(-බදුල්ල ජන රැලිය – 2025.04.19-) ජනපති බදුල්ලේදී කියයි මෙම මහපොළවේම ඉපිද, මහපොළව සමඟ පොරබදිමින්, මහපොළෙවේම මියැදුණද වතුකරයේ කම්කරු ජනතාව මෙරට පුරවැසියන් ලෙස නොසැලකීමේ යුගය අවසන් කර ඔවුන්ගේ අයිතින් දිනා දෙන බව ජනාධිපති අනුර කුමාර දිසානායක මහතා පැවසීය. ඉන්දීය රජය යටතේ හිමිව ඇති නිවාස ව්‍යාපෘතිය කඩිනම් කර එම ජනතාවට ලබාදීමට කටයුතු කරන අතරම, වත්තට ගැට ගසා […]
(-බදුල්ල ජන රැලිය – 2025.04.19-)
ජනපති බදුල්ලේදී කියයි
මෙම මහපොළවේම ඉපිද, මහපොළව සමඟ පොරබදිමින්, මහපොළෙවේම මියැදුණද වතුකරයේ කම්කරු ජනතාව මෙරට පුරවැසියන් ලෙස නොසැලකීමේ යුගය අවසන් කර ඔවුන්ගේ අයිතින් දිනා දෙන බව ජනාධිපති අනුර කුමාර දිසානායක මහතා පැවසීය.
ඉන්දීය රජය යටතේ හිමිව ඇති නිවාස ව්‍යාපෘතිය කඩිනම් කර එම ජනතාවට ලබාදීමට කටයුතු කරන අතරම, වත්තට ගැට ගසා තිබෙන වතුකර ජනතාව, වත්තෙන් නිදහස් කර නිදහස් ව්‍යවසායකයෙකු ලෙස ගොඩනැඟීමට ආණ්ඩුව මැදිහත්වන බවද ජනාධිපතිවරයා ප්‍රකාශ කළේය.
එසේම දැනට වතු කම්කරුවන් වෙනුවෙන් ප්‍රකාශයට පත් කර ඇති රුපියල් 1700ක වැටුප ස්ථීර කර ගැනීම සඳහා වතු සමාගම් සමඟ සාකච්ඡා කරමින් රජයක් ලෙස ඒ වෙනුවෙන් ගත හැකි සැම ක්‍රියාමාර්ගයක්ම ගන්නා බවද ජනාධිපතිවරයා පැවසිය.
වසර 76ක් පුරා මාරුවෙන් මාරුවට බලයට පත් වූ පාලකයින් විනාශ කළ රටේ ආර්ථිකය පියවරින් පියවර ගොඩනැගීමේ වැඩපිළිවෙළ මාස 06ක් වැනි කෙටි කාලයක් තුළ වත්මන් රජය ආරම්භ කර තිබෙන බවත් ආණ්ඩුව මාස හයෙන් කඩා වැටෙන තුරු ඇතැමුන් බලා සිටියද අද හතරගාතෙන් වැටී සිටින්නේ ආණ්ඩුව නොව එම අසාර්ථක දේශපාලනඥයන් බවද පැවසිය.
එසේම ජාතික ජන බලවේගය නැවත මේ රටේ ආර්ථිකය ගොඩනඟන්නේ යළි කිසිදු දිනක 2021, 2022 වසරවල ඇති වූ තත්ත්වය රට තුළ නිර්මාණය නොවන ආකාරයෙන් බවද ජනාධිපතිවරයා අවධාරණය කළේය.
ජනාධිපති අනුර කුමාර දිසානායක මහතා මේ බව සඳහන් කර සිටියේ “ජය නියතයි ගම අපිටයි” ජන රැලි මාලාවේ තවත් ජන රැලියකට ඊයේ (19) බදුල්ලේදී එක් වෙමිනි.
ජන රැලිය ඇමතු ජනාධිපති අනුර කුමාර දිසානායක මහතා වැඩිදුරටත් මෙසේද පැවසීය.
පැරණි අසාර්ථක දේශපාලන කඳවුරු පරාජය කර පසුගිය සැප්තැම්බර් 21 වනදා පැවති ජනාධිපතිවරණයෙන් ජාතික ජන බලවේගය ජයග්‍රහණය කළා. පසුව නොවැම්බර් 14 වනදා පැවති මහ මැතිවරණයේදී මේ රටේ ජනතාව එක් වී ජාතික ජනබලවේගයට සුවිශේෂී ජයග්‍රහණයක් ලබා දුන්නා. දැන් මැයි 06වනදා පළාත් පාලන මැතිවරණය පැවැත්වෙනවා. මෙම පළාත් පාලන ආයතන සියල්ලේම ජයග්‍රහණය ජාතික ජන බලවේගය අත්පත් කර ගන්නවා.
අපේ රටේ දේශපාලනයේ ඉතාමත් වැදගත් හැරවුමක් සිදුව තිබෙනවා. පවුල් කිහිපයක් විසින් දිගු කාලයක් පුරා අපේ රට පාලනය කළා. එහි ප්‍රතිඵලය බවට පත් වුණේ මුළුමනින්ම කඩා වැටුණු රටක්. නීතියක්, විනයක් නැති රටක්. හැම පැත්තෙන්ම අසාර්ථක වූ රටක් ඔවුන් නිර්මාණය කළා. ජනතාව දීර්ඝ කාලයක් මාරුවෙන් මාරුවට ඔවුන්ට ඡන්දය දී ඔවුන් දෙස බලා සිටියා. අනතුරුව වසර 76කට පසුව උතුරේ, නැගෙනහිර, දකුණේ සියලු ජනතාව එක් වී ජාතික ජන බලවේගයේ ආණ්ඩුව හැදුවා.
මේ මාස 06 තුළ අපි ක්‍රමානුකූලව පියවරෙන් පියවර මේ රට ගොඩනැඟීම සඳහා අවශ්‍ය වන වැඩපිළිවෙළ සකස් කර ක්‍රියාත්මක කරමින් පවතිනවා. අප සතුව තිබු පළමු අභියෝගය වූයේ රටේ ආර්ථික ස්ථාවරභාවය ඇති කිරීමයි. රටක් ඉදිරියට ගෙන යාමට ආර්ථික ස්ථාවරභාවය අතිශය වැදගත් වෙනවා. මීට වසර දෙක හමාරකට පෙර අපේ රටේ තිබුණේ ඉතා අසාර්ථක, ස්ථීර නොවන නිරන්තරයෙන් කඩා වැටීමට ලක්වන ආර්ථිකයක්. නිදාගන්නා විට ඩොලරයේ අගය එක් අගයක් ගත් අතර නැගිටින විට තව අගයක් වෙලා තිබුණා. මේ අයුරින් අස්ථාවර ආර්ථිකයක් පැවතුණා. බැංකු පොලී අනුපාතය 30% – 35%ට ගියා. උද්ධමනය ඉහළ ගියා. එපමණක් නොවෙයි අපේ රටේ ක්‍රියාත්මක වෙමින් තිබු විදේශ ව්‍යාපෘති සියල්ල දාලා ගියා. ඒ නිසා අනෙක් සියල්ලට පෙර රටේ ආර්ථිකය ස්ථාවර කිරීමේ කාර්යය ඉටු කිරීමට අපිට සිදු වුණා. මේ වන විට සැලකිය යුතු ප්‍රමාණයකින් අපේ රටේ ආර්ථිකය ස්ථාවර මට්ටමට පැමිණ ඇති බව මම සතුටින් ප්‍රකාශ කරනවා.
ඒ වගේම රට තුළ ස්ථාවර වන ආර්ථිකයේ ප්‍රතිලාභ ජනතාවට ලබා දීමට අපි මේ වන විට කටයුතු කරමින් සිටිනවා. අස්වැසුම දිමනාව වැඩි කිරිම සහ අලුතින් පවුල් ලක්ෂ 04කට අස්වැසුම ලබා දීමට අපි කටයුතු කරනවා. අපි ජනතාව බලාගත යුතුයි. පාසල් ළමුන් ලක්ෂ 16කට මෙම ජනවාරි මාසයේ සිට පාසල් පොත් සහ උපකරණ ලබා දීම සඳහා අපි කටයුතු කර තිබෙනවා. සිසුන්ට පාසල් පොත් සහ උපකරණ ලබා ගැනීම සඳහා ආධාර කරන පළමු ආණ්ඩුව මෙයයි.
අපි ග්‍රාමීය දුප්පත්බව තුරන් කළ යුතුයි. දුප්පත් බව සමාජ ඛේදවාචකයක්. ඒ නිසා අපේ පාලන කාලය තුළ ලංකාවේ දුප්පත්බව තුරන් කිරීම සඳහා කටයුතු කරන බව ප්‍රකාශ කළ යුතුයි. අපි ආකාර කිහිපයකින් ඒ සඳහා කටයුතු කරමින් සිටිනවා. දුප්පත්භාවයෙන් ගොඩඒම සඳහා දිගුකාලීන වුවත් ස්ථිර විසදුමක් අධ්‍යාපනය තුළ තිබෙනවා. හොඳට ඉගෙන ගෙන හොඳ රැකියාවක් සොයා ගතහොත් එම පවුලට දුප්පත්භාවයෙන් ගොඩ ඒමට හැකියාව තිබෙනවා. ඊට අවශ්‍ය අධ්‍යාපන ප්‍රතිසංස්කරණ අපි කඩිනමින් ක්‍රියාත්මක කරනවා.
ඒ වගේම කෘෂිකර්මාන්තය නංවාලීම කෙරෙහි අපි විශේෂ අවධානය යොමු කර තිබෙනවා. කෘෂිකර්මාන්තය නව තාක්ෂණය සමග බද්ධ කිරිම පිළිබඳ අපි ඉන්දියාව සහ චීනය සමඟ සහයෝගිතා ගිවිසුම්වලට එළැඹ තිබෙනවා. ඒ වගේම කඩා වැටී තිබෙන බීජ ගොවිපොළ නැවත ප්‍රතිසංස්කරණය කර සාධාරණ මිලකට බීජ ලබා දීමට අපි කටයුතු කරනවා. ඒ වගේම ගොවි ජනතාවට සාධාරණ මිලකට වල්නාශක සහ කෘමිනාශක ලබා දීමට අවශ්‍ය පියවර අපි ගන්නවා. ඒ වගේම එම ගොවි ජනතාවගේ දරුවන් නව ව්‍යවසායකයන් සහ සුළු හා මධ්‍ය පරිමාණ කර්මාන්තකරුවන් බවට පත් කළ යුතුයි. ඒ සඳහා රාජ්ය බැංකු මගින් සංවර්ධන ණයක් ලබා දීමට අපි සැලසුම් කර තිබෙනවා. ඒ අනුව රාජ්ය බැංකුවල සංවර්ධන ඒකකයක් හදලා අඩු පොලියට ඇපයක් රහිතව ණය මුදලක් ලබා දීමට අපි කටයුතු කරනවා. අපි එකතුවෙලා අලුත් පරම්පරාව වෙනුවෙන් අලුත් ආර්ථික ක්ෂේත්‍ර විවෘත කර දෙනවා. අපි ඒ සඳහා තානාපතිවරුන්ගේ සහාය ඉල්ලා තිබෙනවා. ඔවුන් සිටින රටවල වෙළෙඳපොළ අවස්ථා සොයාබලා මෙම වෙළෙඳ සබඳතා ගොඩනඟා දීමට අපි සූදානම්.
දුප්පත්භාවයේ පතුලේම ගිලී සිටින්නේ අපේ රටේ කඳුකරයේ ජනතාවයි. ඔවුන් විශාල ලෙස සෞඛ්‍ය අනාරක්ෂිතභාවයකින් පෙළෙනවා. අධ්‍යාපනයේ ඉතාමත් පහළ අඩියක පසු වෙනවා. ඔවුන් මේ රටේ පුරවැසියන්.
ඔවුන් මෙරටට පැමිණ දැන් අවුරුදු 200කට වැඩි කාලයක් වෙනවා. මේ මහපොළෙවේ ඉපිද, මහපොළව සමග පොරබැද ජාතික ආර්ථිකයට දායකත්වය ලබා දී මේ මහපොළෙවේ මියැදෙන නමුත් ඔවුන් අපේ රටේ පුරවැසියන් ලෙස සලකන්නේ නැහැ.
ඉන්දියානු රජයේ ණය ආධාර ක්‍රමය යටතේ මොවුන් වෙනුවෙන් නිවාස ව්‍යාපෘතියක් ලැබී තිබෙනවා. එහෙත් තවමත් එහි කටයුතු අවසන් කිරීමට නොහැකි වී තිබෙනවා. අපි ඉතා ඉක්මනින් එම නිවාස ඉදිකිරීම සඳහා සුදුසු ඉඩම් හඳුන්වාදී එම නිවාස ව්‍යාපෘතිය කඩිනමින් අවසන් කර එම ජනතාවට නිවාස ලබා දීමේ වැඩපිළිවෙළ ආරම්භ කරනවා.
ඒ වගේම වතු ජනතාවට සාධාරණ වැටුපක් ලැබිය යුතුයි. වතු සමාගම්වල වත්තෙන් කොටසක් එම වැඩකරන අයට ලබා දීමේ නියමු ව්‍යාපෘතියක් ක්‍රියාත්මක කිරීමට අදත් අපි වතු සමාගම් කිහිපයක් සමග සාකච්ඡා කළා. ඔවුන් එහි වැඩ කර කර්මාන්තශාලාවට තේ දලු ලබාදිය යුතුයි. වත්තට ගැට ගසා තිබෙන පුරවැසියා වත්තෙන් නිදහස් කර ගෙන නිදහස් ව්‍යවසායකයෙකු සහ නිදහස් ගොවියෙකු ලෙස ගොඩනැඟිය යුතුයි. ඒ සදහා නියමු ව්‍යාපෘතියක් අපි ඉතා ඉක්මනින් ආරම්භ කිරීමට කටයුතු කරනවා. එය අත්හදා බලා එය සාර්ථක නම් ඉදිරියටම ක්‍රියාත්මක කරනවා.
ඒ වගේම අපි දන්නවා වතුකරයේ වැටුප සාධාරණ වැටුප් තලයක නැහැ. අපි වතු සමාගම් සමග සාකච්ඡා කර දැනට ප්‍රකාශයට පත් කර ඇති 1700ක වැටුප ඉතා ඉක්මනින් ස්ථීර කර ගැනීම සඳහා රජයක් ලෙස ගත හැකි සෑම ක්‍රියාමාර්ගයක්ම ගන්නවා. අපේ ප්‍රධාන අභිප්‍රාය වන්නේ අපේ රටේ පුරවැසියන් දුප්පත්භාවයෙන් නිදහස් කර ගැනීමයි. ඒ නිසා ජාතික ජන බලවේගය ආණ්ඩුව මේ රටේ ජනතාව දුප්පත්භාවයෙන් නිදහස් කර ගන්නා ආණ්ඩුව බවට පත් කරනවා.
ඒ වගේම අපේ රටේ සංචාරක කර්මාන්තයට විශාල විභවතාවක් තිබෙනවා. ඇල්ල සංචාරක පරාදීසයක් බවට පත්ව තිබෙනවා. සංචාරක කර්මාන්තයේ විශේෂ කලාප තෝරාගෙන ඒ විශේෂ කලාපවල තිබෙන විශේෂ ගැටලු විසඳීම සඳහා විශේෂ මෙහෙයුම් ඒකකයක් ගොඩනැඟිමට බලාපොරොත්තු වෙනවා. ඒ අනුව මෙම වසර ලංකාවට වැඩිම සංචාරකයන් පැමිණෙන වසර බවට පත් කළ හැකි බවට වන සහතිකය අපි ඔබට ලබා දෙනවා.
