NPP News

(ජාතික ජන බලවේගයේ කොළඹ දිස්ත්‍රික් කාන්තා සමුළුව – 2024.03.10, හෝමාගම)

ලංකාවේ මෑත ඉතිහාසයේ දේශපාලන පරිවර්තනීය කඩඉමක් පැමිණ තිබෙනවා. ඒ නිසා පාලක කණ්ඩායම මහ මැතිවරණයක් පවත්වනවාද, ජනාධිපතිවරණයක් පවත්වනවාද යන්න ගැන දෙගිඩියාවෙන් ඉන්නේ. රනිල් වික්‍රමසිංහ කල්පනා කරන්නේ ජනාධිපතිවරණයක් පවත්වන්න. මහා මැතිවරණයක් පවත්වනවා නම්, අපේක්‍ෂකයෝවත් හොයා ගන්න එයාට බැහැ. රාජපක්‍ෂලා හිතන්නේ රාජපක්‍ෂලාට ජනාධිපති මැතිවරණයට අපේක්‍ෂකයෙක් පවුලෙන් හොයා ගන්න බැරි නිසා මහා මැතිවරණයක් තිබ්බොත් හොඳයි කියලා. සජබ වාගේ පක්‍ෂයක් ගම්වල ඉතිරි වෙලා තිබෙන ඡන්ද ටික රැකගන්න කල්පනා කරනවා. කණ්ඩායම් තුනකට බෙදිලා හිටියත්, එකම පිරිසක් වන මේ අයට ජූලි මස 22 වැනිදා වන තුරු ජනාධිපතිවරණය තියනවාද, මහා මැතිවරණය තියනවාද කියලා කල්පනා කර කර ඉන්න වෙනවා. ඒ වාගේම සාමාන්‍යයෙන් පාර්ලිමේන්තුව පැවැත්වෙන දිනවල උදේ නවයේ සිට සවස පහ දක්වා සාමාන්‍යයෙන් විවාද පවත්වනවා. මේ කාලය තුළ අපට ලැබෙන්නේ විනාඩි දහයයි. ඒ අයට පැය හතයි විනාඩි පණහක් ලැබෙනවා. ඒ මුළු කාලය තුළම අපව ඉලක්ක කරගෙන ප්‍රහාර එල්ල කරනවා. සමහර රූපවාහිනී විවාදවල නිවේදකයෝ හතර දෙනකුත්, දේශපාලකයකුත් ඉන්නවා. ඒ පස්දෙනාම අප ගැන කතා කරමින්, ප්‍රහාර එල්ල කරනවා. ඔවුන් හැම දෙනාම ලංකාවේ කවදාවත් නොතිබුණු දේශපාලන මානසික ආතතියකට ගොදුරු වී ඉන්නවා.

අද හෝමාගම මේ රැස්වීමට සහභාගි වී සිටින අම්මලා, සහෝදරියන් සහ දියණියන් දැක්කාම ඔවුන්ගේ ඒ මානසික ආතතිය තවත් වේගයෙන් ඉහළ යනවා. අප මුහුණ දී සිටින්නේ හුදු ආණ්ඩු මාරු කිරීමකට නොවෙයි. ලංකා ඉතිහාසයේ ප්‍රබලතම දේශපාලන, ආර්ථික, සමාජ පරිවර්තනයක් සිදු කරන්න සූදානම් වෙනවා. මේ නිසා මෙතෙක් රට පාලනය කළ කණ්ඩායම් අවසානය දක්වා ඔවුන්ගේ බලය රැකගන්න උත්සාහ කරනවා. තමන්ගේ දේශපාලන බලය ආරක්‍ෂා කර ගන්නත්, ලසන්ත වික්‍රමතුංග ඝාතනය කර තවත් මාධ්‍යවේදීන්ට පහර දුන්නා. තමන්ගේ ස්වාමියා අහිමි වුණු දුක දරාගෙන ඉන්න සන්ධ්‍යා එක්නැලිගොඩලාටත් සාධාරණය ඉටු විය යුතු නැද්ද? පෑන හසුරුවමින්, තමන්ගේ මතය හැසිරවීම නිසා ඔවුන් කිසිවකුත් ඝාතනය විය යුතු නැහැ. ‘සන්ඩේ ලීඩර්’ පුවත් පතේ පිටු ගණනක් ලසන්ත වික්‍රමතුංග පිරවූයේ රනිල් වික්‍රමසිංහ වෙනුවෙන්. අද රනිල් වික්‍රමසිංහ ජනාධිපති පුටුවේ වාඩි වී ඉන්නවා. ලසන්ත වික්‍රමතුංග ගැන පරීක්‍ෂණ නැහැ. මේ රටේ ජනතාවගේ මූල්‍ය අපරාධයන් සිදු කිරීමේ කඩඉමක් මහ බැංකු කොල්ලයෙන් සිදු කළා. ඔවුන් කළ මූල්‍ය අපරාධ ගැන සොයා දඬුවම් දෙන බව කී පිරිස් අද රනිල් වික්‍රමසිංහ වටා වාගේම සමගි ජන බලවේගයට එකතු වී ඉන්නවා. ඔවුන් දඬුවම් ලැබිය යුතු මේ අපරාධවලින් ආරක්‍ෂා වීමට විවිධ උපක්‍රම යොදනවා. පරම්පරාව කේන්ද්‍රගත කරගෙන පැමිණි මේ වංචාකාරී, දූෂිත පාලනය පොදු ජනයා අතට මාරු වීමේ කඩඉමට පැමිණ තිබෙනවා.

දේශපාලනය සඳහා පිවිසීමට අපේක්‍ෂා කරන තරුණ තරුණියන් වෙනුවෙන් නව දොරටු අපේ පාලනයක් යටතේ විවෘත කරනවා. ඔවුන්ගේ පෙළපතින් පැමිණි දේශපාලනය, සාමාන්‍ය ජනතාවගේ දූ-පුතුන් වෙත මාරු වීම වැළැක්වීම සඳහා කළ හැකි සියලු කුමන්ත්‍රණ සිදු කරනවා. මැද කොළඹ පිට්ටනියක් පුරවලා සහල් ගෙනැත් තිබෙනවා. ලංකා ඉතිහාසයේ වැඩිම මුදල් ප්‍රමාණය මේ මැතිවරණයේදී ඔවුන් පොම්ප කරනවා. නමුත්, 2022 මැයි මාසේ 09වැනිදාට පෙර සිටි ජනතාව රැවටිය හැකි වුවත්, දැන් ඉන්නේ අත්දැකීම්වලින් පාඩම් ඉගෙනගෙන තුනෙන් දෙකේ බලයක් සහිත ආණ්ඩුවක් වාගේම හැටනවලක්‍ෂයක් ඡන්දවලින් පත් වුණු ජනාධිපතිවරයෙක් පලවාහැරිය ජනතාවක්. ඉරාකයේ සදාම් හුසේන් පලවාහරින්න ඇමෙරිකානු හමුදාව ගොඩබැස්සා. ලිබියාවෙත් ඒ වාගෙයි. නමුත්, ගල් කැටයක්වත් අතට නොගත් ජනතාව ඡන්දය ලක්‍ෂ 69ක් ලබා ගත් පාලකයාව පලවාහැරියා. ඒ නිසා ඔවුන් සෙල්ලම් කරන්න හදන්නේ අපි දේශපාලනය කරන අලුත් ජනතාවත් එක්කයි. රනිල් වික්‍රමසිංහලා, මහින්ද රාජපක්‍ෂලා, සජිත් ප්‍රේමදාසලා දේශපාලනය කරන්න ලෑස්ති වෙන්නේ පැරැණි ජනතාවත් එක්ක. අපි දේශපාලනය කරන්නේ 2022 මැයි 09වැනිදායින් පසු වෙනස් වූ නව ජනතාවත් එක්ක. ඔවුන්ගේ එක රූපවාහිනී නාලිකාවක් වෙනුවෙන් අපේ ප්‍රචාරක කටවල් දසදහස් ගණනක් තිබෙනවා. ඔබ කොතැනකට ගියත්, ඔවුන්ගේ අවලාද, මඩ, විකෘති කියුම්වලට එරෙහිව නිවැරැදි දේ පහදා දෙන්න.

රනිල්ගේ ඡන්ද කැම්පේන් එක ගෙනියන්න ආයතන තුනකට භාර දී තිබෙනවා. එක ආයතනයක් සකස් කර තිබෙන කැම්පේන් එකේ රනිල් ගැන හතරෙන් එකක් කියන කොට අප ගැන හතරෙන් තුනක් කියනවා. අප ගැන හදන්න භාර දීලා තියෙන්නෙත්, අපේ කෙනකුට. අසූඅට, අසූනවය කාලය ගැන බයක් හදන්න එක කැම්පේන් එකක් නිර්මාණය කරනවා. දෙවැනි එකේදී අපත් ටික කාලයක් ආණ්ඩුවල හිටි බව කියන්න උත්සාහ කරනවා. තුන්වැනි එක මේ වෙලාවේ අත්හදා බලන්න සුදුසු වෙලාවක් නොවෙයි කියන්න යොදා ගන්නවා. සල්ලි පොම්ප කරලා, දැන්වීම් හදන, පත්තර ගහන ප්‍රචාර සැලසුම් කර තිබෙනවා. අපේ රටේ ජනතාවගේ ධනය කොල්ලකා ජනතාව මේ ප්‍රපාතයට හෙළන ලද පාලකයන් සම්බන්ධයෙන් සාධාරණ පරීක්‍ෂණ පවත්වා, දඬුවම් පැමිණවීමේ අවශ්‍යතාවක් අපට තිබෙනවා. මෙතැනට පැමිණ සිටින කිසිවකුත් තමන්ගේ පෞද්ගලික අරමුණු වෙනුවෙන් පැමිණි අය නොවෙයි. අප අතර තිබෙන්නේ මේ රටත්, මේ රටේ ජනතාවටත් මෙයට වඩා යහපත් ජීවිතයක් ගොඩනැඟීම පිළිබඳ පොදු අරමුණ පමණයි. ඒ අරමුණ වෙන කිසිවකුටවත් කොපි කරන්න බැහැ. බෞද්ධ සාහිත්‍යයේ සඳහන් වන වටුවන් දඩයම් කරන්න වැද්දා හෙළුෑ දැලෙන් සාමූහිකව ගැලවී යාමේ නායකත්වය බෝධිසත්ව වටුවා විසින් ලබා දුන්නා. ගැහැනු අපි එකමිටට තේමාව වටා එක්වී සිටින්නේ මේ රට පරිවර්තනය කිරීම සඳහායි. අපි ඒ වෙනුවෙන් සැලසුම් සකස් කර වේදිකාවේ කතා කළත්, ඒ ක්‍රියාමාර්ගවල වැඩිම බරක් දරන්නේ, ක්‍රියාකාරී වන්නේ වේදිකාව ඉදිරිපිට සිටින ඔබ සියලු දෙනායි. මෙය ජයග්‍රහණය කරා මෙහෙයවීමට ශක්තිය, ධෛර්යය ඔබ සියලු දෙනාටම ප්‍රාර්ථනා කරනවා.

