ තමන් වෙනුවෙන් පාවිච්චි කරනවා. මේ කැත සංස්කෘතිය ජාතික ජන බලවේගය නතර කරනවා. මේ වන විටත් අපි චිත්‍රසිරි මහත්මාගේ ප්‍රධානත්වයෙන් කමිටුවක් පත්කර තිබෙනවා, මන්ත්‍රීවරුන්ගේ, ඇමතිවරුන්ගේ, ජනාධිපතිවරුන්ගේ, හිටපු මන්ත්‍රීවරුන්ගේ, ඇමතිවරුන්ගේ, ජනාධිපතිවරුන්ගේ වරප්‍රසාද අහෝසි කිරීම සඳහා වන ක්‍රියාමාර්ග ගැනීමට. එහෙම යහපත් සංස්කෘතියක් රටට අවශ්‍යයි. මේ පාර්ලිමේන්තුව කෙරෙහි ජනතාවගේ විශ්වාසයක් නැහැ. ජනතාවට පාර්ලිමේන්තු කෙරෙහි තිබෙන්නේ කෝපයක්, විරසකයක්. මේ විරසකය තිබෙන්නේ පාර්ලිමේන්තුව තුළ ඉන්න අයට එරෙහිව. නමුත් ඒ අය පාර්ලිමේන්තුවට බලෙන් ගියේ නැහැ, යැව්වේ ඔබලාමයි. මේ පාර්ලිමේන්තුව පිරිසිදු කරන්න, නොවැම්බර් 14 ජාතික ජන බලවේගයේ අයගෙන් මේ පාර්ලිමේන්තුව පුරවන්න ඕනෑ.
දැන් තැන් තැන්වලින් හමුවෙනවා ලියාපදිංචි නොකරන ලද වාහන. රේගුවෙන් නිසි පරිදි ලංකාවට නොගෙනෙන ලද වාහන. සමහර වාහන ආර්.එම්.වී. එකේ රෙජිස්ටර් කරලත් නැහැ. සාමාන්‍ය පුරවැසියා අංක තහඩුවක් නැති වාහන පාරට දාන්න බයයි. රේගුවෙන් පන්නපු, කෑලි ගෙනත් බට් කරපු වාහන පාරෙ දුවනවා. ඒ ගොල්ලන් බය නැහැ. නීතියට උඩින් ඉඳල ඒගොල්ලන්ට පුරුදුයි. අපේ කණ්ඩායම පාර්ලිමේන්තුවට අලුත් වුණාට දේශපාලනයට අලුත් අය නොවෙයි. දීර්ඝ කාලයක් රට වෙනුවෙන් දේශපාලනය කළ, අවංක අය. නොවැම්බර් 14දා පාර්ලිමේන්තුව සුද්ද කරනවා නම් මාලිමාව නියෝජනය කරන අය පාර්ලිමේන්තුවට යවන්න ඕනැ. අපි විධිමත් කැබිනට් මණ්ඩලයක් හදනවා.
