NPP News

(-ජය නියතයි.. ගම අපිටයි.. ගාල්ල ජයග්‍රාහී ජන රැලිය – 2025.04.07-)

පසුගිය සැප්තැම්බර් 21 දින අපේ රටේ එතෙක් තිබූ දේශපාලන ගමනමග වෙනස් කරමින් ජනතාව සුවිශේෂී දේශපාලන තින්දුවක් ගනු ලැබුවා. එය පැරණි අසාර්ථක දේශපාලන කඳවුරු පරාජයට පත් කර පොදු ජනතාව අතට බලය මාරු කරන තින්දුවක්. ඉන් පසුව එම ජයග්‍රහණය තවදුරටත් ශක්තිමත් කරමින් පසුගිය පාර්ලිමේන්තු මැතිවරණයේදී අපිට තවත් සුවිශේෂි ජයග්‍රහණයක් ලබා දුන්නා.

ඒ වගේම මැයි මාසයේ 06 වෙනිදා පළාත්පාලන මැතිවරණය පැවැත්වෙනවා. මෙම මැතිවරණය පැවැත්වීමට යෙදී තිබුණේ 2023 මාර්තු මාසයේදී. නමුත් පැවති රජය මෙම මැතිවරණය කල් දැමුවා. එදා මැතිවරණය කල් දමන විට අපි ජනතාවට ප්‍රකාශ කළා කුඩා ඡන්දය කල් දැමුවට ලොකුම ඡන්දයෙන් අපි ජයග්‍රහණය කරනවා කියලා. එය සත්‍යයක් කරමින් අපි මෙරට දේශපාලනය මුළුමනින්ම හැරවුමකට ලක් කළා.

ඉන්පසුව මෙම පළාත් පාලන මැතිවරණය පැවැත්වීම සඳහා යම් කරුණු කිහිපයක් සම්පූර්ණ කිරීමට සිදුව තිබුණා. මීට පෙර ලබාගත් නාම යෝජනා පත්‍ර අවලංගු කිරීම, පසුව සම්මත කරගෙන තිබු තරුණ නියෝජනය ඇති කිරීමට පාර්ලිමේන්තුවේ අලුතින් පනතක් සම්මත කර ගැනීම කළ යුතුව තිබුණා. මැතිවරණය ඉක්මණින් පැවැත්වීම සඳහා අපේ ආණ්ඩුවේ පළමු සංශෝධන පනත ලෙස පළාත් පාලන මැතිවරණ සංශෝධන පනත සම්මත කළා. ඉන්පසුව මැතිවරණය පැවැත්වීමේ බලය මැතිවරණ කොමිසමට පැවරෙනවා. එම පනත සම්මත කළ දිනයේ සිට ගත් විට අප්‍රේල් 06, 07 වන විට මැතිවරණ පැවැත්වීමට හැකියාව තිබුණා.

අපට අවශ්‍ය කර තිබුණේත් අලුත් අවුරුද්දට පෙර මැතිවරණය පැවැත්වීමටයි. නමුත් විපක්ෂය මැතිවරණ කොමිසමට දැනුම් දුන්නා මැතිවරණය කල් දාන්න කියලා. ඒ අනුව මැතිවරණය මැයි 06 දිනට කල් ගියා.

නමුත් අප පනත සම්මත කර දුන් අන්දමට මැතිවරණ කොමිසම කටයුතු කළානම් අද වන විට පළාත් පාලන මැතිවරණය පවත්වා අවසන්. අපට අවශ්‍ය තවදුරටත් මැතිවරණ පවත්වමින් සිටීමට නොවෙයි, අපි විශාල මුදලක් දිස්ත්‍රික් මට්ටමින් ලබාදී තිබෙනවා. අපි දෙසැම්බර් 31 වන දිනට පෙර එම මුදල්වලින් වැඩ කළයුතුයි. දැන් මැයි 06වන දින දක්වා එම කටයුතු ප්‍රමාද කිරීමට සිදුව තිබෙනවා. නමුත් විපක්ෂය මතක තබාගත යුතුයි මැතිවරණය කල් යාමත් සමඟ ඔවුන්ට දේශපාලන වශයෙන් අසීරු තත්ත්වයකට මුහුණදීමට සිදුවන බව.

ලංකා ඉතිහාසයේ දේශපාලනයේ මෙම මැතිවරණයේදී තරම් පැහැදිළි බෙදීමක් කිසිදිනක සිදුව නැහැ. අද රටේ දේශපාලනය ඉතාමත් තීව්‍රර ලෙස කඳවුරු දෙකකට බෙදී තිබෙනවා. එම කඳවුරු දෙක වන්නේ ජාතික ජනබලවේගය නියෝජනය කරන අපේ ආණ්ඩුව සහ තැන තැන එකතුවී තිබෙන සුන් බුන් ගොඩක්. ඔවුන්ගේ මැතිවරණ වේදිකාව, පාර්ලිමේන්තු ආමන්ත්‍රණය, පාර්ලිමේන්තුවෙන් පිට කියන කතා දෙස බැලූ විට සියලුදෙනාගේම ප්‍රතිවිරෝධය ජාතික ජන බලවේගයට එරෙහි බව තේරෙනවා.

දැන් ජනතාව කළ යුත්තේ සැප්තැම්බර් 21 වනදා අත්පත් කරගත් ජයග්‍රහණය ඉදිරියට ගෙන යාම සඳහා තමන් නියෝජනය කරන දේශපාල කඳවුර ජයග්‍රහණය කරනවාද, එසේ නොමැතිව එම ගමන ආපසු හැරවීම සඳහා එකතු වී තිබෙන සුන් බුන් ගොඩ ඉදිරියට ගෙන යනවාද යන්නයි. පසුගිය ජනාධිපතිවරණයේදී සහ මහ මැතිවරණයේදී මේ රටේ ජනතාව ඉතාමත් තීරණාත්මක ලෙස පැරණි අසාර්ථක දේශපාලන කඳවුරු පරාජයට පත් කළා. එම පරාජයට පත් කර අත්පත් කරගත් ජයග්‍රහණය ඉදිරියට ගෙන යනවාද කියා ජනතාව දැන් තීරණය කළ යුතුයි. අපේ රටේ ජනතාව රට වෙනුවෙන් ඉදිරියට තැබූ පියවර අගලකින්වත් පසු පසට නොතබා එය ඉදිරියට ගෙන යන බවට මා තුළ විශාල විශ්වාසයක් තිබෙනවා.

මේ රටේ නීතියේ ආධිපත්‍ය නිසි ලෙස තහවුරු කිරීමට අපට අවශ්‍යයි. දැන් එවන් රටක් නිර්මාණය වෙමින් තිබෙනවා. මීට පෙර අපේ රටේ නීතිය ක්‍රියාත්මක වුණේ දුබල පිරිසට පමණයි. නීතිය මකුළු දැලක් වගේ තිබුණා. ලොකු අය කඩාගෙන යනවා පොඩි අය අහු වෙනවා. ඒ නිසා දුබල අයට එක නීතියක් සහ බලය තිබෙන එයට එක නීතියක් කියන එක අපි අද වෙනස් කර තිබෙනවා. ලංකා ඉතිහාසයේ කිසි දිනක පොලිස්පතිවරයෙකුට සැඟවී සිටීමට සිදුවුණේ නැහැ. මෙය පළිගැනීමක් නොවයි. අපි එම ආයතනවලට ස්වාධිනත්වය ලබා දී තිබෙනවා. නීතිය නිසි ලෙස ඉටු වෙනවාද නැද්ද යන්න පමණක් අපි පරික්ෂා කරනවා. නමුත් මීට පෙර ආණ්ඩු මැදිහත් වුණේ බලය තිබෙන අය ආරක්ෂා කිරීමටයි. අපරාධ සහ වංචා දූෂණ සිදු කළ අයෙක් වේ නම් තරාතිරම නොබලා නීතිය ඉටුවන රාජ්‍යයක් අපි පළමු වතාවට නිර්මාණය කර තිබෙනවා. ඒ නිසා මේ රටේ ජනතාවට යහපතක් වන, මේ රටේ දුවා දරුවන්ට අනාගතයේ විශ්වාසදායක රටක් ගොඩනඟන කණ්ඩායම ජාතික ජන බලවේගයේ කණ්ඩායම බව සිහිපත් කළ යුතුයි.

එපමණක් නොවෙයි අපි අපේ රටේ දේශපාලන සංස්කෘතියේ වෙනසක් ඇති කර තිබෙනවා. මහජනයාගේ මුදල් සතයක් සොරකම් නොකරන සහ නාස්ති නොකරන පාලනයක් අද ලංකාවේ පළමු වතාවට ගොඩනැගී තිබෙනවා. මේ රටේ ජනතාවගේ මුදල් සොරකම් නොකරන, නාස්ති නොකරන පාලනයක් අපට අවශ්‍යයි.

අපි රට භාරගන්නා විට ආර්ථිකය ඉතාමත් අසීරු තැනක පැවතුණා. නමුත් අපේ රටේ ආර්ථිකය ක්‍රමානුකූලව ස්ථාවර මට්ටමකට ගෙන ඒමට අපි සමත් වුණා. රට තුළ ආර්ථික ස්ථාවර භාවය අති නොකර අපිට කිසිවක් කරන්න බැහැ. ඒ නිසා අපේ පෙළමු ප්‍රයත්නය වුනේ ආර්ථික ස්ථාවරභාවය අති කිරීමයි. අද රට තුළ ඇති වී තිබෙන ආර්ථික ස්ථාවරත්වයේ සංඥා බොහොමයක් තිබෙනවා. අපි පසුගිය දෙසැම්බර් 21 වන දින ණය ප්‍රතිව්‍යුහගතකරණ වැසටහන මුළුමනින්ම අවසන් කළා. ඒ සමගම නිල වශයෙන් අපේ රට බංකොලොත්භාවයෙන් නිදහස් වුණා. ඒ සමගම අතරමඟ නැවතී තිබු විදෙස් ව්‍යාපෘති නැවත ආරම්භ කිරීමට හැකියාව ලැබුණා.

ඒ වගේම ඩොලරයේ අගය රුපියල් 300ට ආසන්න අගයක පවත්වාගැනීමට අපේ ආණ්ඩුව සමත් වුණා. 35%-40% ගිය බැංකු පොලී අනුපාතය අද 10%න් පහළ තනි ඉලක්කමක රඳවා ගැනීමට සමත් වී තිබෙනවා. ඒ අනුව අඩු පොලී අනුපාතයක් යටතේ කර්මාන්තකරුවන්ට, ව්‍යාපාරිකයන්ට ණය ලබා ගැනීමට අවස්ථාව ලැබී තිබෙනවා.

එදා රටේ උද්ධමනය 70% -75%ට ඉහළ ගියා. අද අපි එය අවම අගයක පවත්වාගෙන යාමට සමත් වී තිබෙනවා. අද ආයෝජකයන් ආයෝජනය කිරීම බය නැහැ. සංචාරක කර්මාන්තය තුළ විශාල පිම්මක් ගෙන තිබෙනවා. මේ අනුව අපේ රටේ ආර්ථිකය පිළිබඳ අද ලෝකයේ සියලුදෙනාගේ විශ්වාසය තහවුරු වී තිබෙනවා. මෙහි ප්‍රතිලාභ ජනතාවටද ලැබිය යුතුයි. ඒ වෙනුවෙන් අස්වැසුම ප්‍රතිලාභ වැඩි කිරීම, විශ්‍රාම දීමනාව වැඩි කිරීම, මෑත ඉතිහාසයේ සිදු වූ වැඩිම වැඩිවීමකින් රාජ්‍ය සේවකයන්ගේ මූලික වැටුප වැඩි කිරීම ඇතුළු සාධනීය පියවර ගෙන තිබෙනවා. ඒ අනුව රාජ්‍ය සේවකයන්ගේ වැටුප් වැඩිවීමට රුපියල් කෝටි 33,000ක් වැය කරනවා. මෙම මුදල් යොදවන්නේ කොහොමද කියලා ඇතැමුන් අපෙන් ප්‍රශ්න කරනවා. අපි මේ කටයුතු කරන්නේ මහජනයාගේ හැම සතයක්ම පරිස්සම් කර, යෙදවිය යුතු තැනට නිසි පරිදි යෙදවීමේ ප්‍රතිපත්තිය තුළයි.

අපි අඩු ආදායම්ලාභී පවුල්වල සිසුන් ලක්ෂ 16කට පාසල් පොත් සහ උපකරණ ලබාගැනීම සඳහා රුපියල් 6,000ක දීමනාවක් ලංකාවේ පළමු වතාවට ලබා දුන්නා. ඒ වගේම මහපොළ ශිෂ්‍යාධාරය වැඩි කර තිබෙනවා. පාසල් දරුවන්ට දිවා ආහාර සඳහා ලබාදුන් මුදල වැඩි කළා. මේ අනුව සැම පුරවැසියෙකුම රැක බලා ගැනීමේ වගකීම අපි ඉටු කරමින් සිටිනවා.

විශාල ආර්ථික පරිවර්තනයකින් නොව කුඩා හැරවුමකින් අපි ලබා ගන්නා මුදල් ප්‍රමාණය අපි ක්‍රමානුකූලව ජනතාවගේ සුබසිද්ධිය වෙනුවෙන් වැය කිරීමට පටන් ගෙන තිබෙනවා. අපි එතනින් නතර වී නැහැ මේ වසරේ අපි මිලියන 1400ක් ප්‍රාග්ධන වියදම්වලට වෙන් කර තිබෙනවා. පාරවල්, බෝක්කු, ඇලවේලි හදන්න මේ මුදල් වැය කරනවා. ලංකා ඉතිහාසයේ සංවර්ධන කටයුතු සඳහා වැඩියෙන්ම වියදම් කරන ලද ප්‍රාග්ධන මුදල අපි මෙවර අයවැයෙන් වෙන් කර තිබෙනවා. දෙසැම්බර් 31 වන දිනට පෙර මෙම මුදල් වියදම් කර අවසන් කළයුතුයි. ඒසේනම් නැවත මේ රට වැඩ බිමක් බවට පරිවර්තනය කළයුතුයි. මේ මිලියන 1400 නැවත අපේ රටේ ආර්ථිකයට එක් වුවහොත් අපට එයින්ම 3%-4% ආර්ථික වර්ධන වේගයක් අත්කරගත හැකියි.

ඒ වගේම මේ වන විට භූ දේශපාලනයේ අහිතකර තත්ත්වයක් නිර්මාණය වී තිබෙනවා. අපේ අපනයනවලට යම් බලපෑමක් වන ආකාරයේ තීන්දු තීරණවලට එළැඹ තිබෙනවා. අපි එය විසදා ගැනීමට උපරිම උත්සාහයෙන් යුතුව සාකච්ඡා කරමින් තිබෙනවා. එය විසඳා ගැනීමට ප්‍රයත්න දරණ අතරම එවැන අභියෝගයකට මුහුණ දෙන්නේ කෙසේද කියා අපි සැලසුම් සකස් කර තිබෙනවා.

එය අප අපේක්ෂා නොකරන ලද තත්ත්වයක් වුවද එයට මුහුණ දීමට සිදුව තිබෙනවා. නමුත් අපේ ආර්ථිකය ඉතා හොද ඉදිරි ගමනක් පෙන්නුම් කරමින් තිබෙනවා. ඒ අනුව මේ 2025 වසර ලංකාවේ බොහෝ ක්ෂේත්‍රයන්හි වැඩිම වර්ධන අගයන් වාර්තාවන වසර බවට පත් වෙනවා. එහි පළමුවැන්න ලෙස ලංකාවට වැඩිම සංචාරකයන් පැමිණෙන වසර බවට මේ 2025 වසර පත් වෙනවා. ඒ වගේම ලංකාවේ වැඩිම ප්‍රාග්ධන වියදම් සිදු කරන ලද වසර බවට 2025 වසර පත් වෙනවා. ඒ වගේම ලංකාවේ ආණ්ඩුවක් උපයා ගන්නා ලද වැඩිම ආදායම් උපයා ගන්නා වසර බවට 2025 වසර පත් වෙනවා.