මැතිවරණ ජයග්‍රහණය කියන්නේ අවසානය නොවෙයි, රට ගොඩනැඟීමේ ආරම්භයයි. එහි පළමු කාර්යය ජනතාවගේ ආහාර වේල ලබා දීම සහතික කිරීමයි. අපේ රටේ මහා පරිමාණ හාල්මෝල් හිමියන් කිහිප දෙනකුගේ ඒකාධිකාරී වෙළෙඳපොළ ජාතික ජන බලවේගයේ ආණ්ඩුවක් යටතේ බිඳදමා සාධාරණ මිලකට පාරිභෝගිකයාට සහල් ලබා දීමටත් ගොවියාට සාධාරණ මිලක් ලබා දීමටත් යාන්ත්‍රණයක් සකස් කරනවා. එළවළු, පලතුරු සම්බන්ධ වෙළෙඳපොළත් ඒ වාගේම නැවත සකස් කිරීමට පස්අස්වනු නාස්තිය අවම කරනවා. ජාතික ජන බලවේගයේ ආණ්ඩුවක් යටතේ පළමුකොටම පුරවැසියන්ට සාධාරණ මිලකට පෝෂ්‍යදායී ආහාර වේලක් සහතික කරනවා. වස-විෂවලින් තොර ආහාර වේලක් ලබා දීමත් සහතික කරනවා. දෙවනුව පුරවැසියන්ගේ සෞඛ්‍යය ආරක්‍ෂා කිරීමේ කෙටිකාලීන ක්‍රියාමාර්ග අනුගමනය කරනවා. පරීක්‍ෂණ පහසුකම්, ඖෂධ ප්‍රමාණවත් තරම් ලබා දීම මාස දෙක තුනක් තුළ තහවුරු කරනවා. දරුවන්ගේ අධ්‍යාපනය තුන්වැනි හදිසි අවශ්‍යතාව ලෙස ප්‍රමුඛත්වය ලබා දෙනවා. තමන් විඳින දුක තමන්ගේ දරුවාට ලබා නොදීමේ චේතනාවෙන් අධ්‍යාපනය වෙනුවෙන් විශාල කැප කිරීමක් දෙමාපියන් කරනවා. මේ වන විට මුළු පාසල් පද්ධතියම කඩාවැටී තිබෙන තත්වය වෙනස් කර ඒ ගැන නැවත විශ්වාසයක් ඇති කරනවා. අධ්‍යාපනයේ විශාල පරිවර්තනයක් කරමින්, සියලුම වෘත්තීන්වලට ගැළපෙන අධ්‍යාපනයක් ලබා දීමේ දිගුකාලීන සැලැසුම් ක්‍රියාත්මක කරනවා. ඒ වෙනුවෙන් වූ සමාජ ආකල්ප පරිවර්තනයකුත් අපි ඇති කරනවා. අද ගෙදරට බරක් වී තිබෙන දරුවාගේ අධ්‍යාපනය එයින් මුදාගෙන රජයේ වගකීමක් බවට පත් කර ගන්නවා. අපේ රටට ඕනෑ දැනුමෙන්, නිපුණතාවෙන් යුක්ත පුරවැසියන් බිහි කරන අධ්‍යාපනයක්. ලෝකයත් එක්ක තරග කළ හැකි දරුවන් නිර්මාණය කරන අධ්‍යාපනයක් අපට ඕනෑ. ඔවුන්ට ඕනෑ කරන්නේ ඡන්ද කාලයට ෆෝම් කොළ පුරවන, අරක්කු වීදුරුවට යට වෙන, නාමල්ලාගේ පිටිපස්සෙන් යන දරුවන්. ලෝකයේ නව දැනුම උකහාගෙන ඉදිරියට යන සමාජ විනයක් සහිත දරුවන් බිහි කරන අධ්‍යාපනයක් අපි නිර්මාණය කරනවා. ඒ වාගේම විනයක් සහිත නීතිගරුක සමාජයක් බිහි කිරීමට මෙතෙක් පැමිණි මාවතෙන් අනාගතයේ රට ගොඩනඟන පරිවර්තනීය වෙනසක් කළ හැකි ආණ්ඩුවක් බලයට පත් කරගත යුතුයි. එයින් පසුව කාන්තාවන්ටත්, ඇකයේ නැළවෙන දරුවන්ටත් සුරක්‍ෂිතභාවය තහවුරු වන රටක් ගොඩනැඟීමේ පරිවර්තනය වෙනුවෙන් ජයග්‍රහණය කරා ධෛර්යයෙන් ගමන් කරන ලෙස ආරාධනා කරනවා.

“එකමිටට එකතු වුණු ගැහැනුන් නොනැවැතී පෙරට ගමන් කරමින් සිටිනවා”
-ජාතික ජන බලවේගයේ ජාතික විධායක කමිටු සාමාජිකා සමන්මලී ගුණසිංහ-

මෙවර ජාත්‍යන්තර කාන්තා දිනය අප සැමරුවේ මහපාරේ අරගල කරමිනුයි. රට පුරාම ඉන්න අධිෂ්ඨානශීලී ගැහැනුන් එකමිටට එකතු කරගෙන යන ගමනේදී කාන්තා දින සැමරුමෙන් දින දෙකකට පසුව අප කොළඹදී හමුවී තිබෙනවා. කොළඹ දිහා හැමෝම ඇස් ඇරගෙන බලාගෙන සිටියා. රතු කැකුළු, සුදු කැකුළු හාල් කිලෝ දහය බැගින් බෙදන සමුළු ඒ පැත්තෙන් තරගෙට පටන්ගෙන තිබෙනවා. ඒ වෙනුවට ජාතික ජන බලවේගයේ අපි අභිමානවත් ලෙස ජීවත් වෙන්න කැමැති කොන්ද තිබෙන ගැහැනුන් ලෙස රට ගොඩනැඟීමේ වගකීම වෙනුවෙන් එකතු වී සිටිනවා. ඔවුන් බෙදා දෙන සහල්වලින් කුස පුරවා ගන්නවා වෙනුවට අපේ පුංචි දරුවන්ට අභිමානයෙන් ජීවත් විය හැකි රටක් බිහි කිරීමට මෙසේ ඒකරාශී වී සිටිනවා.

හැමදාමත් පරාධීනව සිටින දේශපාලන සංස්කෘතිය වෙනුවට දැක්මක් සහිතව ප්‍රගතිශීලී කොටස් සමඟ එකමිටට එකතු වන ගැහැනුන් ජීවිතය විඳිමින්, ජීවිතය අවබෝධ කර ගනිමින්, දේශපාලනයේ යෙදීමට පෙරමුණ ගෙන සිටිනවා. මොනිකා රුවන්පතිරණ කිවිඳිය මේ විදියට කියා තිබෙනවා. “එක් පරම්පරාවක සොහොන් බිම පා තබා, නව පරම්පරාවේ කළල රුව දුටිමි ඇය” අවුරුදු හැත්තෑහයක පාලනය අවසන් කර සොහොන් ගෙට යවා අලුත් පරම්පරාවක් බිහි කරන කළල රුව දරාගෙන, අලුත් සමාජය බිහි කරන, නොනිඳා කටයුතු කරන මේ එකමිටට එකතු වුණු ගැහැනුන් නොනැවැතී පෙරට ගමන් කරමින් සිටිනවා. අභියෝගයට මුහුණ දෙන ශක්තිවන්ත ගැහැනුන් හැටියට ජයග්‍රහණය කරා පා නඟමින් සිටිනවා.

-පොදු අරගලයේ අවසන් ජය සතුටින් ජීවත් විය හැකි රටක් සහ සමාජයක් දිනාගැනීමයි-
“ජාතික ජන බලවේගයේ ජාතික විධායක කමිටු සාමාජිකා ව්‍රායි කැලී බල්තසාර්”

ජාතික ජන බලවේගයේ වේදිකාව තුළ කාන්තා අපට කතා කරන්න විශේෂ අවස්ථාවක් තිබෙන බව 2019 ජනාධිපතිවරණ වේදිකාවේදී ඉතා හොඳින් තහවුරු වුණා. ඒ වාගේම 2020 මහා මැතිවරණයෙන් ආචාර්ය හරිනි අමරසූරිය සහෝදරිය පාර්ලිමේන්තු මන්ත්‍රීවරියක ලෙස ජාතික ලැයිස්තුවෙන් පත් කළ පසු අවශ්‍ය සෑම අවස්ථාවකදීම අරගල බිමේදීත්, පාර්ලිමේන්තුවේදීත් හඬනැඟීමට කටයුතු කර තිබෙනවා. දුක්, කරදර තුරුලු කරගෙන, ප්‍රචණ්ඩත්වයට මුහුණ දෙමින්, සමහර විට තනියෙන් වුවත්, දරුවන් තුරුලු කරගෙන රැකබලා ගන්නා ගැහැනුන් අපි. මත්ද්‍රව්‍යවලින් දරුවන් බේරා ගන්න පොරබදන ගැහැනුන් අපි. දවසකට රුපියල් එක්දහස් පන්සීයක්වත් හොයා ගන්න වැඩ කිහිපයක් කරමින්. සෑම තැනදීම පීඩාවට පත් වන ගැහැනුන් අපි. හැඟීම් නැති තෙතමනයක් නැති පාලකයන්ගේ වංචාවට, දූෂණයට වන්දි ගෙවන උගුලකත් අපව හිර කර තිබෙනවා.