විශේෂයෙන්ම අපි ග්‍රාමීය දුප්පත්භාවය තුරන් කරන්න සැලසුම් හදා තිබෙනවා. ප්‍රාදේශීය ලේකම් කොට්ඨාස අනුව ජනතාවගේ ජීවිත ගොඩගන්නේ කොහොමද, අපට දිය හැකි සම්පත් මොනවාද, රාජ්‍ය මැදිහත්වීම් කරන්නේ කෙසේද යනුවෙන් සොයා බලා ග්‍රාමීය දුප්පත්භාවය තුරන් කරනවා. අපේ වැදගත් ක්‍රියාමාර්ගයක් ඩිජිටල් ආර්ථිකයකට පියවර තැබීම. ලෝකයේ ඉහළම ආයතනයක සේවය කරන ඒ ක්ෂේත්‍රයේ උසස්ම වෘත්තියවේදියා, සතයක් නොගෙන සේවය කිරීමට ලංකාවට පැමිණ සිටිනවා. නිවසේ සිට තමන්ගේ සේවාවන් ඉටුකර ගැනීමේ පහසුව සලසන, ආර්ථිකය ඉහළ තැනකට ඔසවන, ජනතාව වෙනුවෙන් සේවා සැපයීමේ කාර්යක්ෂම ඩිජිටල් ඉකොනොමි එකක් ජාතික ජන බලවේගය ශ්‍රී ලංකාවේ ගොඩනඟනවා. ඒ වගේම අපේ වැදගත් සැලැස්මක් “ක්ලීන් ශ්‍රී ලංකා” නමින් දියත් කිරීමට බලාපොරොත්තු වෙනවා. පරිසරය පිරිසිදුව තබා ගැනීම වගේම දූෂණය, වංචාවෙන් පිරිසිදු රටක් අපි හදන්න ඕනෑ. දූෂිතයන්ට දඬුවම් දීම නීතිය ඉදිරියේ තිබෙන වගකීමක්. ඊට අදාළ දක්ෂ නිලධාරීන් අපි පත් කළා. ඔවුන් පරණ ෆයිල් සියල්ලම විමර්ශනය කරමින් සිටිනවා. දේශපාලන බලපෑමකින් තොරව එම පරීක්ෂණ කරගෙන යාමට අපි සහාය දෙනවා. ගම දක්වා විහිදුණු සෑම අතකින්ම පිරිසිදු ශ්‍රී ලංකාවක් ගොඩනැගීම අපේ අපේක්ෂාවයි. ආසියානු කලාපයේ පිරිසිදුම රට ශ්‍රී ලංකාව බවට පත්කරන සැලැස්ම අපි දියත් කරනවා. ඒ වගේම 2025 වසර ලංකාවට මෙතෙක් සංචාරකයන් පැමිණි වැඩිම වසර බවට අපි පත්කරනවා. කෘෂි කර්මාන්තය, වැවිලි කර්මාන්තය, ස්වභාවික සම්පත් මත පදනම් වූ කර්මාන්ත සියල්ල අපි දියත් කරනවා. අපි පෞද්ගලික අංශයේ සේවක සේවිකාවන්ගේ යම් වැටුප් වැඩිකිරීමක් සඳහා පෞද්ගලික අංශයත් සමග සාකච්ඡා කරමින් ඉන්නවා.
ගම දක්වා විහිදුණු ශක්තිමත් බලයක් අපට අවශ්‍යයි. ලබන වසර ඇතුළත පළාත් සභා මැතිවරණය තබන්න අපි සැලසුම් කරනවා. ඒ මගින් ගම දක්වා විහිදුණු දේශපාලන යාන්ත්‍රණයක් ගොඩනැගෙනවා. එම යාන්ත්‍රණයට සමීපව ගමේ ප්‍රශ්න වගේම නගරයේ ප්‍රශ්න, ජාතික ප්‍රශ්න විසඳීමේ සැලසුම් අපි සකස් කරනවා. ජාතික වශයෙන් කළ යුතු වැඩ අපි කරමින් තිබෙනවා. එයට නායකත්වය දෙන්න පුළුවන් ප්‍රාදේශීය පාලනය හදන්න ඕනෑ. ජනතාව සමග සමීප සම්බන්ධතාවය පවත්වා ගත හැකි හොඳ මහජන නියෝජිතයන් දිස්ත්‍රික්කෙන් එවන්න ඕනෑ. මේ මහනුවර විශාල වාහන තදබදයක් තිබෙනවා. මේ ආසන්නයේ විශාල බස් නැවතුම්පළක් හා ඊට අනුබද්ධ පර්යන්ත ගොඩනැගිලි ඉදිකිරීමට පේරාදෙනිය, කටුගස්තොට, තැන්නේකුඹුර සැලසුම් කර තිබුණා. එම සැලසුම් සියල්ලම නතර වෙලා. ඒ සඳහා අවශ්‍ය මුදල් ඉතා ඉක්මනින් ලබාදී මහනුවර වාහන තදබදය ඉතා ඉක්මනින් නතර කිරීමට අවශ්‍ය පියවරයන් ගන්නවා. අධිවේගී මාර්ගයේ නතර වුණු ස්ථාන දෙකක් තිබෙනවා. ඒ ගැන ජපන් තානාපති කාර්යාලය සමග කතා කළා. ඒ වගේ ජාතික වශයෙන් කළ යුතු වැඩ අපි කරමින් තිබෙනවා. ගමේ ප්‍රශ්න බලන්න ඒවාට නායකත්වය දෙන්න, මෙහෙය වන්න හැකි ආකාරයේ ප්‍රාදේශීය නායකත්වය අපි හදන්න ඕනෑ. දිස්ත්‍රික්කයෙන් හොඳ මන්තීවරු එවන්න ඕනෑ. අපි ශක්තිමත් ආණ්ඩුවක් හදමු. ඒ වෙනුවෙන් වැඩි මන්ත්‍රීවරු සංඛ්‍යාවක් ජාතික ජන බලවේගයට ලබාදෙන්න.