ජාත්‍යන්තරයේ මතුව ඇති එම තත්ත්වය ආණ්ඩුවේ දේශපාලන න්‍යාය පත්‍රයේ හෝ තීන්දු තීරණවල ප්‍රශ්නයක් නොවෙයි. මෙහි මතුව තිබෙන්නේ භූ දේශපාලන ප්‍රශ්නයක්. එම ප්‍රශ්නයට අපි මුහුණදිය යුත් වන්නේ පක්ෂයක් ලෙස නොව ජාතියක් ලෙසයි. ඒ නිසා අපි මේ රටේ සියලු ජනතාවගෙන් ඉල්ලා සිටිනවා මෙවැනි ප්‍රශ්නයක් ඇති වීම වළක්වා ගැනීම සඳහා උපරිමයෙන් මැදිහත්වන අතරම එවැනි ප්‍රශ්නයකට මුහුණදිම සඳහා අපි ජාතයක් ලෙස සුදානම් විය යුතුව තිබෙනවා කියලා. ඕනෑම රටකට තමන්ගේ රටේ තීරු බදු පිළිබඳ තීරණයක් ගැනීමේ අයිතිය තිබෙනවා. අපිට එම අයිතිය බැහැර කරන්න බැහැ. මෙය කිසිසෙත් අපිව ඉලක්ක කළ හෝ අපිව හඹාගෙන ආ දඩයමක් නොවෙයි. පොදුවේ ඇති වූ කරුණක්. එහි යම් අහිතකර තත්ත්වයක් ඇතිවීමේ අනතුරක් අභියස අපි සිටිනවා. මම අද උදෑසනත් ජාත්‍යන්තර මූල්‍ය අරමුදල සමඟ සාකච්ඡා කළා. ජාත්‍යන්තර මූල්‍ය අරමුදල විසින් අපට මේ වසරේ සපුරාගත යුතු ඉලක්ක ලබා දී තිබෙනවා. මතුවී තිබෙන නව තත්ත්වයට අනුරූප වන පරිදි නව මානයන් පිළිබඳ සාකච්ඡා කිරීම සිදු වනු ඇති බවට එහිදී අපේ අවධානය යොමු වුණා. මෙම කටයුතු වෙනුවෙන් අපි උපරිම සහාය ලබා ගන්නවා.

පසුගියදා සිදුවූ ඉන්දීය අග්‍රාමාත්‍යවරයාගේ සංචාරයේදී අපි ආර්ථික වශයෙන් විශාල ජයග්‍රහණ අත්පත් කර ගැනීමට ප්‍රයත්නයක් දැරුවා. කෝටි දාහකට ආසන්න ප්‍රදානයක් මේ වසරේ අපේ රටට ලබාදීමට එකඟතාව පළ කළා. ඒ වගේම සාම්පූර්වල මෙගා වෝට් 120ක විදුලි බලාගාරයක් ආරම්භ කිරීම සිදු කෙරුණා. ඉන්දියාව ඩිජිටල්කරණයේ ඉතා ඉහළ පිම්මක් ලබාගත් රටක්. ඩිජිටල්කරණයේදී අපට සහාය ලබාදීමටත්, නැගෙනර පළාතේ ක්ෂේත්‍ර ගණනාවකට ආධාර සැපයීමට මෙන්ම ඖෂධ නිෂ්පාදනයේදී සහාය ලබාදීමට ඉන්දීය අග්‍රාමාත්‍යවරයා එකඟතාවට පැමිණියා

මේ කිසිවක් අප කරන්නේ පෞද්ගලිකව අපේ ආණ්ඩුව වෙනුවෙන් නොව, මේ රට සුබදායී රටක් බවට පරිවර්තනය කිරීම සඳහායි. ආරක්ෂක ගිවිසුම විශාල ආන්දොලනයකට ලක් කරමින් තිබෙනවා. නමුත් එහි තිබෙන්නේ දැනට සිදුවෙමින් තිබෙන කරුණු. දැනටමත් ඒකාබද්ධ මෙහෙයුම් සහ ඒකාබද්ධ පුහුණුවීම් ක්‍රියාත්මක වෙනවා. මෙම එකඟතාව ඇති කරගත්තේ ඒවා විධිමත් කර ගැනීම වෙනුවෙනුයි. අපි කලාපයේ ආරක්ෂාව සුරක්ෂිත කරගත යුතුයි. එහිදී වඩා හැකියාවක් සහ නිපුණතාවක් තිබෙන රටවල සහාය අප ලබාගත යුතුයි.

පසුගිය හැත්තෑහය වසර තුළ අපේ රට තාක්ෂණික දියුණුවේ හිනිපෙත්තට ගෙන ඒමට මේ රටේ පාලකයන් කටයුතු කළා නම් අපට එසේ නොකර සිටීමට තිබුණා. නමුත් ලෝකය තාක්ෂණය සමග ඉදිරියට යන විට අපි කිසිවක් උකහා නොගත් ජාතියක් බවට පත් වුණා. එසේනම් අප කළ යුත්තේ එම දියුණුව ලබාගත් රාජ්‍යයන්හි සහාය ලබා ගැනීමයි. අපට කිසිවෙකු මිලදී ගන්න බැහැ. අප මේ සියලුදේ කරන්නේ මේ රටේ ජනතාවට මීට වඩා හොද ජීවිතයක් සහ රටට මීට වඩා හොද අභිමානයක් නිර්මාණය කිරීමේ අරමුණන් බව කිවයුතුයි.

54 වැනි අප්‍රේල් විරු සමරුව – අනුරාධපුරය 2025.04.05

අද අපි එකතු වෙලා ඉන්නේ, මීට අවුරුදු 54කට කලින් අද වගේ දවසක, අපේ පංතියට තිබෙන දේශපාලනය කිරීමේ අයිතිය, සංවිධානය වීමට තිබෙන අයිතිය, අලුත් සමාජයක් සඳහා සිහින දැකීමට තිබෙන අයිතිය වෙනුවෙන් කළ දේශපාලනයට බාධා එල්ල වෙනකොට ඊට එරෙහිව සටන් කර දිවි පිදූ පරම්පරාවක සහෝදර සහෝදරියන් අනුස්මරණය කරන්නයි. 1971 අරගලයෙන් පසු සෑම අවුරුද්දකම අපි සිරගතවී සිටියත්, වනගත වී සිටියත් කොතනක සිටියත් අප්‍රේල් 05දා මියගිය සහෝදර සහෝදරියන් සිහිපත් කළා. අපි පොරොන්දු වුණා, සපථ කර ගත්තා ඔවුන්ගේ අරමුණු අපේ ජීවිත කාලය තුළ, ඔවුන් දිවිපිදූ දේශපාලන ව්‍යාපාරය ජයග්‍රහණය දක්වා ගෙනියන බවට.

ඔවුන්ගේ අරමුණු ජයග්‍රහණය කර තිබෙනවා. ඒ නිසා අද විශේෂ දවසක්. ජයග්‍රහණය ශක්තිමත් කරගෙන, රටේ ජනතාවට වඩා හොඳ රටක්, “පොහොසත් රටක්, ලස්සන ජීවිතයක්” හදන්න, 1971 සහෝදර සහෝදරියන්ගෙන් ශක්තිය ධෛර්යය ගන්න අපි ලැහැස්තියි. අපි මේ රට දිනුවා වගේම මේ රට හදන්නත් අපි ලැහැස්තියි කියන සහතිකය අපි දෙනවා. පරාජයට පත්වුණු සතුරන් කෝපයෙන්, දුකෙන් හඬා වැලපෙනවා; අපේ ජයග්‍රහණය බිඳ වැටෙන දවස ගැන සිහින දකිනවා. අපි නිකම් ආණ්ඩුවක් හැදුවා නොවෙයි. මේ රට වෙනස් කිරීම අරමුණු කර ගත්ත, මහා දැවැන්ත දේශපාලන ව්‍යාපාරයක නායකත්වයෙන් විශාලම මහජන ව්‍යාපාරයක් හදලා රට වෙනස් කිරීමේ ගමනක් පටන්ගෙන තිබෙනවා. අලුත් සමාජයක් නිර්මාණය කිරීම අනිවාර්යයක්. ඒ සමාජය නිර්මාණය කරන තුරු අපේ ගමන අත්හරින්නේත්, ආපසු හැරෙන්නේත් නැහැ.

අපි බාරගත්තේ සාමාන්‍ය රටක් නොවෙයි. ආර්ථික වශයෙන් බංකොලොත් කරපු ජනතාවට තුන්වේල කන්න නොතිබුණ, බිංදුවට වට්ටපු රටක්. රට වට්ටපු බලවේගය ඒක අමතක කරලා තිබෙනවා. පාසලේ රැස්වීමෙදි දරුවන් කලන්තෙ දාල වැටුණු රටක්. තෙල් ටිකක් ගන්න පෝලිමේ රස්තියාදු ගහපු, පෝලිමේ මිනිස්සු මැරී වැටුණු කාලයක් පසුකර ඇවිත් තිබෙන්නේ. කන්න නැතිව දරුවන්ට වේල් ගණනක් කරවිල තම්බල දුන්නු දුෂ්කර කාලයක් පසුකර ඇවිත් තිබෙනවා. ඒ නිසා අපට වගකීමක් තිබෙනවා, සතුරටන් වට්ටපු මේ රට ගොඩනගන්න. පරාජයන්, බිඳ වැටීම්, පාවාදීම් සියලු අභියෝගවලට නොසැලී මුහුණ දීලා, මේ ව්‍යාපාරය මහජන ව්‍යාපාරයක් බවට පත්කරලා මේ ජයග්‍රහණය ගේන්න අපි සමත් වුණා නම්, අපේ සහෝදරවරුන්ගේ ශක්තියෙන් ධෛර්ය අරගෙන වට්ටපු රට ගොඩනඟලා ලෝකයේ ඉහළින්ම තිබෙන රටක් බවට පත්කරන බවට සහතිකය අපි දෙනවා.

1970ට කලින් අපි පිළිබඳ විශ්වාසයක් පොදු ජනතාවට තිබුණේ නැහැ. වසර 54කට පස්සේ ඒ ව්‍යාපාරයේ ප්‍රතිපත්ති පොදු ජනතාවගෙන් 60%කට වැඩි ප්‍රමාණයක් පිළිගෙන අපිත් එක්ක ඉදිරියට යන්න අත්වැල් බැඳගෙන තිබෙනවා. සතුරන් කුමන කතා කිව්වත් මේ ගමන ජයග්‍රහණය දක්වා ඉස්සරහට යනවා. 1971 අරගලය, නිදහසෙන් පසුව ඇති වුණු ඉතා වැදගත් සංසිද්ධියක්.

ශ්‍රී ලංකාවේ පැවති පාලනයට, අසාධාරණයට, අයුක්තියට එරෙහිව තරුණ පරපුරේ අවිගත් නැගිටීම තමයි 1971 අරගලය කියන්නේ. ඒ සටනට උරදීපු තරුණ පරපුර අවි ගත්තේ ඇයි? ජනතා විමුක්ති පෙරමුණ බිහි වුණේ 1965 මැයි 14 වැනිදා. එළඹෙන මැයි 14දිනට අවුරුදු 60ක් වෙනවා. අවුරුදු 60 වෙනකොට අපි සමත් වෙලා තිබෙනවා, ජනතාවගේ සහයෝගයෙන් මැතිවරණ දෙකකින් බලයට එන්න. ඒ බලය ඉදිරි මැයි 06වැනිදා පැවැත්වෙන පළාත් පාලන මැතිවරණයෙන් තවදුරටත් තහවුරු කරන බව අපට විශ්වාසය තිබෙනවා. 1965 රෝහණ විජේවීර සහෝදරයා ඇතුළු වාමාංශික අදහස් තිබුණු තරුණ තරුණියන් එකතු වෙලා අලුත් දේශපාලන ව්‍යාපාරයක් ආරම්භ කළා. ඒ වෙන විටත් වමේ දේශපාලන පක්ෂ තිබුණා. 1935 ආරම්භ කළ, සම සමාජ පක්ෂය, කොමියුනිස්ට් පක්ෂය, ලංකාවේ පරණම දේශපාලන පක්ෂ. ඒ පක්ෂ ‘වමේ වැඩේ’ කළේ නැහැ. 1947 එක්සත් ජාතික පක්ෂය, 1952 ශ්‍රී ලංකා නිදහස් පක්ෂය හැදුණා. ඒ පක්ෂ අපේ පංතියේ පක්ෂ නොවෙයි. අපේ රටේ වැඩකරණ ගොවි ජනතාව, පීඩිත ජනතාව අනෙක් පක්ෂවල අතකොලු බවට පත්වෙලා තිබුණා. 1965 අපේ පක්ෂය ආරම්භ කළ රෝහණ විජේවීර සහෝදරයා ඇතුළු කණ්ඩායමේ අයට බලාපොරොත්තුවක් තිබුණා පීඩාවට පත් වුණු ජනතාව ස්වාධීනව පංතියක් ලෙස සංවිධානය කරන්න. අපේ විමුක්තිය සඳහා අපේ පංතිය සංවිධානය කළ යුතුයි. ඔවුන්ට දේශපාලනය කියා දෙමින් එකතු කළ යුතුයි කියන අදහසක් තිබුණා. ඒ අනුව ජනතාවට දේශපාලනය කියා දෙමින් සංවිධානය කිරීමට පටන් ගත්තා. අපේ ව්‍යවස්ථාවේත්, ප්‍රජාතන්ත්‍රවාදී රටවලත් අදහස් පළ කිරීම, සංවිධානය වීම මූලික මිනිස් අයිතියක්. අපේ පංතිය පක්ෂයක් ලෙස වෙනම සංවිධානය වෙන කොටම සතුරන් කලබල වෙලා අපේ අයිතිය උදුරා ගන්න උත්සාහ කළා. අපට අවශ්‍ය වූයේ ජනතාවට දේශපාලන අවබෝධය ලබාදෙමින් ජනතාවගේ සහයෝගයෙන් බලයට ඇවිත් රට වෙනස් කිරීම. ඉතා දුෂ්කරතා මැද්දේ ඉස්සරහට යන විටම මේක මර්දනය කරන්න පටන් ගත්තා. 1969 කොමියුනිස්ට් පක්ෂයේ ඇත්ත පත්තරයේ “සමගි පෙරමුණට පහර ගැසීමට තරුණන් බාගන්නා සී.අයි.ඒ. කෙමනක්” යනුවෙන් ප්‍රවෘති පළ කළා. සතුරා එදා කලබල වුණා. අදත් සතුරා කලබල වෙලා තිබෙනවා.

ඉන්දියානු අගමැති මෝදි ලංකාවට පැමිණීම අද සතුරා “මෝදිට රට පාවා දෙන්න හදනවා” කියමින් අවලාද නගනවා. අපි මේ රටේ විමුක්තිය වෙනුවෙන්, රටේ නිදහස වෙනුවෙන් පාවා දීමට එරෙහිව සටන් කොට දිවි පිදූ පරම්පරාවක්. මේ පාවාදීම්වලට එරෙහිව අපේ ජීවිත පුදා තිබෙනවා. වෙනත් රටක රාජ්‍ය නායකයෙකුගේ පැමිණීම අපට ගෞරවයක්. රටට වාසිදායක වන ලෙස, ආර්ථික, දේශපාලන එකඟතාවලට එකතු වෙන එක රටක් කළ යුතු දේවල්.