මේ එළැඹී තිබෙන්නේ මේ පාලනය නිමා කරන යුගයයි. අපේ ඉතිහාසයේ යම්කිසි හෝ ජයග්‍රහණයක් ලබාගෙන තිබෙනවා නම්, ඒ හැම දෙයක්ම ලබාගෙන තිබෙන්නේ සාමුහික අරගල තුළිනුයි. 1931දී අපේ රටේ ගැහැනුන්ට ඡන්ද අයිතිය ලබා ගන්නත් ලොකු අරගලයක් කළ බව ඉතිහාස සටහන්වල තිබෙනවා. දැන් අප ඡන්දයටත් වඩා ලොකු දෙයක් ඉල්ලන්නේ. අපි සංවිධානය වී, ශක්තිමත් වී මේ රට වෙනස් කරන ඓතිහාසික කාර්යභාරයේ කොටස්කරුවන් වන්නයි, මේ සියලු දෙනාම රැස්වී සිටින්නේ. අපි මේ කරන කාන්තා විප්ලවය ගැන තව ටික දවසකින් ලියන්න ගනීවි. අප සියලු දෙනාගේම පොදු අරගලයේ අවසාන ජයග්‍රහණය සතුටින් ජීවත් විය හැකි රටක් සහ සමාජයක් දිනාගැනීමයි.

“නිර්මාණය කරන අලුත් ලෝකය සුරකින්න ගැහැනු අපි ශක්තිමත්ව එකතු වෙමු”
-ජාතික ජන බලවේගයේ පාර්ලිමේන්තු මන්ත්‍රීනි ආචාර්ය හරිනි අමරසූරිය-

ගැහැනු අපි එකමිටට මාලිමාවට සමුළුවට බාධා කරන්න කොළඹ දිස්ත්‍රික්කයේ විවිධ උපක්‍රම පාවිච්චි කර තිබෙනවා. දිස්ත්‍රික්කය පුරාම විවිධ බඩු බෙදනවා. සමෘද්ධි තිබෙන අය රැස්වීම්වලට කැඳවා තිබෙනවා. ඒ හැම දේම මැද්දේ අපේ සමුළුව සාර්ථක කර ගැනීම තමයි, ලංකාවේ දේශපාලනය වෙනස් වී තිබෙන බවට හොඳම සාක්‍ෂිය. නිකම්ම නිකම් ගැහැනු ටිකක් එකතු කර ගත් ව්‍යාපාරයක් නොවෙයි, මේක. සාකච්ඡා කරමින්, අධ්‍යයනය කරමින් ගැහැනුන්ගේ නායකත්වය වෙනුවෙන් විශේෂ වේදිකාවක් සියලුම දෙනා එකතු කර ගනිමින් නිර්මාණය කරනවා. මෙය ප්‍රධාන ධාරාවන් වෙනස් කරමින්, සියලු දෙනා සමඟ සාමුහිකව යන ගමනක්. පාර්ලිමේන්තුව ඇතුළු මහජන ආයතනවල කාන්තා නියෝජනය අංකවලින් වැඩි කරන එක අපේ මූලික අරමුණ නොවෙයි. බැරෑරුම් සමාජ පරිවර්තනයක් සිදු කර සියලුම ක්‍ෂේත්‍රවල පීඩනය අවසන් කිරීම අපේ මූලිකම අරමුණයි. පීඩාව නඩත්තු කරමින් පවත්වාගෙන යන ව්‍යුහයන් වෙනස් කිරීම අපේ දේශපාලනයයි. පීඩාවේ ප්‍රධාන වින්දිතයන් වන ගැහැනු අපි දැනුවත්ව මැදිහත් වී මේ ක්‍රමය වෙනස් කිරීමේ අයිතිය තිබෙනවා.

අපේ ස්ත්‍රී ප්‍රතිඥාවේ සඳහන් වන්නේ සියලු ක්‍ෂේත්‍රයන් සලකා බලමින්, පුළුල් සහ ගැඹුරු පරිවර්තනයක් සිදු කිරීමටයි. ඒ පරිවර්තනය සිදු කරන්න අපට බලය අවශ්‍යයි. 2024 තීරණාත්මක වන්නේ මේ ගැඹුරු පරිවර්තනය වෙනුවෙන් ක්‍රියා කරන අපට විරුද්ධව සිටින සියලු දෙනා පරාජය කිරීමේ වසර වන නිසයි. තවදුරටත් ගැහැනු අපි රැවටෙන්න සූදානම් නැහැ. අපේ ව්‍යාපාරයේ සාර්ථකත්වය නිසා අනෙක් දේශපාලන පක්‍ෂත් ගැහැනුන් ගැන සිතන්නට පටන් ගන්නවා නම්, ඒ ගැන අප සතුටු වනවා. අපට මෙය මැතිවරණ උපායමාර්ගයක් පමණක් නොවෙයි. පීඩනයට එරෙහි වෙමින්, පවතින ක්‍රමය වෙනස් කිරීම ඉදිරියට ගෙන යන විට අද සමස්ත ගැහැනුන්ම ඉලක්ක කරගෙන මඩ ප්‍රහාර එල්ල කිරීම ආරම්භ කර තිබෙනවා. මෙයට කලින් නායිකාවන් ඉලක්ක කරගෙන එල්ල කළ ප්‍රහාර සහ අවලාද විවිධ ක්‍රම මඟින් දියත් කර තිබෙනවා. ගැහැනු අපි තමයි, හැමදාමත් මේ ලෝකයට අලුත් ජීවීන් බිහි කරන්නේ. ඒ අලුත් ජීවීන් රැකගනිමින්, ආරක්‍ෂා කරන්නේත් අපි. ඒ අලුත් ලෝකය නිර්මාණය කරන්න වාගේම ඒ අලුත් ලෝකය සුරකින්න ගැහැනු අපි තව තවත් ශක්තිමත් වෙමින් එකතු වෙමු.

“වියට්නාම් කාන්තාවන් උමංවලින් එළියට ආවා වාගේ අපේ කාන්තාවනුත් නොකඩවා එළියට එමින් සිටිනවා”
-ජාතික ජන බලවේගයේ ජාතික විධායක කමිටු සාමාජික ලක්‍ෂ්මන් නිපුණආරච්චි-

දේශපාලනයෙන් තොරව ජීවත් වන්න බැහැ කියලා ඔප්පු වුණු තැන අපේ රටේ කාන්තාවන් වියට්නාමයේ කාන්තාවන් උමංවලින් එළියට ඇවිත්, ඇමෙරිකානු හමුදාව සමඟ සටන් කළා වාගේ නොකඩවා එළියට එමින් සිටිනවා. මෙයට පෙර අපි ගෙවල්වලට ගිහින්, දේශපාලනය කතා කරන කොට කාන්තාවන් ඒ කතාවලට සම්බන්ධ වුණේ නැහැ. නමුත්, දැන් ඔවුන් පෙරටම ඇවිත්, වියට්නාම් කාන්තාවන් ඇමෙරිකානු හමුදාව පලවාහැරියා වාගේ ධෛර්යයකින් අරගල කරමින් සිටිනවා. ඔක්තෝබර් 17වැනිදාට පෙර කිසියම් දවසක එළැඹෙන ඕනෑම මැතිවරණයකදී ඇමෙරිකානු හමුදාව එළවන්න උමංවලින් එළියට ආ වියට්නාම් ගැහැනුන් වාගේ මේ කාන්තාවන් ඡන්දපොළට ඇදී යනවා. ඒ අවස්ථාව ආවාම කලිසම හැළෙද්දිත්, එල්ලිලා ඉන්න මේ පාලකයන් ඇතුළු සියලු දෙනාටම තනතුරු දාලා යන්න සිදු වනවා.

ජනතාවගෙන් සූරාගත් මුදල්වලින් කොළඹ දිස්ත්‍රික්කය පුරා බෙදන බඩු ලබා ගත්තාට කමක් නැහැ. බොහොම අමාරුවෙන් ජීවත් වන ගැහැනුන් විශාල කැප කිරීමක් කරමින්, මෙතැනට ඇවිත් සිටිනවා. වියට්නාමයේ කාන්තාවන් අතිශය කැප කිරීම් කරමින්, තමන්ගේ මවුබිම බේරා ගන්න සටන් කළ ආකාරයෙන් මේ මාස කිහිපයේ කැප කිරීම් කරමින්, කොළඹ දිස්ත්‍රික්කයේ ජයග්‍රහණය ඉහළින්ම ඔසොවා තබන ලෙස ඉල්ලා සිටිනවා.

“සමස්ත කාන්තාවන්ටම නායකත්වය දෙන එකම දේශපාලන ව්‍යාපාරය ජාතික ජන බලවේගයයි”
-ජාතික ජන බලවේගයේ ජාතික විධායක කමිටු සාමාජිකා සරෝජා සාවිත්‍රි පෝල්රාජ්-

මෙතෙක් රට පාලනය කළ අය ලංකාවට අත් කර දී තිබෙන සමාජ, ආර්ථික, දේශපාලනික පරිහානිය නිසා අපි හැමෝම දැකපු සිහින බොඳ කර තිබෙනවා. අපි මෙතෙක් කොටු වී සිටි දේශපාලන පක්‍ෂ අමතක කර අපේ දරුවන් වෙනුවෙන් නිදහසේ හුස්ම ගත හැකි රටක් සිංහල, දෙමළ, මුස්ලිම් හැම දෙනාම වෙනුවෙන් බිහි කරන්න අධිෂ්ඨානශීලීව පෙළගැසී සිටිනවා. ලෝකයේ සෙසු රටවල් අත්පත් කරගෙන තිබෙන සංස්කෘතික සහ සමාජයීය නිදහස අහිමි කර තිබෙන්නේ පවතින දූෂිත දේශපාලන ක්‍රමය විසිනුයි. මේ කොල්ලකාරී ආර්ථිකය සහ දූෂිත දේශපාලනය අවසන් කර ඉදිරියට යන්න අප සියලු දෙනා ප්‍රායෝගිකව පෙළගැසී සිටිනවා. නමුත්, මෙතෙක් රට පාලනය කළ පිරිස් අපව බෙදා වෙන් කර ඔවුන්ගේ පරම්පරාවල් වෙනුවෙන් සියලු කටයුතු සිදු කර ගත්තා. සාම්ප්‍රදායිකව වැඩිහිටි උරුමයෙන් දේශපාලනය කරනවා වෙනුවට කාන්තාවන්ට සැබෑ ලෙසම ජයග්‍රහණ අත්පත් කරගත හැකි ගැහැනු අපි එකමිටට ජාතික ජන බලවේගය වටා පෙළගැසෙමින් සිටිනවා.