ඒ වගේම මේ වසර ලංකාව වැඩිම අපනයන සිදු කරන වසර බවට පත් කිරීමට අපි සැලසුම් කර තිබෙනවා. එක්සත් ජනපදය සමග බදු ගැටලුව පිළිබඳ සාකච්ඡා කිරීමට අපේ නියෝජිත කණ්ඩායමක් සූදානම්ව සිටිනවා. කෙසේ හෝ මෙම ගැටලුව රටට හිතකර අන්දමින් විසඳා ගැනීම සඳහා අපි උත්සාහ කරනවා. ඒ සමගම ලංකාවේ වසරක් තුළ වැඩිම ඩොලර් ප්‍රමාණයක් වැඩම අපනයන ආදායමක් උපයන වසර බවට 2025 වසර පත්කරගත හැකි කියලා අපි ඔබට සහතිකයක් ලබා දෙනවා. නැවත වරක් අපේ රටේ ආර්ථික අර්බුදයක් සහ කඩාවැටීමක් නොවන ආකාරයෙන් වසරින් වසර ක්‍රමානුකූලව මේ රටේ ආර්ථිකය අපි ඉදිරියට ගෙන යනවා.
අද රටේ සියලුදෙනාටම නීතිය ක්‍රියාත්මක කිරීමට ජාතික ජන බලවේගය ආණ්ඩුව බැඳී සිටිනවා. මේ රටේ සිදුවූ සියලු අපරාධ පිළිබඳ අද පරීක්ෂණ ඉතා හොඳින් ක්‍රියාත්මක වෙනවා. ඉතා වැදගත්, රටම බලා සිටින පරීක්ෂණයක විමර්ශන දියත් වෙමින් තිබෙනවා. එහෙත් විමර්ශනයේ ඉදිරි පියවර ඉතාමත් සූක්ෂමව හා ප්‍රවේසම් සහගතව කළ යුතුව තිබෙනවා. ඒ නිසා ඇතැම් කරුණු ඔබට දැන්ම දැන ගැනීමට නොහැකි වේවි.
විමර්ශන ඉතා හොඳින් සිදුවන බවට සහතිකය මට ඔබට ලබාදිය හැකියි. කට ඇරපු නැති අය දැන් කට අරින්න පටන් ගෙන තිබෙනවා. සාක්ෂි දීමට බියේ සිටි අය දැන් සාක්ෂි දීමට පටන් ගෙන තිබෙනවා. සම්බන්ධ නැහැ කියපු අයගේ සබඳතා හෙළිදරව් වෙමින් තිබෙනවා. ඒ නිසා විමර්ශන නිසි ලෙස සිදු වෙනවා. අපි මේ රටේ කිසිදු අපරාධයක් කාලයේ වැලි තලාවට යටපත් වීමට ඉඩ නොතබා පුරවැසියන්ට සාධාරණය ඉටු කරන බවට මම සහතික වෙනවා.
ඒ නිසා අපි මෙම කටයුතු සාර්ථක කර ගනිමින් මේ රට ඉදිරියට ගෙන යාමට නම් නගර සභා සහ පළාත් සභා ශක්තිමත් කර ගත යුතුව තිබෙනවා. සොරකම් නොකරන මහජනතාවගේ මුදල් මහජනතාව වෙනුවෙන් පමණක්ම යොදවන පිරිසක් ඊට පත්කරගත යුතු වෙනවා. ඒ වෙනුවෙන් මෙම මැයි 06 වනදා ඔබ තම යුතුකම ඉටු කරනු ඇතැ’යි අපි විශ්වාස කරනවා.
(-නුවරඑළිය ජන රැලිය – 2025.04.19-) ජනපති තලවකැලේදී කියයි මීට පෙර ආණ්ඩු නිර්මාණය වූයේ ආණ්ඩු බලයට පත්වන අය වෙනුවෙන් වුවත් ජාතික ජන බලවේගය ආණ්ඩුව සෑම තීරණයක්ම ගන්නේ පොදු ජනතාව වෙනුවෙන් බව ජනාධිපති අනුර කුමාර දිසානායක මහතා පැවසීය. මේ රටේ ජනතාව ජාතික ජන බලවේගය කෙරෙහි තැබු විශ්වාසය කිසිදු අයුරකින් බිඳ වැටීමට ඉඩ නොදෙන බව ප්‍රකාශ කළ ජනාධිපතිවරයා […]
(-නුවරඑළිය ජන රැලිය – 2025.04.19-)
ජනපති තලවකැලේදී කියයි
මීට පෙර ආණ්ඩු නිර්මාණය වූයේ ආණ්ඩු බලයට පත්වන අය වෙනුවෙන් වුවත් ජාතික ජන බලවේගය ආණ්ඩුව සෑම තීරණයක්ම ගන්නේ පොදු ජනතාව වෙනුවෙන් බව ජනාධිපති අනුර කුමාර දිසානායක මහතා පැවසීය.
මේ රටේ ජනතාව ජාතික ජන බලවේගය කෙරෙහි තැබු විශ්වාසය කිසිදු අයුරකින් බිඳ වැටීමට ඉඩ නොදෙන බව ප්‍රකාශ කළ ජනාධිපතිවරයා පසුගිය ජනාධිපතිවරණයේදී සහ මහ මැතිවරණයේදී ජාතික ජන බලවේගයට ඡන්දය ලබා නොදුන් පිරිස්ද ආණ්ඩුවේ ගමන නිවැරදි බව සනාථ කරන පාලනයක් රට තුළ ඇති කරන බවද ප්‍රකාශ කළේය.
එසේම මතු පරපුර ජාතිය හෝ ආගම් මුල්කරගෙන යුද්ධ නොකරන රටක් නිර්මාණය කරන බවද ජනාධිපතිවරයා අවධාරණය කළේය. වතු ජනතාවට ස්වාධීන පුරවැසියන් ලෙස ජිවත්විය හැකි පරිසරය නිර්මාණය කරන බවද ජනාධිපතිවරයා මෙහිදී සඳහන් කළේය.
ජනාධිපති අනුර කුමාර දිසානායක මහතා මෙම අදහස් පළ කළේ, නුවරඑළිය, තලවකැලේදී අද (19) පැවති “ජය නියතයි ගම අපටයි” ජයග්‍රාහී ජන රැලිය අමතමිනි.
ජන රැලිය ඇමතු ජනාධිපති අනුර කුමාර දිසානායක මහතා වැඩිදුරටත් මෙසේද පැවසීය
පහුගිය මහ මැතිවරණයේදී නුවරඑළිය දිස්ත්‍රික්කයේ ජනතාව ජාතික ජන බලවේගයට විශාල ජයග්‍රහණයක් ලබා දුන්නා. ඒ ජයග්‍රහණය අනුව නුවරඑළිය දිස්ත්‍රික්කය ජාතික ජන බලවේගයේ මන්ත්‍රීවරුන් 05 දෙනෙක් නියෝජනය කරනවා. එළැඹෙන පළාත් පාලන මැතිවරණයේදී නුවරඑළිය දිස්ත්‍රික්කයේ ජයග්‍රහණය අපට විශ්වාසයි. පසුගිය වසරේ සැප්තැම්බර් 21 වෙනිදා වන තෙක් මේ රටේ බලය තිබුණේ එක පැළැන්තියකටයි. පවුල් කිහිපයක් අත තිබූ දේශපාලන බලය සැප්තැම්බර් 21 වෙනි දා පොදු ජනතාව අතට පත්වුණා.
පවුල් කිහිපයක පාලනය නිසා ණය බරින් මිරිකුණ රටක් බිහි වුණා. ඒ නිසාම ජනතාව මේ රටින් විදේශ රටවලට ගිහින් පදිංචි වුණා. එහෙත් ජනතාව පෙරට ඇවිත් පොදු ජනතාව අතට පාලන බලය ලබා ගෙන රට නිවැරදි දිශානතියකට ගෙන ඒමට කටයුතු කළා. ජනතාව ඉතාම නිර්භීත තීන්දුවක් අරගෙන ලංකා ඉතිහාසයේ පාර්ලිමේන්තු මැතිවරණයකදී වැඩිම මන්ත්‍රීවරු පිරිසක් සහිත ආණ්ඩුවක් ජාතික ජන බලවේගයට ලබා දුන්නා. එයින් පෙනී යන්නේ ජනතාව අප කෙරෙහි තබා ඇති විශ්වාසයයි.
ඔබ අප කෙරෙහි තබා ඇති එම විශ්වාසය බිංදුවකින්වත් කඩා වැටෙන්න ඉඩ තබන්නේ නැහැ. අපට ඡන්දය ලබා නොදුන්න අයත් අපේ පාලනය දැක ජාතික ජන බලවේග නිවැරදියි කියන තැනට ගෙන ඒමට අප කටයුතු කරනවා. මේ රට ගොඩනැඟිම සඳහා හොඳම අවස්ථාව දැන් ලැබී තිබෙනවා. මීට කලින් ආණ්ඩු හැදුණේ ආණ්ඩු බලයට පත්වන අය වෙනුවෙනුයි. තාත්තා පාර්ලිමේන්තුවට ගිය විට පුතත් පාර්ලිමේන්තු යනවා. අයියා පාර්ලිමේන්තුවේ ඉන්නකොට මල්ලි මහ ඇමති වෙනවා. එයාලා ඇති තරම් මහජනයාගේ ධනය නාස්ති කළා. එයාලා එකතු කරගෙන තියෙන ධනය දිහා බැලුවහොත් මේ ආයු කාලයේදී වියදම් කරලා ඉවර කරන්න පුළුවන් කමක් නැහැ. ඒ තරම් ධනයක් ඔවුන් රැස් කරගෙන තිබෙනවා.
ජාතික ජන බලවේගය ගන්න හැම තීන්දුවක්ම ගන්නේ මේ රටේ ජනතාව වෙනුවෙනුයි. අපිට ඡන්දය දීපු හෝ අපේ පක්ෂයේ ඉන්න අයවලුන් වෙනුවෙන් නොවෙයි. අපි මේ රට හදනවා. අප මේ රට භාරගන්නා විට විශාල ලෙස කඩා වැටීමට ලක්ව තිබුණා. ගෑස් තිබුණේ නැහැ. ඉන්ධන තිබුණේ නැහැ. බැංකු පොලි අනුපාතය දිනපතා ඉහළ යන ආර්ථිකයක් තිබුණේ. ආර්ථිකය පිළිබඳ විශාල අවිනිශ්චිතතාවක් තිබුණා. අපේ පාලන කාලය ඇතුළත ක්‍රමානුකූලව ආර්ථිකය ස්ථාවර කරන්න සමත් වුණා. මෙවර සිංහල හින්දු අලුත් අවුරුද්ද තමයි මෑත ඉතිහාසයේ ජනතාව එකතු වී සතුටින්ම ගත කළ සිංහල හින්දු අලුත් අවුරුද්ද.
ජනතාවට පහසුකම් සහිත ජන ජීවිතයක් උරුම කර දීම සඳහා අප ක්‍රමානුකූලව තීන්දු තීරණ ගනිමින් තිබෙනවා. රාජ්ය සේවයේ අවශ්‍යතාව අප හොඳින් දැන ගෙන තිබෙනවා. කෝටි 14,000ක් රාජ්ය සේවක වැටුප් සඳහා වෙන් කර තිබෙනවා. මහා මාර්ග ඉදිකිරීම් සඳහා මුදල් වෙන් කර තිබෙනවා. මේ වසර සඳහා ප්‍රාග්ධන වියදම් ලෙස විශාල ලෙස මුදල් වෙන් කර තිබෙනවා. එම මුදල් වියදම් කිරීමට හැකි වේ දැ’යි පොඩි සැකයක් තිබෙනවා. ඒ නිසා රාජ්ය සේවයට අලුතින් 30,000ක් බඳවා ගැනීමට තීන්දුවක් ගත්තා. රැකියාව සඳහා ලියුම් ගන්න කිසි කෙනෙක් මන්ත්‍රී ගාවට යා යුතු නැහැ. අපි පත්තරේ දැන්වීම දාන්නම්, විභායට වාඩි වී වැඩිම ලකුණු ගන්න දරුවා රාජ්ය සේවයට බඳවා ගන්නවා. එහෙමයි රට හදන්නේ.
පොලිසිය සඳහා අලුතින් 10,000ක් බඳවා ගැනීමට තීන්දු කර තිබෙනවා. මේ වසරේදී 2000ක් පොලිසියට බඳවා ගන්නවා. එම 2000න් 500ක් දෙමළ තරුණ තරුණියන් බඳවා ගැනීමට අප තීන්දු කර තිබෙනවා. තමන්ගේ මව් භාෂාවෙන් පැමිණිල්ලක් දාන්න බැරි නම්, රාජ්ය ආයතයකට ගොස් දෙමළෙන් ලිපි ලේඛනයක් ගන්න බැරි නම් ඒ අයට හිතෙන්නෙ නෑ මේක මගේ මවු රට කියලා. එම නිසා අපි සෑම දෙනාගේම මවු රට ලෙස ජීවත් විය හැකි රටක් නිර්මාණය කරනවා.
උතුරේ ජනතාව දෙමළ නායකයින් දෙමළ පක්ෂවලින් තෝරන්න කල්පනා කරනවා. දකුණේ ජනතාව සිංහල පක්ෂවලින් බෞද්ධ නායකයන් තෝරනවා. නැගෙනහිර ජනතාව මුස්ලිම් පක්ෂවලින් මුස්ලිම් නායකයින් තෝරනවා. කඳුරට ජනතාව කඳුකරයේ පක්ෂ තෝරනවා. එහෙත් ලංකා ඉතිහාසයේ පළමු වතාවට පසුගිය මහ මැතිවරණයේදී උතුරේ ජනතාවත්, දකුණේ ජනතාවත්, නැගෙනහිර ජනතාවත්, කඳුරට ජනතාවත් ජාතික ජන බලවේගය තෝරා ගත්තා. ක්‍රෝධය වෛරය වපුරන දේශපාලනය වෙනුවට ජාතික සමගිය තෝරන ජනතාවක් එකතු වී තිබෙනවා. මෙය ජනතාව ලැබූ ජයග්‍රහණයක්.
අපි ජනතාවගේ අදහස් ප්‍රකාශ කිරීමේ අයිතියට ගරු කරනවා, ඕනෑම දේශපාලන මතවාදයක් දැරීමේ අයිතියට ගරු කරනවා. එහෙත් ජාතිවාදී කිසිදු කරුණකට අපි මින් ඉදිරියට ඉඩ තබන්නේ නැහැ. ඒ සඳහා අවශ්‍ය නම් නීති ගෙන ඒමටත් කටයුතු කරනවා. මේ රටේ ඉපදෙනවා නම්, මේ රටේ ආර්ථිකයට දායකත්වය සපයනවා නම්, මේ රටේ මියැදෙනවා නම්, ඔවුන් ශ්‍රී ලාංකිකයෝ. ඒ සියලුදෙනාටම තිබෙන්නේ එකම අයිතිවාසිකම්. සියලුදෙනාගේම අයිතිවාසිකම් එක සමානව පිළිගන්න ආණ්ඩුවක් අපි නිර්මාණය කර තිබෙනවා.
අපේ දරුවන්ගේ පරම්පරාව කිසි දිනක ජාතිය හෝ ආගම් මුල් කරගෙන යුද්ධ කරන්නේ නැති රටක් අපි හදනවා. අපි බලය ගන්නේ මන්ත්‍ර පොල්ලක් අතේ තියාගෙන නොවෙයි. අපි බලය ගන්නෙ සාමාන්‍ය ජනතාව ලෙසයි. එහෙත් අපට අරමුණක් තිබෙනවා. ඒ අරමුණ වෙනුවෙන් අපි කැප වී තිබෙනවා.
අපි රාජ්ය සේවකයන්ගේ අවම වැටුප විශාල ලෙස වැඩි කළා. භාණ්ඩාගාරයේ ධනය ජනතාව වෙත යා යුතුයි කියන විශ්වාසයේ අප සිටිනවා. අධ්‍යාපනය වෙනුවෙන්, සෞඛ්‍යය වෙනුවෙන් විශාල ලෙස මෙවර අයවැයෙන් මුදල් වෙන් කළා. දැනට තිබෙන අපේ අධ්‍යාපනය දෙමාපියන්ට බරක් වගේම දරුවන්ට පීඩාවක් වෙලා තිබෙනවා. එම නිසා 2026 වසරේදී අධ්‍යාපන ප්‍රතිසංස්කරණයක් සිදු කිරීමට අපි කටයුතු කරනවා. හය ශ්‍රේණිය සහ පළමුවන ශ්‍රේණියේ අධ්‍යාපන ප්‍රතිසංස්කරණය ලබන වසරේ සිට ආරම්භ කරනවා. ග්‍රාමීය දුප්පත්භාවය තුරන් කිරීමේදී ප්‍රධානම ඉලක්කය වන්නේ අධ්‍යාපනයට හොඳ අවස්ථාවක් ලබා දීමයි. අපි මහපොළ ශිෂ්‍යාධාර වැඩි කලා. විශේෂ වැටුප්තල හරහා විද්‍යාව විෂයයන් වලට අදාළ ගුරුවරුන් බඳවා ගැනීමටත් සැලසුම් කර තිබෙනවා.