එදා අපිව මර්දනය කරන්න ආරක්ෂක අංශ ශක්තිමත් කළා. එහි ප්‍රතිඵලයක් ලෙස කිසිදු හේතුවක් නැතිව, 1970 රෝහණ විජේවීර සහෝදරයා අත්අඩංගුවට ගෙන රක්ෂිත බන්ධනාගාර ගත කළා. අවසානයේ චෝදනා කිසිවක් නැති නිසා නිදහස ලබා, ජනතාව එක්ක දේශපාලය කරන්න පටන් ගත්තා. කොළඹ විද්‍යෝදය විශ්වවිද්‍යාලයේ “සී.අයි.ඒ. කාරයෝ” නමින් දේශනයක් තිබ්බා. ජනතා විමුක්ති පෙරමුණේ මංගල රැළිය තිබ්බේ 1970 අගෝස්තු මාසෙ 10 වැනිදා, හයිඩ් පිටියේදී. අගෝස්තු මාසෙ 12දා එවකට රාජ්‍ය ආරක්ෂක අමාත්‍යාංශයේ ලේකම් ආතර් කුමාර්රාජ් රත්නවේල් පුවත්පත්වලට නිවේදනයක් නිකුත් කළා, “චේ ගුවේරා ව්‍යාපාරය ආණ්ඩුවේ අංක එක් හතුරා වන්නේය. එය හඹාගොස් මුලිනුපුටා දැමිය යුතුය” කියලා. එසේ කියමින් මර්දනය කරන්න පටන් ගත්තා. පෝස්ටර් ගහන අය අල්ලන් යනවා, ප්‍රචාරක වැඩ කරන්න දෙන්නේ නැහැ. අවසාන රැස්වීම 1971 පෙබරවාරි 22දා. තවදුරටත් දේශපාලනය කරන්න බැරි තත්වයක් උදාවෙනවා. මේ මර්දනය නවත්වන්න අපි උත්සාහ ගත්තා. අම්බලන්ගොඩ පාර්ලිමේන්තු මන්ත්‍රී පී. ද එස්. කුලරත්න මහතා මගින් හා ප්‍රින්ස් ගුණසේකර මහතා හරහා මේ සම්බන්ධයෙන් පාර්ලිමේන්තුවේදී කතා කළා. “රටට ආදරය කරන තරුණ කණ්ඩායමක්, ඒගොල්ලන් එක්ක සාකච්ඡා කරලා මේ ගමනට එකතු කරගන්න” කියා ඔවුන් ඉල්ලීම් ඉදිරිපත් කළා. පාලකයන් ඒවාට ඇහුම්කන් දුන්නේ නැහැ. ප්‍රශ්නය බරපතළ වෙන අවස්ථාවේ පක්ෂය තීන්දු කළා මර්දනය බරපතළ නම්, ආත්මාරක්ෂාවට අවි සොයන්න ඕන කියලා. “දණින් වැටී ජීවත් වෙනවාට වඩා දෙපයින් සිට මිය යාම උතුම්” කියලා අපි විශ්වාස කළා. නන්දන වීරසිංහ කවියා “මරණය සුන්දරයි, සත්‍යය වෙත නැමුණු” යනුවෙන් ලිව්වා. ඇත්ත මිනිස්සු එහෙම තමයි.

1971 මාර්තු 06දා ධර්මසේකර කණ්ඩායම ඇමෙරිකන් තානාපති කාර්යාලය ඉස්සරහා බෝම්බයක් පත්තු කරලා පොලිස් නිලධාරියෙක් ඝාතනව කරනවා. ආණ්ඩුව ඒක පාවිච්චි කරලා රටේ හදිසි නීතිය පනවලා ජනතා විමුක්ති පෙරමුණ මර්දනය කිරීමට අවස්ථාවක් කර ගත්තා. 13 වැනිදා රෝහණ විජේවීර සහෝදරයා ඇතුළු කිහිපදෙනක් අම්පාරෙදි අත්අඩංගුවට අරගෙන රැඳවුම් නියෝග මත යාපනයේ රඳවනවා. 16වැනිදා හදිසි නීතිය යටතේ අලුත් නීතියක් ගේනවා, “මළමිනී මරණ පරීක්ෂණයකින් තොරව වැළලීමේ නීතිය”. මෙවැනි නීතියක් ගේන්නේ එක රැයකින් මේ ව්‍යාපාරය විනාස කරන්න.

1971 අරගලයට පදනම වැටෙන්නේ මේ ආකාරයෙන්. 1971 සිදුවුණේ කැරැල්ලක් නොවෙයි. මර්දනයට එරෙහිව ඇති වූ සන්නද්ධ ප්‍රතිචාරයක්. එය ක්‍රියාවක් නොවෙයි, ප්‍රතික්‍රියාවක්. කිසියම් වරදක්, වරදක් වෙන්නේ ඒ මොහොතේ තිබෙන නීතියට පමණයි. 1972දි අතීතයට බලපාන ලෙස නීති හැදුවා. ඒක බරපතළ වරදක්. අපරාධ යුක්ති කොමිෂන් සභාව යනුවෙන් කොමිෂමක් හැදුවා. මහ රැජිනගේ ආණ්ඩුවට එරෙහිව ක්‍රියා කිරීම, මහ රැජිනගේ ආණ්ඩුව බියවැද්දීම හා අවි එකතුකිරීම යන චෝදනා තමයි තිබුණේ. 1948 අපට නිදහස ලැබුණා කිව්වත් අපට නිදහස ලැබුණේ නැහැ. අපේ රටේ නායිකාව වුණේ එංගලන්තයේ මහ රැජිණ. රෝහණ සහෝදරයා සාක්ෂියේදි කිව්වා. ආණ්ඩුව පැත්තෙන් මර්දනයක් ආවා, 1970 අගෝස්තු මාසයේ 12 වැනිදා රාජ්‍ය ආරක්ෂක අමාත්‍යාංශයේ ස්ථිර ලේකම් ආතර් රාජ්කුමාර් රත්නවේල් කොමිෂම හමුවට ගෙන එන ලෙසට. අපි අහන්න ඕනෑ අරවගේ ප්‍රකාශයක් කළේ ඇයි කියලා. ඒ වන විට ඔහුව ප්‍රංශයේ තානාපති කර යවා තිබුණා. 1971 අරගලය කියන්නේ පුද්ගලයෙකුගේ හිතුවක්කාරකමක් හෝ ඕපපාතික එකක් නොවෙයි. ප්‍රජාතන්ත්‍රවාදී ලෙස දේශපාලනය කරපු, ජනතාව සංවිධානය කරපු, අලුත් සමාජයක් ප්‍රාර්ථනා කළ, තමන්ගේ දේශපාලනය කිරීමේ අයිතිය වෙනුවෙන් කටයුතු කිරීම වෙනුවෙන් දක්වපු ප්‍රතිචාරයක්.

මෙහි විශේෂත්වය වන්නේ ඔවුන් සටන් වැදුණේ තමන් වෙනුවෙන් නොවීම. අපි ජීවත් වෙන සමාජයේ ආකාරය වී තිබුණේ ප්‍රතිලාභ නැති නම් කිසිවක් නොකර සිටීම. තමන්ගේ එකම වස්තුව වන ජීවිතය පොදු ජනයාගේ යහපත වෙනුවෙන් පුදකරන්න පුළුවන් කියන පරපුර, අපේ රටේ පළමුවන පරපුර තමයි 1971 පරපුර. එහෙම පක්ෂයක මිනිස්සු අපි. ඔවුන්ට ලොකු විශ්වාසයක් තිබුණා. ඒ නිසා තමයි රෝහණ සහෝදරයා කිව්වේ “අප මරා දැමුවද, අප නඟන හඬ සදා නොමියෙනු ඇත.” කියලා. ඒ වගේම “මිනිස්සු සිරගත කරන්න පුළුවන්, නමුත් අදහස් සිරගත කරන්න බැහැ” කියලා රෝහණ සහෝදරයා කිව්වා. අපේ සහෝදරවරු මිය යන මොහොතෙත් “ජනතා විමුක්ති පෙරමුණට ජයවේවා” කියමින් තමයි මිය ගියේ. අනුරාධපුර, නොච්චියාගම රත්නායක සහෝදරයා, බද්දේගම කමල බන්දු සහෝදරයා එවගේ ශ්‍රේෂ්ඨ විදිහට දිවි පිදූ අය. පවිත්‍ර අරමුණක් නැත්නම් එහෙම සටන් කරන්න යන්නේ නැහැ. අපි දිවි පිදුවත් මේ සටන ජයග්‍රහණය කරනවා කියන විශ්වාසය ඔවුන් තුළ තිබුණා. ඒ විශ්වාසය ආවේ 1971 අරගලයෙන්. මේ සටන ජයග්‍රහණය කළ හැකියි යන විශ්වාසයේ, සුබවාදී අදහස සිරගෙවල්වල බිත්තියේ

“පිපි මල් පරව විසිරී ඇත දෙරණ මත – විහිදූ සුවඳ ඉදිරියටත් මියෙණු නැත
ඔපවත් කරන්නට ඒ සුවඳ අපරිමිත – නිම් නැති තරම් පිබිදෙන්නට කැකුළු ඇත”
මේ විදිහට කවියෙන් ලිව්වා.

මේ ව්‍යාපාරය අපේ රටේ පාලනය බලය හොබවන ව්‍යාපාරය බවට පත්කරන්න පුළුවන් වුණේ මේ විශ්වාසය නිසයි. ලංකාවේ පළවැනි වෘත්තිය විප්ලවවාදියා වුණේ රෝහණ විජේවීර සහෝදරයා. අපි ඉතා දුෂ්කරතා මැද්දේ මේ ගමන ආවේ. අපේ ක්‍රියාකාරී සහෝදරවරු සැතපුම් ගණන් පයින් ගියා. වේල් ගණන් බඩගින්නේ හිටියා. එක ඇඳුම ඇඳගෙන හිටියා. සල්ලි සොයා ගන්න තිස්සමහාරාම බස් නැවතුම් පොළේ රෝහණ විජේවීර සහෝදරයා මුට්ට කරගැහුවා. මෙවැනි පක්ෂයක් ලෝකයේ නැහැ. 1971 පරපුර, දරා ගැනීම සඳහා විශ්වාසය අපට දුන්නා. අපි ජනතාවත් එක්ක අරමුණක් වෙනුවෙන් සටන් කරන්න, රට වෙනුවෙන් කැපකිරීමේ ආදර්ශය අපට දුන්නා.

එදා ජයග්‍රහණය වෙනුවෙන් කැපකිරීම් කළා වගේම මේ රට ගොඩනැගීම සඳහාත් අපි කැපකිරීම් කරන්න ඕනෑ. කලින්ට වඩා කැප කිරීමක්, දරා ගැනීමක්, විශ්වාසයක්, සටන්කාමිත්වයක් අද අපෙන් ඉල්ලා සිටිනවා. 1971 දිවි පිදූ සහෝදර සහෝදරියන්ගෙන් ඒ ආදර්ශ අපට ගන්න පුළුවන්. රුසියානු කියමනක් තිබෙනවා “හොඳ දෙයක් වෙනුවට හොඳ දෙයක් කරන්න කාටත් පුළුවන්ය. එහෙත් නරක දෙයක් වෙනුවට හොඳ දෙයක් දිය හැක්කේ ධෛර්ය සම්පන්න මිනිසුන්ට පමණි” කියලා. අපට නරකම රටක් වෙනුවට, බිඳවට්ටපු රටක් වෙනුවට හොඳ රටක් හදන්න සිදුවෙලා තිබෙනවා. මෙය කළ හැකි ධෛර්ය සම්පන්න, විශ්වාසය තිබෙන එකම දේශපාලන ව්‍යාපාරය මේ ව්‍යාරයයි. අපව පරදවන්න බැහැ. බොක්ෂිං ශූර, මොහොමඩ් අලි කිව්වා “බොක්ෂිං ක්‍රීඩාවේදී පරදින්නේ වැටුණම නොවෙයි, වැටිලා නැගිටීම ප්‍රතික්ෂේප කළ විටදී” කියා. අපි ඔප්පු කර තිබෙනවා වැටුණත් නැගිටීමට හැකි ශක්තියක් අපට තිබෙනවා කියලා.

අද ලෝකය වෙනස් වෙලා. තාක්ෂණය, විද්‍යාව, ජන මාධ්‍ය දියුණු වෙලා. තොරතුරු හුවමාරුව වේගවත් වෙලා. උපකරණ පරිහරණය කරන, දැනුම පරිහරණය කරන තරුණ පරපුරක් බිහිවෙලා. අපි හමුවේ තිබෙන වගකීම තමයි මේ රට ගොඩනඟන එක. බල ව්‍යුහයේ බිම් මට්ටමේ ආයතන තමයි පළාත් පාලන ආයතන. ඒ පළාත් පාලන ආයතන කලින් ලබාගත් ඡන්ද ප්‍රතිශතයට වඩා වැඩි ඡන්ද ගණනකින් අපි ජයග්‍රහණය කරන්න ඕනෑ. ඒ අධිෂ්ඨානයෙන් අපි වැඩ කරන්න ඕනෑ. සමාජයක් වෙනස් කරන්න ජනතා බලය අවශ්‍යයි. ජන වරම අවශ්‍යයි. එකතු කළ හැකි සියලු දෙනා මේ ව්‍යාපාරයට එකතු කර ගෙන මේ ව්‍යාපාරය පුළුල් කර ගන්න ඕනෑ.

අපට බාධා ගොඩක් තිබෙනවා. අලුත් බලවේග ආවාම, පැරණි බලවේග කිසියම් කාලයක් යන තෙක් ප්‍රතිවිරෝධයන් දක්වනවා. ඒක සංවර්ධනයේ ස්වභාවය. දේශපාලනයේත්, කලාවේත්, ආගම්වලත්, විද්‍යාවේත් ඒක පවතිනවා. ඉතාලියේ විද්‍යාඥ බෲනෝ හා ගැලීලියෝ ගැලිලි ලෝකය ගෝලාකාර බව සොයා ගන්නවා. ලෝකය ගෝලාකාර බව සත්‍යයක්. නමුත් අසත්‍ය පිළිගත් අය, සත්‍යයට එරෙහිව වැඩ කළා. අවසානයේ ආගමික ආයතන මැදිහත් වෙලා සත්‍ය සොයාගත් බෲනෝව පුච්චා මරා දැම්මා. ගැලීලියෝ ගැලිලි සිරගත කළා. ඒත් බාධා මැද්දේ සත්‍යය ඉස්සරහට ආවා. ආගම පැත්තෙන් බැලුවත් එහෙම සිදුවෙලා තිබෙනවා.

සිදුහත් කුමාරයා අලුත් දහමක් සොයා ගත්තා. පැරණි බමුණු දහමට ඒකෙන් පහර වැදුණා. බුදුහාමුදුරුවන් මරන්න කුමන්ත්‍රණ කළා. අපහාස කළා. එසේ නමුත් බුදු දහම ඉස්සරහට ආවා. ක්‍රිස්තියානි ආගමටත් එහෙම වුණා. අලුතින් බිහිවෙන දේට, ටික කාලයක් ප්‍රතිවිරෝධයක් දක්වනවා. අපි අලුත් ආණ්ඩුවක් හැදුවා හොඳ සමාජයක් හදන්න. පැරණි අය අහිමිවී ගිය ස්වර්ගය නැවත දිනා ගන්න දැන් සටන් කරන්න පටන් අරගෙන තිබෙනවා. අපි ලබා ගත් ජයග්‍රහණය ඒ අයගේ අවලාදවලට නවත්වන්න බැහැ කියන එක අපි ඔප්පු කර පෙන්නමු. ඒ ගොල්ලන්ගේ අවලාදවලට අපේ ගමන නවත්වන්න බැහැ. අපේ අරමුණු ජයග්‍රහණය කරන තුරු පසු බසින්නේ නැහැ කියන සහතිකය අපි දෙමු. ඒ සඳහා 1971 අරගලයේ ධෛර්යය, අපි ගනිමු.