“ගඳගහන මිනිසුන් වෙනුවට මාලිමාවේ ආදරණීය මිනිසුන්ගෙන් පාර්ලිමේන්තුව පුරවමු”
-පිරිවෙන් ගුරු සේවා සංගමයේ සංවිධායක ලේකම් පූජ්‍ය බඹරගහකන්දේ ඥානසිරි හිමි-
පසුගිය ජනාධිපතිවරණයේදී මෙන්ම මෙවර මහ මැතිවරණයේදීත් මාලිමාව ජයග්‍රහණය කරවීම සඳහා ජාතික භික්ෂු පෙරමුණේ අපි ඉමහත් කැපකිරීමකින් කටයුතු කරනවා. ඉතිහාසයේ සිටම ලාංකේය භික්ෂුවට දේශපාලනයේදී සුවිශේෂී කාර්යභාරයක් හිමි වුණා. ජාතික භික්ෂු පෙරමුණ කටයුතු කරන්නේ “චරත භික්ඛවේ චාරිකං. බහුජන හිතාය, බහුජන සුඛාය” යන බුදු වදනට අනුවයි. මේ රට ආක්‍රමණය කළ බි්‍රතාන්‍යයන් ජනතාව සූරාකමින්, තලාපෙලා පාලනය කරගෙන යන විට ඊට එරෙහිව පෙරමුණ ගෙන සටන් වැදුණේ මේ රටේ භික්ෂූන් වහන්සේලායි. කුඩාපොල හාමුදුරුවෝ වැනි එඩිතර භික්ෂූන් අපේ රට තුළ සිටිය බව මතක තබා ගන්න. අදටත් එවැනි භික්ෂූන් සිටින වගත් මතක තබා ගන්න. අතීත අපේ වීරෝදාර භික්ෂූන් ගිය මඟේ යන අද ලංකාවේ එකම භික්ෂු සංවිධානය ජාතික භික්ෂු පෙරමුණයි. අපි මේ රට වෙනුවෙන් මේ මෙහෙවර කරන්නේ කිසිදු වරප්‍රසාදයක් වරදානයක් අපේක්ෂාවෙන් නොවෙයි.
රට තුළ සාධාරණ සමාජයක් ගොඩනැගීම අපේ එකම අරමුණයි. බෞද්ධ ශාසනය මුල්කරගෙන හතුරා විසින් මාලිමාවට එල්ල කළ අභූත චෝදනා, මඩ, අවලාද පරාජය කරන්නට පසුගිය ජනාධිපතිවරණයේදී භික්ෂූන් වහන්සේලා හැටියට අපිට පුළුවන් වුණා. අතීතයේ අපේ රටේ කාන්තාවකට පේදුරු තුඩුවේ සිට දෙවුන්ද තුඩුව දක්වා ස්වර්ණාභරණයෙන් සැරසී නිරුපද්‍රිතව පයින් ගමන් කරන්න හැකි වාතාවරණයක් තිබුණා කියලා අපි අසා තිබෙනවා. අද කෝ ඒ රට? වසර 76ක් පුරා මේ රට පාලනය කළ පාලකයන් අද අපිට උරුම කරලා තිබෙන්නේ. සෑම අතින්ම නරක පැත්තට ඇද වැටුණු රටක්. අද ඔබ මාලිමාව වටා පෙළ ගැසී සිටින්නේ රට හොඳ පැත්තට හැරවීමේ බලාපොරොත්තුවෙන්.