සමස්ත කාන්තා පරපුරට ම ඉදිරියට එන්න ධෛර්යය දුන්, ශක්තිය දුන්, මඟපෙන්වූ සහ නායකත්වය දුන් එකම දේශපාලන ව්‍යාපාරය ජාතික ජන බලවේගය පමණක් බව අපි ඉතා අවධාරණයෙන් කියනවා. මෙයින් ඉදිරියට අපි නිර්මාණය කරගත යුත්තේ මොන වාගේ රටක්ද? සාමකාමී, සහජීවනයෙන් යුක්ත, නිදහස් සංස්කෘතියක් බිහි කරන පාලනයක් අපට ඕනෑ කරනවා. ඒ තුළ ගැහැනුන් හැටියට අපි අසාධාරණයට, අයුක්තියට සහ අසමානත්වයට ඇදදමන සියලු කොන්දේසි ඉවත් කරමින්, ආර්ථික සාධාරණත්වය සහිත සංස්කෘතික නිදහසක් නිර්මාණය කරගත යුතුයි. එවැනි පාලනයක් නිර්මාණය කර ගැනීම වෙනුවෙන් අපි රොදබඳිමින් සිටිනවා. එම පාලනය නිර්මාණය කළ හැක්කේ ජාතික ජන බලවේගයට පමණයි. මේ දක්වා අප ගමන් කළ මාවතේ හෙළා තිබූ අභියෝග ජයගත හැක්කේ සිංහල, දෙමළ, මුස්ලිම් අපි හැමෝම එකමිටට එකතු වීමෙන් පමණයි. අපේ දරුවන් වෙනුවෙන් බාධාවකින් තොරව ඉදිරියට යා හැකි රටක් නිර්මාණය කිරීමේ වගකීම අප අපේ දෙඋර මත පටවාගෙන තිබෙනවා. මෙතෙක් එකතු නොවූ සියලු දෙනාටත් අප සමඟ එකතු වන ලෙස ආරාධනා කරනවා.

(-Colombo, March 08, 2024-)

අද (08) පස්වරුවේ ජ.වි.පෙ. ප්‍රධාන කාර්යාලයේදී ශ්‍රී ලංකාවේ කියුබානු තානාපති Andrés Marcelo Garrido මහතා ජාතික ජන බලවේගයේ නායක අනුර කුමාර දිසානායක සහෝදරයා හමුවිය.

එමෙන්ම කියුබන් තානාපති කාර්යාලයේ පළමු ලේකම් Mrs. Maribel Duarte Gonzalez මහත්මියද ජාතික ජන බලවේගය වෙනුවෙන් ජාතික විධායක සභික බිමල් රත්නායක සහෝදරයාද මෙම අවස්ථාවට සහභාගි වූහ.

මෙහිදී දීර්ඝ කාලයක් තිස්සේ කියුබාවේ කොමියුනිස්ට් පක්ෂය සහ ජනතා විමුක්ති පෙරමුණ අතර පවත්වාගෙන ආ දේශපාලන සම්බන්ධතාවය පිළිබඳවත් වර්තමානයේ ජාතික ජන බලවේගයේ දේශපාලන කටයුතු සම්බන්ධයෙනුත් දීර්ඝ වශයෙන් සාකච්ඡාවට බඳුන් විය.

දීර්ඝ කාලයක් තිස්සේ කියුබාවට පනවා ඇති සම්බාධක සම්බන්ධයෙනුත් මේ වනවිට කියුබාව සහ ශ්‍රී ලංකාව අතර ඇති සෘජු සම්බන්ධතාත් ඒවායේ ප්‍රගතිය සහ ගැටලු සහගත තැන් පිළිබඳවත් තානාපතිවරයා මෙහිදී අනුර දිසානායක සහෝදරයා දැනුවත් කළේය.

එමෙන්ම ශ්‍රී ලංකාවේ ඩෙංගු මර්දනය සම්බන්ධයෙන් කියුබානු රජයේ සහයෝගීත්වයෙන් ව්‍යාපෘතියක් ක්‍රියාත්මක කිරීමට මේ වනවිටත් ගිවිසුම්ගතවීම පිළිබඳ සාකච්ඡා පවත්වන බවත් එවැනි ව්‍යාපෘති තවත් මහද්වීප 03ක රටවල් සමඟ මේ වනවිටත් ක්‍රියාත්මක කරමින් සිටින බවත් තානාපතිවරයා පැහැදිලි කළේය.

113 වැනි ජාත්‍යන්තර කාන්තා දිනය – 2024 මාර්තු 08

ජාත්‍යන්තර කාන්තා දිනය යෙදී තිබෙන්නේ සෑම වසරකම මාර්තු 08 වෙනිදාටය. කාන්තාවන් වෙනුවෙන් වෙන්වූ දිනයක අවශ්‍යතාවය කොමියුනිස්ට් ජාත්‍යයන්තරයට යෝජනා වන්නේ 1910දීය. කාන්තාව සමාජ බලවේගයක් ලෙස බලමුළු ගන්වන සහ ඇගේ ශක්තිය විදහාලන දිනයක් ලෙස වාමාංශික අරුතින් එදින ක්‍රියාකාරකම් පෙලගැස්වේ.

මෙවරද ජාත්‍යන්තර කාන්තා දිනය වෙනුවෙන් ශ්‍රීලංකාව තුලද පැවැති විවිධ ක්‍රියාකාරකම් අතර ජාතික ජන බලවේගය නායකත්වයෙන් කාන්තාව මුහුණ දෙන ගැටළු මෙන්ම රටේ පොදු ජීවන ප්‍රශ්න අරඹයාද, පවතින මේ අසාධාරණ ක්‍රමයට එ⁣රෙහිව කාන්තාව සංවිධානය කිරීම අරමුණු කොට ගෙන දැවැන්ත උද්ඝෝෂණ දීපව්‍යාත්ත ලෙස විශාල කාන්තා සහභාගිත්වයෙන් සාර්තකව සිදුවිය.

~කලුතර~

~බදුල්ල~

~මහනුවර~

~අනුරාධපුර~

(-Colombo, March 07, 2024-)

අපේ රටේ ආර්ථික අර්බුදය කාලයක් තිස්සේ කඩා වැටෙමින් තිබූ ක්‍රියාවලියක ප්‍රතිඵලයක්. මේ විදිහට බංකොලොත්භාවයට පත්වුණේ අහම්බයක් නිසා නොවෙයි. දශක ගණනාවක් තිස්සේ ක්‍රමානුකූලව කඩා වැට්ටූ ආර්ථිකයක, සමාජයක සහ දේශපාලන සංස්කෘතියක අවසානය තමයි මේ. මේ විශාල අර්බුදකාරී අවස්ථාවක් වගේම අලුත් දිශාවකට රට පරිවර්තනය කරන්නත්, අලුත් ඉතිහාසයක් ආරම්භ කරන්නත්, අවස්ථාවක් අපට ලැබී තිබෙනවා. මෙවැනි අර්බුද හරහා ජනතාවට ලැබෙන අත්දැකීම්වලින් අලුත් සමාජයක් ගොඩනැගිය හැකි වෙනවා. කඩා වැටුණු ගමන් මාර්ගය ගැන හොඳින් හිතලා අලුත් වෙන්න අවස්ථාවක් ලැබී තිබෙනවා. මේ රටේ පුරවැසියන්ගේ මැදිහත් වීමෙන් රට වෙනස් මාර්ගයකට ගන්න අවස්ථාව ලැබී තිබෙනවා.

එහෙම බලනකොට අද අපිට ආර්ථික ක්‍රම දෙකක් අතර තෝරා ගැනීමක් කරන්න සිදුවී තිබෙනවා. අපේ ජීවිත යම්තම් ගැටගහගෙන යන්න හැකියාවක් තිබෙනවා නම්, මොකක් වුණත් කමක් නැහැ, වගේ මත දරමින් මැද ඉන්න බැහැ. පැහැදිලිවම තෝරා ගැනීමක් කරන්න වෙනවා. ප්‍රජාතන්ත්‍රවාදී රටක් තුළ දියුණු වෙන්න නම්, පාලකයන් සහ පුරවැසියන් අතර, සමාජ සම්මුතියක් අවශ්‍යයි. අපි මහජන නියෝජිතයන් පත්කරන්නේ බලාපොරොත්තුවක් එක්ක. ඒ බලාපොරොත්තුව ඉටුකරාවි යැයි විශ්වාසයක් ඇතිවයි. නමුත් අද ඒ සම්මුතිය මුළුමනින්ම බිඳ වැටිලා. පාලකයන් දිහා, රජයේ යාන්ත්‍රණය දිහා, දේශපාලනය දිහා බලන්නේ අවිශ්වාසයෙන්. ඒ තුළින් සිදුවන්නේ තවත් මිනිසෙක් දිහාත් අවිශ්වාසයෙන් බැලීම වැඩිවීමයි. මිනිස් සම්බන්ධතා අතිශයින්ම දුර්වල තැනට වැටිලා. දේශපාලන, ආර්ථික පමණක් නොවෙයි සමාජ පැවැත්මට අවශ්‍ය සියලුම ක්ෂේත්‍රවලට මෙය බලපා තිබෙනවා. විශේෂයෙන් අධ්‍යාපනයට එය තදින් බලපා තිබෙනවා.

මේ අධ්‍යාපනයෙන් ලබාගත හැකි දේ පිළිබඳ දරුවන්ටවත් දෙමාපියන්ටවත් ගුරුවරුන්ටවත් විශ්වාසයක් නැති තවත් එක් ක්ෂේත්‍රයක් පමණක් බවට පත්වී තිබෙනවා. අධ්‍යපනය සම්බන්ධයෙන් ලොකු දැක්මක් හෝ විශ්වාසයක් නැහැ. පැවති දේශපාලනය විසින් නිර්මාණය කළ තත්වයක් මේක. අධ්‍යාපනය මෙතනින් මුදා ගන්න නම්, පවතින දේශපාලන සංස්කෘතිය සහ ආර්ථිකය මෙතනින් මුදා ගත යුතුයි. ඒ පරිවර්තනය ලෝක ඉතිහාසයේ විප්ලව, ඡන්ද, නිදහස් අරගල හරහා, පාරේ සටන් තුළින් වැනි විවිධ අන්දමින් සිදුවී තිබෙනවා. මැතිවරණයෙන් පත්කර ගන්නා ආණ්ඩුවක් තුළින් මේ පරිවර්තනය කරන්න අපි තෝරාගෙන තිබෙනවා. ඒ නිසා මේ ගත කරන්නේ සුවිශේෂී මොහොතක්. මැතිවරණයක් තුළින් පමණක් එවැනි පරිවර්තනයන් ඇතිකර ගැනීම හරි දුර්ලභයි. නමුත් 2024 කියන්නේ ලංකාවට සුවිශේෂී වසරක්. 2022 ජනතාව තුළින් පැන නැගුණු අරගලයෙන් පස්සේ, අවධිවීමක් හරහා වෙනස් වූ සහ වෙනස් වෙමින් පවතින දේශපාලනික අත්දැකීම් රැසක් සහ අවබෝධයක් ලබාගත් පුරවැසියන්ගේ ශක්තිය සංවිධාන ගතවන ඡන්දදායකයින් එක්ක මේ මැතිවරණයට සූදානම් වෙනවා.