අපි පාර්ලිමේන්තු විශ්‍රාම වැටුප අහෝසි කළා, අනීතික ලෙස සොයා ගත් වත්කම් රජයට පවරා ගන්න අලුතින් පනතක් සම්මත වෙනවා. දැන් වාහන පර්මිට් නැහැ. පරණ සොරකම් අල්ලන්න පටන්ගෙන තිබෙනවා. වැරදි කරලා ගැලවෙන්න බැරි ආණ්ඩුවක් තිබෙනවා. ඔවුන්ගේ වරප්‍රසාද අහිමි වෙලා තිබෙනවා. ඒ නිසා ඔවුන් කලබල වෙලා තිබෙනවා. අපි අපේ රටේ දේශපාලන සංස්කෘතිය වෙනස් කළා. අද මුළු ලෝකයම පිළිගන්නවා ලංකාවේ වංචා, දූෂණ නැති පාලනයක් තිබෙනවා කියලා. පගා නොගන්න මන්ත්‍රීවරු ඉන්න අදූෂිත පාලනයක් තිබෙනවා. අපේ රටේ දේශපාලනඥයෝ ජනතාව දුක් විඳිද්දී ජනතා බදු මුදල්වලින් වරප්‍රසාද බුක්ති වින්දා. ඇමතිවරුන්ට, නිවාස දෙන එක නැවැත්වුවා. ඒවායේ ලයිට් බිල්, වතුර බිල් ගෙව්වේ මහජන සල්ලිවලින්. ඇමතිවරුන්ගේ මන්ත්‍රීවරුන්ගේ වරප්‍රසාද ගොඩක් කප්පාදු කරගෙන ඒවා ජනතාවට ලබා දුන්නා. කලින් හිටියේ එහෙම අයද. ජනාධිපති නිල නිවස, විශ්‍රාම ඇමති වැටුප, නිල නිවාස ගත්තා, සොරකමත් කර ගත්තා. අපි ඒ කිසිවක් ගත්තේ නැහැ. සරල, සැබෑ ස්වේච්ඡා මහජන සේවකයෙක් නිර්මාණය කර තිබෙනවා. වංචා දූෂණ නැති පාලනයක් නිර්මාණය කළා. අපි ආදර්ශ දී තිබෙනවා. නීතිය සියල්ලන්ටම සමානයි. පිළිවෙළක් ඇතිව, අරමුණක් සහිතව මේ සමාජය වෙනස් කිරීමේ ගමනක් පටන්ගෙන තිබෙනවා. ප්‍රතිඵල ගෙනත් තිබෙනවා. ඒ වගේම ජනතාවට සහන ලබාදී තිබෙනවා. මේ රට ගොඩනැගීමට අවශ්‍ය පදනම දමා තිබෙනවා. ජනතාවට සහන දීමට පටන්ගෙන තිබෙනවා. අපි වෙනස්කම් ගොඩක් කළා. මන්ත්‍රීවරු, ඇමතිවරු පාරෙ යද්දි ඉස්සර වගේ දූවිලි අවුස්සාගෙන, ආරක්ෂා මැද්දේ යන්නේ නැහැ. අපි එහෙම අය හදලා තිබෙනවා. එහෙම කැපකිරීමේ දේශපාලනය කළ හැකියාව තිබෙන්නේ අපේ ව්‍යාපාරයට විතරයි.

අපි “පොහොසත් රටක්, ලස්සන ජීවිතයක්” හදන්න ඕනෑ. ඒ සඳහා ධෛර්යය අවශ්‍යයි. දැනුම අවශ්‍යයි. විශ්වාසය අවශ්‍යයි. ඒ සඳහා ශක්තිය ගත හැක්කේ 1971 අරගලයෙන්. දිවි පිදූ අය වෙනුවෙන් කළ හැකි ලොකුම දේ තමයි ඒ අයගේ අරමුණු, බලාපොරොත්තු ඉටුකිරීම. අපි සියලු දෙනාම එකට එකතුවෙලා සහෝදරත්වයෙන්, විශ්වාසයෙන්, සංවිධානාත්මකව බැඳිලා මේ සියලු අභියෝග පරාජයට පත්කරමින් රට ගොඩනඟන්න ඕනෑ. ඒ ගොඩනැගීමේදී තමන්ට, අපට කිසිවක් බලාපොරොත්තුව නොවෙයි, මේ පක්ෂය හදන්න කැප කළා වගේම මේ රට හදන්නත් ඒ කැප කිරීම කරන්න ඕනෑ. ඒ ආදර්ශය 1971න් ගන්න අපි ලැහැස්තියි. කලින් වගේම කැපකිරීම් කරලා අපි හොඳ රටක් වෙනුවෙන්, 1971 සහෝදරවරු මිය යන මොහොතේ හඬගා කිව්ව ප්‍රාර්ථනාව අපේ දෑත්වලින් ඉටුකරනවා. ඒ වෙනුවෙන් හැම කැපකිරීමක් කරන්න අපි ලැහැස්තියි. පරිත්‍යාගයට අපි ලැහැස්තියි. අපි පසුබසින්නේ නැහැ. ආපසු හැරෙන්නේ නැහැ. මේ ජයග්‍රහණය අපි ඉස්සරහට අරගෙන යනවා කියන අධිෂ්ඨානයෙන් අපි වැඩ කරන්න ඕනෑ. ජනතාවට අතරට යන්න, කතා කරන්න ඕනෑ. කැපකිරීමේ ආදර්ශය, පරිත්‍යාගයේ ආදර්ශය, සමාජයක් වෙනුවෙන් වැඩ කිරීමේ ආදර්ශය ලබාදී සමාජය ආත්මාර්ථකාමිත්වයෙන් මුදවලා සැබෑ මිනිසුන් ජීවත් වෙන මානවවාදී සමාජයක්, මානව ගුණධර්ම සහිත සමාජයක් බවට පත්කරන්න අපි සියලු දෙනාම එක්ව වැඩ කරන්න ඕනෑ. ඒ සඳහා ඔබ හැමදෙනාටම ශක්තිය ධෛර්ය ප්‍රාර්ථනා කරනවා.

1971 සගයෙක් සතුරා අවලාද නගනකොට, ලිව්ව කවියක් ඉදිරිපත් කරමින් මම ඔබගෙන් සමු ගන්නවා.
ගමන යන මග තිබේ හෙළිවී අදිරදේ මර ගී ගයද්දී
සටන මොට කොට නවත්තන්නට ඇතැම් අය මග අවුර වද්දී
ගැයෙන නිවහල් ගීතිකාවෙන් සහස් දන කැළ පිබිද එද්දී
බුරන බල්ලන් ඔහෙ බුරද්දෙන් සොයුර අපි යමු පෙරට ඇද්දී

(-‘ජය නියතයි – ගම අපිටයි’ පළාත් පාලන රැලි මාලාවේ මොනරාගල දිස්ත්‍රික් ජන රැලිය, බුත්තල නගරය – 31.03.2025-)

රට අත්පත් කර ගන්නා ජයග්‍රහණ ප්‍රාදේශීය සභා මගින් ගමට එන එන බවත් ඒ සඳහා බය සැක නැතුව මුදල් වෙන් කළ හැකි හොඳ ප්‍රාදේශීය යාන්ත්‍රණයක් අවශ්‍ය බවත් ජනාධිපති අනුර කුමාර දිසානායක සහෝදරයා ප්‍රකාශ කළේය.

ජුනි මස 02ට පෙර ප්‍රාදේශීය සභා පිහිටුවිය යුතු අතර ජූලි – අගෝස්තු වන විට සිය යෝජනා මධ්‍යම ආණ්ඩුවට ලබා දිය යුතු බව පැවසූ ජනාධිපතිවරයා ඒ අනුව ගමට අවශ්‍ය මුදල් නොවැම්බර් මස වන විට ලබා දීමට සූදානම් බවද පැවසීය.

ජනාධිපති අනුර කුමාර දිසානායක සහෝදරයා මෙම අදහස් පළ කළේ, “ජය නියතයි ගම අපටයි” ජයග්‍රාහී ජනතා රැලි මාලාවේ බුත්තල නගරයේදී ඊයේ (31) පැවති ජන රැලියට එක්වෙමිනි.

එහිදී වැඩිදුරටත් අදහස් දැක් වූ ජනාධිපති අනුර කුමාර දිසානායක සහෝදරයා මෙසේද පැවසීය.

ජනාධිපති මැතිවරණය, මහ මැතිවරණය දෙකම ජයග්‍රහණය කිරීමට ජාතික ජන බලවේගයට හැකියාව ලැබුණා. ඊළඟට මැයි මස 06 වැනිදා පැවැත්වෙන පළාත් පාලන මැතිවරණයෙන් පළාත් පාලන ආයතන 10ම ජයග්‍රහණය කරන බවට කිසිදු සැකයක් නැහැ. මේ රටේ ජනතාවට එළැඹෙන ඕනෑම මැතිවරණයදී ජාතික බලවේගය හැර තෝරා ගන්න දේශපාලන ව්‍යාපාරයක් තවදුරටත් නැහැ. එනිසා මේ රටේ අනාගතය, ජනතාවගේ අනාගතය වෙනුවෙනුත් එය භාර ගැනීමට මේ රටේ ගොඩනැඟී තිබෙන එකම දේශපාලන ව්‍යාපාරය ජාතික ජන බලවේගය පමණයි.

මේ රටේ ජනතාව දීර්ඝ කාලයක් තිස්සේ පැවති පාලකයන්ගෙන් බලය අත්පත් කර ගැනීමට විවිධ ආකාරයෙන් උත්සාහ ගත්තා. නමුත් ඒ අය විවිධ අවලාද, අසත්‍ය තොරතුරු, මැර කණ්ඩායම් වැනි බොහෝ දේවල් යොදමින් බලය තමන්ගේ අතේ දිගු කාලයක් තබා ගැනීමට සමත් වුණා. එමඟින් අවසන් ප්‍රතිඵලය වුණේ රට බංකොලොත් වීම පමණයි. ඔවුන් රටට කළ හැකි සියලු පන්නයේ විනාශයන් සිදු කළා.

ඊට ප්‍රතිපක්ෂව ඔවුන් හැදුණා, වැඩුණා.ඒ වගේම ඔවුන් ගෙවල්, පෙට්‍රල් ෂෙඩ්, බාර් ලයිසන් ගත්ත ආකාරය ගැන අද හෙළිවෙමින් තිබෙනවා. ගෙවල් ගිනි ගත්තා කියා සල්ලි ගත්ත හැටිත් ඉදිරියේ හෙළි වෙයි. තණමල්විල ජනතාව මැර බලයට බිය නොවී ජාතික ජන බලවේගය ජයග්‍රහණය කිරීමට මැදිහත් වුණා. එවැනි විශාල කාර්යභාරයක් සිදු කරමින් හදාගත් ආණ්ඩුවක් තමයි අද තිබෙන්නේ. මේ ආණ්ඩුව වට්ටන්න බැහැ. වට්ටන්න කෙනෙක් ඇත්තෙත් නැහැ. අපි මේ රට ගොඩනඟලා තමයි ආපසු හැරෙන්නේ.

ඉතා කුඩා කාලය තුළ මෙතෙක් හැදුණු කිසිදු ආණ්ඩුවකටත් වඩා අපි රට වෙනුවෙන් සහ ජනතාව වෙනුවෙන් විශාල වැඩ කොටසක් සිදුකර තිබෙනවා. රටක් ආර්ථිකමය වශයෙන් මෙන්ම අස්ථාවර නම් රටක් ඉදිරියට ගෙන යන්න බැහැ. මේ මාස 6 ඇතුළත අපි රට ආර්ථිකමය වශයෙන් ස්ථාවර කර තිබෙනවා. දිගු කාලයක් පොලිය තනි ඉලක්කමක පවත්වාගෙන යෑමට සැලසුම් කර තිබෙනවා. අස්ථාවර වී තිබූ ආර්ථිකය නිසා නතර වී තිබූ විදෙස් ව්‍යාපෘති 76ක ප්‍රමාණයක් යළි ආරම්භ කිරීමට පියවර ගෙන තිබෙනවා.

රටේ බැංකු කේෂ්ත්‍රය කෙරෙහි විශ්වාසය ඇති විය යුතුයි. රට ස්ථාවර කිරීම තුළින් අද යළිත් රටට ආයෝජකයන් පැමිණෙමින් තිබෙනවා. කොළඹ නගරයේ පමණක් විශාල ව්‍යාපෘති වෙනුවෙන් ඉඩම් 15ක් හඳුනාගෙන තිබෙනවා. ආයෝජකයන්ට රට කෙරෙහි විශ්වාසය ඇති කර තිබෙනවා. කොමිස් නොමැතිව ආයෝජකයන්ට සිය ව්‍යාපෘති ආරම්භ කිරීමේ පරිසරය අප විසින් ඇති කර තිබෙනවා. අඩු මිලට විදුලිය ගන්නවා හැරෙන්න කලින් ආණ්ඩු වගේ වැඩි මිලට විදුලිය මිලදී ගන්න අප කටයුතු කරන්නේ නැහැ.

අයවැය ලේඛනයකින් ඉතිහාසයේ වැඩිම මුදලක් මාර්ග, බෝක්කු, ගොඩනැඟිලි ඇතුළු ඉදිකිරීම්වලට විශාල මුදලක් වෙන් කළ පළමු අයවැය මෙයයි. අපි සල්ලි තිබුණත් වැඩ කිරීමට ප්‍රමාණවත් රාජ්‍ය නිලධාරීන් නැහැ. රාජ්‍ය කේෂ්ත්‍රයේ ඉහළ යාන්ත්‍රණය ශක්තිමත්ව තිබුණත් කාර්යක්ෂම රාජ්‍ය සේවයක් වෙනුවෙන් අලුතින් රාජ්‍ය සේවයට 30,000ක් බඳවා ගැනීමට තීන්දුවක් ගත්තා. රජයේ රැකියාවක් ලබා ගැනීමට දේශපාලකයා පසුපස ගිය යුගය අවසන් කර තිබෙනවා. අපට මේ රට හදන්න නම් ශක්තිමත් රාජ්‍ය සේවයක් අවශ්‍යයි.

රාජ්‍ය සේවයට උපරිම වැටුප් වැඩි කිරීමට සමගාමීව මන්ත්‍රීවරුන්ගේ විශ්‍රාම වැටුප අයින් කරනවා. ලබා දෙන ලක්ෂ 10 රක්ෂණාවරණය ලක්ෂ 2 1/2 දක්වා අඩු කළා. වාහන පර්මිට් නැහැ. ඉන්ධන කෝටාව අඩකින් අඩු කර තිබෙනවා. අපි දේශපාලන නායකයන් වශයෙන් මේ රට ගොඩනැඟීමට ආදර්ශයක් ලබාදී තිබෙනවා. කලින් මීට පෙර මන්ත්‍රීවරුන් මන්ත්‍රී වැටුපත්, විශ්‍රාම වැටුපත් අරගෙන තිබෙනවා.

අඩු ආදායම්ලාභීන්ට ලබා දෙන දීමනා වැඩි කිරීමට පියවර ගෙන තිබෙනවා. ජුනි මාසයේදී පවුල් ලක්ෂ 4කට අලුතින් අස්වැසුම ප්‍රතිලාභ ලබාදීමට කටයුතු කරනවා. රාජ්‍ය සේවකයන්ට වැටුප් වැඩි වී තිබෙනවා, විශ්‍රාමිකයන්ට ලබා දෙන දීමනාව වැඩි කර තිබෙනවා. අස්වැසුම ප්‍රලාභී දීමනාව වැඩි කර තිබෙනවා. නමුත් මේ කිසිදු ප්‍රතිලාභයක් නොලැබෙන ලක්ෂ 8ක පමණ පිරිසක් මේ රටේ සිටිනවා. මේ අවුරුද්දේ ඔවුන්ටත් පන්දහසක් වටිනා අත්‍යවශ්‍ය ආහාර ද්‍රව්‍ය මල්ලක් රුපියල් 2500කට ලබා දෙනවා. ඒ වගේම අපේ පාසල් දැරියන් වෙනුවෙන් සනීපාරක්ෂක තුවා මේ අප්‍රේල් මාසයේ සිට ලබා දීමට තීන්දුවක් අප ගත්තා. ආණ්ඩු තිබිය යුත්තේ ජනතාව බලා ගැනීමටයි. මෙහෙම ආණ්ඩු කලින් තිබුණද?

ගොවීන්ට ලබාදුන් පොහොර සහනාධාරය 25,000ක් දක්වා වැඩි කළා. ඉදිරියේදී කුඹුරුවල අතුරු බෝග වගා කරන ගොවීන්ට මේ යල කන්නයේ සිට රුපියල් 15,000ක පොහොර සහනාධාරයක් ලබාදීමට කටයුතු කරනවා. වීවලට සාධාරණ මිලක් අප ලබා දී තිබෙනවා. මේ යල කන්නයේදී මොණරාගල දිස්ත්‍රික්කයේ සෑම කුඹුරුක්ම වගා කිරීමට අවශ්‍ය පියවර ගෙන තිබෙනවා. මෙතැනින් එහාට අප රට ගෙනියන්න නම් අපේ දරුවන්ට අලුත් ආර්ථික අවශ්‍යතා සැපිරිය යුතුයි. මේ රට හදන්න නම් විදෙස් විනිමය ඉපැයීමට අවශ්‍යයි. සංචාරක කර්මාන්තයෙන්, අපනයනයෙන්, විදෙස්ගත ශ්‍රමිකයන්ගෙන් රටට ඩොලර් ලැබෙනවා. අපට තවදුරටත් අවශ්‍ය වන ඩොලර් ප්‍රමාණය ඉපැයීමට සැලසුම් සකස් කළ යුතුයි.