බීජ පර්යේෂණ ආයතනය නැවත ගොඩනඟනවා. සාධාරණ මිලකට ගොවියාට බීජ ලබා දෙන්න අපි සැලසුම් කර තිබෙනවා. වෙළඳපොළෙහි තිබෙන කෘමිනාශකවලින් හරි අඩක මිලකට කෘමිනාශක ලබා දීමට ආණ්ඩුව කටයුතු කර තිබෙනවා. වතු ජනතාවට දෛනික වැටුප 1700ක් ලබා දීමට සාකච්ඡා කරමින් තිබෙනවා. අපි වතු ජනතාවට ස්වාධීනව ජීවත්වීමට හැකි පරිසරයක් නිර්මාණය කරනවා. වත්තේ කොටස් එම පුරවැසියන්ට ලබා දීමට අවධානය යොමු කර තිබෙනවා. මේ පළාතෙන් නව ව්‍යවසායකයන් බිහි විය යුතුයි. ඒ සඳහා අවශ්‍ය ණය සහ තාක්ෂණය රජයෙන් ලබා දීමට කටයුතු කරනවා. ග්‍රෙගරි වැවට කේබල් කාර් ව්‍යාපෘතියක් ආරම්භ කිරීමට කටයුතු කරනවා. සීතාඑළිය කෝවිල අවට සංචාරක කර්මාන්තය නඟා සිටුවීමට ආධාර ලබා දීමට ඉන්දියාව කැමැත්ත පළ කර තිබෙනවා. ඔබට අවශ්‍ය අලුත් ආර්ථික අවස්ථා ලබා දීමට අපි කටයුතු කරනවා. ආර්ථිකයේ නව පරිවර්තනයක් ඇති කරමින් සියලු ජනතාවගේ ජීවන තත්ත්වය උසස් කිරීමට අපි කටයුතු කරනවා.
පුරවැසියාට පවුලේ වෛද්‍යවරයෙක් ලබා දීමට අපි කටයුතු කරනවා. එය මේ වසර තුළ නියමු ව්‍යාපෘතියක් ලෙස ක්‍රියාත්මක කරනවා. පොදු ප්‍රවාහනය නංවාලීමටත් අපි කටයුතු කරනවා. නව ප්‍රවාහන පද්ධතියක් ඇති කිරීමට මෙවර අයවැයෙන් මුදල් වෙන් කර තිබෙනවා. එය නගරවල නියමු ව්‍යාපෘතියක් ලෙස සිදු කරමින් ගම දක්වා ගෙන යාමට සැලසුම් කර තිබෙනවා. අපේ රටේ ජනයාගේ කිසිදු මුදලක් නාස්ති නොකරන ආණ්ඩුවක් අද බිහි වී තිබෙනවා. මහජනයාගේ මුදල් සතයක් හොරකම් කරන්නේ නැති පිරිසක් අපි සමඟ සිටිනවා. පගා ඉල්ලන්නේ නැති ආණ්ඩුවක් නිසා ආයෝජකයන් මේ රටට පැමිණෙමින් තිබෙනවා.
වංචා දූෂණ සිදු කළ අයට දඬුවම් දිය යුතු නැද්ද? වංචා දූෂණය කළ අයට දඬුවම් දීමේ වුවමනාව පොදු ජනතාවට වඩා මට තිබෙනවා . නීතිය කාටත් පොදු වීම දියණු රටක ලක්ෂණයක්.
ඉන්දියානු ආධාර යටතේ නිවාස ව්‍යාපෘතියක් නුවරඑළියට ලැබී තිබෙනවා. එය කඩිනමින් අවසන් කර ජනතාව ලබා දීමට අපි කටයුතු කරනවා. මේ සියල්ල අයිති ජනතාවටයි. මීට පෙර තිබුණේ දිය ඇල්ලක් දුටුවහොත් එයත් දේශපාලඥයාට අයිති ලෙසයි. එහෙත් වර්තමාන දේශපාලනය එහෙම නැහැ. මේ සියල්ලම ජනතාව සතු දේවල්. අපි ඒ සියල්ල ආරක්ෂා කරනවා. ඒ නිසා මැයි 06 වෙනි දා පළාත් පාලන ආයතන ජයග්‍රහණය ජාතික ජන බලවේගයට ලබා දීමට ජනතාව දෙපාරක් හිතන්න අවශ්‍ය වෙන්නේ නැහැ. මධ්‍යම ආණ්ඩුව හොරකම් නොකරන දේශපාලන අධිකාරියක් අද රටේ තිබෙන්නේ. ඒ නිසා පළාත් පාලන ආයතනත් හොරකම් නොකරන පිරිසකගෙන් පිරවිය යුතුයි. ඒ සඳහා සියලුදෙනා එකතුවෙලා වැඩ කරමු.
(-2024.04.17 ජන රැලිය – යාපනය -) – ජනපති යාපනයේ දී කියයි කුමන වේශයෙන් ජාතිවාදය යළි රට තුළ හිස එසවීමට උත්සාහ කළද එය පරාජය කිරීමට ගත හැකි සෑම පියවරක්ම ජාතික ජන බලවේගයේ ආණ්ඩුව ගන්නා බව ජනාධිපති අනුර කුමාර දිසානායක මහතා ප්‍රකාශ කළේය. ජාතිවාදය අවුලන කණ්ඩායම් ආණ්ඩුවට කුමන ආකාරයේ ලේබල් ගැසීමට උත්සාහ ගත්තද උතුරේත්, දකුණේත් ජනතාවගේ අයිතිවාසිකම් […]
(-2024.04.17 ජන රැලිය – යාපනය -)
– ජනපති යාපනයේ දී කියයි
කුමන වේශයෙන් ජාතිවාදය යළි රට තුළ හිස එසවීමට උත්සාහ කළද එය පරාජය කිරීමට ගත හැකි සෑම පියවරක්ම ජාතික ජන බලවේගයේ ආණ්ඩුව ගන්නා බව ජනාධිපති අනුර කුමාර දිසානායක මහතා ප්‍රකාශ කළේය.
ජාතිවාදය අවුලන කණ්ඩායම් ආණ්ඩුවට කුමන ආකාරයේ ලේබල් ගැසීමට උත්සාහ ගත්තද උතුරේත්, දකුණේත් ජනතාවගේ අයිතිවාසිකම් ආරක්ෂා කරමින් රට තුළ ජාතික සමගිය ගොඩනැඟීමට කැප වන බවද ජනාධිපතිවරයා අවධාරණය කළේය.
ජනාධිපති අනුර කුමාර දිසානායක මහතා මේ බව ප්‍රකාශ කළේ “ජය නියතයි ගම අපිටයි” ජන රැලි මාලාවේ තවත් ජන රැලියකට අද (17) යාපනයේදී එක් වෙමිනි.
ආණ්ඩුව කිසි විටෙක, කිසිදු පළාතක ජනතාවකගේ අයිතිවාසිකම් හෝ උරුමයන් උදුරා ගැනීමට කිසිසේත් කටයුතු නොකරන බවද මෙහිදී පැවසූ ජනාධිපතිවරයා තිස්ස විහාරයේ ගැටලුව විසඳීමට නම් ඒ මත තිබෙන දේශපාලනය ඉවත් විය යුතු බවද සඳහන් කළේය.
යාපනය යළි යථා තත්ත්වයට ගෙන ඒමට ගත හැකි සෑම පියවරක්ම ගන්නා බවත්, යුද්ධයේ අමිහිරි ඉතිහාසය සහ අප අමතක කළ යුතු ඉතිහාසය නැවත නැවත පෑරීමට ඉඩ නොදෙන බවත් පැවසූ ජනාධිපතිවරයා යාපනයේ ජනතාවගේ ගැටලු විසඳමින් නව නගර සැලැස්මක් ඔස්සේ යාපනය යළි ගොඩනැඟීමට කටයුතු කරන බවද පැවසීය.
අතුරුදහන් වූවන්ගේ දෙමාපියන් සහ ඥාතීන් අත්විඳින වේදනාව තමා හොදින් දන්නා බවද සඳහන් කළ ජනාධිපතිවරයා එම වේදනාව සමනය වීමට නම් ඔවුන් සත්‍යය දැන ගත යුතු බවත්, සත්‍යය එළිදරව් කිරීම වෙනුවෙන් ආණ්ඩුවක් ලෙස අවශ්‍ය කටයුතු සිදු කරන බවත් පැවසීය.
රටේ ජනතාව එක්ව ජාතික ජන බලවේගය ආණ්ඩුව පත් කර ගත්තේ අලුත් පරිඡේදයක් රට තුළ ආරම්භ කිරීමට බව වැඩිදුරටත් සඳහන් කළ ජනාධිපති අනුර කුමාර දිසානායක මහතා මේ ආරම්භ වී තිබෙන්නේ කළු අතීතය අවසන් කර අලුත් අනාගතයක් කරා රට ගෙන යන නව පරිච්ඡේදයක් බවත් යළි ගොඩනැඟෙමින් තිබෙන රටට පැමිණ ආයෝජනය කරන ලෙස තමා දෙමළ ඩයස්පෝරාවට ආරාධනා කරන බවත් පැවසීය.
ජනරැලිය ඇමතු ජනාධිපතිවරයා වැඩිදුරටත් මෙසේද පැවසීය.
පසුගිය පාර්ලිමේන්තු මැතිවරණයේදී මේ යාපනය දිස්ත්‍රික්කයෙන් ඓතිහාසික ජයග්‍රහණයක් ජාතික ජන බලවේගයට ලබා දීම පිළිබඳව මම පළමුවෙන්ම ඔබට ස්තුතිවන්ත වෙනවා. මේ රටේ හැමදාම මැතිවරණවලදී සිදු වුණේ ජනතාව අතර බෙදීමක් ඇති වීමයි. එහෙත් පසුගිය මහ මැතිවරණයේදී උතුරේ, දකුණේ සහ නැගෙනහිර සිංහල, මුස්ලිම්, දෙමළ සියලු ජනතාවගේ තෝරා ගැනීම වුයේ ජාතික ජන බලවේගයයි. පසුගිය මැතිවරණයේදී බෙදෙනවා වෙනුවට ජනතාව රට වෙනුවෙන් එකතු වුණා. එසේ එක් වූ අප යළි කිසිදිනක නැවත බෙදිය යුතු නැහැ. එකිනෙකා බියෙන් සැකෙන් ජීවත් වන රටක් අපට අවශ්‍ය නැහැ.
ජාතික ජන බලවේගයේ ආණ්ඩුවේ අපේක්ෂාව සිංහල, දෙමළ, මුස්ලිම් සියලුදෙනා එකට ජීවත්වන, එකට මියැදෙන එකම මාතෘ භූමියක් ලෙස, මේ රටේ සෑම පුරවැසියෙකුටම සමාන අයිතිවාසිකම් ලැබෙන සාධාරණ රටක් ගොඩනැඟීමයි. අපි එකිනෙකාට වෛර කරගෙන තිබෙනවා. යුද්ධ කරගෙන තිබෙනවා. එහෙත් අපිට කිසිවක් ඉතිරි වුණේ නැහැ. අපට ඉතිරි වුණේ විනාශ වූ උතුරු පළාතක්, දරුවන් අහිමි වූ දෙමාපියන් පමණයි. ඥාතීන්, මිතුරන් සියලුදෙනා අපිට අහිමි වුණා. උතුරේත්, දකුණේත් එය සිදු වුණා. නැවත එවන් යුගයක් අපට අවශ්‍ය නැහැ. අප දැන් එය අවසන් කළ යුතුයි. අපේ පරම්පරා යුද්ධ කරගත්තා. ගහගත්තා. එහෙත් අපේ දරුවන්ගේ පරම්පරාවට යුද්ධ කරගන්නේ නැති රටක්, ගහගන්නේ නැති රටක් සහ සියලුදෙනා සමගියෙන් ජිවත්වන රටක් ජාතික ජන බලවේගය විසින් ගොඩනඟන බවට මම ඔබට සහතික වෙනවා.
තවදුරටත් අපේ රටේ ජාතිවාදය නැහැ. ජාතිවාදය අවශ්‍ය දේශපාලනඥයන්ටයි. ඔබ දන්නවා තිස්ස විහාරය කේන්ද්‍ර කරගෙන ප්‍රශ්නයක් තිබෙනවා. පසුගිය පාර්ලිමේන්තු උපදේශක කාරක සභාවේදී මම ප්‍රකාශ කළා තිස්ස විහාරයේ ප්‍රශ්නය විසඳන්න පහසුයි. ඒ ප්‍රශ්නය පසුබිම් කරගෙන ක්‍රියාත්මක වන උතුරේ සහ දකුණේ දේශපාලනය ඉන් ඉවත් විය යුතුයි කියලා. තිස්ස විහාරයේ ප්‍රශ්නය විසඳිය හැකියි ඒ මත තිබෙන දේශපාලනය ඉවත් කළහොත්. විහාරාධිපති ස්වාමින් වහන්සේ, එම ගමේ ජීවත්වන පුරවැසියන්, නාග විහාරයේ ස්වාමීන් වහන්සේ එකතු වුණොත් මේ ප්‍රශ්නය විසඳිය හැකියි. දේශපාලනඥයන්ට නැවත අවශ්‍ය ජාතිවාදයයි. අපි ආණ්ඩුවක් ලෙස කිසි විටෙක, කිසිදු පළාතක ජනතාවකගේ අයිතිවාසිකම් හෝ උරුමයන් උදුරා ගැනීමට කිසිසේත් කටයුතු කරන්නේ නැහැ. මේ රටේ කොතැනක පුරාවස්තුවක් හමු වුණත්, කොතැනක ඓතිහාසික නටඹුන් හමු වුණත් අපි සිංහල, දෙමළ, මුස්ලිම් කියා බලන්න අවශ්‍ය නැහැ. අපි ඒ දෙස බැලිය යුත්තේ රටේ උරුමයක් ලෙසයි. එහෙත් දැන් පුරාවස්තු සහ ඓතිහාසික නටඹුන් මතු වූ විට එය සිංහලද, දෙමළද කියලා හොයනවා. එය ජාතිවාදියාගේ ස්වභාවයයි. එහෙත් ඒවා ආරක්ෂා කරගෙන අනාගත පරපුර වෙනුවෙන් රැක දීම වෙනුවෙන් අපි කටයුතු කරනවා.
මෙම ජාතිවාදී පිරිස් ජනතාවගෙන් ප්‍රතික්ෂේප වුණා. එහෙත් යළි එම ජාතිවාදය මත රට තුළ ගැටුම් ඇති කිරිමට උත්සාහ කරනවා. එහෙත් මොන වේශයෙන්, මොන ආකාරයෙන් යළිත් ජාතිවාදය නැගිටීමට උත්සාහ කළත් එය පරාජයට පත් කිරීමට ජාතික ජන බලවේගයේ ආණ්ඩුව ගත හැකි සෑම පියවරක්ම ගන්නා බව මම ඔබට ප්‍රකාශ කරනවා. අපට ජාතික සමගිය අවශ්‍යයි. මෙම යාපනයේ පාරම්පරික දේශපාලන නායකයෝ සිටියා. පාරම්පරික පක්ෂ තිබුණා. මෙම විශාල පක්ෂ තිබියදී, මහා නායකයන් සිටියදී ඔබ අප කෙරෙහි විශ්වාසය තැබුවා. කුමන දුෂ්කරතා හමුවේ වුවද ඔබ අප කෙරෙහි තැබූ විශ්වාසය කිසිසේත් බිඳ වැටීමට ඉඩ නොදෙන බව මම ඔබට සහතික වෙනවා. ඔබ අප කෙරෙහි විශ්වාස තබමින් විසඳා ගැනිමට අපේක්ෂා කරන ප්‍රශ්න තිබෙනවා. අපි ඒවා විසදනවා. කුමන ආකාරයේ ලේබල් ගැසීමට උත්සාහ කළත් ජාතිවාදී කණ්ඩායම් කුමන ආකාරයේ විරෝධතා පළ කළත් අපි ඔබේ අයිතිවාසිකම් ආරක්ෂා කරමින් ජාතික සමගිය ආරක්ෂා කිරීම වෙනුවෙන් ගත යුතු සියලු පියවර ගන්නවා.