පාර්ලිමේන්තුව තුළද, එයින් පිටද දේශපාලනඥයන්ගේ භාවිතාව පිළිබඳව මිනිසුන් ප්‍රසිද්ධියේ විවේචන ඉදිරිපත් කරනවා. ඔවුන්ට එරෙහිවන්න තවදුරටත් බය වෙන්නේ නැහැ. දියුණු වූ පුරවැසියන් සහ ඒ බව තේරුම් නොගත් පරණ ක්‍රමයම පවත්වාගෙන යන්න උත්සාහ කරන කණ්ඩායමක් වගේම ජනතා අභිලාෂයන් සමග වැඩකරන දේශපාලන ව්‍යාපාරයක් හමුවන සුවිශේෂී මොහොතක් මේක. මාලිමාව කෙරෙහි විශාල ජනතා ආකර්ශනයක් ලැබෙමින් තිබෙන්නේ අලුත් දේශපාලන සංස්කෘතිය තිබෙන නිසයි.

පස්වැනිදා බැසිල් රාජපක්ෂ ලංකාවට පැමිණීම ප්‍රධාන මාධ්‍යවල ප්‍රධාන ප්‍රවෘත්තියක් කරගෙන තිබුණා. නැවත වරක් රට බේරා ගන්න මොළ හතක් තිබෙන චරිතය රටට සම්ප්‍රාප්තවීම පිළිගන්න, බැසිල් රාජපක්ෂව කර උඩ තියාගෙන එනවා වගෙයි ප්‍රචාරය තිබුණේ. නමුත් එහෙම කිසිම දෙයක් සිදුවුණේ නැහැ. බැසිල් රාජපක්ෂ නියෝජනය කරන දේශපාලනය ජනතාවට අදාළ නැති බව තේරුම් ගන්න මේ සිදුවීමම, හොඳටම ඇති. ජනතාව පිළිකුල් කරන දේශපාලනය නියෝජනය කරන සියලු දෙනා වෙනුවෙන් එම ව්‍යාපෘතිය ගෙනයන්න පොරබදන කිහිපදෙනෙක් බැසිල් රාජපක්ෂ පිළිගන්න ගිහින් හිටියා. පුරවැසියන් එතන නැහැ.

ජනතාව ප්‍රතික්ෂේප කළ පුද්ගලයෙක් ජනාධිපති වී රට ගොඩගැනීමේ වීරයා බව ප්‍රකාශ කරමින් සිටිනවා. කෝවිඞ්, වැරදි කෘෂිකාර්මික ප්‍රතිපත්ති, ගෝඨාභය රාජපක්ෂගේ කාලය තුළ නොතිබුණේ නම් රට කඩා නොවැටෙන බව ඔවුන් කියනවා. මේ කඩාගෙන වැටුණු අවස්ථාවේ ගින්දරෙන් මතුවූ වීරයෙක් වගේ රනිල් වික්‍රමසිංහ පැමිණි බව කියනවා. ජාත්‍යන්තර සම්බන්ධතා තිබෙන, ආර්ථිකය පිළිබඳ හසල දැනුමක් තිබෙන රනිල් වික්‍රමසිංහට විකල්පයක් නැති බවත් කියනවා. නමුත් ඇත්ත තත්වය ඊට වඩා හාත්පසින්ම වෙනස්. ආර්ථිකය කඩා වැටීමේ බරපතළම තත්වය ජනතාවට ඇවිත් තිබෙන්නේ දැන්. අධ්‍යාපන ක්ෂේත්‍රයේ උසස් පෙළ පංතිවල විශේෂයෙන්ම ශිෂ්‍යයන් නැතිවීම ප්‍රධාන ගැටලුවක්. මේ රට දාලා යාමේ එකම අරමුණ විතරයි ඔවුන්ට තිබෙන්නේ. අපේ තරුණ කාලයේ අසූතුනේ කළු ජූලිය, යූ.එන්.පී. භීෂණය, යුද්ධය අතරේ අපි හිටියා. එදා තරුණ පරපුරරේ ප්‍රබල මතය රට දාලා යන එක නොවෙයි. ෆයිට් එකක් දීලා රට හදන්න පුළුවන් කියන හැඟීම අපේ පරපුරට තිබුණා. අද තරුණ පරපුරට එහෙම හැඟීමක් වත් ඉතිරි වෙන්න පුළුවන් සමාජයක්, රටක් අද නැහැ. රනිල් වික්‍රමසිංහ යටතේ රට ස්ථාවර වෙනවා කියන විහිළුව කරන්නේ මේ තත්වය තුළ.

තව පැත්තකින් ආහාර අනාරක්ෂිතභාවය, සෞඛ්‍ය අනාරක්ෂිතභාවය, ජන ජීවිතයට ඍජුවම බලපැම් කරමින් තිබෙනවා. ආර්ථිකය ගැන දත්තවලින් කතා කිරීමට වඩා ජනතාවගේ ජීවිතය දෙස යථාර්ථවාදීව බලන්න ඕනෑ. එහෙම බලනකොට මේ ආර්ථිකය ස්ථාවර වී නැහැ. දියුණු වන මාර්ගයක නැහැ. ජනතාවගේ යහපැවැත්ම සුරක්ෂිතවන මට්ටමක නැහැ. අතිශයින්ම අස්ථාවර, කුමණ මොහොතකක කඩා වැටෙයිද, තවත් පීඩාකාරී ක්‍රියාමාර්ග කුමන මොහොතක ගනීද කියන වටපිටාවක් තිබෙන්නේ. ජාතික ජන බලවේගය එවැනි වටපිටාවක මැදිහත් වෙන්නේ එක් එක් ක්ෂේත්‍ර වෙන වෙනම අරගෙන ගොඩදාන්න නොවෙයි. රටට මුලින්ම දැක්මක් සහ ජාතික සැලැස්මක් අවශ්‍යයි. රටක් හැටියට, සමාජයක් හැටියට යා යුත්තේ කොතැනටද, එතැනට යන්න කළ යුත්තේ මොනවාද? ඒ ගමනේදී අධ්‍යාපනය, සෞඛ්‍යය, ආර්ථිකය සම්බන්ධයෙන් වෙන වෙනම වගේම පුළුල් ඒකාබද්ධ ක්‍රියාමාර්ගත් තිබෙන්න ඕනෑ. ඒ වෙනුවෙන් දැනුවත්භාවයෙන් යුතු පුරවැසියන් විශ්වාසයෙන් සහ බලාපොරොත්තුවකින් සම්බන්ධ කර ගැනීමත් මූලිකම කටයුත්තක්.

ජාතික ජන බලවේගය නව පුනරුදයක්, ජාතික වැඩ පිළවෙළක් ගැන කතා කරන්නේ ජනතාව සහභාගී කරගත් සාමූහික ඉලක්ක කරා යායුතු මාර්ගය තෝරාගෙන අපි සියලු දෙනා තම තමන්ගේ කොටස ඉටුකිරීම කළ යුතුයි. අපි සියලු දෙනාටම පැවරී තිබෙන ඒ වැඩ කොටස සැලසුම්කර සමාජගත කරමින් ක්‍රියාත්මක කිරීම දේශපාලන ව්‍යාපාරයක් හැටියට අපගේ වගකීමයි. ගුරු වෘත්තියේ යෙදී සිටින වෘත්තිකයන් වන ඔබටත් පැවරුණු ප්‍රධාන කොටසක් තිබෙනවා. මේ පරිවර්තනයට අවශ්‍ය පුරවැසියෙක් බිහි කරන ප්‍රධානම ආයතනය අධ්‍යාපනයයි. මේ අධ්‍යාපන ක්‍රමය බිහි කරන්නේ රටට අවශ්‍ය පුරවැසියෙක් නොවෙයි. රටේ සංවර්ධනය සහ සමාජ අභිලාෂයන් සමග බද්ධ වූ මානුෂික, කාරුණික සංවේදී සමාජයක් වෙනුවෙන් පුළුල් මානව සම්පතක් බිහිකිරීම අධ්‍යාපනයේ ප්‍රධාන කාර්යභාරය කරගත යුතුයි. විභාග කේන්ද්‍රීය, කටපාඩම් කරන පවතින අධ්‍යාපනයෙන් අපි බලාපොරොත්තු වන දියුණු පුරවැසියන් බිහි වෙන්නේ නැහැ. එයින් බාහිරව දියුණු පුරවැසියන් බිහිකරන අධ්‍යාපනය සැලසුම්කර ක්‍රියාත්මක කිරීම පමණක් වෙනුවට අධ්‍යාපනය, රටේ සංවර්ධනය සහ සමාජ පරිවර්තනයක් තුළින් නව පුනරුද යුගයක් ඇතිකිරීමට ක්‍රියාකාරීව මැදිහත් විය යුතුයි. ඒ සඳහා අපි තවදුරටත් සංවාද කර, අවබෝධයෙන් යුතුව ඔබට පැවරී තිබෙන කොටස වෙනුවෙන් පෙළ ගැසෙන ලෙස ඉල්ලා සිටිනවා.

(-Colombo, March 06, 2024-)

අද (06) පස්වරුවේ ජ.වි.පෙ. ප්‍රධාන කාර්යාලයේදී රටවල් 06ක තානාපතිවරු ජාතික ජන බලවේගයේ නායක අනුර කුමාර දිසානායක සහෝදරයා හමුවූහ.