පිටරටට යන ඩොලර් නතර කිරීමට නම් අපට නිෂ්පාදනය කළ හැකි සෑම දෙයක්ම ෂ්පාදනය කළ යුතුයි. වී වගා කළ හැකි සෑම බිම් අඟලකම වී වගා කරන ලෙස අප ජනතාවගෙන් ඉල්ලා සිටිනවා. පොල් වගාව වැඩිදියුණු කිරීමට පොහොර සහනාධාර ලබාදීමට වැඩපිළිවෙළක් සකස් කර තිබෙනවා. රුපියල් ලක්ෂ 5000ක් උතුරේ අක්කර ගණනාවක පොල් වගා කිරීමට වෙන් කර තිබෙනවා.

සීනි ආනයනය කිරීමට විශාල වශයෙන් ඩොලර් අප වැය කරනවා. පැලවත්ත සීනි සමාගම පමණක් වැට් බදු ඇතුළු ණය පමණක් රුපියල් කෝටි 394ක් ගෙවන්න තිබෙනවා. අද වන විට පැලවත්ත සීනි කර්මාන්තය කඩා වට්ටවා තිබෙනවා. සීනි නිෂ්පාදන වියදම වැඩි වෙලා තිබෙනවා. එවැනි තත්ත්වයක් තුළ රටින් 190 ට සීනි කිලෝවක් ගේන්න පුළුවන්. අපි පාරිභෝගිකයන් ගැන සිතා නිෂ්පාදනය කරනවාට වඩා සීනි ආනයනය කිරීම ලාභයි. මෙහෙම කර්මාන්ත පවත්වාගෙන යන්න පුළුවන්ද? අපිට කඩාවැටුණු ආයතන ගොඩනඟන්න කාලයක් දෙන්න.

සේවක ප්‍රශ්නය සාධාරණව විසඳන ගමන් නැවත සීනි සමාගම ලාභ තත්ත්වයට පත් කිරීමට අප සැලසුම් කර තිබෙනවා. මේ සමාගම් නිසා අපි තවත් ණය විය යුතුද? මේ සමාගම්වල වත්කම් අඩුයි.ණය වැඩියි. මේ සමාගම් කාර්යක්ෂම කරමින් මේ පළාතේ තරුණ තරුණියන්ට රැකියා අවස්ථා උදා කර දෙනවා. හොරකම්, වංචා දූෂණ මේවාට හේතු වෙලා තිබෙනවා.

සංචාරක කර්මාන්තයෙන් රටට ඩොලර් ලැබෙන ප්‍රමාණය වැඩියි. 2025 වසර වැඩිම සංචාරකයන් පැමිණෙන වසර බවට පත් වෙනවා. දැනටමත් මාර්තු මස 30 වන විට ලක්ෂ 6කට වැඩි ප්‍රමාණයක් ඇවිත් තිබෙනවා. ලක්ෂ 30ක් ඉක්මවන සංචාරකයන් පිරිසක් මේ වසර අවසන් වීමට පෙර පැමිණෙනවා. සංචාරක කලාපයක් විදිහට පැලවත්ත සංවර්ධනය කිරීමටත් බලාපොරොත්තු වෙනවා. සංචාරක කර්මාන්තය වැඩිදියුණු කිරීමට යටිතල පහසුකම් සංවර්ධනය කිරීමට අප පියවර ගනිමින් සිටිනවා. කටුනායක ගුවන් තොටුපළ කාර්යක්ෂම කිරීම එහි ප්‍රමුඛතම කාර්යයක්.

භාණ්ඩ හා සේවා අලෙවි කිරීම තුළින් වැඩිම අපනයනය ආදායම උපයා ගන්නා වසර 2025 වසර බවට පත් වෙනවා. 2030 වන විට ඩොලර් බිලියන 36ක අපනයනය ආදායමක් ඉලක්ක කරගෙන අප සැලසුම් සකස් කර තිබෙනවා. ඒ වගේම විදෙස්ගත ශ්‍රමිකයන් වැඩිම ඩොලර් ප්‍රමාණයක් එවන වසර බවට 2025 වසර බවට පත් වෙනවා. මේවා හොඳ නැද්ද? යළි කිසි දිනෙක 2021,2022 – 2023 වසරවල ඇති වුණු තත්ත්වයට රට තුළ ඇතිවීමට ඉඩ දෙන්නේ නැහැ.

මධ්‍යම ආණ්ඩුවේ සැලසුම් ගමට පැමිණිය යුතුයි. රට අත්පත් කර ගන්නා ජයග්‍රහණ ගමට ඒමට නම් ප්‍රාදේශීය සභාව අවශ්‍යයි. එකිනෙකට පෙළගැසුණු ප්‍රාදේශීය සභාව භාර දිය යුත්තේ ජාතික ජන බලවේගය තිබෙන ආණ්ඩුව පැත්තට නෙමෙයිද? ඊළඟ අයවැය අප නොවැම්බර් මාසයේ ඉදිරිපත් කරනවා. ඒ වෙනුවෙන් අප ජුනි මාසයේ සිට යෝජනා ලබා ගන්නවා. එහිදී ගමේ ප්‍රාදේශීය දේශපාලන අධිකාරිය මධ්‍යම ආණ්ඩුවට යෝජනා ලබා දිය යුතුයි. අයවැය ඉවර වෙන කල් ඡන්දය කල්දාන්න විපක්ෂය ශ්‍රේෂ්ඨාධිකරණයට ගියා. නමුත් මැයි මස 06 ට මැතිවරණය දිනය කල්වැඩියි. අපට තිබෙන්නේ ඡන්ද පවත්ව පවත්වා ඉන්න නෙමෙයි. ජුනි මස 02 ට පෙර ප්‍රාදේශීය සභා පිහිටුවිය යුතුයි. ජූලි අගෝස්තු වන විට සිය යෝජනා මධ්‍යම ආණ්ඩුවට ලබා දිය යුතුයි. එහිදී අවශ්‍ය වන මුදල් නොවැම්බර් මස වන විට ලබා දෙන්නම්.

මම උතුරු පළාතට ගිය අවස්ථාවේ දිස්ත්‍රික් සංවර්ධන කමිටු සාකච්ඡාවේදී යෝජනාවක් ආවා උතුරු පළාතේ අබලන් වූ මාර්ග හදන්න සල්ලි අවශ්‍යයි කියලා. ඒ අබලන් මාර්ග හදන්න මෙවර අයවැයෙන් අප ලක්ෂ 5000ක් වෙන් කළා. දැන් ඔවුන්ට තිබෙන අභියෝගය තමයි මේ දෙසැම්බර් මස වන විට මේ ලක්ෂ 5000 වියදම් කරලා පාරවල් හදන්න එක.එයට ප්රාුෙද්ශීය සභාවේ, නගර සභාවේ සහාය අවශ්‍යයි. අනුරාධපුරයට ගියාම රාජාංගණය වැව, නාච්චදූව වැව, හුරුළු වැව ඇතුළු වාරිමාර්ග පද්ධති නවීකරණය කිරීමට සල්ලි අවශ්‍යයි කිව්වා. ඒවා අලුත්වැඩියා කිරීමටත් අය වැයෙන් ලක්ෂ 3000ක් වෙන් කළා. නමුත් පසුව එහෙන් කතා කරලා ලක්ෂ 3000 වැඩියි, ලක්ෂ 2000ක් ඇතියි කියා මහා භාණ්ඩාගාරයට කියා තිබෙනවා. මම සියලුම දිස්ත්‍රික් ලේකම්වරුන් කැඳවලා දිස්ත්‍රික්කවලට වෙන් කර තිබෙන සල්ලි ප්‍රමාණය කිව්වා. සියලුම දිස්ත්‍රික්කවල වැඩ කටයුතු මේ දෙසැම්බර් මස අවසන් වීමට පෙර අවසන් කළ යුතු බවට දැනුම් දුන්නා. ඒ වගේම අමාත්‍යාංශවල ලේකම්වරුන් ද කැඳවා ඒ වැඩ කටයුතු ද දෙසැම්බර් මස 31 වැනිදාට පෙර අවසන් කළ යුතු බවටත් දැනුම් දුන්නා.

දැන්, සල්ලි තියෙනවා, වැඩ ඉවර කරන්න ඕන. ඒකට ගමේ ශක්තිමත් යාන්ත්‍රණයක් අවශ්‍යයි. මීට පෙර ලක්ෂ 10ක් යන පාරකට ලක්ෂ 20ක් දාන්න ඕන. දැන් ලක්ෂ 10ක් දුන්නොත් ඇති. ඉස්සර වගේ දෙගුණයක් වැඩ කරන්න පුළුවන් එදා සල්ලිවලට. හැබැයි මේ සැරේ සල්ලිත් වැඩි වෙලා තිබෙන නිසා වැඩ කටයුතු හොඳට කරන්න පුළුවන්. අපට බය නැතුව සල්ලි වෙන් කරන්න පුළුවන් හොඳ ප්‍රාදේශීය යාන්ත්‍රණයක් අවශ්‍යයි. වෙන කවුරු හරි ප්‍රාදේශීය සභාවක බලය අරගෙන යෝජනා එව්වොත් අපට එකින් එක බලන්න වෙනවා. එහෙම වුණොත් මුදල් වෙන් කරන්න බැහැ. අපට විශ්වාස කණ්ඩායමක් පත් කරලා එවන්න. මීට පෙර පාලකයන් සිදු කර තිබෙන වැඩ හැටියට වෙන කණ්ඩායම් ගැන අපට විශ්වාසයක් නැහැ.

වසර 76කට පසුව මහජනතාවගේ මුදල් හොරකම් නොකරන ආණ්ඩුවක් අද නිර්මාණය කර තිබෙනවා. ඉස්සර රස්සාවක් ගන්නම් දේශපාලනඥයන්ට කීයක් හරි දෙන්න ඕන. පාරක් හදන කොටත් ඇමැතිගේ ගෙදරටත් කීයක් හරි යනවා. අපට තොරතුරු ලැබෙමින් තිබෙනවා රාජ්‍ය නිලධාරීන් ද වංචා දූෂණවලට නිරත වන බවට. එහෙම වුණොත් වෙන්නෙ බොහොම අමාරුවෙන් හොයා ගත්ත රස්සාව ඉතා කෙටි දවසකින් අහිමි වීම පමණයි. අපි රට හැදිය යුත්තේ එහෙම නෙවෙයිද? පොලිස් දෙපාර්තමේන්තුවේ, රේගු දෙපාර්තමේන්තුවේ නිලධාරීන් කිහිප දෙනෙකු ද මේ වන විට දූෂණ වංචා හේතුවෙන් ගෙදර යවා තිබෙනවා. දේශපාලන අධිකාරිය හොරකම් කර කර, රාජ්‍ය නිලධාරීන්ට හොරකම් කරන්න එපා කියන්න බැහැ. අපි ඒ යාන්ත්‍රණය නිවැරදි ලෙස සකස් කර තිබෙනවා. යළිත් දූෂිතයන්ට කිසි දිනෙක ආණ්ඩු හදන්න ඉඩ දෙන්නේ නැහැ. මධ්‍යම ආණ්ඩුවේ හොරකම් අවසන් කර තිබෙනවා. මීට පෙර වැඩියෙන්ම ගසාකෑ ගමේ ප්‍රාදේශීය සභාවත් අපට පිරිසිදු කරලා දෙන්න.

ඇයි වංචනිකයන්ට, දූෂිතයන්ට නඩු පවරන්නේ නැහැ කියන ප්‍රශ්නය තවමත් අහනවා. වංචනිකයන්ට දූෂිතයන්ට දඩුවම් දීමේ බලය ආණ්ඩුවට නැහැ. පරීක්ෂණ පවත්වලා, නඩු ගොනු කිරීමෙන් දඩුවම් ලබාදීම අධිකරණයෙන් සිදුවිය යුතුයි. අපි ඒ සඳහා සම්පූර්ණ ස්වාධීන බලය අදාළ ආයතනවලට ලබාදී තිබෙනවා. එවැනි වංචනිකයන් සහ දූෂිතයන්ට එරෙහිව නඩු ගොඩක් අද වන විට පවරා තිබෙනවා. හිටපු පාලකයන්ට අයත් සෙවනගල, කතරගම නිවාසවලටත් ඉදිරියේදී නඩු ගොනු වෙයි. පාස්කු ප්‍රහාරයේ, ක්‍රිෂ් ගනුදෙනු පරීක්ෂණ ඉදිරියටත් ක්‍රියාත්මක වෙනවා. මේ වන විටත් හිටපු ඇමැතිවරුන් තිදෙනෙක් රිමාන්ඩ්. එක් කෙනෙක් හැංගිලා. බලමු කොතරම් කාලයක් හැංගිලා ඉන්නවද කියලා. හිටපු පොලිස්පතිවරයාත් රිමාන්ඩ්. රට, බලය, තනතුරු, ධනය, ගැන නොසිතා කටයුතු කළ අයට එරෙහිවත් නීතිය ක්‍රියාත්මක වන රටක් අද නිර්මාණය කර තිබෙනවා.

(-දෙයියන්දර ජන හමුව – 30.03.2025-)

රට තුළ ස්ථාවර ආර්ථිකයක් නිර්මාණය කිරීමේ ගමන ආරම්භ කිරීමට ජාතික ජන බලවේගයේ ආණ්ඩුවට හැකිවූ බවත්, යළි ආර්ථිකය කඩා වැටීමට කිසිසේත් ඉඩ නොතබන බවත් ජනාධිපති අනුර කුමාර දිසානායක සහෝදරයා ඊයේ (30) දෙයියන්දර පැවති ජන හමුව අමතමින් අවධාරණය කළේය.

දූෂණයෙන්, වංචාවෙන් තොර ආණ්ඩුවක් පළමුවරට නිර්මාණය කර ගැනීමට ජනතාවට හැකිවූ බව පෙන්වා දුන් ජනාධිපතිවරයා පුරවැසියා ලබාදෙන සෑම බදු මුදලක්ම ජනතාව වෙනුවෙන්ම වෙන් කරන බවද ප්‍රකාශ කළේය.

ජනාධිපති අනුර කුමාර දිසානායක සහෝදරයා මේ අදහස් පළ කළේ පළාත් පාලන මැතිවරණයේදී ජාතික ජන බලවේගයේ ජයග්ර හණය තහවුරු කෙරෙන ජන රැලි මාලාව අතරතුර අතිවිශාල ජන සහභාගිත්වයකින් ඊයේ (30) දෙයියන්දරදී පැවති ජන හමුව අමතමිනි.

ජන රැලිය ඇමතූ ජනාධිපති අනුර කුමාර දිසානායක සහෝදරයා වැඩිදුරටත් මෙසේද පැවසීය.

මේ රටේ පැවති පාලනය වෙනස් කර රට නව මඟකට හැරවීමට පසුගිය ජනාධිපතිවරණයේ දී ජනතාව කටයුතු කළා. එසේම ලංකා ඉතිහාසයේ ගොඩ නැගුණු පරතිබලතම පාර්ලිමේන්තු බලය සහිත ආණ්ඩුව පසුගිය මහ මැතිවරණයේදී ජනතාව විසින් නිර්මාණය කර දුන්නා. දැන් එළැඹ තිබෙන්නේ පළාත් පාලන මැතිවරණයයි. එහිදීද මේ රටේ ජනතාව නිවැරදි තීන්දුවක් ගත යුතුව තිබෙනවා.

මේ වන අපේ ආණ්ඩුවට මාස 06ක් ගත වී තිබෙනවා. මේ කෙටි කාලය තුළ අපි රට විශාල පරිවර්තනයකට ගෙනවිත් තිබෙනවා. රටේ පුරවැසියාගේ නිදහස තහවුරු කිරීමට මෙන්ම රාජ්‍ය සේවකයාට, ආයෝජකයාට, ව්‍යාපාරිකයාට මේ සියලුදෙනාට නිදහසේ වැඩ කරන්න පුළුවන් පසුබිම අපි නිර්මාණය කර දී තිබෙනවා.