මේ රට මේ අගාධයට ඇදලා දම්මෙ මේ රට පාලනය කළ චෞර පාලකයන්. ඔවුන් වටා පෙළ ගැසී සිටින දූෂිත වළල්ල සහ රටේ දූෂිත නිලධාරී තන්ත්‍රයන් විසින්. අපි පන්සලට වෙලා බණ කියූ පමණින් මේ රට සුචරිතවත් රටක් බවට පත් කරන්න අපිට බැහැ. මේ රට හදන්න නම් මහා සංඝරත්නය හැටියට අපි මේ රටට ගැලපෙන පාලනයක් සහ පාලකයන් පත්කර ගැනීමට අපි පෙරමුණ ගත යුතුයි. ඒ සඳහා අපි සූදානම්. මේ මහා මැතිවරණයේදී අපි සූදානම් අර ගඳගහන මිනිසුන් වෙනුවට මාලිමාවේ සුවඳ හමන ආදරණීය මිනිසුන්ගෙන් අපේ රටේ පාර්ලිමේන්තුව පුරවන්න. ඒ සඳහා ජාතික භික්ෂු පෙරමුණ හැටියට අපි මේ මහනුවර දිස්ත්‍රික්කය පුරා ගෙයක් ගානේ යමින් ජනතාවට කරුණු පැහැදිලි කරමින් කටයුතු කරමින් ඉන්නවා. මෙවර මැතිවරණයේදී මාලිමාවේ නියෝජිතයන් වැඩිම පිරිසක් මහනුවරින්, පාර්ලිමේන්තුවට යැවිය යුතුයි. ඒ සඳහා අපිත් එක්ක එකතු වෙන්න කියලා අපි මහනුවර ජනතාවට ආරාධනා කරනවා.
“අපට ඡන්දෙ නුදුන්න අය මාලිමාවට කතිරෙ ගහන්න බැරිවීම ගැන අද කම්පා වෙනවා”
-ජාතික ජන බලවේගයේ මහනුවර දිස්ත්‍රික් විධායක සභික එරික් වීරවර්ධන-
2023 පාර්ලිමේන්තු මැතිවරණයේදී මහනුවරින් ඡන්ද 23,000ක් හිමිකරගත් මාලිමාව, පසුගිය සැප්තැම්බර් 21 වන විට ලක්ෂ හතරකට ආසන්න ඡන්ද ප්‍රමාණයක් ලබාදී ජනාධිපතිවරණයේදී ඓතිහාසික ජයග්‍රහණයක් ලබාදීමට සමත් වුණා. මේ ජයග්‍රහණය අත්පත් කර ගන්න අපට හයිය ලබාදුන්නේ අපේ නායකත්වය. අපි මේ මැතිවරණය පටන් ගත්තේ 2022 දෙසැම්බර් මාසයේ. එදා සිට අපි එතැන් සිට කොට්ඨාස සභා, ගුරු සමුළු, හෙද සමුළු, වෛද්‍ය සමුළු පවත්වමින් අපේ සංවිධාන ශක්තිය තර කළා. අපි ජනාධිපතිවරණය ජයග්‍රහණය කළා. අපිට ශක්තිමත් පාර්ලිමේන්තුවක් අවශ්‍යයි. ඉදිරි මහ මැතිවරණයේදී අපේ ඡන්ද ලක්ෂ හතර, ලක්ෂ හයක් කර ගනිමු. මහනුවර දිස්ත්‍රික්කයෙන් පාර්ලිමේන්තුවට දහ දෙනෙක් යවමු. ඒ ගැම්මෙන් ඊළඟ සති දෙක වැඩ කරන්න ඕනෑ.