පලස්තීන රාජ්‍යයේ තානාපති ආචාර්ය Zuhair M.H. Dar Zaid මහතා, තුර්කි ජනරජයේ තානාපතිනි R. Demet Sekercioglu මහත්මිය, බංගලාදේශ ජනරජයේ මහකොමසාරිස් Tareq M.D. Ariful Islam මහතා, ඉන්දුනීසියානු ජනරජයේ තානාපති Dewi Gustina Tobing මහත්මිය, එම තානාපති කාර්යාලයේ ප්‍රධාන කොන්සල් Heru Prayitno මහතා, මැලේසියානු මහකොමසාරිස් Badli Hisham Bin Adam මහතා, සහ මාලදිවයින් ජනරජයේ වැඩබලන තානාපතිනි Fathimath Ghina මහත්මිය යන රාජ්‍යතාන්ත්‍රිකයෝ එම රටවල් නියෝජනය කරමින් මෙම හමුව සඳහා එක්ව සිටියහ.

ජාතික ජන බලවේගය වෙනුවෙන් ජාතික විධායක සභික බිමල් රත්නායක, ජාතික විධායක සභික වෛද්‍ය නලින්ද ජයතිස්ස, ජාතික විධායක සභික වෛද්‍ය රිස්වි සාලි සහ ජාතික විධායක සභික මුදිත නානායක්කාර යන සහෝදරවරුද මේ සඳහා සහභාගි වූහ.

ජාතික ජන බලවේගයේ ප්‍රතිපත්ති සහ ක්‍රියාකාරිත්වය පිළිබඳව මෙහිදී ජාතික ජන බලවේගයේ නියෝජිතයින් විසින් විදෙස් රාජ්‍යතාන්ත්‍රිකයින් දැනුවත් කරන ලද අතර රට තුළ දේශපාලන හා ආර්ථික තත්වය පිළිබඳව දීර්ඝ වශයෙන් මෙහිදී සාකච්ඡාවට බඳුන් විය. එසේම රටවල් සමග අන්‍යෝන්‍ය ගරුත්වය සහ සහයෝගීතාව මත පදනම්ව ගනුදෙනු කිරීමට ජාතික ජන බලවේගයේ ඇති සූදානම පිළිබඳවද මෙම හමුවේදී ජාතික ජන බලවේගයේ නියෝජිතයෝ රාජ්‍යතාන්ත්‍රිකයින්ට පෙන්වා දුන්හ.

මාධ්‍ය හමුව – 2024.03.06 – ජාතික ජන බලවේගය

මාර්තු 08වැනිදාට ජාත්‍යන්තර කාන්තා දිනය යෙදී තිබෙනවා. ඒ සුවිශේෂී දිනය පිළිබඳව ජාතික ජන බලවේගයේ කාන්තාවෝ හැටියට අදහසක් දෙන්න අපට තිබෙනවා. 1910 වැනි අතීතයේදී ඇමෙරිකාව දක්වා ඉතිහාසයක් කාන්තා දිනයට තිබෙනවා. කාන්තාවන්ගේ ඡන්ද අයිතියට අරගල කිරීමේ ප්‍රතිඵලයක් හැටියට විකාශනය වීමෙන් ජාත්‍යන්තර දිනය පසුකාලයක නම් කරනවා. කාන්තාවන්ගේ අරගල ඉතිහාසය, කාන්තාවන්ගේ සුවිශේෂී ගැටලු ආදිය පිළිබඳව මෙහිදී වැඩි අවධානයක් යොමු කරනවා. ලංකාවේ ගැහැනුන් මේ වන විට යම් දෙයක් දිනාගෙන තිබෙනවා නම්, ඒවා ලැබී තිබෙන්නේ ඉතිහාසයේ කළ අරගල නිසයි. 1931 සර්වජන ඡන්ද අයිතිය ලබා ගැනීමේදී වුවත් ඒ කාලයේ සිටි කාන්තාවන් අරගල කර තිබෙනවා. විශේෂයෙන්ම වාමාංශික ඉතිහාසයේ කාන්තාවන් ඉදිරියට ඇවිත් කළ අරගල නිසයි. රට ගොඩනැංවීමට කාන්තාවන් තවදුරටත් ශ්‍රම දායකත්වය දිය යුතු බව ජනාධිපති රනිල් වික්‍රමසිංහ ප්‍රකාශ කර තිබෙනවා. නමුත් ඉතාමත් අමාරුවෙන් ජීවත් වන ලංකාවේ ගැහැනුන්ට තවදුරටත් දෙන්න ඉතිරිවී නැහැ.

අයවැයෙන් කාන්තාවන්ට ළමයින්ට වෙන්කරන මුදල් 50%කින් කපා හැරියා. එයට එරෙහිව ජාතික ජන බලවේගයේ කාන්තාවන් හැටියට පොල්දූව හන්දියේ අපි අරගලයක් කළා. සාමකාමී අරගලයට බියගුලු නායකයන් ජල ප්‍රහාර එල්ල කර, අමානුෂික ප්‍රහාර එල්ල කළා. වසර ගණනාවක් පුරා නිවාසවලට කොටුකර සිටි කාන්තාවන් අද වෙන විට මර්දනයට බිය නොවී ධෛර්යවන්ත විදිහට අරගලවලට එකතු වන්නේ දුෂ්ට පාලකයන් නිසාමයි. විශේෂයෙන්ම දිනෙන් දින උග්‍රවන ණය බර හමුවේ ක්ෂුද්‍ර මූල්‍ය ණයවලට ලංකාවේ කාන්තාවන් විශාල පිරිසක් ගොදුරු වී සිටිනවා. අපි තවදුරටත් මෙහෙම ජීවත්වීම අවශ්‍ය නැහැ. අපේ රටේ කාන්තාවන් නිවාස තුළත් එතනින් පිටත් අසීමිත වෙහෙසවී වැඩ කළත් ජීවත්වීම අසීරුවී තිබෙන්නේ බදුබර දරාගැනීමට නොහැකි වීමෙන්. තමන්ගේ සෞඛ්‍යය ගැන නොසිතා දරුවන්ගේ අධ්‍යාපනයට වියදම් කරමින් තවදුරටත් නිහඬව සිටින්න කාන්තවන් සූදානම් නැහැ. ගැහැනු අපි එක මිටට කියලා ජාතික ජන බලවේගය වටා විශාල කාන්තාවන් පිරිසක් දිනෙන් දිනම එකතු වෙමින් මේ ජඩ දේශපාලනය අවසන් කරන්න ප්‍රබෝධයෙන් ඉදිරිපත්වී සිටිනවා. මාර්තු 08 වැනි දිනට යෙදී තිබෙන කාන්තා දිනය අපි 10 වැනි දින රොද බැඳගෙන සමරන්නේ පවතින දේශපාලන සංස්කෘතිය වෙනස් කරන්නයි.

“තමන්ගේ අභිමානය, ගෞරව රැකෙන එකම වේදිකාව මාලිමාව බව
කාන්තාවන් තේරුම් අරගෙන ඉන්නේ”
-ජාතික ජන බලවේගයේ පාර්ලිමේන්තු මන්ත්‍රී ආචාර්ය හරිනි අමරසූරිය-

මේ වසරේ කාන්තා දිනය ලංකාවේ ඓතිහාසික දිනයක් වන බවට කිසිම සැකයක් නැහැ. කාන්තාවන් සියලුම දෙනා වැඩකරන කාන්තාවන්. ඉතිහාසය පුරාම ඒ අරගල කළ කාන්තාවන් අනුස්මරණය කළා සේම මේ මාර්තු 08 ලංකාවට සුවිශේෂී වන්නේ අපේ ඉතිහාසයේ පළමුවෙනි වතාවට සංවිධානාත්මක දේශපාලනිකව බලමුළු ගන්වමින් අනාගතය පිළිබඳව තීන්දු කිරීමේ බලය ලබාගැනීමට ඉදිරියට එන ප්‍රවණතාවය නිසයි. මාතරින් පටන් ගත් ‘ගැහැනු අපි එක මිටට’ කියන සමුළුවලට පැමිණෙන ගැහැනුන් තවදුරටත් මේ දේශපාලන සංස්කෘතිය සහ ආර්ථික පීඩනය ඉවසිය යුතු නැති බව තේරුම්ගෙන සිටිනවා. ගෞරවාන්විතව, තමන්ගේ අභිමානය රැකගෙන ශක්තිමත්ව ගැහැනුන් හැටියට සාමූහිකව ගෙනඑන වේදිකාවක් තැනෙන තුරු ඔවුන් බලාගෙන සිටි බව අපිට තහවුරුවී තිබෙනවා. ජාතික ජන බලවේගය හැටියට ගැහැනුන්ට නායකත්ව දී ඔවුන් තුළ සැඟවී තිබුණු හැකියාව, දේශපාලන උවමනාව සහ නායකත්වයට වේදිකාව සකස් කර දීමට හැකිවීම පිළිබඳව අපි ඉතාමත් සතුටු වෙනවා. මේ කාන්තා දිනයට ඔවුන් ඉදිරිපත් වන්නේ තමන්ගේ භූමිකාව සහ අනාගතය පිළිබඳව දැනුවත්භාවයකින් යුතුවයි.

යූ.එන්.පී. ආණ්ඩුව එක්දහස් නවසිය අසූ ගණන්වල කාන්තා දිනය තහනම් කර කාන්තා දිනය සමරන්න ආපු ගැහැනුන්ට ප්‍රහාර එල්ල කර, අත්අඩංගුවට ගත් යුගයක් තිබෙනවා. කාන්තා දිනයේ ඇත්ත අරමුණු විකෘති කර, වාණිජ අරමුණු වෙනුවෙන් යොදාගත් ඉතිහාසයක් අපට තිබෙන්නේ. නමුත් 2024 කාන්තා දිනය නැවත වරක් අර්ථවත් කරන්න සංවිධානය වීමේ හැකියාව ලබාගැනීම පිළිබඳව අපි සතුටු වෙනවා. ලාංකික ගැහැනිය ගැන පමණක් නොවෙයි, අපේ සහෝදරත්වය, බැඳීම, සාමූහිකත්වය ලෝකය වටා ඉන්න ගැහැනුන් එක්ක බෙදා ගන්නවා. එවැනි අවස්ථාවක ගාසාතීරයේ අතිශයින්ම ක්‍රෑර, අමානුෂික පීඩාවන්ට පත්වෙන දහස් ගණන් ගැහැනුන් සහ දරුවන් පිළිබඳව අප පෙනී සිටිනවා. ඒ ක්‍රෑරත්වය නවත්වන්න බලය තිබෙන රාජ්‍යයන් නිහඬව සිටින මොහොතක අපි ඔවුන්ගේ අයිතීන් වෙනුවෙන් පෙනී සිටිනවා. යුද්ධය කියන්නේ මනුෂ්‍ය සතා තුළ තිබෙන ඉතාමත්ම ක්‍රෑර, සාහසිකත්වය එළියට එන අවස්ථාවක්. යුද්ධ නැති සාමකාමී ලෝකයක් වෙනුවෙන් අපි පෙනී සිටිනවා. ගාසාතීරයේ සහෝදරියන්ට ළමයින්ට සිදුවන හානිය අවම කරන්න වහාම මැදිහත් වෙන ලෙස ලෝකයෙන් ඉල්ලා සිටිනවා.