ඒ වගේම අපි අපේ රටේ දේශපාලන සංස්කෘතිය මුළුමණින්ම පරිවර්තනයකට ලක් කර තිබෙනවා. රටට අවශ්‍ය වංචාව, දූෂණය හා නාස්තියෙන් තොර පාලනයක්. ඒ පාලනය ජාතික ජනබලවේගය විසින් අද රට තුළ ස්ථාපිත කර තිබෙනවා. අපේ ආණ්ඩුවේ කිසිදු මන්ත්‍රීවරයෙකුට හෝ ඇමතිවරයෙකුට රුපියලක වංචාවක් පිළිබඳව ඇඟිල්ල දිගු කරන්න බැහැ. අපි මේ රටේ ජනතාවගේ මුදල් සතයක්වත් සොරකම් නොකරන, නාස්ති නොකරන ආණ්ඩුවක් ගොඩනගා තිබෙනවා. එය වැදගත් දේශපාලන පරිවර්තනයක් බව කිව යුතුයි. එදා මේ රටේ පැවතුණේ මොන වගේ පාලනයක්ද කියලා ජනතාව දන්නවා. එදා දේශපාලඥයන් විශාල ධනස්කන්ධයකට හිමිකම් කිවුවේ මුදල් උපයලා නොවෙයි. මහජන දේපළ සොරකම් කරලයි. අපි එම දේශපාලන සංස්කෘතියට තිත තබා තිබෙනවා. අලුත් රටකට – අලුත් මාවතකට තිබෙන මාර්ගය එයයි.

ඒ වගේම වංචා දූෂණ කළ අයට දඬුවම් දිය යුතුයි කියා ජනතාව තුළ විශාල බලාපොරොත්තුවක් තිබෙනවා. දඬුවම් ලබාදීමේ බලයක් ආණ්ඩුවකට නැහැ. නමුත් එම වංචා දූෂණ පිළිබඳ පරීක්ෂණ කිරීමට අල්ලස් හෝ දුෂණ කොමිෂන් සභාව සහ අපරාධ පරීක්ෂණ දෙපාර්තමේන්තුව තිබෙනවා. එම පරීක්ෂණ මත හෙළිදරව් වන කරුණු අනුව නීතිපති දෙපාර්තමේන්තුවට මහාධිකරණයේ නඩු ගොනු කළ හැකියි. එම නඩු ගොනු කිරීමෙන් පසුව අපගේ කාර්යභාරය අවසන් වෙනවා. ඉන් පසුව එම නඩුව නිසි පරිදි විභාගයට ලක් කර අදාළ දූෂියන්ට දඩුවම් දීම අධිකරණයේ කාරයභාරයයි.

අපි රජයක් ලෙස අපේ කාර්යභාරය ඉටුකරමින් සිටිනවා. ඒ අනුව පරීක්ෂණ විශාල ප්‍රමාණයක් මේ වන විට දියත් කර තිබෙනවා. වංචා දූෂණ පිළිබඳ පමණක් නොවයි, පාස්කු ප්‍රහාරය පිළිබඳ පවා පරීක්ෂණ ඉතා විධිමත්ව දියත් වෙමින් තිබෙනවා. මෙම අප්‍රේල් 21 වනදාට පෙර ඊට වගකිවයුතු කණ්ඩායම් පිළිබඳ හෙළිදරව් කිරීමට අපරාධ පරික්ෂණ දෙපාර්තමේන්තුව උත්සාහ කරමින් සිටිනවා.

මේ වන විටත් හිටපු ඇමතිවරු තිදෙනෙක් රිමාන්ඩ් භාරයේ සිටින බව ඔබ දන්නවා. හිටපු එක් ඇමතිවරයෙක් සැඟවී සිටිනවා. හිටපු පොලිස්පතිවරයෙක් රිමාන්ඩ් භාරයේ සිටිනවා. මොවුන් රාජ්‍ය සේවකයන් ගස් බැඳ, නීති වීරෝධී ලෙස ඉඩම් අල්ලාගෙන, නීති විරෝධි ලෙස පස් කපා විවිධ අපරාධ සිදු කළ අයයි. තවත් ප්‍රවෘත්ති බොහොමයක් ඉදිරියේදී ඔබට අසන්නට ලැබේවි. මේ අපරාධකරුවන් පිළිබඳ පරීක්ෂණ අද කරිය යාත්මක වෙමින් තිබෙනවා.

මේ ආණ්ඩුව වංචාව, දූෂණය සහ නිස්තිය නතර කළ පාලනයක්. වංචා, දූෂණ අපරාධ සිදු කළ අයට දඬුවම් දීමට උත්සාහ කරන පාලනයක්. නමුත් අනිත් පිරිස වංචා සහ දූෂණවල නිරත වූ අයයි. ඔවුන් උත්සාහ කරන්නේ නැවත වංචා සහ දූෂණවලට නිරතවීමටයි. මේ දිනවල රූපවාහිනිය නරඹවන විට ඔබට පෙනේවි වැඩියෙන්ම කෑ ගහන්නේ වැඩියෙන්ම බිය වූ අයයි. ඔවුන් අපරාධයේ පරනේමාණය අපිට වඩා හොඳින් දන්නවා. ඒ නිසා ඔවුන් බිය විය යුතුයි.

මේ රට පිරිසිදු රාජ්‍යයක් බවට පත් කිරීමේ ව්‍යායාමයට ජාතික ජන බලවේගයේ අපි පියවර තබා තිබෙන අතර එය ඉටු කරමින් තිබෙනවා. ඒ වගේම අපි රටේ ආර්ථික ස්ථාවරභාවය නිර්මාණය කළා. අනිත් අය මේ රටේ ආර්ථිකය බිඳ දැමූ අයයි. මීට වසර දෙක හමාරකට පෙර අපේ රට ලංකා ඉතිහාසයේ දැවැන්තම ආර්ථික කඩාවැටීමට මුහුණ දුන්නා.

මේ රට බංකොලොත් කළ කණ්ඩායම දැන් නැවත බලය ඉල්ලනවා. නමුත් ජාතික ජන බලවේගය බංකොලොත්භාවයෙන් රට නිදහස් කරගෙන ආර්ථිකය ඉදිරියට ගෙන යාමට කටයුතු කරන ආණ්ඩුවක්. අද අපි සැලකිය යුතු ප්‍රමාණයකින් ආර්ථික ස්ථාවරභාවය ඇති කර තිබෙනවා. හැම දත්තයකින්ම ආර්ථික ස්ථාවරභාවය පෙන්නුම් කරනවා.

අපේ රටට පසුගිය අවුරුදු 05කට ආසන්න කාලයක් තුළ කිසිදු ආයෝජකයෙක් පැමිණියේ නැහැ. දැන් නැවත ආයෝජකයන් රටට පැමිණීමට පටන් ගෙන තිබෙනවා. එය ආර්ථික ස්ථාවරභාවය පිළිබඳ සංඥාවක්. ඒ වගේම මෙම අප්‍රේල් 05 වනදා මෙගා වොට් 120ක සූර්ය බලාගාරයක් ඉන්දීය අග්‍රාමාත්‍ය නරේන්ද්‍ර මෝදි මහතාගේ සහභාගිත්වයෙන් ආරම්භ කිරීමට අපි සැලසුම් කර තිබෙනවා.

ඒ වගේම සියඹලාණ්ඩුවේ මෙගා වොට් 100ක බලාගාරයක් සහ මන්නාරමේ මෙගා වොට් 50ක බලාගාරයක් ආරම්භ කරනවා. ඒ වගේම විදේශ ආධාර යටතේ ආරම්භ කර අතරමග නවත්වන ලද ව්‍යාපෘති විශාල ප්‍රමාණයක් නැවත ආරම්භ කිරීමට එම රටවල් එකඟතාව පළ කර තිබෙනවා.

එසේම ලංකාවේ මෙතෙක් සිදු කළ විශාලම ආයෝජනය වන හම්බන්තොට තෙල් පිරිපහදුවේ වැඩ තව මාස කිහිපයකින් ආරම්භ කිරීමට අපි සැලසුම් කර තිබෙනවා. මේ අයුරින් අද රට ස්ථාවර වෙමින් තිබෙනවා.

ඒ වගේම මාස 06කට වැඩි කාලයක සිට ඩොලරය රුපියල් 300 සීමාවේ තබාගෙන සිටීමට අපේ ආණ්ඩුව සමත් වී තිබෙනවා. අද ආයෝජකයන් අපේ රටේ කොටස් වෙළඳපොළ කෙරෙහි විශ්වාස තබා ඇති අතර එය වර්ධනය වෙමින් පවතිනවා. අද බැංකු පොළි අනුපාතය 10%ට පහළින් තිබෙනවා. ඒ අනුව ක්‍රමානුකූලව රට තුළ නොසැලෙන ආර්ථිකයක් නිර්මාණය කිරීමට අපි සමත් වී තිබෙනවා. 2021 – 2022 වසරවල පැවති තත්ත්වය යළි මේ රටේ ඇති නොවන මම ඔබට සහතික වෙනවා. මොකද අපි හදන්නේ නොසැලෙන ආර්ථිකයක්.

ආර්ථිකය ශක්තිමත්වීම සමග එහි ප්‍රතිලාභ ජනතාවට ගලා ආ යුතුයි. රාජ්‍ය සේවයට අලුතින් 30,000ක් බඳවා ගැනීමට අපි සැලසුම් කර තිබෙනවා. ඒ අනුව ජනතාවට අවශ්‍ය සේවාවන් සැපයීම වෙනුවෙන් රාජ්‍ය සේවාව ශක්තිමත් කිරීමට සැලසුම් කර තිබෙනවා. රාජ්‍ය සේවකයන්ගේ වැටුප් වසර පහ හයකින් වැඩි කර තිබුණේ නැහැ. අපි රාජ්‍ය සේවකයන්ගේ මූලික වැටුප ඉතා විශාල ප්‍රමාණයකින් වැඩි කළා. මේ වසරේ පමණක් රාජ්‍ය සේවකයන්ගේ වැඩි වූ වැටුප් වෙනුවෙන් අපි රුපියල් කෝටි 11,000ක් දරනවා. මෙම වැටුප් වැඩිවීම වාර්ෂිකව ඉහළ යනවා. ඒ අනුව 2028 වන විට රාජ්‍ය සේවකයන්ගේ වැටුප් වැඩිවීම සඳහා කෝටි 33,000ක් වැය කිරීමට සිදු වෙනවා. අපිට ශක්තිමත් රාජ්‍ය සේවයක් අවශ්‍යයි. සරිලන වැටුපක් නොතිබූ නිසා වෘත්තීයවේදීන් මේ රට හැර ගියා.

ඒ වගේම අපි අස්වැසුම ප්‍රතිලාභය වැඩි කිරීමට කටයුතු කළා. මෙම ජූලි මාසයේ සිට අස්වැසුම නොලැබෙන එහෙත් ලැබිය යුතු පවුල් ලක්ෂ 04කට අලුතින් අස්වැසුම හිමි වෙනවා. රැකබලා ගත යුතු පිරිස් රැකබලාගත යුතුයි. ඒ වගේම වැඩිහිටි දීමනාව, විශ්‍රාම වැටුප, වකුගඩු දීමනාව, මහපොළ ශිෂ්‍යාධාරය, දරුවන්ගේ කෑම වේලක් සදහා ලබාදෙන දීමනාව මේ සියලු දීමනා වැඩිකිරීමට අපි කටයුතු කළා.

බන්ධනාගාර තුළ සිටින හැකියාව සහ දක්ෂතාව තිබෙන තරුණ තරුණියන්ට වෘත්තීය පුහුණුවක් ලබාදීමට අපි මෙවර අයවැයෙන් මුදල් වෙන් කළා. ඔවුන් සිරගතව සිට සමාජයට එක් වන්නේ වෘත්තිමය සහතිකයක් සමගයි. ඔවුන්ට ඒ අනුව රැකියාවක් හිමි වෙනවා. ඒ වගේම රැදවුම් මධ්‍යස්ථානවල සිටින දරුවන්ට වාර්ෂිකව රුපියල් 5,000ක් ලබා දෙනවා. එයින් රුපියල් 3,000ක් මාසිකව ස්ථාවර ගිණුමකට බැර වෙනවා. එම දරුවෙක් විවාහපත් වන විට ඔවුන්ට නිවසක් තනා ගැනීමට රුපියල් ලක්ෂ 10ක් ලබා දෙනවා. අපි ජනතාව රැක බලා ගත යුතුයි. ඒ වගේම පාසල් දරුවන්ට අධ්‍යාපන උපකරණ ලබා ගැනීමට රුපියල් 6,000 බැගින් ලබා දෙනවා. ඉතිහාසයේ කිසිදා මෙවන් දීමනා ලබා දී නැහැ.

එසේනම් රටේ ආර්ථිකය ස්ථාවරවන විට එහි ප්‍රතිලාභ රටේ ජනතාවට ගලා ඒමට අපි සැලසුම් සකස් කර තිබෙනවා. ලංකාවේ ආණ්ඩුව ප්‍රාග්ධන වියදම් සඳහා වෙන් කරන ලද වැඩිම මුදල අපි වෙන් කර තිබෙනවා.

අපි මාතර පුරන් කුඹුරු අස්වැදීමට ලක්ෂ 3000ක් වෙන් කර තිබෙනවා. මෙම මුදල් ලැබීමත් සමග එම වැඩ ආරම්භ කළ යුතුව තිබෙනවා. ඔබට තිබෙන අභියෝගය එම මුදල් මෙම දෙසැම්බර් මාසයට පෙර වියදම් කිරීමයි. මම දිසාපතිවරුන්, අමාත්‍යාංශ ලේකම්වරු කැඳවා මේ පිළිබඳ උපදෙස් ලබා දී තිබෙනවා. මීට පෙර සිදු වුයේ වැඩ කරන්න මුදල් නොතිබු එක. දැන් මුදල් තිබෙන අතර වැඩ කළ යුතුව තිබෙනවා.

මේ අනුව රට ගොඩනැගීමට අවශ්‍ය ආණ්ඩුවක් අද ගොඩනැගී තිබෙනවා. ඒ වගේම නිල්වලා ව්‍යාපෘතිය පිළිබඳ විවාදය ඔබ අපට අවසන් කර දෙන්න. අපි ඊට අවශ්‍ය මුදල් ඉදිරි අයවැයෙන් වෙන් කිරීමට බලාපොරොත්තු වෙනවා.

අපි මහජනතාවගේ මුදල් සතයක් නාස්ති කරන්නේ නැති ආණ්ඩුවක්. මහා භාණ්ඩාගාරයට එන හැම සතයක්ම පෙරළා පුරවැසියාට ලබාදෙන ආණ්ඩුවක්. අපි සෑම ව්‍යාපෘතියකදීම කටයුතු කරන්නේ රට සහ ජනතාවගේ පැත්තෙන් සිතලයි. මෙතෙක් පැවති ආණ්ඩු ව්‍යාපෘති ක්‍රියාත්ම කරද්දි සිතුවේ තමන්ට කොපමණ මුදල් ලැබෙනවද යන්න පමණයි. නමුත් අපි සෑම ආයෝජනයක් පිළිබඳවම තීරණයක් ගන්නේ රටට සහ ජනතාවට එය කොතරම් සුබවාදීද, නැද්ද කියලා සිතලයි.

අපි 2028 දී නැවත ණය ගෙවීම ආරම්භ කළයුතුයි. ඒ සඳහා අවශ්‍ය ඩොලර් ප්‍රමාණය උත්පාදනය කළ යුතුයි. 2028 වසරේදී ඉතා හොදින් ණය ගෙවිය හැකි ආර්ථිකයක් අපි හදනවා. ඒ පිළිබඳ සංඥා මේ වන විටත් ලැබී තිබෙන අතර මේ වසර මෙරටට වැඩිම සංචාරකයින් පිරිසක් පැමිණි වසර බවට පත් වෙනවා. ඒ වගේම ලංකා ඉතිහාසයේ වැඩිම අපනයන ආදායම මේ වසරේදී ලංකාව උපයා ගන්නවා. ඒ වගේම විදෙස්ගත ශ්‍රී ලාංකිකයන් වැඩිම ඩොලර් එවන වසර බවට මේ වසර පත් වෙනවා. මේ අයුරින් මහා භාණ්ඩාගරයට වැඩිම ආදායමක් ලැබෙන වසර බවට 2025 වසර පත් වෙනවා.