අපට ඡන්දෙ නුදුන්න අය මාලිමාවට කතිරෙ ගහන්න බැරිවීම ගැන අද කම්පා වෙනවා. ඒ සියලු දෙනාම අද අපට ඡන්දෙ දෙන්න සූදානම් වෙලා මාලිමාව වටා එකතු වෙලා ඉන්නවා. දමිළ සහෝදරවරුන්ගේ ඡන්ද අපට විශාල ලෙස ලැබුණේ නැහැ. හැබැයි අද දමිළ ජනතාව ගම් පිටින් එකතු වෙමින් ඉන්නවා. ඉතිහාසයේ පළමුවැනි වතාවට තොණ්ඩමන්ලා, දිගම්බරම්ලා, හකීම්ලා,රිෂාඩ් බදූර්දීන්ලා ඊළඟ කැබිනට් එකේ නැහැ. කෙහෙලියලා, ලක්ෂ්මන්ලා නැහැ. ඉන්නේ අපේ ලාල්කාන්ත සහෝදරයා ඇතුළු මාලිමාවේ අය. මාලිමාවේ නියෝජිතයන්ගෙන් දහයක් පාර්ලිමේන්තුවට යවන්න කටයුතු කිරීම වෙනුවෙන් කැපවෙමු.
“අපට විරුද්ධව පච කිවුව අය දැන් පච වෙලා”
-ජාතික ජන බලවේගයේ මහනුවර දිස්ත්‍රික් සංවිධායක කේ.ඩී. ලාල්කාන්ත-
අපි මහනුවර දිස්ත්‍රික්කයේ දේශපාලන වැඩ කරන්න එනකොට සමහරු අපිට කිවුවේ දිස්ත්‍රික්කයේ ඡන්ද පදනම වෙනස් කරන්න බැහැ කියලා. දේශපාලනය වෙනස් කරන්න බැහැ කියලා. හරිම ගතානුගතිකයි කිවුවා. නමුත් ඔබ සියලු දෙනා පුනරුදයක් වෙනුවෙන් කැපවෙලා මාලිමාව ජයග්‍රහණය කරනවා කියලා රටට පෙන්නුවා. ඒ කැපකිරීමට අපි ගොඩක් ආදරය කරනවා. අපේ දේශපාලනයට විරුද්ධව හිටපු අයත් යථාර්ථය තේරුම් අරන් වෙනස් වෙනවා නම් අපි ඒ අයත් ආදරයෙන් පිළිගන්නවා.
අපි මන්ත්‍රීකම් 10ක් මහනුවර දිස්ත්‍රික්කයෙන් ගන්නවා. ඒක ස්ථිරයි. දැන් ඔක්කෝම හරි. අපි දිනලා අපේ ජනාධිපති කෙනෙක් ඉන්නෙ කියලා කවුරුත් උද්ධච්ඡ වෙන්න එපා. අපි බුදු දහමෙන් ඉගෙන ගන්නවා නම් වැරදි කළ අය නිවැරදි වීමට පියවර ගන්නවා නම් අපි ඒ අය පිළිගත යුතුයි. අහක දැමිය යුතු නැහැ. මුළු සමාජයක් කුණු වුණාම සමහර දේශපාලකයොත් කුණු වෙනවා. එතනැදී අපි එක් එක් පුද්ගලයාට පෞද්ගලිකව වෛර කරලා වැඩක් නැහැ. සමාජය වෙනස් කිරීමට උත්සාහ ගත යුතුයි. චෝදනා තිබෙන අයට නීතියෙන් උත්තර දෙයි. මහනුවර දිස්ත්‍රික්කයේ අපේ පක්ෂයෙන් නාම යෝජනා ගන්න විවිධ තරාතිරමේ උදවිය 543ක් ඉදිරිපත් වුණා. නමුත් අපිට නාම යෝජනා දෙන්න පුළුවන් 15 දෙනෙකුට පමණයි. අපිට නාම යෝජනා දෙන්න 15 දෙනෙක් හොයා ගන්න බැරි වුණු කාලයක් තිබුණා. නමුත් අද 543 දෙනෙක් ඉදිරිපත් වීමෙන් පේන්නේ මොකක්ද? අපේ දේශපාලන ව්‍යාපාරය ජයග්‍රහණය කරනවා කියන එක නේද?