පළමුවෙන්ම ආරක්ෂක හේතුන් මත ආණ්ඩුවට පවරා ගත් ජනතාවට අයත් ඉඩම් නිදහස් කිරීමට කටයුතු කරනවා. තවදුරටත් ආරක්ෂක හේතුන්වලට මුවා වෙමින් ජනතාවගේ ඉඩම් ආණ්ඩුව අතේ තබා ගැනීමට අයිතියක් නැහැ. නිදහස් කළ හැකි හැම ඉඩමක්ම නිදහස් කරනවා. ඔබ ඉඩම්වල පදිංචි වෙන්න. වගා කරන්න. අපි වැඩ කරන්නේ යුද්ධයක් එයි කියා බලාගෙන නොවෙයි, යුද්ධය එන එක නතර කරන්නයි ජාතික ජනබලවේගය වැඩ කරන්නේ. ආණ්ඩුවක වගකීම එයයි.
මේ ප්‍රදේශයේ විශාල මාර්ග ප්‍රමාණයක් වසා දමා තිබුණා. අපි පියවරින් පියවර ඒ පාරවල් යළි විවෘත කරනවා. ඔබ නිදහසේ කටයුතු කරන්න. කොළඹත් පාරවල් වසා දමා තිබුණා. ජනාධිපති මන්දිරය ඉදිරිපිට මාර්ගය, අරගලිය මන්දිරය ඉදිරිපිට මාර්ගය වහලයි තිබුණේ. අපි එම පාරවල් විවෘත කළා. ජනාධිපති, අගමැති මන්දිර ඉදිරිපිට පාරවල් අරින්න පුළුවන් නම් යාපනයේ පාරවල් වහගෙන ඉන්න අයිතියක් නැහැ. අපි යළි යථා තත්ත්වයට මෙම යාපනය ගෙන එනවා. යුද්ධයේ අමිහිරි ඉතිහාසය, අපි අමතක කළ යුතු ඉතිහාසය නැවත නැවත පාරන්න ඉඩ දෙන්නේ නැහැ.
අතුරුදන් වූවන් පිළිබඳ ප්‍රශ්නයක් තිබෙන බව මම දන්නවා. අපි හැකි තරම් උත්සාහ කරනවා. ඔබේ දරුවා ආණ්ඩුවට භාරදුන්නා නම් පොලිස් ස්ථානයකට හෝ හමුදා කදවුරකට භාර දුන්නා නම් ඔහුට කුමක් වූවා දැයි සොයා බැලිය යුතුයි. එය වගකීම් සහගත රජයක වගකීමක්. අතුරුදන් වූ දරුවන්ගේ දෙමාපියන්ගේ වේදනාව මම දන්නවා. සාමාන්‍යයෙන් කෙනෙක් මිය ගිය විට අපි දේහය දකිනවා. ආගමික වතාවක් සිදු කරනවා. අපි අතින්ම භූමදානය කරනවා. කාලයත් සමග අපි සුවපත් වෙනවා. එහෙත් දරුවෙක් අතුරුදන් වූ විට එසේ නොවෙයි. විශාල වේදනාවක් තිබෙනවා. මගේ ඥාති සහෝදරයාත් අතුරුදන් වුණා. ඒ නිසා මම එම වේදනාව දන්නවා. එම වේදනාව සමනය වීමට නම් දරුවන් පිළිබඳ සත්‍ය ප්‍රකාශ කළ යුතුයි. ඒ කිසිවෙකුගෙන් පළි ගැනීමට නොවෙයි. එය සාමදානය සදහා අවශ්‍යයි. අපි ආණ්ඩුවක් ලෙස එය ඉටු කරනවා. ඉතිහාසයේ ජීවත්වීමෙන් සහ එහි වේදනාවෙන් අපි මිදිය යුතුයි. අපි අලුත් පරිච්චේදයක් ආරම්භ කළ යුතුයි. ඒ වෙනුවෙන් තමයි ඔබ අප කෙරෙහි විශ්වාසය තැබුවේ. පැරණි දේ අවශ්‍ය නම් ඔබ පැරණි පක්ෂ තෝරා ගන්නවා. ඔබ අපව තෝරා ගත්තේ අලුත් දේ වෙනුවෙන්. නොබියව එම අලුත් දේ කරන බව අපි සහතික වෙනවා. එය කළ යුතුයි. අපි අපේ රටයි. අපි කවුරුත් ජීවත්වන රටයි.
එපමණක් නොවෙයි ක්‍රමානුකූලව ජනතාවගේ ජීවිත නඟාසිටුවිය යුතුයි. පැරණි පාලකයින් මේ රටේ ආර්ථිකය විශාල ලෙස බිඳ දැමුවා. ඉන්ධන, ඖෂධ ගෙන එන්න බැරි ණය ගෙවාගත නොහැකි රටක් හැදුවා. එහෙත් අපි දැන් ක්‍රමානුකූලව රටේ ආර්ථිකය ගොඩනඟමින් තිබෙනවා. අපි ඒ සදහා සෑම රටකින්ම සහාය ලබා ගන්නවා. අපේ පරමාර්ථය මේ රට ගොඩනැඟීමයි. ඒ වගේම ගොඩනැඟෙන ආර්ථිකයේ ප්‍රතිලාභ මේ රටේ ජනතාවට ලබාදීමටද අප මේ වන විට කටයුතු කරමින් සිටිනවා.
මම පසුගියදා මෙම යාපනයේ දිස්ත්‍රික් කමිටු රැස්වීමට සහභාගී වූණා. එහිදී අපිට යෝජනා ගණනාවක් ඉදිරිපත් වුණා. අපි ඒ හැම යෝජනාවකටම මෙවර අයවැයෙන් මුදල් වෙන් කළා. කන්කසන්තුරේ ජනාධිපති මන්දිරය යාපනයට වැදගත් ව්‍යාපෘතියක් වෙනුවෙන් ලබාදෙන්න මම සූදානම් බව මම එහිදී දැනුම් දුන්නා. එවන් ස්ථාන ජනතාව වෙනුවෙන් වැඩකරන ස්ථාන බවට පත් කළ යුතුයි. අපේ දරුවන්ට රැකියා උත්පාදනය වන ස්ථාන විය යුතුයි. අපි ඒ වෙනුවෙන් ඒවා නිදහස් කරනවා.
ඒ වගේම මෑත කාලයේ මේ පළාතේ පාරවල් හදන්න වෙන් කළ වැඩිම ප්‍රතිපාදනය ලෙස රුපියල් දස ලක්ෂ 5000ක් අපි මෙවර අයවැයෙන් වෙන් කළා. එපමණක් නොවෙයි, ඉතිහාසයේ ඉතාමත් කළු සිදුවීමක් යාපනය පුස්තකාලය සමඟ ගැට ගැසී තිබෙනවා. පුස්තකාලයක් විනාශ කිරීම අපේ හදවත් පෑරුවා. පුස්තකාලයකට ගිනි තැබීම තමයි ජාතිවාදයේ උච්චතම අවස්ථාව. අපි මේ වසරේ පුස්තකාලයේ පහසුකම් ඇති කිරීම වෙනුවෙන් රුපියල් කෝටි 10ක් වෙන් කළා.
එපමණක් නෙවෙයි මේ නගර සභාව සඳහා විශාල ගොඩනැගිල්ලක් තිබෙනවා. එහෙත් කිසිම වැඩක් වෙන්නේ නැහැ. එය විශාල ගොඩනැගිල්ලක්. අපේ ගම්වල ගෙවල් ඉතා කුඩයි. අපේ නගර සභාව ඉතා විශාලයි. අපි නැවත එහි රාජකාරී ආරම්භ කළ හැකි අන්දමින් ප්‍රතිසංස්කරණය කිරීම සඳහා දස ලක්ෂ 400ක් වෙන් කර තිබෙනවා. මේවා හදලා ජනතාවගේ තැන් බවට පත් කළ යුතුයි.
ඒ වගේම උතුරු පළාතේ ජනතාව මහ පොළොවත් සමඟ හැපෙන ජනතාවක්. අපි පොහොර සහනාධාරය 15,000 සිට 25,000 දක්වා වැඩි කළා. එළවළු සහ පලතුරු වගාව සඳහාත් අපි පොහොර සහනාධාරය ලබා දීමට කටයුතු කරනවා. උතුරු පළාතේ අක්කර 16,000ක පොල් වගා කළ හැකියි. නව පොල් ත්‍රිකෝණයක් හදන්න පුළුවන්. ඒ සඳහා ආණ්ඩුව සහාය ලබා දිය යුතුයි. අපි ඒ සඳහා මිලියන 500ක් වෙන් කළා. පොල්වගා කරන ගොවීන්ට ආණ්ඩුවෙන් පොල් පැළ ලබා දෙනවා. පොල් පොහොර ලබා දෙන්නම්. පොල්වලවල් කපා බිම සකස් කරන්න මුදල් ලබා දෙන්නම්. වගා කරන්න සූදානම් වෙන්න. උතුර, දකුණ, නැගෙනහිර භේදයකින් තොරව අපි යළි මේ රට ගොඩනැඟීම සඳහා වෙහෙසෙමු.
මේ උතුරු පළාතේ සංචාරක ව්‍යාපාරයට විශාල ලෙස ඉඩප්‍රස්ථා තිබෙනවා. එහෙත් ආරුගම්බේට හෝ දකුණට යන තරම් උතුරට සංචාරකයෝ එන්නේ නැහැ. අභ්‍යන්තර ගුවන් සේවය තව දුරටත් ශක්තිමත් කර කොළඹට පැමිණෙන සංචාරකයින් ගුවනින් යාපනයට එන වැඩපිළිවෙළක් සකස් කරනවා. යාපනය නව සංචාරක ගමනාන්තයක් බවට පත් කරනවා. ලබන වසරේදී පැරණි යාපනය නිරූපණය වන ආකාරයේ නව සංවර්ධන සැලැස්මක් සහිතව යාපනය නගරය නඟාසිටුවීමට අප අපේක්ෂා කරනවා. යාපනය ඓතිහාසික නගරයක් ලෙස පිළිබිඹු විය යුතුයි. ඔවුන්ගේ සංස්කෘතිය, ඉතිහාසය පිළිබිඹු වන ලෙස යළි ගොඩනැඟීම සඳහා මේ වන විට නාගරික සංවර්ධන අධිකාරිය සැලසුම් සකස් කරනවා. ලබන වසරේ ඊට අප මුදල් වෙන් කරනවා.
ඒ වගේම යාපනයේ ජනතාවගේ පානීය ජල ගැටලුව සහ කැළිකසළ ප්‍රශ්නය විසඳීමට අපි කටයුතු කරනවා. අපි උතුර, නැගෙනහිර දකුණ භේදයකින් තොරව හැම පළාතකම ජනතාවට සලකමින් රට ඉදිරියට ගෙන යා යුතුයි කියන ආණ්ඩුවක්.
ඒ වගේම අපි දන්නවා 1983 සිට දෙමළ ජනතාව විශාල පිරිසක් මේ රට අතහැර ගියා. අද ඔවුන් ලෝකයේ විශාල ව්‍යාපාරිකයන් සහ ධනවතුන් බවට පත්ව තිබෙනවා. මම දෙමළ ඩයස්පෝරාවේ සියලුදෙනාට ආරාධනා කරනවා ඔබගේ ඥාතින් සිටින භූමිය ගොඩනඟන්න, ඔවුන්ගේ ආර්ථිකය ගොඩනඟන්න හැකිතරම් ආයෝජනය කරන්න යළි ලංකාවට එන්න කියා අපි ආරාධනා කරනවා.
දැන් මේ රට සුරක්ෂිතයි. ජාතිවාදයෙන් තොර රටක් බවට පත්ව තිබෙනවා. සෑමදෙනාගේම අයිතිවාසිකම් සාධාරණ ලෙස පිළිගන්න රටක්. හැම සංස්කෘතියකටම ගරු කරන රටක්. ඒ නිසා නැවත මේ රට ගොඩනඟන්න ඔබගේ ආයෝජන යොදවන ලෙස මම ආරාධනා කරනවා. මෙය නව පරිච්ඡේදයක් පැරණි කළු අතීතය අවසන් කර අලුත් අනාගතයක් කරා යන පරිච්ඡේදයක්. එය ඉතා වැදගත් දේශපාලන පරිවර්තනයක්. එය අපගේ අම්මලා, තාත්තලා දීර්ඝ කාලයක් පුරා ප්‍රාර්ථනා කළ දෙයක්. විවිධ ආකාරයෙන් ඔවුන් මෙවන් ආණ්ඩුවක් අපේක්ෂා කළා.
දැන් ඒ ආණ්ඩුව හදලා තිබෙනවා. මහජනතාවගේ මුදල් සතයක් සොරකම් නොකරන ආණ්ඩුවක් අද හදලා තිබෙනවා. පැරණි දේශපාලනය මේ රට දුප්පත් කළා. ජනතාව දුප්පත් කළා. එහෙත් පාලකයන් පොහොසත් වුණා. අපි එම සංස්කෘතිය අවසන් කර තිබෙනවා. දැන් සියලුදෙනා එක්වෙලා ප්‍රාදේශීය සභා සහ නගර සභා ශක්තිමත් කර ගනිමින් එම වැඩපිළිවෙළ ඉදිරියට ගෙන යමු කියා ආරාධනා කරනවා.
(-2024.04.17 ජන රැලිය – මන්නාරම-) ජනතා අදහස් අනුව මන්නාරම – පුත්තලම යා කරන නව මාර්ගයක් සුළං බලයෙන් විදුලිය උත්පාදනයට මන්නාරම සතු විභවතාව ප්‍රයෝජනයට ගැනීම ජනතා අදහස් අනුවයි උතුරේ අක්කර 16,000ක පොල් වගාවට සැලසුම් – ජනපති මන්නාරමේදී පවසයි ජාතිවාදී ආණ්ඩු වෙනුවට මෙරට ඉතිහාසයේ පළමු වතාවට ජාතික සමගියේ ආණ්ඩුවක් ගොඩනැගී තිබෙන බව ජනාධිපති අනුර කුමාර දිසානායක මහතා […]
(-2024.04.17 ජන රැලිය – මන්නාරම-)
ජනතා අදහස් අනුව මන්නාරම – පුත්තලම යා කරන නව මාර්ගයක්
සුළං බලයෙන් විදුලිය උත්පාදනයට මන්නාරම සතු විභවතාව ප්‍රයෝජනයට ගැනීම ජනතා අදහස් අනුවයි
උතුරේ අක්කර 16,000ක පොල් වගාවට සැලසුම්
– ජනපති මන්නාරමේදී පවසයි
ජාතිවාදී ආණ්ඩු වෙනුවට මෙරට ඉතිහාසයේ පළමු වතාවට ජාතික සමගියේ ආණ්ඩුවක් ගොඩනැගී තිබෙන බව ජනාධිපති අනුර කුමාර දිසානායක මහතා පැවසීය.
තවදුරටත් රට තුළ ජාතිවාදයට ඉඩක් නොමැති බව අවධාරණය කළ ජනාධිපතිවරයා වත්මන් රජය සිංහල, දෙමළ, මුස්ලිම් සියලු ජනතාවට සහෝදරත්වයෙන් සලකන සහ සියලුදෙනාගේ අයිතිවාසිකම් පිළිගන්නා ආණ්ඩුවක් බවද පැවසීය.