අද රට ඉතා හොද දිශාවකට ගමන් කරමින් තිබෙන අතර රටට අවශ්‍ය පරිවර්තනය සිදු කරමින් තිබෙනවා. මේ වැඩපිළිවෙළ කිසිවෙකුට ආපසු හරවන්න බැහැ. ඔවුන්ට අද තිබෙන්නේ එකම කතාවයි. එක නාලිකාවක රාත්‍රී 7.00ට ප්‍රවෘත්තිවලින් විකාශය වන්නේ ඔවුන්ගේ අදෝනාව පමණයි. මේ පිට වන්නේ ඔවුන්ගේ වේදනාවයි. ඔවුන් කිසිදා මෙවන් ආණ්ඩුවක් අපේක්ෂා කළේ නැහැ.

ඔවුන මේ ආණ්ඩුව වැටෙන තුරු බලා සිටියා. ඒ වගේම රටේ ආර්ථිකය බිඳ වැටෙන තුරු බලා සිටියා. නමුත් ඔවුන්ගේ එම අපේක්ෂාවන් කිසිවක් ඉටු වුණේ නැහැ. අද ශක්තිමත් ජාත්‍යන්තර සම්බන්ධතා ගොඩනැගෙමින් තිබෙනවා. ඉන්දියානු රාජ්‍ය නායකයෙක් වසර 10කට පසුව ලංකාවට පැමිණෙනවා. ආණ්ඩුවට තවම ගතවී තිබෙන්නේ මාස 06යි. මේ අයුරින් ශක්තිමත් රාජයුවතාන්ත්රි ක සබඳතා ගොඩනැගී තිබෙනවා. අපි චීනය සමග ඉතා ශක්තිමත් සබඳතා ගොඩනගා ගනිමින් සිටිනවා. දැනටමත් ජපානයෙන්, වියට්නාමයෙන් ආරාධනා ලැබී තිබෙනවා. ශ්‍රී ලංකාව ඉහළින් ඔසවා තැබිය හැකි ඉතාමත් හොද රාජ්‍ය තාන්ත්‍රික සබදතා අද ගොඩනැගී තිබෙනවා.

අද අපේ රටට ආයෝජකයන් පැමණීමට පටන් ගෙන තිබෙනවා. පෞද්ගලික අංශයේ ආයෝජකයන් විශාල විශ්වාසයක් තබා තිබෙනවා. මේ අයුරින් රට අලුත් දිශාවකට ගමන් කරමින් තිබෙනවා. මේ ගමනට යළි ශක්තියක් ලබාදිය යුතුයි. එහිදී පළාත් පාලන මැතිවරණය ඉතා වැදගත් වෙනවා. ඒ නිසා පළාත් පාලන මැතිවරණයේදී විශ්වාසවන්ත කණ්ඩායමක් පත්කරගත යුතුයි. අපි ඉතාමත් ශක්තිමත් ප්‍රාදේශීය සභාවක් හදමු.

අපි ජාතික වශයෙන් ජයග්‍රහණ රැසක් සමග විශාල ශක්තිමත්භාවයක් ගොඩනගාගෙන තිබෙනවා. මේ ශක්තිමත්භාවයේ ප්‍රතිඵල ගමට ඒමට නම් ගමේ ප්‍රාදේශීය සභාව නිසි ලෙස ස්ථාපිත කළ යුතුයි. එසේ නොමැති වුවහොත් ජාතික වශයෙන් ලබන ජයග්‍රහණය ගමට ගලාගෙන එන්නේ නැහැ. ඒ නිසා ගමේ බලය ශක්තිමත් කරගත යුතුයි. මැයි මාසයේ 06 වෙනිදා අපි සියලුදෙනා එක්වී ශක්තිමත් ප්‍රාදේශීය සභාවක් ගොඩනගා ගනිමු. ඒ වෙනුවෙන් එක්වන ලෙස සියලුදෙනාට ආරාධනා කරනවා.

(-Colombo, March 31, 2025-)

ලොව පුරා ඉස්ලාම් භක්තිකයන් විසින් මාසයක් පුරා උපවාස ශීලය රැක ඉන් අනතුරුව නව සඳ බැලීමෙන් පසු සමරනු ලබන ඊදුල් ෆිතර් උත්සවය ඉස්ලාමීය ආගමික දින දර්ශනයේ අතිශය වැදගත් අවස්ථාවකි.

ඉස්ලාම් ධර්මය ගොඩනැගී ඇති කුලුනු පහෙන් එකක් වන රාමසාන් උපවාසය පිළිබිඹු කරන්නේ ලෞකික ආශාවන්ගෙන් දුරස් වී පරිත්‍යාගය සහ අල්පේච්ඡත්වය සහිත පරමාදර්ශී පිළිවෙතක පිහිටීමේ වැදගත්කමයි. ලොව පුරා කුසගින්නෙන් පීඩා විඳින ජනයා කෙරෙහි පරිත්‍යාගශීලී වීමට මෙන්ම සිත දමනය කර ගැනීමේ හැකියාව වර්ධනය කර ගැනීමටත් මේ සමය මහඟු අවස්ථාවක් ලෙස ඉස්ලාමීය බැතිමත්හු සලකති.

සමාජ, ආර්ථික සහ දේශපාලන පරිවර්තන රැසක් සමග දියුණු ශ්‍රී ලංකාවක් පිළිබඳ මේ රටේ ජනතාව තැබූ අපේක්ෂා මල්ඵල ගන්වමින් නිදහස, සමානාත්මතාව, සාමුහිකත්වය සහ මානව ගරුත්වය රජයන සමාජයක් ගොඩනැගීමට අප තබන පියවරේදී ඉස්ලාම් දහම තුළ වන මෙම ඉගැන්වීම් පරමාදර්ශයක් වනු ඇති බව මම විශ්වාස කරමි.

එසේම මහජන මුදල් සහ රාජ්‍ය දේපළ විනාශ කරන අශිෂ්ට දේශපාලන සංස්කෘතියක් වෙනුවට අල්පේච්ඡත්වය සහ පරිත්‍යාගය සහිත අනෙකාගේ සංවේදනා හමුවේ සංවේදී වන සහකම්පනීය දේශපාලන සංස්කෘතියක් සහ පුරවැසි සමාජයක් රට තුළ ගොඩනැගීමට අප දරන උත්සාහයේදී රාමසාන් සමයේ භාවිතය මහඟු ආදර්ශයක් සපයනු ඇත.

ආගමික සීමා අතික්‍රමණය කරමින් පොදු මිනිසත් බව සහ සාමුහිකත්වය ආමන්ත්‍රණය කරන්නා වූද, ආත්මාර්ථය වෙනුවට පරාර්ථය ප්‍රකට කරන්නා වූද ඊදුල් ෆිතර් උත්සවය සමරන සමස්ත ශ්‍රී ලංකාවාසී සහ ලෝකවාසී ඉස්ලාම් බැතිමතුන්ට මාගේ හෘදයාංගම සුබ පැතුම් පිරිනමමි.

පුනරුද යුගයක අපේක්ෂා ඉටුවන සාමය, සංහිඳියාව සපිරි ප්‍රීතිමත් ඊදුල් ෆිතර් සැමරුමක් වේවා!

ඊද් මුබාරක්!

අනුර කුමාර දිසානායක

ජනාධිපති

ශ්‍රී ලංකා ප්‍රජාතාන්ත්‍රික සමාජවාදී ජනරජය

2025 මාර්තු 31 වන දින

‘ජය නියතයි – ගම අපිටයි’ තිස්සමහාරාම ජනහමුව – 2025.03.29

පුරවැසියාගේ බදු මුදල් සෑම රුපියලක්ම ජනතාව වෙනුවෙන් පරිස්සමෙන් වියදම් කිරීමට වත්මන් ආණ්ඩුව සහතික වන බව ජනාධිපති අනුර කුමාර දිසානායක සහෝදරයා ප්‍රකාශ කළේය. ජනාධිපති අනුර කුමාර දිසානායක සහෝදරයා මෙම අදහස් පළ කළේ, “ජය නියතයි ගම අපටයි” ජයග්‍රාහී ජනතා රැලි මාලාවේ හම්බන්තොට දිස්ත්‍රික්කයේ තිස්සමහාරාම ප්‍රදේශයේ ඊයේ (29) පැවති ජන හමුවට එක්වෙමිනි.

එහිදී වැඩිදුරටත් අදහස් දැක් වූ ජනාධිපති අනුර කුමාර දිසානායක සහෝදරයා මෙසේද පැවසීය.

තිස්සමාරාමය අපට හැමදාම විශාල ජයග්‍රහණ ගෙනත් දුන්නා. තිස්ස ගැන අපට කිසි සැකයක් නැහැ. දැන් අපි ලංකා දේශපාලනයේ විශාල හැරවුමක් අරගෙන තිබෙනවා. දීර්ඝ කාලයක් රට පාලනය කළ පැරණි කණ්ඩායම අතින් පොදු ජනතාව නියෝජනය කරන අලුත් කණ්ඩායමකට බලය මාරු වෙලා තිබෙනවා. මේක සාමාන්‍ය තත්වයක් නොවෙයි. පසුගිය ජනාධිපතිවරණයේදී ඊට අවශ්‍ය වන පළමු හැරවුම ගත්තා. මහ මැතිවරණයේදී ලංකා ඉතිහාසයේ වැඩිම මන්ත්‍රීවරුන් පිරිසක් සමඟ පාර්ලිමේන්තු මැතිවරණය ජයග්‍රහණය කළා. පළාත් පාලන ඡන්දයේදී ඊට වඩා මනාප ලැබෙන බව අපට විශ්වාසයි. මොකද මේ අප ගත්ත හැරවුම ආපසු හැරවීමට ජනතාව ඉඩ නොදෙන බව අපට විශ්වාසයි. මේක ඉදිරියට ගෙනයාම තමයිි අපේ රටේ ජනතාවට අපට තිබෙන එකම මාර්ගය.

අපි බලය ගන්නා විට අපේ රට ආර්ථික වශයෙන් සුවපත් රාජ්‍යයක් ලෙස තිබුණේ නැහැ. මෙයට අවුරුදු දෙකහමාරකට පෙර අපේ රට විශාල බංකොලොත්භාවයකට පත් වෙලා තිබුණා. දිගු කාලයක් අපේ රට පාලනය කළ පාලකයන්ගේ දුර්වලතා හේතු කර ගෙන රටකට විය හැකි විශාලතම ව්‍යසනය අපට ගෙනත් දුන්නා. රටක ආර්ථිකයට ගෙනත් දිය හැකි විශාලම විනාශය වන්නේ ආර්ථික බංකොලොත්භාවයයි. අප ලෝකෙට ණය වී ණය ගෙවන්නේ නැහැ කියා හුදෙකලා වුණු රටක්. තව අවුරුදු සියයකින් ලංකාවේ ආර්ථිකය ගැන පොතක් ලියවුණත් 2021-2023 ආර්ථික අර්බුදය ගැන ඉතිහාසයේ ලියවෙනවා. ණය ගෙවා ගන්න බැරි වූ රාජ්‍යයක්, තෙල් ආනයනය කිරීම සඳහා ඩොලර් සොයාගන්න බැරි වූ රාජ්‍යයක්, ඖෂධ ආනයනය කිරීම සඳහා මුදල් සොයාගන්න බැරි වූ රාජ්‍යයක්, ගෑස් ආනයනය කිරීම සඳහා මුදල් හිඟ වූ රාජ්‍යයක්, රටේ ජනතාව පාරට ඇවිත් පාලකයන්ව එළවා දැමූ රාජ්‍යයක්, රටේ පාලකයා සැඟවිලා ජීවිතය බේරා ගත් කාලයක් බව ඉතිහාසයේ ලියවේවි.

ඒ වගේ රටක් බංකොලොත්භාවයට පත් වූ විට නැවත යථා තත්ත්වයට පත් වෙන්න අවුරුදු දහයක් වගේ කාලයක් ගත වෙනවා. ලෝකයේ බොහෝ රටවල් එවැනි ව්‍යසනයකට පත් වූ විට එවැනි කාලයක් ගත වී තිබෙනවා. එහෙත් කෙටි කාලයක් තුළ මේ රටේ ආර්ථිකය ස්ථාවරත්වයට පත් කරන්න අපි සමත් වී තිබෙනවා.

ආයෝජකයන් ලංකාවට පැමිණෙන්න විශ්වාසය අවශ්‍යයි. පහුගිය වසර පහක කාලය තුළ ආයෝජකයන් මේ රටට පැමිණ නැහැ. මේ වන විට ආයෝජකයන් වත්මන් ආණ්ඩුව සමඟ සාකච්ඡා කරමින් තිබෙනවා. ශ්‍රී ලංකාවේ විශාලතම ආයෝජනය වන හම්බන්තොට තෙල් පිරිපහදු ව්‍යාපෘතිය පිළිබඳ අප මේ වන විටත් සාකච්ඡා කරමින් තිබෙනවා. එය දැන් අවසන් අදියරේ තිබෙනවා. ඉන්දියානු අගමැතිවරයාගේ සහභාගිත්වයෙන් 05 වන දා සාම්පූර්වල විදුලි බලාගාරයකට මුල්ගල තියනවා. ආයෝජන එන්න පටන් අරන් තිබෙනවා. සියඹලාආණ්ඩුවේ මෙගාවොට් 100ක සූර්ය විදුලි බලාගාරයක් ඉදිකිරීමට සැලසුම් කර තිබෙනවා. මන්නාරමේ සුළං විදුලි බලාගාරයක් සඳහා ආයෝජන පැමිණ තිබෙනවා. කෙරවලපිටියේ නව ගබඩා පර්යන්තයක් ඉදි කිරීමට සැලසුම් කර තිබෙනවා. කොළඹ නගරයේ ආයෝජනයට සුදුසු ඉඩම් හඳුනාගෙන ඉතා නුදුරේම ඒවා ප්‍රසිද්ධියට පත් කරනවා ආයෝජකයන් සඳහා. ක්‍රමානුකූලව ආයෝජකයන් අපේ රට කෙරෙහි අවධානය යොමු කරන්න පටන් අරන් තිබෙනවා.

ආර්ථික අර්බුදයේදී, ආයෝජකයෝ කටුනායක ගුවන්තොටුපල සාදමින් සිටියා. එය අත්හැර ගියා. කටුනායක ව්‍යාපෘතිය තව මාස දෙකකින් අපි සකස් කර නිම කරනවා. කඩවත- මීරිගම අධිවේගී මාර්ගය සාදමින් සිටි ආයෝජකයෝ අතැර ගියා. එහෙත් නැවත එම අධිවේගී මාර්ගය ඉදිකිරීමට අප ආරම්භ කරනවා. අත්හැර ගිය ආයෝජන, අත්හැර ගිය ව්‍යාපෘති නැවත ආරම්භ කිරීමට ආණ්ඩුව සමත් වී තිබෙනවා. ඩොලරය රුපියල් 300 සීමාවේ ආරක්ෂා කර ගැනීමට වත්මන් ආණ්ඩුව සමත් වී තිබෙනවා. මීට පෙර ඩොලර්වල අගය රාත්‍රියේ නිදියන විට එක අගයක්, උදේ නැගිටින විට තවත් අගයක්. පොලි අනුපාතය එක ඉලක්කමක තබා ගෙන තිබෙනවා. කොටස් වෙළඳපොළ විශාල වර්ධනයක් ලබා තිබෙනවා. එය ආර්ථික ස්ථාවරත්වය පිළිබඳ සංඥාවක්. ණය ප්‍රතිව්‍යුහගත කිරීමෙන් පසු ඩොලර් මිලියන 500කට වඩා ණය මුදලක් අප ගෙවා තිබෙනවා. එහෙත් ඩොලරයේ අගය කිසිදු අගයකින් වෙනස් වුණේ නැහැ. වසර පහකට හයකට වඩා වැඩි කාලයක් වාහන ආනයනය තහනම් කර තිබුණා. ක්‍රමානුකූලව වාහන වෙළඳපොළ විවෘත කර තිබෙනවා. මේ හැමදෙයකින්ම කියන්නේ ආර්ථිකය පිළිබඳ සුබවාදී සංඥාවක්. පහුගිය මාස හය තුළ ආර්ථික ස්ථාවරත්වය ඇති කිරීමට වත්මන් ආණ්ඩුව හැකි වී තිබෙනවා. ආණ්ඩුව පිළිබඳව අවිශ්වාසයක් ඇති කර ගෙන ඉස්සරහට යන්න බැහැ.