දකුණු අප්‍රිකාවේ තමයි ලෝකයේ පිළිකුල් සහගතම වර්ණභේදවාදය ක්‍රියාත්මක වුණේ. සුදු ජාතිකයෝ කළු ජාතිකයින්ව විනාශ කළා. සුදු පාලකයන් යටතේ නෙල්සන් මැන්ඩෙලාලා ඒකෙන් බැට කෑවා. කළු ජාතීන් දුක් වින්දා. එක හෝටලයක තේ බොන්නේ නැහැ. එක මේසයක වාඩිවෙන්නේ නැහැ. එක බස් එකේ යන්නේ නැහැ. නමුත් නෙල්සන් මැන්ඩෙලාලා අන්තිමට ජයග්‍රහණය කළා. හැබැයි සුද්දාගෙන් පළිගන්න ගියේ නැහැ. තමන්ගේ ජනතාව විනාශ කරපු සුදු ජාතිකයන් සමග මැන්ඩෙලා සම්මුතියකට ගියා. ඉන් පස්සේ තමයි ඒ රට සාමකාමී වුණේ. ඒක ලෝක දේශපාලනයේ විශේෂයක්. අවංක පාපොච්චාරණයක් කරලා අපි එතන ඉඳන් එකට යමු කියලා මැන්ඩෙලා සුද්දන්ට කිවුවා. ඉන් පස්සේ රට ස්ථාවර වුණා. එතන සිද්ධ වුණේ එහෙමයි.
දේශපාලනයේදී හරි පුද්ගලික ජීවිතයේදී හරි වැරැද්දක් නොකළ කෙනෙක් මෙතන ඉන්නවා නම් අත උස්සලා පෙන්වන්න. එහෙම අය නැහැ. හැබැයි වැරදි තියෙනවා නම් ඒවා නීතියෙන් බලා ගනියි. අපි ඇඟිලි ගහන්න යන්නේ නැහැ. අපිට විරුද්ධව මඩ ගැහුවා. අවලාද කිවුවා. චෝදනා කළා. අපට විරුද්ධව පච කිවුව අය දැන් පච වෙලා. ඒ නිසාම දැන් සජිත් ප්‍රේමදාසලා තරගයක නැහැ. ආණ්ඩු බලය ඉල්ලන්නේ නැහැ. අනේ අපිව විපක්ෂයට යවන්න බැරිද කියලා අඬනවා. ලංකාවේ ප්‍රථම වතාවට ආණ්ඩුවක් සඳහා තරගයක් නැති මැතිවරණය බවට මෙවර මහ මැතිවරණය පත්ව තිබෙනවා. අපි දැන් තරග කරන්නේ ශක්තිමත් පාර්ලිමේන්තුවත් සඳහායි. සියයට තුනේ හිටපු කෙනෙක්ව ජනාධිපති කරන්න අපිට පුළුවන් කියන කොට, සමහරු කිවුවා අපිට අධිතක්සේරු පිස්සුවක් තිබෙනවා කියලා. නමුත් ඒක පිස්සුවක් නොවෙයි, යථාර්ථයක් වුණා. මේ මහ මැතිවරණයේදීත් අපි මහනුවර දිස්ත්‍රික්කයෙන් ආසන 10ක්ම දිනා ගැනීම තමයි අපේ අපේක්ෂාව. අධිතක්සේරුව පිස්සුවක්. හැබැයි ඒකත් යථාර්ථයක් වෙන බව අපි සහතික කරලා කියනවා. මහනුවර ජනතාව ඒක ඔප්පු කරන බව විශ්වාසයි.