ජනාධිපති අනුර කුමාර දිසානායක මහතා මේ බව සඳහන් කර සිටියේ “ජය නියතයි ගම අපිටයි” ජන රැලි මාලාවේ තවත් ජන රැලියකට අද (17) මන්නාරමේදී එක් වෙමිනි.
පාරිසරික ප්‍රශ්න පිළිබඳ සාකච්ඡා කර දැනට ඉදිකෙරෙමින් තිබෙන මන්නාරම – පුත්තලම මාර්ගයට විකල්ප යෝජනා සහිතව නව ආකාරයෙන් මන්නාරම සහ පුත්තලම යා කිරීමට බලාපොරොත්තු වන බවද ජනාධිපතිවරයා මෙහිදී පැවසීය. මෙම මාර්ගය විවෘත කිරීමෙන් පුත්තලම දක්වා දුර කි.මි 90කින් පමණ අඩුවන බවද පෙන්වා දුන් ජනාධිපතිවරයා වත්මන් ආණ්ඩුව මේ රටේ ජනතාවට ඇහුම්කන් දෙන මෙන්ම ජනතාව වෙනුවෙන් වැඩකරන ආණ්ඩුවක් බවද අවධාරණය කළේය.
එසේම මන්නාරම සහ රාමේශ්වරම් අතර බෝට්ටු සේවාව නැවත ආරම්භ කිරීමට ඉන්දියානු රජය සමග සාකච්ඡා කරමින් තිබෙන බවත්, සුළං බලයෙන් විදුලිය උත්පාදනයට මන්නාරම සතු විභවතාව ප්‍රයෝජනයට ගැනීම වෙනුවෙන් ජනතා අදහස්ද විමසමින් පාරිසරික හානිය අවම වන පරිදි කටයුතු කිරීමට ආණ්ඩුව සූදානම් බවත් ජනාධිපතිවරයා පැවසීය.
පසුගිය යුද සමයේ ආරක්ෂක හේතුන් මත රජයට පවරාගත් සහ වන සංරක්ෂණ දෙපාර්තමේන්තුව යටතේ ගැසට් කෙරුණු උතුරේ ඉඩම් නැවත ජනතාවට ලබාදීමට සහ වසා දැමුණු මාර්ග නැවත විවෘත කිරීමට අවශ්‍ය පසුබිම සකසන බවද පැවසු ජනාධිපතිවරයා ඉන්දියානු රජය සමඟ සාකච්ඡා කර පේසාලේ ප්‍රදේශයේ නීති විරෝධි ලෙස මසුන් ඇල්ලීමේ ගැටලුව විසඳා ගැනීමට කටයුතු කරන බවද සඳහන් කළේය.
ජන රැලිය ඇමතු ජනාධිපති අනුර කුමාර දිසානායක මහතා වැඩිදුරටත් මෙසේද පැවසීය
ලංකාවේ පළමු වතාවට මැතිවරණයකදී බෙදුණු දේශපාලනය අපි අවසන් කර දැමුවා. මීට පෙර මැතිවරණවලදී සිදු වුණේ ජනතාව බෙදීමයි. උතුරේ ජනතාව දෙමළ පක්ෂත්, නැගෙනහිර ජනතාව මුස්ලිම් පක්ෂත්, දකුණේ ජනතාව සිංහල පක්ෂත් තෝර ගන්නවා. නමුත් පසුගිය මහ මැතිවරණයේදී උතුර, දකුණ, නැගෙනහිර දෙමළ, මුස්ලිම්, සිංහල සියලුදෙනා තේරාගත්තේ ජාතික ජනබලවේගය ආණ්ඩුවයි. එම මැතිවරණයේදි අපි සියලුදෙනා එක් වුණා. ඒ නිසා නැවත කිසිදිනක අපි බෙදෙන්නේ නැතිව දේශපාලනය කරමු.
සියලු ජාතීන් එකට ජීවත්වන සමගියෙන් පිරිණු රටක් අපිට අවශ්‍යයි. අපි සියලුදෙනා ජාතිවාදයෙන් බැට කෑවා. එකිනෙකා අතර සැකය ඇති වුණා. ගැටුම් ඇති වුණා. යුද්ධය ඇති වුණා. මේ හමුවේ අපි ඇති තරම් ජාතිවාදී ගැටලුවලට මුහුණ දුන්නා. තවදුරටත් අපේ රට තුළ ජාතිවාදයට ඉඩ දෙන්නේ නැතිව ජාතික සමගිය ආරක්ෂා කර ගැනීම සඳහා අපි අලුත් ආණ්ඩුවක් හදලා තිබෙනවා. මෙය තමයි සමගියේ ආණ්ඩුව. වත්මන් ආණ්ඩුව සිංහල, දෙමළ මුස්ලිම් සියලු දෙනාට සහෝදරත්වයෙන් සලකන ආණ්ඩුවක්. ඒ වගේම සියලු දෙනාගේ අයිතිවාසිකම් පිළිගන්න ආණ්ඩුවක්. මීට පෙර මෙවන් ආණ්ඩු ගොඩනැගී තිබුණේ නැහැ. එදා පැවතියේ ජාතිවාදී ආණ්ඩු. දැන් ජාතික සමගියේ ආණ්ඩුවක් හැදිලා තිබෙනවා. අපි පියවරින් පියවර මේ රට ගොඩනැගීම සඳහා සැලසුම් සකස් කර තිබෙනවා.
ජාතික සමගිය නිර්මාණය කිරීම වෙනුවෙන් ව්‍යවස්ථාවේ අයිතිවාසිකම්, නීති අණපනත්වල අයිතිවාසිකම්, භාෂාවේ අයිතිවාසිකම්, ආගම් ඇදහීමේ අයිතිවාසිකම්, සංස්කෘතික අනන්‍යතාව පිළිගැනීමේ අයිතිවාසිකම් අපි තහවුරු කරනවා. මේ රටේ තවදුරටත් ලොකු, පොඩි කියා ජන කණ්ඩායම් නැහැ. ඉන්නේ එකම ජන කණ්ඩායමයි. සිංහල, දෙමළ, මුස්ලිම් වේවා, උතුරේ, දකුණේ, නැගෙනහිර වේවා හැම තැනම ජීවත්වන්නේ ශ්‍රී ලාංකේය ජනතාව පමණක් බව අප සිහිපත් කරන්න කැමැතියි. ඒ සඳහා අවශ්‍ය නීති ප්‍රතිසංස්කරණ අපි සිදු කරනවා. බෙදුණු යුගය අපි අවසන් කරනවා.
අපි දන්නවා උතුරේ යුද්ධය හේතු කොට ගෙන ජනතාවගේ ඉඩම් ආණ්ඩුවට පවරා ගැනීම සිදු වුණා. ඇතැම් මාර්ග වසා දැමීමටත්, ඇතැම් පුද්ගලික ඉඩම් වන සංරක්ෂණ දෙපාර්තමේන්තුව යටතට ගැසට් කිරීමත් සිදුව තිබෙනවා. අපි ඒ සියල්ල විසදා ජනතාවට නිදහසේ තමන්ගේ වැඩ කටයුතු කර ගැනීමට සහ තමන්ගේ ඉඩම්වල පදිංචිවීමටත්, වගා කිරීමටත් අවශ්‍ය පරිසරය සකස් කර දෙනවා.
ඒ වගේම අපි දන්නවා අපේ රට සංවර්ධනය කිරීමේදී මේ මන්නාරම ඉතා වැදගත් ප්‍රදේශයක්. මෙම අලංකාරවත් මුහුදු තීරය ඉතා වටිනා සම්පත් අපට එක්රැස් කර දී තිබෙනවා. මන්නාරමේ ජනතාව විශාල පිරිසක් ධීවර කර්මාන්තයෙන් ජිවත් වෙනවා. නමුත් අපි දන්නවා මේ පේසාලේ ප්‍රදේශයේ මත්ස්‍ය සම්පත නෙළා ගන්නේ කවුද කියලා. නීති විරෝධි මසුන් ඇල්ලීමේ බෝට්ටු හරහා විශාල විනාශයක් අපේ මුහුදට සිදු කරමින් තිබෙනවා. පසුගියදා ඉන්දියානු අග්‍රාමාත්‍යවරයා සමග අප ඒ පිළිබඳ දීර්ඝ ලෙස සාකච්ඡා කළා. අපේ මුහුද සහ අපේ මසුන් අපේ ජනතාවට අයිතියි. ඒ නිසා මෙම ප්‍රශ්නය විසදා ගැනීම සඳහා අපි උත්සාහ කරනවා. ඒ වගේම මුහුදේ සිදුවන සියලු නීති විරෝධී ක්‍රියාවන්ට එරෙහිව කටයුතු කරන ලෙස අපි නාවික හමුදාවට උපදෙස් ලබා දී තිබෙනවා. අපේ මුහුද ආරක්ෂා කර ගැනීමට අපේ හමුදාවන්ගේ වගකීමක්. අපි එය ඉටු කරනවා.
ඒ වගේම කෘෂිකර්මාන්තයට අදාළ ඉඩම් ගැටලු අපි විසදනවා. පොහොර සහනාධාරය ලබා දෙන්නම්. ඒ වගේම වී ගබඩා ප්‍රතිසංස්කරණය කර වී මිලදී ගන්නම්. ඔබ වැඩ කිරීමට සූදානම් වන්න. ඊට අවශ්‍ය සහාය අපි ලබා දෙනවා.
එසේම මෙම මන්නාරම සහ රාමේශ්වරම් අතර විශාල බෝට්ටු සේවාවක් තිබුණා. යළි එම බෝට්ටු සේවාව ආරම්භ කිරීමට අපි ඉන්දියානු රජය සමග සාකච්ඡා කරමින් සිටිනවා. ඒ වගේම මෙම මන්නාරම ප්‍රදේශය සුළං බලයෙන් විශාල ලෙස විදුලිය උත්පාදනය කළ හැකි ස්ථානයක්. පසුගිය සමයේ ජනතාවගේ හඩට ඇහුම්කන් නොදී පරිසර විනාශයන් සිදුවන ආකාරයට එම ව්‍යාපෘතිවලට එකඟතාව පළ කර තිබෙනවා. ඒ නිසා අපි ඒ සියල්ල තාවකාලිකව නතර කර තිබෙනවා. නමුත් මේ සම්පතින් ප්‍රයෝජන ගැනීම සඳහා ජනතා අදහස් විමසමින් පාරිසරික හානිය අවම වන පරිදි ජනතාගේ ජීවිතවලට හානියක් නොවන ආකාරයට වැඩ කරන්න අපි සූදානම්.
මේ ප්‍රදේශය ගැන දන්නේ ඔබයි. ඒ නිසා අපි මේ පරිසරය විනාශ කරන විනාශකාරී ව්‍යාපෘතිවලට ඉඩ ලබා දෙන්නේ නැහැ. සෑම ව්‍යාපෘතියක්ම ජනතාවගේ එකඟතාවෙන් අවම පරිසර හානියෙන් සිදු කිරීමට අපි අපේක්ෂා කරනවා. ඔබ දන්නවා මේ මන්නාරම සහ පුත්තලම අතර මාර්ගය දීර්ඝ කාලයක් තිස්සේ වසා දමා තිබෙනවා. මෙම මාර්ගය විවෘත කිරීමෙන් පුත්තලම දක්වා යන දුර කි.මි 90ක් පමණ අඩු වෙනවා. පාරිසරික ප්‍රශ්න පිළිබඳ සාකච්ඡා කර දැනට ඉදිකෙරෙමින් තිබෙන මාර්ගයට විකල්ප යෝජනා සහිතව නව ආකාරයෙන් මන්නාරම සහ පුත්තලම යා කිරීමට අපි බලා පොරොත්තු වෙනවා. ආණ්ඩුවක වගකීම වන්නේ ජනතාවට පහසුකම් සැලසීමයි. ජනතාව පීඩාවට පත් කිරීමට සහ ගැටලුවලින් බැඳ තැබීමට ආණ්ඩු තිබී වැඩක් නැහැ. ඒ නිසා මේ රටේ ජනතාවට ඇහුම්කන් දෙන ආණ්ඩුවක් සහ ජනතාව වෙනුවෙන් වැඩ කරන ආණ්ඩුවක් අපි හදලා තිබෙනවා.
අපි දන්නවා මීට අවුරුදු දෙක හමාරකට, තුනකට කළින් අපේ රටේ ආර්ථිකය මුළු මනින්ම කඩා වැටී තිබුණා. මේ මන්නාරමේත් එම ආණ්ඩුවල හිටපු ඇමතිවරු සිටියා. රාජ්ය ඇමතිවරු සිටියා. ජනාධිපතිවරු, අගමැතිවරු, ඇමතිවරු, රාජ්ය ඇමතිවරු, මන්ත්‍රීවරු මේ සියලුදෙනා එක් වී අපේ රටේ ආර්ථිකය බිඳ දැමුවා. ඉන්ධන, ඖෂධ ආනයන කරන්න බැරි රටක් තිබුණේ. එයින් පීඩාවට පත් වුණේ මේ රටේ ජනතාවයි. ගැටලු නිර්මාණය කළ අය පීඩාවට පත් වුණේ නැහැ. ඒ නිසා මේ රටේ ජනතාව එක්වී මේ ආණ්ඩුව හැදුවා. දැන් අපි ක්‍රමානුකූලව නැවත රටේ ආර්ථිකය ස්ථාවර කර තිබෙනවා.
අවුරුදු පහ, හයකට පසු විශාලම ඩොලර් සංචිතය අද අපේ රටේ තිබෙනවා. මාස හයක් තිස්සේ රුපියල සෙළවෙන්නේ නැතිව තිබෙනවා. අපි තෙල් මිල අඩු කළා, රාජ්ය සේවකයන්ගේ වැටුප් වැඩි කළා, අස්වැසුම දීමනාව වැඩි කළා පමණක් නොවෙයි ජූලි මාසයේ අලුතින් පවුල් ලක්ෂ හතරකට අස්වැසුම ලබා දීමට කටයුතු කරනවා. අපි ජනතාව බලා ගත යුතුයි. පාසල් දරුවන්ට අවශ්‍ය සියලු නිල ඇදුම් ලබා දෙනවා. සිසුන් 300ට අඩු පාසල්වල දරුවන්ට නොමිළේ සපත්තු ලබා දෙනවා.
සිසුන් ලක්ෂ 16කට පාසල් පොත් සහ උපකරණ මිලදී ගැනීමට රුපියල් හයදහස බැගින් ලබාදීමට කටයුතු කළා. එපමණක් නොවෙයි වසර ගණනාවකින් පසුව අලුතින් 30,000ක් රාජ්ය සේවයට බදවා ගැනීමට කටයුතු කරනවා. අද රැකියා ලබා ගැනීමට මන්ත්‍රීවරු පිටුපස යාමට අවශ්‍ය නැහැ. පුවත් පත් දැන්වීමක් පළ කරනවා. ඔබ අයදුම් පත් යොමු කරන්න. විභාගයෙන් වැඩිම ලකුණු ගන්න පිරිසට රැකියාව ලැබෙනවා.
රාජ්ය සේවයේ දෙමළ භාෂාවෙන් කතා කරන අයගේ හිඟයක් තිබෙනවා. ඒ වගේම පොලිසියේ දෙමළ භාෂාවෙන් කතා කරන අයගේ හිඟයක් තිබෙනවා. ඒ නිසා දෙමළ භාෂාව කතා කරන අය පොලීසියට අවශ්‍යයි. අපි මේ වසරේ අලුතින් පොලිසියට 2,000ක් බඳවා ගන්නවා. දෙමළ භාෂාව කතා කරන ඔබගේ දරුවන්ද පොලිස් සේවයට බඳවන්න. එය ඉතා ගෞරවාන්විත රැකියාවක්. අපේ රටේ නීතිය හා සාමය රැකීමට තිබෙන රැකියාවයි. අපි ඔවුන්ට හොද වැටුප් තලයකුත් ලබා දෙනවා. ඒ වගේම තව පහසුකම් අපි ලබා දෙනවා. ඒ වගේම රාජ්ය සේවයට දෙමළ භාෂාවෙන් කථා කරන අය එක් විය යුතුයි. අපි එකතුවෙලා මේ රට හදන්න ඕන.