ආර්ථික ස්ථාවරත්වය නිසා අප අත්පත් කරගන්නා ලද ධනය අප නැවත පෙරළා ජනතාවට යෙදවීම සඳහා යොමු කර තිබෙනවා. වසර හතරක් පහක් තිස්සේ රාජ්‍ය සේවයට සේවකයන් බඳවා ගෙන නැහැ. අලුතින් රාජ්‍ය සේවයට 30,000ක් බඳවා ගන්න අප තීන්දුවක් අරන් තිබෙනවා. ඒ සඳහා මෙවර අයවැයෙන් මුදල් වෙන් කර තිබෙනවා. මේ වනවිට 15,700ක් පුරප්පාඩු හඳුනා ගෙන තිබෙනවා. ඉතිරි පුරප්පාඩු හඳුනා ගැනීම සඳහා කමිටුවක් පත් කර තිබෙනවා. ප්‍රාදේශීය සභාවේ තාක්ෂණ නිලධාරි මහත්වරු නැහැ. පාරක් සාදන්න ගියාම තාක්ෂණික ගැටලු ගොඩක් එනවා. ආර්ථිකය ලබා ගන්නා ස්ථාවරභාවය නැවත ජනතාවට පෙරළා ලැබෙනවා. එම නිසා පස් වසරක් බඳවා නොගත් රාජ්‍ය සේවයට මේ වසරේ නැවත බඳවා ගැනීම සිදු කරනවා. රාජ්‍ය සේවකයන්ගේ මූලික වැටුප විශාල ලෙස වැඩි කර තිබෙනවා. එම වැඩි කළ කොටස පමණක් ගෙවන්න රුපියල් කෝටි 11,000ක් වෙන් කළා. අපේ වෘත්තියවේදින් රැක ගන්න ඕනේ. විශ්‍රාමිකයන්ටත් ඒ වගේම වැටුප් වැඩි කිරීමක් සිදු කර තිබෙනවා. වී වගා කිරීම සඳහා ලබා දුන් පොහොර සහනාධාරය අතුරු බෝග වවන ගොවීන්ටත් ලබා දීමට අප කැබිනට් අනුමැතිය ලබා ගත්තා. ලංකාවේ පළමු වතාවට පාසල් දරුවන්ට පාසල් උපකරණ ලබා ගන්න මුදල් ලබා දුන්නා. ලැබෙන මුදල් ආරක්ෂා කරලා ජනතාව වෙනුවෙන් යොදවන ආණ්ඩුවක්. වකුගඩු රෝගීන්ගේ දීමනා වැඩි කළා. මහපොළ ශිෂ්‍යාධාර දීමනා වැඩි කළා. පාසල් ආහාර වේල සඳහා ලබා දෙන දීමනා වැඩි කළා. ජනතාව බලා ගැනීම සඳහා සියලු දේ මේ ආණ්ඩුව කරමින් තිබෙනවා. අස්වැසුම දීමනා වැඩි කළා, දැනට අස්වැසුම නොලැබෙන ඒත් ආධාර අවශ්‍යයි කියලා සිතන ලක්ෂ හතරක කණ්ඩායමකට ලබන ජූනි මාසයේ සිට දීමනාවක් ලබා දෙනවා. සෑම පාසල් දැරිවියකටම සනීපාරක්ෂක තුවා මාසෙකට අට බැගින් ලබා දෙන්න අප තීරණය කර තිබෙනවා. ඒ සඳහා මුදල් වෙන් කර තිබෙනවා. අප ආධාර ලබා දීමේ වැඩසටහන තවත් ශක්තිමත් කර තිබෙනවා.

ප්‍රවාහන පද්ධතිය දියුණු කරන්න සැලසුම් සකස් කර තිබෙනවා. ලංගමය සහ පුද්ගලික බස් සේවාව ඒකාබද්ධ කිරීමට සැලසුම් කර තිබෙනවා. බස්වලට යම් ප්‍රමිතියක් ගෙන එනවා. ඒ සඳහා රුපියල් කෝටි 300ක් වෙන් කර නව ප්‍රමිතියකින් යුත් බස් රථ ගෙන්වීමට සැලසුම් කර තිබෙනවා. සුවපහසු බස්රථ සේවයක් ඇතුළු පොදු ප්‍රවාහන සේවයක් සකස් කිරීමට අප කටයුතු කරමින් තිබෙනවා. සෞඛ්‍ය ක්ෂේත්‍රය සඳහා රුපියල් බිලියන 650ක් වෙන් කර තිබෙනවා. උපකරණ ගන්න, ඖෂධ අනයනය කරන්න, ගොඩනැගිලි හදන්න ඒ සඳහා මුදල් වෙන් කර තිබෙනවා. සෑම පවුලකටම පවුලේ වෛද්‍යවරයෙක් සිටිය යුතුයි. ඒ සඳහා නියමු ව්‍යාපෘතියක් සකස් කරමින් තිබෙනවා. දකින දකින ඉස්පිරිතාලෙට දකින දකින වෛද්‍යවරු ළඟට යන්න අවශ්‍ය නැහැ. ඔබේ පවුලේ වෛද්‍යවරයා හමු වී ලබා දෙන නිර්දේශයට අනුව ඉදිරි පියවර ගන්න පුළුවන් වැඩපිළිවෙළක් අප සකස් කරනවා.
අධ්‍යාපනය සඳහා 2026 වසරේදී නව විෂය නිර්දේශයක් හඳුන්වා දෙනවා. ඒ අනුව නවය වසරේදී විභාගයකට මුහුණ දුන් පසුව ඒ දරුවාගේ හැකියාවලින් යා හැකි මාර්ගය කියා දෙනවා. සෞඛ්‍යයට අධ්‍යාපනයට, ප්‍රවාහනයට පවුලකින් යොදවන මුදල අඩු කරනවා. එය ආණ්ඩුව බලාගන්නවා. එයින් ඉතිරි වන මුදලින් ජනතාවට වෙන වැඩපිළිවෙළකට යා හැකියි. චිත්‍රපටියක් බලන්න, විනෝද චාරිකාවක් යන්න පුළුවන්.

සිරගත වී සිටින පුද්ගලයන් පිළිබඳව කිසිදු ආණ්ඩුවක් බලා ගත්තේ නැහැ. එම නිසා සිරගත වී සිටින අයගේ වෘත්තිය හැකියාවන් සොයා බලා ඔවුන්ට වෘත්තීය පුහුණු සහතික ලබා දී රැකියාගත කිරීමේ වැඩපිළිවෙළක් සකස් කර තිබෙනවා. අනාථ නිවාසවල සිටින දරුවන් වෙනුවෙන් මසකට රුපියල් 5000ක දීමනාවක් ලබා දෙනවා. එයින් තුන් දාහක් අනිවාර්යෙන්ම ස්ථිර තැන්පතුවක් සඳහා යොදවනවා. විවාහ වන හැම දරුවකුටම රුපියල් ලක්ෂ 10ක් ආණ්ඩුවෙන් ලබා දෙනවා. නිවාස ඉදිකිරීම සඳහා. හැම කෙනාම අත් අරින්නේ නැති ආණ්ඩුවක්. ජනතාව බලා ගෙන සේවාවන් දියුණු කරන ආණ්ඩුවක් බවට අප පත්ව තිබෙනවා.

සංචාරක ක්ෂේත්‍රය සඳහා වැඩි අවධානයක් යොමු කර තිබෙනවා. 2025 වසර ලංකාවට වැඩිම සංචාරකින් පැමිණෙන වසරයි. සංචාරකයන්ට අවශ්‍ය යටිතල පහසුකම් වැඩි කිරීමට සැලසුම් කර තිබෙනවා. සංචාරක ගමනාන්ත වැඩි කිරීමට සැලසුම් කර තිබෙනවා. සෑම වසරකම වර්ධනය වන ආර්ථිකයක් බවට සංචාරක කර්මාන්තය පත් කරනවා. මේ වසරේ වැඩිම භාණ්ඩ හා සේවා අපනයනය කරන වර්ෂය ලෙස අප පත් කරනවා. විදේශගත ශ්‍රමිකයින් මෙරටට එවන වැඩිම ඩොලර් ප්‍රමාණය මේ වසරේදී ලැබෙන බව අපට ස්ථිරයි. වැඩිම රාජ්‍ය ආදායම ලැබෙන වර්ෂයත් 2025 වර්ෂයයි. දේශීය ආදායම් දෙපාර්තමේන්තුව මාසෙට ලබා දෙන ඉලක්කයට වඩා ඉලක්ක සපුරා ගනිමින් තිබෙනවා. පුරවැසියන් බදු ගෙවීමට පුරුදු වෙමින් තිබෙනවා. ඒ වගේම බදු ගෙවන පුරවැසියන්ට ස්තුතිවන්ත වෙන ගමන් ඒ ලැබෙන හැම රුපියලක්ම ජනතාව වෙනුවෙන් පරිස්සමෙන් වියදම් කරනවා. එහෙමයි රටක් හදන්නේ. ශීඝ්‍රගාමී වැඩපිළිවෙළකට අප ඇතුළත් වී තිබෙනවා. පුරවැසියෙකුට වත්මන් ආණ්ඩුවට ඇඟිල්ල දිගු කර පාලකයෝ හොරකම් කරනවා කියලා කියන්න බැහැ. ඒ නිසා විරුද්ධ දේශපාලන ව්‍යාපාරවල අනාගතයම විනාශ වෙමින් තිබෙනවා.

සවස ප්‍රවෘත්ති බලන විට විපක්ෂයේ දේශපාලන පක්ෂ මාධ්‍ය ඉදිරියේ හඬා වැටෙමින් සිටිනවා. එක වෙලාවකට හිතෙනවා මාධ්‍ය ඉස්සරහ ඔච්චර අඬනවා නම් ගෙදර කොච්චර අඬනවා ඇතිද කියලා. ඒ කියන්නේ ආණ්ඩුව නිවැරදි ගමන යන බව පැහැදිලියි. විරුද්ධවාදින් කිවුවා ආණ්ඩුවට ජාත්‍යන්තර සබඳකම් නැහැ කියලා. එහෙත් අප ආණ්ඩුවක් අරගෙන මාස හයක් ඇතුළත ඉන්දියානු අගමැතිවරයා ලංකාවට එනවා. මහ මැතිවරණය අවසන් වූ වහාම ඉන්දියාවෙන් සහ චීනයෙන් එරට සංචාරයකට ආරාධනා ලැබුණා. ජපානයෙන් සහ වියට්නාමයෙන්ද සංචාරයක් සඳහා අපට මේ වන විටත් ආරාධනා ලැබී තිබෙනවා. ජාත්‍යන්තර සබඳතා ශක්තිමත් කරමින් තිබෙනවා. රටත් ජනතාවත් උකසට තබා පාවා දෙන්නේ නැතුව කෙලින් ශක්තිමත්ව ජාත්‍යන්තර සබඳතා පවත්වා ගැනීමට අප කටයුතු කර තිබෙනවා. වඩාත් සුබදායි දිශාවකට රට පරිවර්තනය වෙමින් තිබෙනවා. ප්‍රවෘත්තිවලින් හදන විජ්ජාවෙන් අපේ රටේ දේශපාලනය නැවත හරවන්න බැහැ.

අපරාධ පරීක්ෂණ දෙපාර්තමේන්තුව, නීතිපති දෙපාර්තමේන්තුව,අධිකරණ මේ වන විට හොඳින් ක්‍රියාත්මක වෙමින් තිබෙනවා. මේ වන වන විට ඇමතිවරු තුන්දෙනෙක් රිමාන්ඩ්, පොලිස්පතිවරයෙක් රිමාන්ඩ්, තවත් ඇමතිවරයෙක් හැංගිලා, පොලිස්පති හැංගිලා හිටිය. ආවා නේ එළියට. මේ පරීක්ෂණ ටික හොඳටම යනවා. මහාධිකරණයේ දාන නඩුව පරදින්නේ නැති ආකාරයට හොඳින් ගොනු කරලා දාන්න අපරාධ පරීක්ෂණ දෙපාර්තමේන්තුව කටයුතු කරයි. කතරගම ගෙදර නඩුව, ගෙදරක් තියෙනවා ලයිට් බිල එන්නේ නන්දසේන ගෝඨාභය රාජපක්ෂ කියලා. හැබැයි, ඔහු කියනවා ඔහුගේ ගෙදර නෙමෙයි කියලා. ඒ පිළිබඳ පරීක්ෂණ යනවා. සියලු පරීක්ෂණ ඉදිරියටම යනවා. දූෂණය නතර කර තිබෙන්නෙත් දූෂිතයන්ට දඬුවම් දෙන්නෙත් ජාතික ජබලවේගය ආණ්ඩුවක් විතරයි.

රුපියල් කෝටි එක් ලක්ෂ හතළිස්දාහක් ප්‍රාග්ධන මුදල් වශයෙන් වෙන් කර තිබෙනවා ජනතාව වෙනුවෙන් මාර්ග ඉදි කරන්න. වැඩ කරන්න වෙන් කළ මුදල් ඉදිරි මාස අට ඇතුළත නිවැරදි ව්‍යාපෘතිවලට යොදවා අවසන් කළ යුතුයි. ඉස්සර වැඩ කරන්න මුදල් තිබුණෙ නෑ. අද මුදල් තිබෙනවා වැඩ කරන්න පිරිස නැහැ. ඒ නිසා රාජ්‍ය සේවයට බඳවා ගන්නත් මුදල් වෙන් කර තිබෙනවා. බාගෙට හදලා තිබෙන අධිවේගී මාර්ග නැවත ඉදිකිරීමට මුදල් වෙන්කර තිබෙනවා. ඉතිරි කරන මුදල්, ජනතාව වෙනුවෙන් යොදවා තිබෙනවා. එම නිසා රාජ්‍ය සේවය කාර්යක්ෂමතාව වැඩි කරමින් ජනතාවට සේවය කළ යුතුයි. වෙන් කළ මුදල්වලට වැඩ කරන්න දේශපාලන නායකත්වයක් අවශ්‍යයි.

අන්න ඒ වැඩ කොටස කරන්න ප්‍රාදේශීය සභාවේ දේශපාලන අධිකාරිය අවශ්‍යයි. රටේ වැඩවලට ජනාධිපති සහ පාර්ලිමේන්තුව ඉන්නවා වගේම ගමේ වැඩවලට ප්‍රාදේශීය සභාවේ දේශපාලන අධිකාරිය අවශ්‍යයි. මධ්‍යම ආණ්ඩුවත් සමඟ එකට වැඩ කරන ප්‍රාදේශීය සභාවක් අවශ්‍යයි. එසේ නොමැති වුවහොත් කරත්තෙකට දෙවර්ගයෙන් බැඳපු ගොන්නු දෙන්නෙක් වගේ වේවි. එකෙක් ගොඩට අදිනවා, අනෙකා මඩට අදිනවා. ගම්මාන මට්ටමින් කළ යුතු වැඩ සිදු කිරීමට ප්‍රාදේශීය සභාවේ නායකත්වය අවශ්‍යයි. ලබන ජුනි මාසයේදී අයවැය යෝජනාව සකස් කරන්න යෝජනා ගන්නවා. ලබන වසරේ අයවැය නොවැම්බර් මාසයේ පාර්ලිමේන්තුවට ඉදිරිපත් කරනවා. එම නිසා ජූනි මාසය වන විට අයවැය යෝජනා සකස් කරන්න ජාතික ජන බලවේගයට ප්‍රාදේශීය සභාවේ බලය ලබා දීමෙන් එය ශක්තිමත් කළ හැකියි. ඔබ ජාතික ජන බලවේගයට ජයග්‍රහණය ලබා දෙන්න කටයුතු කරනවා වගේම අප රට ජයග්‍රහණය කිරීම සඳහා කටයුතු කරනවා.