“රට පාලනය කරන හොරු එකක මිටට තබා පැරදවීමට ගැහැනු එක මිටට සූදානම්”
-ජාතික ජන බලවේගයේ ජාතික විධායක සභික සමන්මලී ගුණසිංහ-

අපේ රටේ ඉන්න ගැහැනුන්ට සහ ලෝකයේ ඉන්න සියලුම ගැහැනුන්ට දෙන්න පණිවිඩයක් අපට තිබෙනවා. අපි ජීවත් වන ලෝකය දරුවන්ට සහ ගැහැනුන්ට අයිති නැහැ. ආර්ථික, සමාජීය, සහ සංස්කෘතික ලෝකය අපට අහිමිවී තිබෙනවා. නැතිවුණු ඒ ලෝකය ගැහැනුන්ට දිනා ගන්න ලෝකයේම ගැහැනුන් එකට එකතු වී කරන්න අරගලයක් තිබෙනවා. අරගල මාවතේ පමණයි අපේ රටේත් ලෝකයේත් ගැහැනුන් අයිතීන් දිනාගෙන තිබෙන්නේ. 1910දී කෝපන්හේගන් නගරයේ පැවති ලෝක සමාජවාදී නායිකාවන්ගේ දෙවන ජාත්‍යන්තරය අමතා ක්ලාරා සෙට්කින් සහෝදරිය ගැහැනුන් වෙනුවෙන් දිනයක් අවශ්‍ය බව යෝජනා කළා. ඒ දිනය මාර්තු 08 ලෙස නම් කරන්නැයි තවදුරටත් කළ යෝජනාව එදා සිටි සියලුම සමාජවාදී නායිකාවන් අනුමත කළා. 1911 සිට මේ දක්වා වසර 113ක් ජාත්‍යන්තර කාන්තා දිනය සමරමින් සිටිනවා. ඒ බව කියමින් මල්මාලා පැළැඳගෙන පාටි දාන්න ඕන දවසක් නොවෙයි. අපට විශාල අරගලයක් කරන්න තිබෙනවා. විශේෂයෙන්ම 2014දී දේශපාලන පරිවර්තනයක් කර, අලුත් යුගයක් ආරම්භ කරන්න අපට තිබෙනවා. එහි වැඩි කොටස තිබෙන්නේ ජනගහනයෙන් 52%ක් වූ අපේ රටේ කාන්තාවන්ට.

මේ රටේ දේශපාලන සංස්කෘතිය වෙනස් කිරීමේ අරගලයේදී අපට තිබෙන පරමාධිපත්‍ය බලය පාවිච්චි කිරීමේ දැනුවත්භාවය අවශ්‍යයි. මෙතෙක් සිටි පාලකයන් සිතා සිටියේ ඒ ගැහැනුන්ගේ පරමාධිපත්‍යය බලය ලාභයට ගත හැකි බවයි. දේශපාලන වශයෙන් රවටමින්, බොරු කරමින්, මේ දක්වා බලය ලබා ගත්තා. එවැනි ගැහැනුන්ට දේශපාලන අවබෝධය ලබාදෙමින් විශාල පිරිසක් දැනුවත් කරන්න අපි කටයුතු කළා. අපේ රටේ සියලුම ගැහැනුන් මහපාරට බැස අරගල කරමින් මහපාරට බැස ජාත්‍යන්තර කාන්තා දිනය සමරන්න සිදුවී තිබෙනවා. ගැහැනිය කිසි දවසක රවට්ටන්නේ නැති, ගැහැනියගේ හැකියාව සහ බලය ගැන අවබෝධයෙන් දේශපාලනික ගැහැනියක් බවට පත් කළ, ජාතික ජන බලවේගය වටා මේ රටේ සියලුම ගැහැනුන්ට එකතු වෙන ලෙස ආරාධනා කරනවා.

මහ බැංකුව හිස්කරන පාලකයන්ගේ සිට ග්‍රාමීය බැංකුවල සල්ලි සොරකම් කරන ග්‍රාමීය මට්ටමේ හෙංචයියන් දක්වා හොරකම දූෂණය ව්‍යාප්තවී තිබෙනවා. ආර්ථික ඝාතකයන් ලෙස අධිකරණයෙන් නම්කර සිටින රාජපක්ෂලා එක මොහොතක ක්ෂුද්‍ර මූල්‍ය ණය අහෝසි කරන බවට පොරොන්දු වුණා. ඔවුන් එය කඩකළා. ඉන්පසු 2023 අයවැය ඉදිරිපත් කරමින් ජනාධිපති රනිල් වික්‍රමසිංහත් ඒ පොරොන්දුවම දීලා කඩකර තිබෙනවා. මේ නිසා ක්ෂුද්‍ර මූල්‍ය ණය වෙනුවෙන් සිය දිවි නසාගන්න අපේ රටේ කාන්තාවන්ට සිදුවී තිබෙනවා. ක්ෂුද්‍ර මූල්‍ය ණය අහෝසි කරනවා වෙනුවට ග්‍රාමීය බැංකුවල තිබුණු අපේ කාන්තාවන් තැන්පත් කළ මුදල් කොල්ල කෑම දක්වා ගිහින් තිබෙනවා.
අපට අවශ්‍ය මේ හොරුන් එකට තබා පරද්දන්නයි. ඒ වෙනුවෙන් අපේ රටේ ගැහැනුන් සාමූහිකව නැගී සිටිය යුතුයි. ලයිට් බින 400%කින් වැඩිකිරීම නිසා ගෙවල් ලක්ෂ දහයක විතර ලයිට් බිල් ගෙවා ගන්න බැරිව විදුලිය කපාදමා තිබෙනවා. එවැනි තාත්තා කෙනෙක් තමන්ගේ දරුවාට පාඩම් කරන්න අසල්වැසි නිවසකින් විදුලිය ගන්න යාමේදී අනතුරකින් මිය ගියා. විදුලි බල මණ්ඩලයේ සිදුකරන මාෆියාවන් සම්බන්ධව ජනාධිපති සහ ඇමතිවරයා ඇතුළු පාලකයන් වගකියන්න ඕනෑ. කාන්තාවන් අඳුරට පත්කළ විදුලි මාෆියාව අහෝසි කිරීමට ක්‍රියාකරනවා මිස තවදුරටත් සහන බලාපොරොත්තු විය යුතු නැහැ. ඡන්ද කාලයේදී විදුලි ගාස්තු අඩුකිරීම කියන්නේ ප්‍රෝඩාවක් විතරයි. එයට එරෙහිව ආලෝකයක්, ජීවිතයක්, අලුත් රටක් ගොඩනඟන්න ජාතික ජන බලවේගය සමග පෙරට එන්න කියලා ආරාධනා කරනවා. මහපොළොවේ ඉන්න ගැහැනුන් මෙරට ඉතිහාසයේ පළමුවෙනි වතාවට මහ පාරේ අරගල කරන හැටි ඉදිරියේදී බලාගත හැකියි. දෙන සහනයක් ඉක්මනින් ලබාදී ඉවත්ව යන ලෙස අපි මේ පාලකයන්ට අවධාරණය කරනවා.

“මෙතෙක් ආණ්ඩු ගෙන ගිය දූෂිත ගමන වෙනුවට නව මාතක් තොරගන්න
කාන්තාවන් පෙළගැසී තිබෙනවා”
-ජාතික ජන බලවේගයේ ජාතික විධායක සභික සරෝජා සාවිත්‍රි පෝල්රාජ්-

ආර්ථික අර්බුදය එක පැත්තක තිබියදී රනිල් රාජපක්ෂ ආණ්ඩුව ප්‍රජාතන්ත්‍ර විරෝධී ගමනක යෙදී සිටින අතරේ 113වැනි ජාත්‍යන්තර කාන්තා දිනය සමරනවා. මේ රටේ කාන්තාවන් සහ දරුවන් ඡන්ද ව්‍යාපෘතියට යොදා ගනිමින් ඉදිරියට යන්න රනිල් රාජපක්ෂ ආණ්ඩුව උත්සාහ කරනවා. නමුත් මෙතෙක් පැමිණි දූෂිත ගමට තිත තබන්න කාන්තාවන් තීරණය කර අවසන් බව අපි අවධාරණය කරනවා. තමන්ගේ දරුවන්ගේ අනාගතය වෙනුවෙන් අලුත් දේශපාලන ක්‍රමයක් සහ අලුත් දේශපාලන ප්‍රවාහයක් කෙරෙහි ජනතාව විශ්වාස තබා ඇති බව සනාථ වී තිබෙනවා. නිවාසයට පැටවී තිබෙන අසීමිත දරිද්‍රතාවය නිසා අපේ රටේ ලක්ෂ 43ක් වන පාසල් දරුවන්ගෙන් 54%කට අධ්‍යාපනික උපකරණ ලබාගැනීමේ දුෂ්කරතාවයට මුහුණ දී සිටිනවා. ආහාර, ඖෂධ, පාසල් පොත් පත් සහ උපකරණ මත අසීමිත බදු පනවා තිබෙන ආණ්ඩුවට එරෙහිව මුළු රටේම කාන්තාවන් ඒකරාශී කරගෙන මාර්තු 08වැනිදා සෑම දිස්ත්‍රික්කයකම උද්ඝෝෂණ මාලාවක් අපි සූදානම් කර තිබෙනවා. සෑම දිස්ත්‍රික්කයකම දැවැන්ත ජනතා නැගිටීමක් මේ ආණ්ඩුවට එරෙහිව සිදුකරනවා. ඒ වගේම එළඹෙන 10දා කොළඹ දිස්ත්‍රික්කයේ පවත්වන කාන්තා සමුළුව වසර 76ක පාලනය වෙනස් කරන අවස්ථාවක් ලෙසත් යොදා ගන්නවා.