මහා ආණ්ඩුව, ජනාධිපතිවරයා ලෙස මම සහ අපේ කැබිනට් මණ්ඩලය සහ මන්ත්‍රීවරු කිසි කෙනෙක් මහජනයාගේ රුපියලක්වත් හොරකම් කරන්නේ නැහැ. රුපියලක්වත් නාස්ති කරන්නේ නැහැ. ලංකාවේ පළමු වතාවට හොරකම් කරන්නේ නැති ආණ්ඩුවක් හදලා තිබෙනවා. මහජනයාගේ ධනය නාස්ති නොකරන ආණ්ඩුවක් හදලා තිබෙනවා. මේ ලංකා ඉතිහාසයේ කිසිදා එවන් ආණ්ඩුවක් නිර්මාණය වී තිබුණේ නැහැ. ජනාධිපතිවරයා ලෙස පත් වූ දා සිට ඇමති ධූරයට පත් වූ දිනයේ සිට හොරකම් කිරීමටයි සැලසුම් කළේ. අද අපි රට හදන්නයි සැලසුම් කරන්නේ. අපි මේ ආණ්ඩුව ආරක්ෂා කර ගනිමින් ශක්තිමත් කළ යුතුයි. අපි හොරකම් කරන්නේ නැහැ වගේම හොරකම් කරපු අයට සහතික වශයෙන්ම දඩුවම් ලබා දෙනවා.
මිනිස් ඝාතනය, පාස්කු ප්‍රහාරය මේ සියල්ල පිළිබඳ අපි සොයනවා. අපේ රටේ ජනතාව නීතියට අනුගත වුණත් පාලකයන් නීතියට ඉහළින් කටයුතු කරමින් නීතිය පාගා දැමුවා. එවන් රටකට ඉදිරියට යන්න බැහැ. අද දියුණු වූ සෑම රටකම නීතිය කාටත් සමානයි. අපි ඒ කටයුත්ත සිදු කරනවා.
අපි එකතුවෙලා ඉදිරියට යමු. මේ වසරේ උතුරු පළාතේ පාරවල් හදන්න දශ ලක්ෂ පන්දහසක් වෙන් කර තිබෙනවා. ඒ වගේම උතුරේ පොල් වගාව සංවර්ධනය කිරීමට විශාල මුදලක් වෙන් කර තිබෙනවා. ඔබ පොල් වගා කිරීමට සූදානම් නම් පැළ ටික ලබා දීම, බිම සකස් කර ගැනීමට මුදල් ලබා දීම සහ පොහොර සදහා මුදල් ලබාදීමට ආණ්ඩුව කටයුතු කරනවා. මේ වසරේ උතුරේ අක්කර 16,000ක පොල් වගා කිරීමට මුදල් වෙන් කර තිබෙනවා. එසේනම් මේ ප්‍රාදේශීය සභා ශක්තිමත් කර ගැනීමට අපි කටයුතු කරමු. ඒ සඳහා යෝජනා ලබා දෙන්න. අපි මුදල් වෙන් කරනවා. නමුත් අපි විශ්වාසදායක පිරිසක් ඊට පත් කර ගත යුතුයි. ඒ සඳහා මෙවර මැතිවරණයේදී ඔබ ඔබේ යුතුකම ඉටු කරන්න. අපි ඉදිරියට යමු.
(-2024.04.12 ජන රැලිය – කන්තලේ නගරය-) රට දියුණු වීමට නම් ලොකු පොඩි භේදයකින් තොරව සියලුදෙනාට සමව නීතිය ක්‍රියාත්මක විය යුතු බවත් ජාතික ජන බලවේග ආණ්ඩුව හදමින් තිබෙන්නේ හැම දෙනාම නීතියට යටත් යන පණිවිඩය සහිත රට බවත් ජනාධිපති අනුර කුමාර දිසානායක සහෝදරයා ප්‍රකාශ කළේය. ජනාධිපති අනුර කුමාර දිසානායක සහෝදරයා මේ බව පැවසුවේ, “ජය නියතයි ගම අපිටයි” […]
(-2024.04.12 ජන රැලිය – කන්තලේ නගරය-)
රට දියුණු වීමට නම් ලොකු පොඩි භේදයකින් තොරව සියලුදෙනාට සමව නීතිය ක්‍රියාත්මක විය යුතු බවත් ජාතික ජන බලවේග ආණ්ඩුව හදමින් තිබෙන්නේ හැම දෙනාම නීතියට යටත් යන පණිවිඩය සහිත රට බවත් ජනාධිපති අනුර කුමාර දිසානායක සහෝදරයා ප්‍රකාශ කළේය.
ජනාධිපති අනුර කුමාර දිසානායක සහෝදරයා මේ බව පැවසුවේ, “ජය නියතයි ගම අපිටයි” ජන රැලි මාලාවේ තවත් ජන රැලියකට පසුගිය 12වනදා කන්තලේ නගර‍යේදී එක් වෙමිනි.
ජන රැලිය ඇමතූ ජනාධිපතිවරයා වැඩිදුරටත් සඳහන් කළේ ප්‍රදේශයේ ගොවි ජනතාවගේ ප්‍රධාන ගැටලුවක් වූ ඉඩම් ගැටලුවට විසඳුම් ලබා දෙමින් ගොවියාගේ ඉඩමේ අයිතිය බැහැර කිරීමට ඉඩ නොදෙන ආකාරයේ නව ඔප්පුවක් ලබා දීමට කටයුතු කරන බවයි.
එමෙන්ම දෙමාපියන්ට බරක් සහ දරුවන්ට පිඩාවක් වූ මෙරට අධ්‍යාපන ක්‍රමය වෙනස් කරමින් එළඹෙන ජනවාරි මාසයේ සිට දරුවන්ට බරක් නොවන නව විෂය නිර්දේශ හඳුන්වාදීමට රජය සැලසුම් කර ඇති බව ජනාධිපතිවරයා පැවසීය.
රටේ එක් දරුවෙකු හෝ පහසුකම් නොමැතිකමින් හෝ ගුරුවරුන් නොමැතිකමින් අධ්‍යාපනයෙන් පිටමන් නොවිය යුතු බව අවධාරණය කළ ජනාධිපතිවරයා ආණ්ඩුවේ මැදිහත්වීමෙන්කුඩා පාසල්වල සිටින දරුවන් ඒ ආසන්නයේ පිහිටි පහසුකම් ඇති පාසල්වලට යොමු කිරීමේ වැඩපිළිවෙළක් ඉදිරියේදී ක්‍රියාත්මක කරන බවද පැවසීය.
ජන රැලිය ඇමතු ජනාධිපති අනුර කුමාර දිසානායක සහෝදරයා වැඩිදුරටත් මෙසේද පැවසීය.
පසුගිය සැප්තැම්බර් 21 වනදා අපේ රටේ විශාල දේශපාලන හැරවුමක් සිදු වුණා. එතෙක් අපේ රට පාලනය කළ පවුල් සංස්ථා කිහිපයක් අත හුවමාරු වෙමින් තිබූ බලය පළමු වතාවට පොදු ජනතාව අතට පත් වුණා. ඒ වගේම පසුගිය මහ මැතිවරණයේදී එය වඩාත් ශක්තිමත් වුණා.
ඒ අනුව, ජනතා අපේක්ෂා ඉටු කරමින් ජනාධිපති ධුරයේත්, පාර්ලිමේන්තුවේත් බලය ජාතික ජන බලවේගය ආණ්ඩුව විසින් පිහිටුවා ගනු ලැබුවා. මේ වන විට අප ජාතික මට්ටමෙන් විශාල වැඩකොටසක් සිදු කරමින් තිබෙනවා. අපේ රට සුඛිතමුදිත රාජ්‍යයක්ව තිබුණේ නැහැ. අපි භාරගත්තේ හැම පැත්තෙන්ම කඩා වැටුණු රටක්. උගතුන් සහ බුද්ධිමතුන් රට හැර ගියා. ඒ අනුව අපේ ආණ්ඩුවේ පළමු අභියෝගය බවට පත් වුණේ මේ රටේ ආර්ථිකය ස්ථාවර කිරීමයි.
රටක් ගොඩනැඟීමටනම් පළමුව රට තුළ ආර්ථික ස්ථාවරභාවය නිර්මාණය කළ යුතුයි. ඒ අනුව මාස හයක් ගත වන විට අපේ රටේ ආර්ථිකයේ සැලකිය යුතු ස්ථාවරභාවයක් ඇති කිරීමට ආණ්ඩුවට සමත්වූ බව මම සතුටින් ප්‍රකාශ කරනවා. අද එම ආර්ථික ස්ථාවරත්වයේ සංඥාවන් අපට පෙනෙන්ට තිබෙනවා. අද ඩොලරය අඛණ්ඩව ස්ථාවර මට්ටමක පවත්වාගෙන යාමට හැකි වී තිබෙන අතර උද්ධමනය අවම කර ගනිමින් පහළ අගයක පවත්වාගෙන යාමටත්,බැංකු පොලී අනුපාතය අඛණ්ඩව 10%ක අගයට පහළින් පවත්වාගෙන යාමටත් කටයුතු කර තිබෙනවා.
ආර්ථිකයක් අස්ථාවර වූ විට රටේ ඉදිවෙමින් තිබෙන ව්‍යාපෘති අතරමඟ නතර වන අතර, එම ආයෝජකයන් රටින් පිට වෙනවා. පසුගිය කාලය තුළ අපේ රටේ එලෙස අතරමග නතර වූ ව්‍යාපෘති සියල්ලේමවැඩ නැවත ආරම්භ කිරීමට අපි කටයුතු සූදානම් කර තිබෙනවා.
මේ අයුරින් ස්ථාවර වන ආර්ථිකයේ ප්‍රතිලාභ ජනතාව වෙත ගලා ආ යුතුයි. ඒ අනුව මෙම වසරේ ප්‍රාග්ධන වියදම් ලෙස රුපියල් මිලියන 1400ක් වැය කිරීමට අප තීරණය කර තිබෙනවා. ලංකා ඉතිහාසයේ කිසිදු කාලයක ප්‍රාග්ධන වියදම් වෙනුවෙන් මෙවන් විශාල මුදලක් වෙන් කර නැහැ. මෙම මුදල් වෙන් කිරීම පමණක් ප්‍රමාණවත් වන්නේ නැහැ. මෙම මුදල් වැය කරමින් එම ප්‍රදේශයේ වැඩ කිරීමට ශක්තිමත් රාජ්ය නිලධාරී යාන්ත්‍රණයක් තිබිය යුතුයි. අපේ රටේ රාජ්ය නිලධාරි යාන්ත්‍රණය බිඳ වැටී තිබුණා. අපි රාජ්ය සේවය ශක්තිමත් කිරීම වෙනුවෙන් මෑතකදී රාජ්ය නිලධාරින් වෙනුවෙන් සිදු කළ වැඩිම වැටුප් වැඩි කිරීම මෙවර අයවැයෙන් සිදු කළා.
අපි එතනින් නතර වී නැහැ. සාමාන්‍ය ජනතාවට සහන ලබාදීමට අපි කටයුතු කර තිබෙනවා. අස්වැසුම ප්‍රතිලාභය වැඩි කිරීමට මෙන්ම එය ලැබිය යුතු සියලුදෙනා වෙත ලබාදීමට අවශ්‍ය පියවර අපි ගෙන තිබෙනවා. ඒ වගේම සිසුන් 300ට වඩා අඩුවෙන් සිටින සෑම පාසලකම සිසුන්ට සපත්තු නොමිලේ ලබාදීමට අපි කටයුතු කර තිබෙනවා. මෙවන් කටයුතු සිදු වන්නේ ලංකාවේ පළමු වතාවටයි. පාසල් පොත් සහ උපකරණ මිලදී ගැනීමට මුදල් නැති දරුවන්ට රුපියල් 6,000ක් ලබාදීමට අපි තීරණය කළා. මේ වසරේ සිසුන් ලක්ෂ 16කට පාසල් පොත් සහ උපකරණ ලබා ගැනීමට රුපියල් හයදහස බැගින් අපි ලබා දුන්නා. ඒ වගේම වැඩිහිටි දීමනාව, වකුගඩු රෝගීන්ගේ දීමනාව සහ මහපොළ ශිෂ්‍යාධාරය වැඩි කිරීමට අපි කටයුතු කළා. මේ අයුරින් අපි ආර්ථිකයේ ඉතිරි කරගත් ධනය ජනතාව අතර බෙදා දෙමින් සිටිනවා.
රටේ ආර්ථිකය ගොඩනැඟීමට අපට තවත් විශාල සැලසුම් තිබෙනවා. සංචාරක කර්මාන්තයේ විශාල පිම්මක් ගත යුතුයි. ඒ වගේම ධීවර කර්මාන්තයේ නව පිම්මක් අවශ්‍යයි. කෘෂිකර්මාන්තය ඉතා වැදගත් වෙනවා. අපි රුපියල් 15,000ක්ව තිබූ පොහොර සහනාධාරය 25,000 දක්වා වැඩි කළා. එපමණක් නොවෙයි යල කන්නයේ සිට කුඹුරක අතුරු බෝග වගා කරනවානම් අතුරු බෝග වගා කරන ගොවීන්ටද රුපියල් 15,000 බැගින් පොහොර සහනාධාර ලබාදීමට කැබිනට් මණ්ඩලයේදී තීරණයක් ගත්තා.
ඒ වගේම වී මිල ස්ථාවරව තබා ගැනීමට අපි සමත් වුණා. ගබඩා ප්‍රතිසංස්කරණය කරමින් වී මිල අඩු වුවහොත් මිලදී ගැනීමට අවශ්‍ය සැලසුම් සකස් කරනු ලැබුවා. පෞද්ගලික අංශය වී මිල පහළ දැමුවොත් ආණ්ඩුව වී මිලදී ගැනීමට සැලසුම් සකස් කළා. එහිදී මහ කන්නය වෙනුවෙන් පමණක් වී මිලදී ගැනීමට අපි රුපියල් කෝටි 500ක් වෙන් කළා. බීජ ගොවිපොළවල් ප්‍රතිසංස්කරණය කර අඩු මිලට බීජ ලබාදීමට අපි කටයුතු කරනවා. මේ අයුරින් කෘෂිකර්මාන්තය දියුණු කිරීම සඳහා ආණ්ඩුව වේගවත් වැඩපිළිවෙළක් සකස් කර තිබෙනවා.
ඒ වගේම කන්තලේට සම්පතක් වූ දීර්ඝ කාලයක් පුරා වසා දමා තිබෙන කන්තලේ සීනි සමාගම යළි ආරම්භ කිරීම සඳහා අවශ්‍ය සැලසුම් අපි සකස් කර තිබෙනවා.
මේ පළාත්වල ජනතාවගේ ඉඩම් ප්‍රශ්න තිබෙනවා. විධිමත් ඔප්පුවක් සහ හිමිකම් පත්‍රයක් නොමැතිකමින් ගැටලු ගණනාවකට මුහුණ දී තිබෙනවා. මෙම ගැටලුව විසඳමින් ගොවියාගේ ඉඩමේ අයිතිය බැහැර කිරීමට ඉඩ නොදෙන ආකාරයේ අලුත් ඔප්පුවක් අපි ගොවි ජනතාවට ලබා දෙනවා. දෙමව්පියන්ගෙන් පසු දූදරුවන්ට එම ඉඩම් අයිති වන ආකාරයේ නව නීති සමඟ එම ඉඩම් ලබාදීමට කටයුතු කරනවා.
ඒ වගේම අපි අධ්‍යාපනය වෙනුවෙන් විශාල වෙහෙසක් දරමින් කටයුතු කරනවා. අද දරුවන්ගේ අධ්‍යාපනය දෙමාපියන්ට බරක් වගේම දරුවන්ට පීඩාවක් වී තිබෙනවා. දරුවන් යන්ත්‍ර බවට පත් කර ඇති මෙම අධ්‍යාපන ක්‍රමය වෙනස් කරමින් එළඹෙන ජනවාරි මාසයේ සිට දරුවන්ට බරක් නොවන නව විෂය නිර්දේශ අපි හදුන්වා දෙනවා. දරුවන්ට අධ්‍යාපනයට ලැබීමට අවශ්‍ය පහසුකම් අපි ලබා දෙනවා. ඒ වගේම ඇතැම් කුඩා පාසල් පිළිබඳ තීන්දු තීරණ ගනිමින් ඒ ආසන්නයේ තිබෙන පහසුකම් ඇති පාසල්වලට ආණ්ඩුවේ මැදිහත්වීමෙන් දරුවන් යොමු කරනවා. රටේ එක් දරුවෙක්වත් පහසුකම් නැතිව හෝ ගුරුවරුන් නැතිව අධ්‍යාපනයෙන් පිටමන් නොවිය යුතුයි. ඒ නිසා අපි වැඩිම බර තබා තිබෙන්නේ අධ්‍යාපනයටයි. අද අපේ දෙමව්පියෝ තමන්ගේ දරුවන්ගේ අධ්‍යාපනය වෙනුවෙන් දරන වැය බර අපි අඩු කරනවා.
ඒ වගේම අපේ ප්‍රවාහන ක්ෂේත්‍රය සඳහා අපි විශාල වැඩසටහනක් සකස් කර තිබෙනවා. පහසුකම් සහිත අලුත් ප්‍රවාහන සේවයක් ලංකාවේ ආරම්භ කිරීම සඳහා අයවැය ලේඛනයෙන් දැනටමත් අපි කෝටි 300ක් වෙන් කර තිබෙනවා.එම ප්‍රවාහන සේවය නගරයෙන් ආරම්භ කර වසර කිහිපයක් තුළ ගම දක්වා ව්‍යාප්ත කරනවා. අපේ ආණ්ඩුවේ ප්‍රධානතම වගකීම වන්නේ අධ්‍යාපනය, ප්‍රවාහනය සහ සෞඛ්‍යයයි. නීරෝගී සම්පන්න ජීවිතයක් වෙනුවෙන් අපි සෞඛ්‍ය සේවය නඟා සිටුවනවා. ඒ සඳහා මේ වසරේදී නියමු ව්‍යාපෘතියක් අපි සැලසුම් කර තිබෙනවා. දකින දකින දොස්තර ගාවට ගිහින් බෙහෙත් ගන්න අවශ්‍ය නෑ. පවුලකට වෛද්‍යවරයෙක් සිටිය යුතුයි. ඒ ආකාරයෙන් අපි සෞඛ්‍ය සේවයේ විශාල පරිවර්තනයක් ඇති කරනවා. එසේ නම් ලංකා ඉතිහාසයේ නිර්මාණය වී තිබෙන රට ගොඩනඟන ආණ්ඩුව මෙයයි. මේ රටේ ජනතාවගේ අවශ්‍යතා ඉටු කරන ආණ්ඩුව මෙයයි. මේ රටේ අනාගතයත් මේ රට ගොඩනඟන කාර්යභාරයත් මුළුමනින්ම තිබෙන්නේ ජාතික ජන බලවේගය අතේ බව අප කවුරුත් දන්නවා.
දැන් ප්‍රාදේශීය සභා මැතිවරණය පැමිණ තිබෙනවා. ග්‍රාමීයව ප්‍රාදේශීය සභාවල ලොකු ආදායම් නැහැ. එහෙත් ප්‍රාදේශීය සභාවලට වැඩ ගොඩක් තිබෙනවා. ආදායම මදි. ජනතාවගේ දෛනික ජීවිතයේ තිබෙන ගැටලු විශාල ප්‍රමාණයක් විසඳන්න තිබෙන්නේ ප්‍රාදේශීය සභාවටයි. අපි මේ නොවැම්බර් මාසයේ තව අයවැය ලේඛනයක් ඉදිරිපත් කරනවා. ඊට පෙර කන්තලේට, ත්‍රිකුණාමලයට අවශ්‍ය මොනවද කියන යෝජනා අපට එවන්න අවශ්‍යයි. ජූනි මාසය වන විට අපි ඒ යෝජනා භාර ගන්නවා. ප්‍රාදේශීය සභාවේ ආදායමෙන් කළ හැකි වැඩ කොටසට අමතරව මහා ආණ්ඩුවෙන් කළ යුතු වැඩ කොටසට ප්‍රතිපාදන ඉල්ලා සිටිය යුතුයි. අපි ඒක මහා ආණ්ඩුවෙන් දෙන්නම්. සිදු කළ යුත්තේ කන්තලේ ප්‍රාදේශීය සභාවෙන්නම්,එයට අදාළව දිස්ත්‍රික් සංවර්ධන කමිටුව අනුමත කළ යෝජනාව එවන එක විතරයි තිබෙන්නේ. අපි එතකොට බලනවා එවලා තියෙන්නේ කොහෙන්ද කියලා.
කන්තලේ ප්‍රාදේශීය සභාවෙන් නම්, එය තිබෙන්නේ ජාතික ජනබලවේගය අතේනම්, එහෙනම් ඇස් පියා ගෙන යෝජනාව අනුමත කරලා මුදල් ලබා දෙනවා. මොකද අපි දන්නවා ඒ මුදල මුළුමනින්ම අදාළ කටයුත්තට යොදවන බව. ප්‍රාදේශීය සභාව වෙන කාටවත් ගිහින් නම් දහ සැරයක් සිතන්න වෙනවා. මොකද හිටපු කට්ටිය ගැන දන්න හින්දා. වැඩේට මුදල් ටිකයි. වැඩි මුදල සාක්කුවට. මේ විදිහට හොරකම් කරන්න අපි සල්ලි දෙන්නේ නෑ. දැන් අපි හොරකම්, නාස්තිය නතර කරලා හොරකම් කළ දේපොළත් පවරා ගන්න නීති හදලා පවරා ගන්න සැලසුම් හදලා තිබෙනවා.
මහා ආණ්ඩුව හොරකම් කරන්නේ නැහැ. එහෙනම් හොරකම් නොකරන ප්‍රාදේශීය සභාවක් ඕනෑ. මහා ආණ්ඩුව නාස්ති කරන්නේ නැහැ. එසේ නම් නාස්ති නොකරන ප්‍රාදේශීය සභාවක් ඕනෑ. මහා ආණ්ඩුව වැඩ කරනවා. ප්‍රාදේශීය සභාව වැඩ කළ යුතුයි. එසේ නම් මෙවර ප්‍රාදේශීය සභා සියල්ලේම බලය ලබා දිය යුතු වන්නේ ජාතික ජනබලවේගයටයි.
නැත්නම් මහා ආණ්ඩුව හොරකම් කරන්නේ නැහැ. ප්‍රාදේශීය සභාව හොරකම් කරනවා. මහා ආණ්ඩුව නාස්ති කරන්නේ නැහැ. ප්‍රාදේශීය සභාව නාස්ති කරනවා. මහා ආණ්ඩුව වැඩ කරනවා. ප්‍රාදේශීය සභාව කකුලෙන් අදිනවා. හරි යයිද? ඒක හරි යන්නේ නෑ, ඒ නිසා මහා ආණ්ඩුවත් සමඟ එකට කෙලින් සිට ගන්නා අයටම තමයි මේ ප්‍රාදේශීය සභා භාර දිය යුතු වන්නේ. එසේ නම් මැයි මාසේ 06 වෙනිදා කන්තලේ ප්‍රාදේශීය සභාව අපි භාර දිය යුතු වන්නේ ජාතික ජන බලවේගය කණ්ඩායමටයි. එසේ නොවුණහොත් කොන් වූ ප්‍රාදේශීය සභාවක් බවට පත් වේවි. මහා ආණ්ඩුව වැඩ කරද්දී කකුලෙන් අදින ප්‍රාදේශීය සභා හරියන්නේ නෑ.
මහා ආණ්ඩුවෙන් කරන්නේ ජාතික තලයේ කටයුතුයි. එහෙත් ගම්වල කරන්න වැඩ ගොඩක් තිබෙනවා. ගම්වල තිබෙන වැඩ ටික ඉටු කරන්න නම් අනිවාර්යයෙන්ම ගමේ සභා ටික ජාතික ජනබලවේගයට භාර දීමට කටයුතු කළ යුතුයි. මීට වඩා හොඳ ආණ්ඩුවක් කල්පෙකට එන්නේ නැහැ. එසේ නම් අපි සියලුදෙනා එක් වී මේ රට හදන්න ඕනෑ. මේ වෙලාවෙ සමහරු කියනවා ආණ්ඩුවේ වැඩ ගැන සතුටුයි නමුත් හොරු අල්ලනවා මදි කියලා. මතක තියා ගන්න. තව ටික දවසකින් පෝලිමේ ඒක වෙන්නේ. දැන්මම තුන හතරක් රිමාන්ඩ්. අපරාධ පරීක්ෂණ දෙපාර්තමේන්තුව, අල්ලස් හෝ දූෂණ විමර්ශන කොමිෂන් සභාව, නීතිපති දෙපාර්තමේන්තුව යන සියලු ආයතන ඉතාමත් සක්‍රීයව වැඩ කරමින් වංචාවේ, දූෂණයේ යෙදුණ අය අධිකරණයට ගෙන යාමට අවශ්‍ය වැඩ කටයුතු සිදු කරමින් සිටිනවා.
අපේ රටේ පළමු වතාවට ධනය, බලය තිබෙනවාද කියලා බේදයකින් තොරව නීතිය ඉටු කරන රටක් හදලා තිබෙනවා. පහුගිය දා ඌව පළාතේ හිටපු මහ ඇමති ආණ්ඩුවට පාඩුවක් සිදු කිරීම සම්බන්ධයෙන් අධිකරණයට ඉදිරිපත් කළා. දැන් ඉන්නේ රිමාන්ඩ් භාරයේ. හිටපු ජනාධිපති රනිල් වික්‍රමසිංහ කිවුවා ඊට අදාළ බැංකු ගිණුම අයින් කර ගන්න කිවුවේ එයා කියලා. අල්ලස් කොමිසමෙන් හැරෙන තැපෑලෙන් ලියුමක් යවලා එහෙනම් ඔයත් එන්න කියලා. ඒක හොඳද නරකද? මීට කලින් මෙහෙම වුණාද? ඒගොල්ලන්ට අත තියන්නේ නැහැ. කවදාවත් සී.අයි.ඩීයට, අල්ලස් කොමිසමට එන්නේ නැති අය. අල්ලස් කොමිසම නීතිය ක්‍රියාත්මක කර තිබෙනවා. අපි ඒකට පහසුකම් සපයා ඔවුන්ට ස්වාධීනත්වය ලබා දී තිබෙනවා. ඔවුන් වැඩේ හරියට කරනවා.
මේවායින් පෙන්වන්නේ නීතිය ඉටු වන රටක්. සාමාන්‍යයෙන් කට්ටිය පොලීසියට බයේ හැංගෙනවා. පසුගිය දවස්වල අපි හොයනවා. පොලිස්පති හැංගෙනවා. ඔවුන්ට කවදාවත් නීතිය ක්‍රියාත්මක වෙන්නේ නැහැ කියලා ඔවුන් හිතා ගෙන හිටියා. හැබැයි අද ලංකාවේ සැමට සමාන ලෙස නීතිය ක්‍රියාත්මක වෙනවා. හැම දෙනාම නීතියට යටත් කියන පණිවිඩය සහිත රටක් අපි හදනවා. නීතියට යටත් වෙනවා වගේම නීතියට ටිකක් බය වෙන්නත් ඕනෑ. හැබැයි අපේ ලොකු ලොකු අය නීතියට යටත් නැහැ. නීතියට බයත් නැහැ. වාහන ආනයනය තහනම් කරලා තිබුණ කාලේ ගෙනාපු වාහන හිටපු ඇමතිවරු මන්ත්‍රීවරු ළඟ තිබිලා හම්බ වෙනවා. වාහන රෙජිස්ටර් කරන්නේ නැතුව පාරේ දුවලා. සාමාන්‍ය කෙනෙකුට බයිසිකලයක් පාරට දාන්න පුළුවන්ද අංක තහඩුව නැතුව? ඒ කියන්නේ ඇමතිවරුන්ට මන්ත්‍රීවරුන්ට නීතියක් නැහැ, අනිත් අයටයි නීතිය. එහෙම කරපු එක්කෙනා දෙන්නා ඇතුළට ගන්නවා. තව පෝලිමක් ඉන්නවා. මේ තමයි නීතිය ක්‍රියාත්මක වීම. පළිගැනීමද? නැහැ. මේ කිසිවක් පළිගැනීමක් නෙවෙයි. අප කරන්නේ හැමදෙනාම නීතියට යටත්වන රටක් හදන එකයි. මේ රට දියුණු වෙන්න නම් ලොකු පොඩි භේදයකින් තොරව සියලුදෙනාට සමව නීතිය ක්‍රියාත්මක විය යුතුයි. මේ හදමින් තිබෙන්නේ ඒ රටයි.
පසුගිය සැප්තැම්බරයේ ජනාධිපතිධුරයට පත් වෙලා, නොවැම්බරයේ මහා ඡන්දයෙන් ආණ්ඩුව හදලා, නොවැම්බර් 21 කැබිනට් මණ්ඩලය හදලා අපි මේ රට වෙනස් කිරීමේ අඩිතාලම ගොඩනඟා තිබෙනවා. මේ වෙනසට තවත් ශක්තියක් විශ්වාසයක් ලබා දෙන්න මැයි මාසයේ 06 වෙනිදා ජාතික ජනබලවේගයට ප්‍රාදේශීය සභා සහ නගර සභා භාර දෙන ලෙස මා ඉල්ලා සිටිනවා.
(-ජය නියතයි.. ගම අපිටයි.. මහනුවර ජයග්‍රාහී ජන රැලිය – 2025.04.10-) ලෝකයේ ඇති වන ඕනෑම අර්බුදයක් හමුවේ, කඩානොවැටෙන ආර්ථිකයක් රට තුළ නිර්මාණය කරන බව ජනාධිපති අනුර කුමාර දිසානායක සහෝදරයා පැවසීය. මෙරට ජාතික උරුමය සහ ජාතික ආර්ථිකය ආරක්ෂා කර ගැනීම වෙනුවෙන් වූ නව වැඩපිළිවෙළ මේ වන විටත් රජය ආරම්භ කර තිබෙන බවද ජනාධිපතිවරයා සඳහන් කළේය. ජනාධිපති අනුර […]
(-ජය නියතයි.. ගම අපිටයි.. මහනුවර ජයග්‍රාහී ජන රැලිය – 2025.04.10-)
ලෝකයේ ඇති වන ඕනෑම අර්බුදයක් හමුවේ, කඩානොවැටෙන ආර්ථිකයක් රට තුළ නිර්මාණය කරන බව ජනාධිපති අනුර කුමාර දිසානායක සහෝදරයා පැවසීය.
මෙරට ජාතික උරුමය සහ ජාතික ආර්ථිකය ආරක්ෂා කර ගැනීම වෙනුවෙන් වූ නව වැඩපිළිවෙළ මේ වන විටත් රජය ආරම්භ කර තිබෙන බවද ජනාධිපතිවරයා සඳහන් කළේය.
ජනාධිපති අනුර කුමාර දිසානායක සහෝදරයා මේ බව සඳහන් කර සිටියේ මෙවර පළාත් පාලන මැතිවරණය වෙනුවෙන් ජාතික ජනබලවේගය විසින් මහනුවර, මහයියාව ප්‍රදේශයේ පසුගිය 10වැනිදා සංවිධානය කර තිබූ ජන හමුවක් අමතමිනි.