ඒ වගේම අදටත් මේ රටේ ජාතික සමගිය ගොඩනඟා නැහැ. ප්‍රජාතන්ත්‍රවාදය සහ ආර්ථික සාධාරණත්වය ඇති කර නැහැ. අතිමහත් කාර්යභාරයක් ඉටුකරන කාන්තාවන්ගෙන් ශ්‍රම බලකායට දායකත්වය සපයන්නේ 30%යි. සම ශ්‍රමයට සම වැටුප් අයිතිය දීර්ඝ කාලයක් තිස්සේ අපි ඉල්ලා සිටියත් තවමත් ලැබෙන්නේ නැහැ. ගර්භනී මාතාවන්ගෙන් 33%ක් සහ ලක්ෂ 10කට ආසන්න කාන්තාවන් සහ දරුවන් පිරිසක් මන්දපෝෂණයෙන් පෙළෙනවා. මෙතෙක් පවත්වාගෙන ආ පෝෂණ මල්ල ලබාදීමවත් ක්‍රමවත් ලෙස කරන්න අසමත් වුණු ආණ්ඩුව කාන්තාවන්ගේ ආර්ථිකයත්, ප්‍රජාතන්ත්‍රවාදී අයිතීනුත් හකුළමින් ක්‍රියාකරනවා. ශ්‍රේෂ්ඨාධිකරණයෙන් වැරදිකරුවෙකු කළ පුද්ගලයෙකු පොලිස්පති ලෙස පත්කරගෙන ඔන්ලයින් පනත, ප්‍රතිත්‍රස්ත පනත වගේම මාධ්‍ය ආයතන නියාමන පනත වැනි පනත් සම්මත කර ගන්නත් උත්සාහ කරමින් සිටිනවා. ඔවුන්ගේ දේශපාලන බල අධිකාරිය පවත්වාගෙන යාමට දරන මෙම ප්‍රයත්නයන් හමුවේ ගැහැනුන්ට සහ දරුවන්ට සුරක්ෂිතභාවයක් තිබෙනවා දැයි අපි ප්‍රශ්න කරනවා. සමාජ මාධ්‍ය හා ප්‍රධාන මාධ්‍ය තුළත් කාන්තාවන් ඉලක්ක කරගත් හිංසනයත් මුදාහැර තිබෙනවා. මේ තත්වයන් තුළ භාෂණයේ සහ අදහස් ප්‍රකාශ කිරීමේ අදහස, ආර්ථික ප්‍රජාතන්ත්‍රවාදී අයිතිය සහ මූලික මිනිස් අයිතිවාසිකම් දිනාගැනීමට ජාතික ජන බලවේගය නායකත්වය ලබාදෙනවා. ජනතාව වෙනුවෙන් ක්‍රියානොකරන ආණ්ඩුව බදු අයකර ගැනීමට විතරක් අසීමිත ලෙස ක්‍රියාකරන ආණ්ඩුවට තවදුරටත් ජනතාව මුලා නොවෙන බව අවධාරණය කරනවා. මේ රටේ සිටින සෑම ගැහැනියකගේම ගෘහ ජීවිතය තට්ටු මාරු ක්‍රමයකින් උත්තර ලැබෙන්නේ නැහැ. මේ රටට අලුත් යුගයක් උදාකිරීම සඳහා 113වැනි ජාත්‍යන්තර කාන්තා දිනයේදී ක්‍රියාකරන බව අපි අවධාරණය කරනවා.

මාධ්‍යවේදීන් නැගූ ප්‍රශ්නවලට පාර්ලිමේන්තු මන්ත්‍රී ආචාර්ය හරිනි අමරසූරිය පිළිතුරු ලබාදෙමින්

ප්‍රශ්නය: ගිනිගොඩක්ව තිබුණු රට ගොඩගත්තේ ජනාධිපති රනිල් වික්‍රමසිංහ බව පාර්ලිමේන්තුවේදී මීට ටිකවෙලාවකට පෙර ප්‍රකාශ කළා. එය තවදුරටත් ඉදිරියට ගෙනයමින් සිටින බවත් කීවා. ඒ ගැන මොකද කියන්නේ?

පිළිතුරු: අපිට නම් තිබෙන්නේ හිනා වෙන්න විතරයි. ඔහු එය කතාව කරන්නේ මැතිවරණ ව්‍යාපාරයට සූදානම් වෙන්න. ජනතාවගේ ප්‍රශ්න විසඳූ බවට ඔහුට කියන්න බැරි නිසා ඔය බොරු ගොඩක් කියනවා. 2022 මැයි 09දා අගමැති මහින්ද රාජපක්ෂ ඉල්ලා අස්වුණාම අපි ප්‍රතිචාර දැක්විය යුතු ආකාරය ගැන අපි පාර්ලිමේන්තු මන්ත්‍රීවරුන් සමග සාකච්ඡා කරන අතර, රනිල් වික්‍රමසිංහ අගමැති ධුරයට ගෝඨාභය රාජපක්ෂ විසින් පත් කළා. ඊට පස්සේ ජනාධිපති පාර්ලිමේනතුවෙන් තෝරා ගැනීමේ දී ඉදිරිපත් වුණේ ඔහු විතරක් නොවෙයි. තව දෙන්නෙක් ඉදිරිපත් වී සිටියා. අපේ නායක අනුර දිසානායකත් ශ්‍රී ලංකා පොදුජන පෙරමුණේ ඩලස් අලහප්පෙරුමත් ඉදිරිපත් වී සිටියා. පොහොට්ටුවේ සිටි මන්ත්‍රීවරුන්ගේ වැඩි බලයෙන් රනිල් වික්‍රමසිංහ පත්වුණා. ඔහු විතරක් ඉදිරිපත් වුණා කියන එක පට්ටපල් බොරු. ඔහුව පත්කර ගත්තේ පොහොට්ටුවේ ආරක්ෂාව වෙනුවෙන් මිස රට ගොඩගන්න නොවෙයි. ඔය ගිනි ගොඩකින් බේරා ගත්තා කියන එකම බොරු.

රට ගොඩ ගත්තා කීවාට ඇත්තටම සිදුකර තිබෙන්නේ ආර්ථිකය තවදුරටත් සංකෝචනය කිරීමයි. ණය උගුලේ ප්‍රතිඵල නිසා රට බංකොලොත් වුණා. අද ආර්ථික නොහැකියාව තුළ ජන ජීවිත කඩාවැටී තිබෙනවා. ගෙවල් ලක්ෂ 10ක විදුලිය කප්පාදුව ඔහුට පේන්නේ නැද්ද? ළමුන්ගේ පාසල් යාම අඩුවීම ඔහුට පේන්නේ නැද්ද? ආර්ථික අර්බුදයක් විසඳන බව කියා මිනිසුන්ගේ ජීවිත අමතක කර දාන්න අපට බැහැ. ආර්ථිකය ශක්තිමත් කරන්න විශාල කැපවීම් කර තිබෙන්නේ මේ රටේ දුප්පත්ම සහ කිසිම බලයක් නොමැති පුරවැසියෝ. අඩුම තරමේ ඔහු ඒ කැපවීම අගය කරන්න ඕනෑ. විදුලි බලමණ්ඩලය විශාල ලාභයක් ලබා තිබෙන්නේ දූෂණ සහ වංචා නැවැත්වීමෙන් නොවෙයි. මිනිස්සු විදුලියට ගෙවන ගාස්තු විශාල වශයෙන් ඉහළ දැමීමෙන්. මහ පොළොවේ පයගහලා නැති ඔහුට කියන්න කතාවක් අවශ්‍යයි. ඔහුගේ මැතිවරණ ව්‍යාපාරයට කියන ඔවැනි කතා අපිත් මහජනතාවත් කිසිසේත්ම පිළිගන්නේ නැහැ.

ප්‍රශ්නය: බැසිල් රාජපක්ෂ නැවතත් පැමිණීමත් සමග පොහොට්ටුව පිබිදුණා කියලා කතාවක් තිබෙනවා. ඔබලාට අභියෝගයක් වෙයිද?

පිළිතුර: අනේ නෑ. කිසිසේත්ම අභියෝගයකුත් නෑ. අපි නම් මොන පිබිදීමක්වත් දැක්කේ නෑ. එන්න ඉස්සර පෙරහැරකින් ගේනවා කිවා නේද? ඒ පෙරහැරට මොකද දන්නෑ වුණේ. අපි නම් පෙරහැරක් දැක්කේ නෑ. එළියට බැස්සෙත් බොහොම අමාරුවෙන්. ආර්ථික ඝාතකයන්ට මේ රටේ ජනතාවගෙන් එළඹෙන මැතිවරණයේදී නිසි පිළිතුරු ලැබෙයි. ඔය කියන කිසිම දේශපාලනඥයෙක් ජනතාව එක්ක හිටගත්තෙත් නෑ. අදටත් නෑ. ඔවුන්ගේ බලය රැකගැනීම සඳහා උඩතලයේ දේශපාලන ඩීල් දැමීම එකම උපාය මාර්ගය. ජනතාව එක්ක ඇත්ත දේශපාලනය කරන්න ඔවුන්ට හැකියාවකුත් නෑ. තේරෙන්නෙත් නෑ. ඔවුන් තාම හිතන්නේ උඩ ඩීල් දාන්නත්, ජනතාව රවට්ටන්නත් විතරයි. මේ පාර වෙනස, කලින් වගේ ජනතාව රැවටෙන්නේ නෑ. ඔවුන් සියලු දෙනාම එකම වේදිකාවට ආවත් වැඩක් වෙන්නේ නෑ. ඒ දේශපාලන සංස්කෘතිය මේ අවුරුද්දේ අවසන් වෙනවා. ඒක කරන්නේ මේ රටේ ජනතාව.

ප්‍රශ්නය: ඒ දේශපාලන පක්ෂ හැම එකක්ම එකතු වෙලා ජාතික ජන බලවේගය තනිවෙන බව පේනනවා. එහෙම වුණොත් ජයග්‍රහණය කරන්න පුළුවන්ද?

පිළිතුර: එහෙම වුණොත් තවත් ලේසියි. එකතු වුණොත් අපිට හරිම ලේසියි. ජනතාවටත් හරිම ලේසියි. පැරණි ගඳ ගහන, දූෂිත දේශපාලනය වෙනුවට ජනතාවත් සහභාගී වෙන අලුත් දේශපාලනයකට රට ගෙනියන යුගයක් අපි ආරම්භ කරනවා. කණ්ඩායම් දෙක හරියටම බෙදුනම ජනතාවටත් අපිටත් හරිම පහසුයි.