ජන හමුව ඇමතූ ජනාධිපතිවරයා වැඩිදුරටත් මෙසේද පැවසීය
අප මේ ආරම්භ කර තිබෙන ගමන ඉදිරියට යෑමට ඉදිරි පළාත් පාලන මැතිවරණයේදී ජාතික ජන බලවේගය ජයග්‍රහණය කරවිය යුතුයි. ඉදිරි මැතිවරණයත් අපට ජයග්‍රහණය කළ හැකි මැතිවරණයක්. මීට වසර දෙකකට පෙර රට ආර්ථිකමය අතින් කඩාවැටුණ බව ඔබ කවුරුත් දන්නවා. අප හමුවේ තිබූ ප්‍රධානතම අභියෝගය වූයේ රටේ ආර්ථිකය ස්ථාවර කිරීමයි. අප වැඩිපුරම වෙහෙස මහන්සි වී කටයුතු කළේ ඒ වෙනුවෙනුයි.
මේ වන විට රටේ ආර්ථිකය ඉතාමත් හොඳ ස්ථාවර ආර්ථිකයක් බවට පරිවර්තනය කර ගැනීමට අප සමත් වී තිබෙනවා. අස්ථාවර රටක නිදියන විට ඩොලරය එක අගයක්. නැගිටින විට තව අගයක්. නමුත් මේ මාස හය ඇතුළත ඩොලරයේ අගය 300ක මට්ටමක තබා ගැනීමට අපේ රජය සමත් වී තිබෙනවා. ඒ අයුරින් අප රුපියල ස්ථාවර කර, ආර්ථික ස්ථාවරභාවයේ සංඥාව ලබාදී තිබෙනවා.
මේ වසර ඇතුළත උද්ධමනය 5ක අගයක පවත්වාගෙන යෑමට අපි උත්සාහ ගනිමින් සිටිනවා. පසුගිය කාලයේ දිනපතා භාණ්ඩවල මිල ඉහළ ගියා. බැංකු පොලී අනුපාතිකය 20% – 35%ක් දක්වා ඉහළ ගියා. බැංකු පොලී අනුපාතය අධික ලෙස ඉහළ යෑම රටක ආර්ථික අස්ථාවරත්වයේ සංඥාවක්. බැංකු පොලී ඉහළ යෑම නිසා කර්මාන්තකරුවන් ණය ලබා ගත්තේ නැහැ. මේ සියල්ලක්ම අඩාල වුණා. ගත වූ මාස 6ක කාලය තුළ බැංකූ පොළී අනුපාතය තනි ඉලක්කමක පවත්වාගෙන යනවා. ඒ නිසා ව්‍යපාර, අලුත් කර්මාන්ත වෙනුවෙන් විශාල ලෙස බැංකු ණය නිදහස් වෙනවා.
ආර්ථික කඩාවැටීම හමුවේ මෙරට ආරම්භ කර තිබූ විදෙස් ව්‍යාපෘති සියල්ල අතරමග නැවතුණා. අද ජපන් රජය සමඟ නතර වී තිබූ ව්‍යාපෘති 11ක් ආරම්භ කර තිබෙනවා. චීන රජය ආරම්භ කළ කටුනායක – මීරිගම කොටස අතරමග නතර වීම නිසා දිනකට රුපියල් මිලියන 21ක වන්දි ගෙවිමට සිදුව තිබෙනවා. චීන ව්‍යාපෘති 76ක් යළි ආරම්භ කිරීමට කටයුතු යොදා තිබෙනවා.
නතර කර තිබූ තෙල්දෙණිය විශාල ජල ව්‍යාපෘතිය නැවත ආරම්භ කිරීමට චීනය එකඟතාව පළ කර තිබෙනවා. රටේ ආර්ථිකය ස්ථාවරවීමත් සමග අතරමග නැවතුණ සංවර්ධන ව්‍යාපෘති යළි ආරම්භ වෙනවා. පසුගිය වසර 5-6 ඇතුළත කිසිදු ව්‍යාපෘතියක් සිදු වුණේ නැහැ. අප නව ව්‍යාපෘති ගණනාවක් ආරම්භ කිරීමට සැලසුම් කර තිබෙනවා. රට යළි වැඩ බිමක් බවට පරිවර්තනය කර තිබෙනවා.
ජාතික ජන බලවේගයේ ආණ්ඩුවක් ආවොත් රටට ආයෝජකයන් එන්නේ නැහැ කියලා එදා දේශපාලන වේදිකාවල කිවුවා. රටේ ආර්ථිකය කඩාවැටෙනවා කිවුවා. නමුත් ආණ්ඩුවක් ලෙස මහා භාණ්ඩාගාරයට වැඩිම ආදායමක් උපයන වසර 2025 වසර බවට අපි පත් කරනවා. ආදායම් ඉලක්කවලට අනුව අපේක්ෂා කරන ආදායම් ඉලක්ක අභිබවා ඉපයීමට පුළුවන්. මහා භාණ්ඩාගාරයට ආදායම උපයන්න පුළුවන් වෙන්නේ රටක ආර්ථිකය ස්ථාවර වුවහොත් පමණයි. මේ වසරේ ප්‍රාග්ධන වියදම්වලට පමණක් රුපියල් බිලියන 1400ක් වෙන් කර තිබෙනවා. මහනුවර වාහන තදබදය අවම කර ගැනීම සදහා වූ ව්‍යාපෘති වෙනුවෙන් ද අප මුදල් වෙන් කර තිබෙනවා.
රටේ යටිතල පහසුකම් සංවර්ධනය වෙනුවෙන් වූ අවශ්‍ය මුදල් වෙන් කර තිබෙනවා. ප්‍රාග්ධන වියදම් ලෙස වෙන් කර තිබෙන රුපියල් බිලියන 1400 මේ වසරේ දෙසැම්බර් 31 වැනිදාට පෙර වියදම් කර ව්‍යාපෘති අවසන් කළ යුතුයි. මේ මුදල් ප්‍රමාණය වියදම් කිරීමට සමත් වුණොත් එතැනින් පමණක් 3% ඉක්මවා යන ආර්ථික වර්ධනයක් ලැබෙනවා. පෞද්ගලික, විදෙස් ආයෝජන සමඟ අප අපේක්ෂා කරන 5% ඉක්මවන ආර්ථික වර්ධන වේගයක් අත්පත් කර ගන්න පුළුවන්. පසුගිය කාලයේ ඍණ 1ට ඍණ 5ට ආර්ථිකය කඩාවැටුණු, ආපස්සට ගියක් රටක් තිබුණේ. මීට මාස 6කට පෙර ආර්ථිකය වර්ධන වේගය ධන 5.4යි. ආපස්සට යමින් තිබුණු රටක් අප ඉස්සරහට හරවලා තිබෙනවා. එහි ප්‍රතිලාභ ගමට තල්ලු කරමින් තිබෙනවා.
ආර්ථිකය ස්ථාවර වුණාම එහි ප්‍රතිලාභ ජනතාවට, ගමට ගලාගෙන යා යුතුයි. අපේ රාජ්ය සේවය එක පැත්තකින් අකර්මණ්‍යයි. අනික් පැත්තකින් රාජ්ය සේවය බිඳවැටී, විශාල පුරපපාඩු ප්‍රමාණයක් තිබෙනවා. පහළ මට්ටමේ විශාල රාජ්ය සේවකයන් පිරිසක් සිටියත් මැද මට්ටමේ රාජ්ය සේවයක් නැහැ. ගොඩනැඟුණු සෑම රටකම රාජ්ය සේවයට විශාල කාර්යභාරයක් පැවරී තිබෙනවා. අපට එහෙම කාර්යක්ෂම රාජ්ය සේවයක් නැහැ. අප මේ වෙන් කළ රුපියල් බිලියන 1400 වැය කිරීමට රාජ්ය සේවය ශක්තිමත් කළ යුතුයි. පුරවැසියාට අවශ්‍ය සේවය ලබා දීමට රාජ්ය සේවයේ පුරප්පාඩු හඳුනාගෙන අලුතින් තරුණ තරුණියන් 30,000ක් බඳවා ගන්නවා.
රාජ්ය සේවයට අලුත් හැකියාවක් තිබෙන අය බඳවා ගත යුතුයි. ඔවුන් හොඳ වැටුප් තලයක පිහිට විය යුතුයි. රජයක් විදිහට අප ශක්තිමත් රාජ්ය සේවයක් අපේක්ෂා කරනවා. ඒ වෙනුවෙන් රාජ්ය සේවකයන් රටත්, ජනතාවත් වෙනුවන් නිසි කාර්යභාරයක් කළ යුතුයි. අපි රාජ්ය සේවකයන්ට වෙනස් වීමට කාලයක් ලබාදී තිබෙනවා. ඒ වෙනස් වීමට සූදානම් නැත්නම් ඒ ආයතනත්, සේවකයනුත් මැයි මාසයෙන් පසුව වෙනස් කරනවා.
මේ රට ගොඩනැඟීම වෙනුවෙන් ශක්තිමත් රාජ්ය සේවයක් අප අපේක්ෂා කරනවා. ආණ්ඩුවක ආර්ථිකයක් ස්ථාවර වන විට එහි ප්‍රතිලාභ ජනතාවට ලැබිය යුතුයි. අපි සමෘද්ධිමත් ආර්ථිකයක් තිබූ රටක් නොවෙයි. නමුත් අපි මේ වන විට ආර්ථික ජයග්‍රහණ රැසක් අත්පත් කරගෙන තිබෙනවා. එක්සත් ජනපදයේ යම් තීන්දු තීරණ නිසා රටේ ආර්ථිකයට යම් බලපෑමක් ඇති වීමේ අනතුරු ඇඟවීමක් ඇති වෙමින් තිබෙනවා. අපි අභියෝගවලට මුහුණ දිය යුතුයි. බදුවලින් පමණක් නොව, යුද්ධ, වසංගත හෙතුවෙන්ද රටක ආර්ථිකයට බලපෑම් ඇති කරනවා. එනිසා ඕනෑම තත්ත්වයකට ඔරොත්තු දෙන නොසැලෙන ආර්ථිකයක් අප නිර්මාණය කළ යුතුයි. අප මේ බදු ප්‍රතිපත්තිය සම්බන්ධව ඇමරිකානු ජනාධිපතිවරයාට ලිඛිතව ලිපියක් යොමු කළා, එය ලැබුණු බව අපට දන්වා තිබෙනවා.
ඒ අනුව ගන්නා ක්‍රියාමාර්ග පිළිබඳ මහා භාණ්ඩාර ලේකම්වරයා විසින් යෝජනා ඉදිරිපත් කර තිබෙනවා. අද අප සියලු පක්ෂ සමඟ සර්ව පාක්ෂික සමුළුවක් පවත්වා ඔවුන්ගේද අදහස් ලබා ගත්තා.
යළි අපේ ජාතික ආර්ථිකය, අපේ උරුමය ආරක්ෂා කර ගැනීම වෙනුවෙන් වූ වැඩපිළිවෙළක අප නිරතව සිටිනවා. 2025 වසර ශ්‍රී ලංකාව වැඩිම අපනයන ආදායමක් උපයා ගන්නා වසරයි. වාහන ආනයනය සඳහා ඩොලර් මිලියන 300ක ණයවර ලිපි නිකුත් කර තිබෙනවා. 2028 වසර වන විට නැවත ණය ගෙවීමට සමත් වන ආර්ථිකයක් බවට රට පත් කරනවා. ඒ වගේම 2025 වසර වැඩිම සංචාරකයන් පිරිසක් ලංකාවට පැමිණෙන වසර බවට පත් වෙනවා. අප විවිධාකාරයෙන් ඩොලර් සංචිත ශක්තිමත් කර ගැනීමට සැලසුම්වල නිරතව සිටිනවා.
අප රටේ භාවිතයට නොගන්නා සියලු ඉඩම් නැවත අස්වැද්දීමට කටයුතු කරනවා. එම ඉඩම්වල වගා ආරම්භ කරන ලෙසට තරුණ තරුණියන්ට අප ආරාධනා කරනවා. බැංකු ණයක් ලබා දෙන්නම්, හොඳ වගාවක් ආරම්භ කරන්න. අපේ රට යළි ජාතික උරුමය ආර්ථිකය ගොඩනැගීම සඳහා දායක කර ගත යුතුයි. අපේ වරාය ආශ්‍රිතව විශාල ආර්ථිකයක් හිමිව තිබෙනවා. දැනට කන්ටේනර් ලක්ෂ 75ක් හුවමාරු වෙනවා. 2030 වන විට මිලියන 12ක් දක්වා වැඩි කිරීමට සැලසුම් සකස් කරනවා. නැව්වලට ඉන්ධන ලබා දීමට අලුතින් තෙල් ගබඩා ඇති කරනවා. එහෙමයි රටක ආර්ථිකයක් දියුණු කරන්නේ. ඉතා සැලසුම් සහගතව 2022, 2023 ඇති වූ තත්ත්වය යළි මේ රටේ ඇති නොවන ආකාරයේ ආර්ථික සැලැස්මකට අප අවතීර්ණ වී තිබෙනවා. අප මේ ගමන ආරක්ෂා කරගත යුතුයි.
සුරක්ෂිත අනාගතයක් වෙනුවෙන් දශක ගණනාවකට පසුව අද රට අවතිර්ණ වී තිබෙනවා. ශ්‍රී ලංකාවේ පළමු වතාවට මහජනයාගේ ධනය සොරකම් නොකරන දේශපාලන අධිකාරියක් නිර්මාණය වී තිබෙනවා. හිටපු ජනාධිපතිවරු කොපමණ මුදලක් නාස්ති කරලා තිබෙනවාද? ජනතාව අපේක්ෂා කරන ආකාරයට හොරකම් කළ අයට දඬුවම් ලබා දෙනවා. ධනය, බලය බේදයෙන් තොරව සියලුම දෙනාට නීතිය ක්‍රියාත්මක කරන රටක් බිහි කරනවා. සෑම කෙනාටම නීතිය ඉටු කරන රටක් අපි හදා තිබෙනවා. මේවා විශාල පරිවර්තනයන් වුවත් හැමෝටම මේවා දරා ගන්න බැහැ. මේ බලය නැතුව මාධ්‍ය ඉදිරියේ මෙහෙම අඬනවා නම් ගෙදර ගිහින් කොහොම අඩනවා ඇද්ද?
මහජනතාවගේ සෑම රුපියලක්ම දේවකාරියක් ලෙස බලා ගත යුතුයි. අපට පළාත් පාලන අවශ්‍ය වෙන්නේ මධ්‍යම ආණ්ඩුවේ මුදල් පරිස්සම් කර ගන්නයි. ගමේ කුණු ටික අයින් කරන්න, පෙර පාසලක් පවත්වාගෙන යෑම ඇතුළු ගමේ ජනතාවගේ දෛනික ජනජීවිතයක් එක්ක ගැටගැසී තිබෙන්නේ නගර සභාව හා ප්‍රාදේශීය සභාවයි. ග්‍රාමීය ජනතාවට අවශ්‍ය සේවාව ලබා දෙන්නේ ගමේ තිබෙන නගර සභාවෙයි, ප්‍රාදේශීය සභාවෙනුයි. අපට අවශ්‍ය මුදල් වෙන් කරන්න පුළුවන් විශ්වාසයක් තිබිය යුතුයි. එහෙම විශ්වාසයක් තිබෙන්නේ කා අතේද? බලය වෙන පැත්තකට ගියොත් මුදල් එවීමේදී අපට දෙපාරක් සිතන්න සිදු වෙනවා. හොඳ විශ්වාසදායක කණ්ඩායමක් අතට ගමේ බලය ලැබිය යුතුයි.
මධ්‍යම රජයට සමාන්තරව ප්‍රාදේශීය සභාව, නගර සභාවද ජාතික ජන බලවේගය විසින් පිහිටුවන්න ඕනෑ. එවිට තමයි ගමට ජාතික තලය සමඟ ඒකාබද්ධව වැඩ කටයුතු කළ හැකි වන්නේ. ඒ නිසා අනිත් අය ඡන්ද ඉල්ලන එකත් තේරුමක් නැහැ. ඔවුන් එකම සුන්බුන් ගොඩක් විතරයි. අපි සෑම ජන ප්‍රජාවක් සමඟ හොඳින් වැඩ කටයුතු කරගෙන යනවා. සියලු ජාතීන් අප කෙරෙහි විශ්වාසයක් තබාගෙන සිටිනවා. එම විශ්වාසය සමග අපි ඉදිරියට යමු.
